Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

“Man Kalak si Latih IberekenNa Gegeh”

“Man Kalak si Latih IberekenNa Gegeh”

Ayat bas tahun 2018: “Ipegegehi Jahwe kalak si erpengarapen man baNa.”​—JESAYA 40:31, Terjemahan Dunia Baru.

ENDE-ENDEN: 152, 67

1. Kai piga-piga masalah si banci saja siadapi? Uga carana erban meriah ukur Jahwe? (Nen gambar pemena artikel.)

LABO gampang nggeluh bas doni enda. Contohna, nterem kam ngadapi penakit si mekelek. Si debanna, amin pe ia nggo metua arus ka iurusna keluargana si nggo metua. Lit ka si latih kel akapna cari makan. Banci jadi labo sada ngenca masalah enda si iadapindu, tapi kerinana sekaligus! Melala waktunta, gegehta, bage pe senta keri perban si e. Tapi tek kam maka pasti nge isampati Jahwe. Tek kam maka lit nge pagi malemna perban nggo erjanji Jahwe bandu. Kinitekenndu e erban meriah ukur Jahwe!

2. Uga Jesaya 40:29 nampati kita? Tapi, kesalahen kai si banci saja silakoken?

2 Mon-mon pernah nge mberatsa iakapndu masalah si iadapindu? Labo kam saja si pernah bage pengakapndu. Piga-piga umat Dibata si mbarenda pe pernah kang iadapina bage. (1 Raja-Raja 19:4; Jop 7:7) Kai nge si nampati kalak e tetap megenggeng? Pindona gegeh man Jahwe.  Ikataken Pustaka maka “man kalak si latih ibereken [Dibata] gegeh.” (Jesaya 40:29) Tapi iakap piga-piga umat Dibata gelah banci iadapina masalahna e, ngadi ia lebe ngelayani Jahwe. Akapna ngelayani Jahwe e ngelatihi saja. Emaka lanai ia mbaca Pustaka, lawes ku perpulungen, bage pe erberita. E me si meriah akap Setan gelah silakoken.

3. (a) Uga carana gelah kita megegeh? (b) Kai si man bahasenta bas artikel enda?

3 Ate Setan ula min kita megegeh. Janah ietehna banci kita megegeh adi sibuk kita ngelayani Jahwe. Emaka sanga gulut ukurndu ula min kam ndauh arah Jahwe nari. Reh dehernalah kam ku Ia. Nina Pustaka, “IpetetapNa dingen ipegegehiNa kam.” (1 Petrus 5:10; Jakup 4:8) I bas artikel enda, sibahas kari Jesaya 40:26-31 kerna Jahwe si ngasup mpegegehi kita. Sibahas ka kari dua situasi si banci erban kurang semangatta ngelayani Jahwe, janah ngkai maka ndalanken pedah Pustaka nampati kita megenggeng.

IPEGEGEHI JAHWE KALAK SI ERPENGARAPEN MAN BANA

4. Pelajaren kai si banci idatndu arah Jesaya 40:26 nari?

Banci ibere Jahwe kam gegeh gelah ngasup ngadapi masalahndu

4 Baca Jesaya 40:26. La lit manusia si banci ngkira kerina bintang. Nina ilmuwan, lit kira-kira 400 miliar bintang i sekitarta saja. Tapi ibere Jahwe gelar tiap bintang e. Kai si banci sipelajari kerna Jahwe arah si e? Adi bintang si la nggeluh pe iperdiateken Jahwe, apai ka kam! Nggit kam ngelayani Ia, labo perban ipaksa tapi perban keleng atendu Ia. (Masmur 19:2, 4, 15) Kerinana kerna kam ieteh Bapanta si i surga. Ikataken bas Pustaka maka “buk takalndu pe enggo ibeligaiNa.” (Matius 10:30) Janah “ipekena-kena [Jahwe] kap kalak si ngikutken Ia.” (Masmur 37:18) Teklah maka ieteh Jahwe kap kerina masalahndu, janah banci ibereNa kam gegeh gelah ngasup ngadapisa.

