Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Kekelengen si Uga si Erban Kita Tuhu-Tuhu Ermeriah Ukur?

Kekelengen si Uga si Erban Kita Tuhu-Tuhu Ermeriah Ukur?

“Malem ate kalak si erdibataken [Jahwe]!”​—MASMUR 144:15.

ENDE-ENDEN: 75, 73

1. Kai si menarik bas jamanta gundari enda?

MENARIK kel bas jamanta enda. Ipepulung Jahwe nterem jelma “i bas kerina bangsa, suku, negara ras i bas kerina cakap” bagi si nggo inubuatken bas Pustaka. Kalak e “bangsa si mbelin” si buena lebih waluh juta kalak, “suari ras berngi isembahna Dibata” alu meriah ukur. (Ketangkasen 7:9, 15; Jesaya 60:22) La pernah lit bage buena kalak si ngkelengi Dibata ras temanna manusia.

2. Uga sifat kalak si la teman Dibata? (Nen gambar pemena artikel.)

2 Tapi, inubuatken ka bas Pustaka maka bas jamanta, kalak si labo teman Dibata salah si ikelengina eme dirina saja. Ikataken rasul Paulus maka bas wari pendungi pagi, kalak “nggeluh ngukurken dirina saja, merangap” ras “lanai diatena Dibata, tapi kesenangen saja idaramina.” (2 Timotius 3:1-4) Kekelengen si bage, beda kel ras kekelengen ku Dibata. Iakap kalak, ermeriah ukur ia adi mentingken bana, tapi situhuna labo. Malahen, enda erban kegeluhen susah.

3. Kai si man bahasenta bas artikel enda? Engkai maka perlu sibahas?

 3 Ieteh Paulus maka reh lalana pagi kalak si egois, janah enda banci erban kalak Kristen terpengaruh. Emaka ipersingetina gelah “ola deheri” kalak si mentingken bana. (2 Timotius 3:5) Tapi buen kap kalak si bage gundari. Emaka kai nge si arus silakoken gelah ula kita terpengaruh ras kalak e, janah erban Jahwe, Dibata kekelengen, ermeriah ukur? Mari sibahas kekelengen si ngena ate Dibata ras kekelengen si ikataken 2 Timotius 3:2-4. Kenca si e, sipereksa dirinta janah siukuri uga carana gelah kekelengenta erban kita tuhu-tuhu puas ras ermeriah ukur.

ENGKELENGI DIBATA NTAH DIRI SENDIRI?

4. Engkai maka labo salah sikelengi dirinta?

4 Nina Paulus, “Manusia nggeluh ngukurken dirina saja.” Adi bage salah nge sikelengi dirinta? Labo salah, perlu nge sikelengi dirinta. Bage kap kita iciptaken Jahwe. Nina Jesus, “Arus ikelengindu temanndu manusia bagi ikelengindu badanndu.” (Markus 12:31) Situhuna, la banci sikelengi kalak adi kita pe la sikelengi banta. Nina Pustaka ka, “Perbulangen arus engkelengi ndeharana bagi ia engkelengi kulana. Kalak si engkelengi ndeharana, engkelengi dirina kap, labo pernah lit kalak elem-elem nandangi kulana. Tapi ipekena-kenana dingen ikawalina kulana e.” (Epesus 5:28, 29) Payo, perlu sikelengi dirinta.

5. Uga nge kalak si egois e?

5 Tapi labo mejile adi sikelengi dirinta bagi si itulis bas 2 Timotius 3:2. Enda gelarna egois. Kalak si kelengsa atena bana, ia saja ngenca iukurina, kalak la diatena. (Baca Roma 12:3.) Janah adi lit masalah, kalak si isalahkenna. Lit si ngataken maka kalak si egois e, seri bagi landak. Igulungna dirina, ntabeh akapna bas perban lembut buluna, tapi man kalak durina berekenna. Kalak si bage la banci ermeriah ukur.