5. Contoh kai si mbuktiken maka Jahwe ngasup mereken gegeh banta?

5 Baca Jesaya 40:28. Jahwe kap sumber kerina gegeh. Cuba ukuri energi matawari. Ikataken sekalak penulis kerna sains, gelarna David Bodanis maka energi si iasilken matawari i bas sada detik, seri hebatna ras energi miliaren bom atom si meledak. Ikataken peneliti si deban ka, adi banci sipake energi matawari i bas sada detik saja, e bias man bahan bakar kerina kalak i doni enda sedekah 200.000 tahun! Payo, adi man matawari pe banci ibere Jahwe gegeh, tentu banci ka nge ibereNa man banta gegeh guna ngadapi masalahta.

6. Kai buktina maka menahang pasangen si ibereken Jesus banta? Enda ngiahken kita ngelakoken kai?

6 Baca Jesaya 40:29. Meriah kap  siakap adi silayani Jahwe. Nina Jesus man murid-muridna, “Tamakenlah pasangenku ku kudukndu.” Kenca e nina ka, “Alu bage, idatndu me kemalemen ate. Sabap pasangen si kubereken man bandu ntabeh mabasa, dingen baban si kutamaken ku babondu menahang kap.” (Matius 11:28-30) Payo kel kata-kata Jesus enda! Mon-mon latih kel siakap sanga lawes ku perpulungen ntah pe erberita. Tapi, uga nge perasanta kenca mulih? Nggo reh nahangna siakap janah reh beluhna kita ngadapi masalahta. Payo, pasangen si ibereken Jesus menahang kap.

7. Ceritaken sada pengalamen si mbuktiken maka Matius 11:28-30 e payo.

7 Cuba ukuri pengalamen sekalak turang seninanta. Ia sakit sindrom kelelahan kronis, depresi, ras mesui takal si mekelek. Emaka, mon-mon mesera akapna ngikuti perpulungen. Tapi bas sada wari, kenca nggo iusahakenna reh ku perpulungen, nina, “Khotbahna kerna perasan kitik ukur. Ndeher iluhku megi khotbahna e, perban kena kel ku pusuhku. Emaka, ndigan pe la aku nggit nadingken perpulungen.” Meriah kel akapna perban iusahakenna reh ku perpulungen!

8, 9. Kai maksud Paulus sanga ikatakenna, “Adi gegehku kurang, i je me maka aku megegeh”?

8 Baca Jesaya 40:30. Banci jadi melala ketrampilenta, tapi terbatas gegehta. Enda arus sisedari. Rasul Paulus pe melala ketrampilenna, tapi la banci ilakokenna kerina. Sanga iturikenna uga perasanna man Jahwe, nina Jahwe bana, “GegehKu serta kap i bas gegeh si kurang.” Ieteh Paulus kai maksud Jahwe e. Emaka nina, “Adi gegehku kurang, i je me maka aku megegeh.” (2 Korinti 12:7-10) Kai maksudna?

9 Ieteh Paulus maka terbatas gegehna. Perlu ia penampat arah si ndauh gegehen asangken ia. Banci ibere Dibata man Paulus kesah si badia gelah ia megegeh sanga lemah. Tapi labo ngayak je saja. Kesah si badia pe banci mereken gegeh man Paulus guna ngelakoken kai si la banci ilakokenna alu gegehna. Kita pe banci bage. Sanga ibere Jahwe kita kesah si badia, tuhu-tuhu reh gegehna kita!

10. Uga Jahwe nampati Daud ngadapi masalahna?

10 Pemasmur Daud pe rusur igejapkenna maka isampati kesah si badia ia gelah megegeh. Rende ia, nina, “Kam mereken gegeh man bangku naluken musuh-musuhku. Kam mere kuasa bangku ngkuasai benteng-bentengna.” (Masmur 18:30) Bagi benteng si meganjang si la banci sinangkihi, mon-mon masalahta pe mberatsa siakap janah la banci sidungi. Perlu kita penampat Jahwe.

11. Uga Jahwe nampati kita arah kesah si badia?

11 Baca Jesaya 40:31. Rajawali kabang labo perban gegehna saja. Igunakenna udara si melas gelah banci tetap kabang i datas. Enda me si erban rajawali banci ndauh kabang tapi la latih akapna. Emaka sanga melala  masalahndu, ingetlah rajawali. Pindolah man Jahwe gelah ibereNa kita terbuen gegeh arah “si nampati, e me kesah si badia.” (Johanes 14:26) Banci sipindo man Jahwe ndigan pe kita perlu, 24 jam sada wari. Sipindolah penampat Jahwe, khususna sanga la sicocoken ras turang seninanta. Tapi, ngkai maka banci kita la sicocoken?

12, 13. (a) Ngkai maka mon-mon la kita sicocoken ras turang seninanta? (b) Kai si banci sipelajari kerna Jahwe arah pengalamen Jusup nari?

12 Perban la sempurna rusur kita la sicocoken. Mon-mon sakit hati kita iban turang seninanta ntah pe kita si erban ia sakit hati. Pasti mberat kel siakap adi bage masalah siadapi. Tapi enda kesempaten man banta mbuktiken maka setia kita man Jahwe. Uga carana? Erusaha kita gelah ersada arihta ras turang seninanta. Keleng ate Jahwe kalak e amin pe la sempurna, kita pe arusna bage.

Labo itadingken Jahwe Jusup, janah kam pe labo itadingkenNa (Nen paragraf 13)

13 Labo iambati Jahwe umatNa dat masalah. Contohna Jusup. Sanga nguda denga ia, cian senina-senina tirina man bana. Idayakenna Jusup jadi budak, janah ibaba ia ku Mesir. (Kejadin 37:28) Iidah Jahwe kerina si terjadi janah pasti sedih akapNa ngidah kai si iadapi temanNa ras umatNa si setia e. Tapi labo mis idungi Jahwe masalahna. Sanga ituduh Jusup mperkosa diberu Potipar janah ipenjara, i je pe la mis ibebasken Jahwe ia. Tapi itadingken Dibata nge ia? Lang. Ikataken Pustaka maka “erkiteken [Jahwe] si ngarak-ngarak Jusup, kasa kai si idahikenna jore kerina.”​—Kejadin 39:21-23.

14. Kai gunana adi la kita mesukah merawa?

14 Contoh si deban eme Daud. Labo piga kalak ngenanami kesusahen bagi si inanami Daud. Tapi teman Dibata enda la nggit mis merawa. Nina, “Ola pelepas dirindu ikuasai ate nembeh ntah aru ate, e nuhsahi kam nge ngenca.” (Masmur 37:8) Alasen si pentingna maka “ola” kita terus merawa, perban ateta ngusih Jahwe.  “Labo kita iukumNa sue ras dosanta” tapi iampuniNa kita. (Masmur 103:10) Lit ka gunana adi la kita mesukah merawa. Contohna, adi merawa kita naik tensinta ras terganggu pernapasenta. Hati ras pankreasta pe banci sakit, janah banci ka bermasalah ku pencernanta. Pikirenta pe kacau sanga kita merawa. Kata-kata ntah pe perbahanenta banci erban kitik ukur kalak, si dungna jadi ukurenta janah siinget lalap. Emaka pangen kita tetap tenang. Nina Pustaka, “Ketenengen ukur mahanca kalak mejuah-juah.” (Kuan-kuanen 14:30) Adi bage, kai si arus silakoken sanga kitik ukurta iban kalak, janah uga carana erdame ras turang seninanta? Sidalankenlah pedah Pustaka.

SANGA KITIK UKURTA IBAN TURANG SENINANTA

15, 16. Kai si arus silakoken adi isakiti kalak kita?

15 Baca Epesus 4:26. Labo ateta mamang adi kita isakiti kalak si la ngelayani Jahwe. Tapi adi turang seninanta bas runggun ntah pe keluarganta si erban kita sakit hati, getem kel siakap. Uga adi la banci mis silupaken kesalahenna e? Lalap nge kita merawa, siinget nge kesalahenna e amin gia nggo ertahun-tahun? Ntah siikutken nge pedah Pustaka guna mis ndungi masalah? Reh dekahna sipeturut masalahta e, reh serana siakap erdame ras ia.