Adi keleng ateta Dibata, mehuli dungna sifat-sifatta

6. Kai hasilna adi keleng ateta Dibata?

6 Ikataken pakar Pustaka maka sifat egois si tangtangna ikataken Paulus, perban sifat e me si erban sifat si la mehuli si debanna lit bas sekalak jelma. Tapi, adi keleng ateta Dibata, mehuli dungna sifat-sifatta. Contohna, meriah ukur, dame, sabar, mehuli, tek, lemah lembut, ras banci ngkuasai diri. (Galati 5:22, 23) Nina pemasmur, “Malem ate kalak si erdibataken [Jahwe]!” (Masmur 144:15) Jahwe eme Dibata si ermeriah ukur, emaka umatNa pe ermeriah ukur ka. Kalak egois, si ialokenna ngenca si iukurina, tapi umat Jahwe meriah ukurna perban nggit ia mere.​—Perbahanen Rasul-Rasul 20:35.

Uga carana gelah ula kita ngukurken dirinta saja? (Nen paragraf 7)

7. Penungkunen kai si perlu sisungkun banta guna meteh uga kekelengenta man Dibata?

 7 Ja nari sieteh nggo kelengen ateta dirinta asangken Dibata? Cuba ukuri nasehat enda, “Ola ibahanndu kai pe erpalasken kerangapen, ntah si erpalasken ukur meganjang. Tapi peteruklah ukurndu sekalak nandangi si debanna. Ola kal iakapndu ulin kam asangken kalak si deban. Ola keperlunndu saja ngenca iperdiatekenndu tapi perdiateken pe keperlun kalak si deban.” (Pilipi 2:3, 4) Sungkuni banta, ‘Kudalanken nge nasehat enda? Erusaha nge aku ngelakoken kai si ngena ate Dibata? Nggit nge aku nampati turang senina bage pe kalak si ku jumpai sanga erberita?’ Mon-mon mesera siakap mereken waktu ras gegehta. Arus siusahaken kel janah sikorbanken kai si meriah siakap. Tapi pasti ndauh riahen erban Penguasa alam semesta enda ermeriah ukur!

8. Kai si ilakoken piga-piga kalak Kristen perban keleng atena Dibata?

8 Piga-piga kalak Kristen, lit pe kesempatenna ndatken melala sen la ia nggit, perban keleng atena Dibata janah gelah banci fokus ngelayani Ia. Ericka eme sekalak dokter. Situhuna banci nge ia bayak, tapi ipilihna merintis. Janah ia ras dilakina nggo ngelayani i piga-piga daerah. Nina, “Melala kel pengalamen kami i bas nampati kalak si make bahasa si deban janah melala teman kami. Enda me si erban kami bayak.” Tetap nge Ericka jadi dokter, tapi buen waktuna ipakena guna erberita ras nampati turang senina. Ikatakenna maka enda erban ia “tuhu-tuhu puas ras ermeriah ukur.”

 KEBAYAKEN I SURGA NTAH I DONI?

9. Engkai maka kalak si mata duiten la banci ermeriah ukur?

9 Itulis Paulus maka kalak pagi jadi “merangap,” ntah pe mata duiten. Piga-piga tahun si lewat, erberita sekalak perintis i Irlandia man sekalak dilaki kerna Dibata. Ipedarat dilaki e dompetna, ituduhkenna senna piga-piga lembar, kenca e nina, “Enda dibatangku!” Amin gia nterem kalak la mis ikatakenna bage, tapi bage nge ia situhuna. Mata duiten ia janah mbue atena barangna. Tapi nina Pustaka, “Kalak si meduit la pernah bias akapna; kalak si erngena ate man erta la pernah idatca kai si isurana.” (Pengerana 5:10) Kalak si mata duiten labo pernah puas. Kurang bue atena lalap janah geluhna ngayaki erta saja. Akibatna, “erbage-bage kecedan ate.”​—1 Timotius 6:9, 10.

10. Kai nina Pustaka kerna kebayaken ras kemusilen?

10 Kerina kita perlu sen. Perban enda banci jadi perlindungen man banta. (Pengerana 7:12) Tapi banci nge kita ermeriah ukur amin gia senta bias man keperlunta saja? Banci! (Baca Pengerana 5:12.) Itulis Agur anak Jake, nina, “Ola pelepasNdu aku musil ntah bayak. Berekenlah man bangku kai si kuperluken.” Pasti minter sieteh ngkai maka ipindo dilaki e gelah ula min ia mesera. Sabap adi mesera ia banci ia dungna nangko, e banci erban Dibata itokohi. Tapi ngkai maka la ka ia nggit bayak? Nina, “Sabap kune bayak aku banci jadi maka la aku perlu Kam.” (Kuan-kuanen 30:8, 9) Banci jadi ietehndu ise saja kalak si teken ia ku erta asangken ku Dibata.

11. Kai nina Jesus kerna duit?

11 Kalak si mata duiten la banci erban Dibata senang. Nina Jesus, “Ise pe labo ngasup ngikutken dua tuan. Sabap adi dua tuanna, la banci lang sekalak keleng atena janah sekalak nari nembeh atena; ntah pe mejingkat ia nandangi sekalak tuan, tapi tuan si sada nari la diatena pe. Labo kam ngasup erdahin guna Dibata adi erdahin ka kin kam guna duit.” Nina ka, “Ola pepulung erta-erta i doni enda man bandu. Sabap erta-erta doni banci ipan nget-nget, tembesin dingen itangko pinangko. Tapi pepulunglah erta-erta i surga. Sabap i surga la banci ipan nget-nget, tembesin dingen itangko pinangko.”​—Matius 6:19, 20, 24.

12. Engkai maka lebih fokus kita ngelayani Jahwe adi sederhana geluhta? Bereken contohna.

12 Nterem umat Jahwe erusaha gelah sederhana geluhna. Perban nggo buen waktuna ngelayani Jahwe, reh riahna akapna. Jack, tading i Amerika Serikat, idayakenna rumahna si galang ras bisnisna gelah banci ia merintis ras diberuna. Nina, “Mesera kel kuakap nadingken rumah kami si mejile e bage pe erta-erta kami.” Tapi biasana adi mulih ia ku rumah, stres akapna perban melala masalahna bas ingan dahinna. Nina, “Diberuku sekalak perintis, ermeriah ukur kuidah ia lalap. Nina bangku, ‘Bosku mehuli kel!’ Dungna aku pe merintis, janah nggo seri Bos kami eme Jahwe.”

‘Teridah nge arah kai si kulakoken maka tek aku kai nina Pustaka kerna sen?’

 

Uga carana gelah ula kita mata duiten? (Nen paragraf 13)

13. Penungkunen kai si perlu sisungkun man banta kerna sen?

 13 Sanga siukuri uga perukurenta kerna sen, perlu kita jujur janah sisungkuni banta, ‘Teridah nge arah kai si kulakoken maka tek aku kai nina Pustaka kerna sen? Sen nge si pentingna bas geluhku? Pentingen nge kuakap barang-barang asangken hubungenku ras Jahwe bage pe kalak si deban? Tek nge aku maka icukupi Jahwe nge kerina keperlunku?’ Tek kita maka labo pernah ikecewaken Jahwe kalak si tek man baNa!​—Matius 6:33.

ENGKELENGI JAHWE NTAH KESENANGEN?

14. Kai nina Pustaka kerna kesenangen?

14 Ikataken i bas Pustaka maka bas wari pendungi pagi, nterem kalak “kesenangen saja idaramina.” Bagi si nggo sipelajari ndai, labo salah lit senta, tapi arus seimbang. Bage ka pe labo salah adi meriah-meriah kita, tapi arus ka seimbang. Lit kalak akapna la banci meriah-meriah, tapi labo bage ate Jahwe. Nina bas Pustaka, “Emaka manken dingen meriahlah atendu, inemlah anggurndu alu senang ukurndu.”​—Pengerana 9:7.