16 Uga adi kitik iban turang senina ukurndu, janah la banci lupakenndu? Kai si banci ilakokenndu gelah erdame? Si pemena, ertotolah man Jahwe. Pindolah man Jahwe gelah banci kam ngerana alu mehuli man bana. Ingetlah, ia pe teman Jahwe ka nge. (Masmur 25:14) Keleng ate Jahwe ia. Mehuli perbahanen Jahwe man temanNa janah ateNa kita pe bage. (Kuan-kuanen 15:23; Matius 7:12; Kolose 4:6) Si peduaken, ukuri lebe kai si atendu ikatakenndu man bana. Ula mis iakapndu sengaja ia erban kam sakit hati. Banci jadi salah paham nge kena. Nggitlah kam ngakui maka kam pe erban salah ka nge. Banci imulaindu ngerana, alu ngataken, “Mungkin aku nge si la jore tangkel-tangkelku, tapi sanga ngerana kam nderbih man bangku, kuakap . . .” Adi bage pe nindu la berhasil, tetaplah kam erusaha. Totokenlah ia. Pindolah man Jahwe gelah pasu-pasuNa ia ras gelah sampati Jahwe kam nginget sifat-sifatna si mehuli. Teklah kam maka iergai Jahwe usahandu erdame ras turang seninandu, perban ia pe teman Jahwe kang.

SANGA SALAH LALAP SIAKAP BANTA

17. Adi pernah lakokenndu dosa si mberat, uga carana gelah kam banci ndeher mulihi ras Jahwe? Ngkai maka perlu sialoken penampat?

17 Piga-piga kalak la cocok iakapna ia ngelayani Jahwe perban pernah ilakokenna dosa si mberat. Adi siinget lalap kesalahenta, e erban kita lanai dame, lanai ermeriah ukur, janah kurang gegehta. Nina Raja Daud, si pernah salah lalap akapna bana, “Tupung la kuakuken dosa-dosangku, kote aku perban ndehereng tep-tep  wari. O [Jahwe], iukumNdu aku suari berngi.” Tapi dungna banci ilakoken Daud kai si ipindo Jahwe. “Emaka kuakui dosa-dosangku man baNdu,” nina ka, “jenari dosa-dosangku ialemiNdu.” (Masmur 32:3-5) Adi pernah lakokenndu dosa si mberat, banci ialemi Jahwe kam. IsampatiNa ateNa kam gelah banci ndeher mulihi ras Ia. Tapi arus ialokenndu penampat arah pertua nari. (Kuan-kuanen 24:16; Jakup 5:13-15) Ula tertaren-taren! Enda nentuken kam banci dat kegeluhen si rasa lalap ntah lang. Tapi adi terus salah akapndu bandu, kai nge si arus ilakokenndu?

18. Engkai contoh arah Paulus banci nampati kalak si salah lalap akapna bana?

18 Paulus pe mon-mon kitik ukurna nginget dosana. Nina, “Aku me rasul si meterukna, situhuna la metunggung pe aku igelari rasul sabap enggo kusiksa perpulungen Dibata.” Amin gia bage, nina Paulus, “Tapi erkiteken lias ate Dibata aku lit bagi si genduari enda.” (1 Korinti 15:9, 10) Ieteh Jahwe maka Paulus labo sempurna. Tapi ialokenNa Paulus uga pe ia mbarenda, janah ateNa tek min Paulus kerna si e. Adi tuhu-tuhu erkadiola kam, janah nggo iakuindu man Jahwe, adi perlu man pertua ka pe, pasti mekuah ate Jahwe kam. Teklah maka imaafken Jahwe nge kam, janah ulanai salah akapndu bandu!​—Jesaya 55:6, 7.

19. Kai ayat tahunenta bas tahun 2018 enda? Engkai maka enda cocok man banta?

19 Reh deherna kita ku kedungen doni enda, pasti reh lalana masalah siadapi. Tapi ingetlah maka Jahwe banci ‘mereken gegeh man kalak si latih ras nambahi gegeh man kalak si ngelabuh.’ Emaka, pasti iberekenNa kerina si iperlukenndu gelah banci ngelayani Ia alu setia. (Jesaya 40:29; Masmur 55:23; 68:20) I bas tahun 2018 e, pastilah siinget enda adi reh kita pulung ku Bale Kerajan sanga siidah ayat tahunenta, “Ipegegehi Jahwe kalak si erpengarapen man baNa.”​Jesaya 40:31.