15. Kai maksudna kalak si “kesenangen saja idaramina”?

15 Ikataken i bas 2 Timotius 3:4 kerna kalak si kesenangen saja idaramina janah nggo tadingkenna Dibata. Perdiateken maka labo ikataken bas ayat enda ndauh kelengen atena kesenangen asangken Dibata. Adi bage, lit denga sitik kelengna man Dibata. Tapi ikataken bas ayat e, “lanai diatena” Dibata. Itulis sekalak pakar maka kalak si bage “labo sitik ngenca kelengna man Dibata, tapi tuhu-tuhu la lit kelengna man Dibata.” Enda persinget si serius man kalak si kesenangen saja idaramina. Ikataken bas Pustaka maka kalak si bage, kesenangen saja lalap “atena.”​—Lukas 8:14.

16, 17. Kai si iajarken Jesus man banta kerna ndarami kesenangen?

16 Arah kegeluhen Jesus iajarina kita kai maksudna seimbang i bas ndarami kesenangen. Nggit ia lawes ku ‘kerja-kerja’ ras “kerja man-man si mbelin.” (Johanes 2:1-10; Lukas 5:29) Sanga Jesus bas kerja e, la bias anggur, nggit ia erban mukjizat, iubahna lau jadi anggur. Selain si e, sanga ipandangi kalak Jesus perban man ras minem ia i kerja-kerja, ikataken Jesus maka kalak si bage la seimbang carana rukur.​—Lukas 7:33-36.

17 Tapi, labo kesenangen si pentingna akap Jesus. Ngelayani Jahwe ras nampati kalak si deban si pentingna akapna. Guna nelamatken manusia, nggit ia mate alu kematen si seh kel suina i tiang. Ikataken Jesus man pengikutna, “Ketuahen me kam adi erkite-kiteken kam ajar-ajarku, igombang-gombangi,  ipesega-sega dingen ipelawes kalak kam janah alu kata guak ipalitkenna si jahat man bandu. Ermengkah dingen meriahlah atendu, sabap enggo isikapken Dibata upahndu si mbelin i surga; sabap bage me pe nabi-nabi si nggeluh leben asangken kam ipesega-sega kalak.”​—Matius 5:11, 12.

Uga carana gelah ula kita ndarami kesenangen saja?(Nen paragraf 18)

18. Ja nari sieteh nggo riahen siakap kesenangen asangken ngelayani Dibata?

18 Ja nari sieteh nggo riahen siakap kesenangen asangken ngelayani Dibata? Cuba sisungkuni banta, ‘Pentingen nge kuakap hiburen asangken pulung ras erberita? Nggit nge aku ngorbanken kai si meriah kuakap gelah banci ngelayani Dibata? Sanga kupilih sada hiburen, kuukuri nge uga perasan Jahwe?’ Perban keleng ateta Dibata janah ateta erban Ia senang, labo saja kita la nggit milih hiburen si nggo sieteh salah, tapi pe hiburen si iakap kita banci jadi labo erban Jahwe senang.​—Baca Matius 22:37, 38.

CARA GELAH ERMERIAH UKUR

19. Kalak si uga si la banci ermeriah ukur?

19 Enggo 6.000 tahun dekahna iban doni Setan enda manusia menderita. Janah i bas wari pendungi enda, doni enda dem alu kalak si ngukurken dirina saja, mata duiten, ras ndarami kesenangen saja. Si iukurina eme kai si banci idatna janah sura-surana ngenca si pentingna akapna. Kalak si bage la banci ermeriah ukur! Tapi, nina Pustaka, “Malem ate kalak si [Jahwe] Dibata penundalenna, si ibahanna Dibata nu Jakup jadi penampatna.”​—Masmur 146:5.

20. Engkai adi keleng ateta Jahwe, meriah ukurta?

20 Keleng kel ate umat Jahwe man Jahwe janah tiap tahun, reh tambahna lalap kalak si nandai Ia janah ngkelengi Ia. Enda mbuktiken maka Kerajan Dibata nggo merentah, si lanai ndekah mereken pasu-pasu si mbelin ku doni enda! Adi silakoken kai si ngena ate Jahwe, meriah ukurNa, janah kita pe ermeriah ukur ka. Kalak si keleng atena Jahwe, pasti ermeriah ukur rasa lalap! I bas artikel si reh, sibahas kari sifat-sifat si la mehuli perban kekelengen si mentingken bana ntah pe egois. Janah sibahas ka kari sifat-sifat umat Jahwe si mehuli.