Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Perban itukur Jakup nge hak Esau jadi anak sintua maka ia jadi nini bulang Mesias?

Penungkunen Si Mbaca

Penungkunen Si Mbaca

Bas jaman Israel, arus nge anak dilaki sintua si jadi nini bulang Mesias?

Mbarenda bage siakap pengertinna perban kai si itulis bas Heber 12:16. I je ikataken maka Esau “la ngergai si meherga iakap Dibata” janah iberekenna man Jakup “hakna selaku anak sintua, erkiteken sada mangkuk pangan.” Emaka sanga ialoken Jakup ‘hak selaku anak sintua,’ siakap enda sada kehamaten jadi nini bulang Mesias.​—Matius 1:2, 16; Lukas 3:23, 34.

Tapi, ipelajari me alu megermet keterangen-keterangen si deban i bas Pustaka, e mbuktiken maka anak dilaki la perlu jadi anak sintua gelah banci jadi nini bulang Mesias. Mari sibahas piga-piga keterangenna:

Anak sintua Jakup ras Lea eme Ruben. Anakna sintua ras Rahel eme Jusup. Sanga ilakoken Ruben perbahanen seks si salah, bene me hakna jadi anak sintua, janah ibereken me hak e man Jusup. (Kejadin 29:31-35; 30:22-25; 35:22-26; 49:22-26; 1 Kronika 5:1, 2) Tapi, Mesias e labo reh arah Ruben ntah pe Jusup. Ia reh arah Juda, anak Jakup ras Lea si nomor empat.​—Kejadin 49:10.

Bas Lukas 3:32, lit daftar lima kalak nini bulang Mesias, janah salah sada arah kalak e anak sintua. Contohna, Boas eme bapa Obed, janah Obed eme bapa Isai.​—Rut 4:17, 20-22; 1 Kronika 2:10-12.

Daud labo anak sintua Isai. Ia anak singuda arah waluh ersenina. Tapi Mesias reh arah Daud. (1 Samuel 16:10, 11; 17:12; Matius 1:5, 6) Bage ka pe Salomo, nini bulang Mesias seterusna, ia labo anak sintua Daud.​—2 Samuel 3:2-5.

 Enda labo ka ertina jadi anak sintua e la penting. Lit dat anak dilaki sintua sada kehamaten si la idat senina-seninana. Janah ia jadi kepala keluarga seterusna i bas keluarga ras dua kali lipat ialokenna erta warisen.​—Kejadin 43:33; Ulangen 21:17; Josua 17:1.

Tapi hak jadi anak sintua banci ipindahken ku anak dilaki si deban. Sanga isuruh Abraham si Ismael lawes, hakna jadi anak sintua ipindahken ku Isak. (Kejadin 21:14-21; 22:2) Janah bagi si nggo sibahas, hak Ruben jadi anak sintua ipindahken ku Jusup.

Pelajaren kai si ibereken rasul Paulus arah Heber 12:16 e? I je sibaca, “Jagalah maka ola sekalak pe erlagu la mehuli ntah la ngergai si meherga iakap Dibata bagi si Esau, si ndayaken hakna selaku anak sintua, erkiteken sada mangkuk pangan.”

I je, labo sangana ibahas Paulus kerna nini bulang Mesias. Tapi, sangana ipersingetina kalak Kristen. Nina man kalak e, “Tetaplah kam erdalan i bas dalan si pinter” gelah “sekalak pe ola surut i bas lias ate Dibata.” Janah enda banci terjadi adi ilakoken kalak e perbahanen seks si salah. (Heber 12:12-16) I bas kejadin enda, kalak e bali bagi Esau, si “la ngergai si meherga iakap Dibata” tapi sura-surana saja si ilakokenna.

Menurut kebiasan bas jaman kalak e, banci jadi ibere tugas si istimewa man Esau guna mereken persembahen man Jahwe. (Kejadin 8:20, 21; 12:7, 8; Jop 1:4, 5) Tapi si iutamaken Esau eme sura-surana. Emaka ilepaskenna hakna jadi anak sintua perban sada mangkuk pangan. Banci jadi la nggit Esau menderita bagi si inubuatken Jahwe man keturunen Abraham. (Kejadin 15:13) Teridah ka maka la iergaina kai si badia menurut Jahwe sanga empoina diberu si la nembah Jahwe, janah enda pe erban ceda kel ukur orang tuana. (Kejadin 26:34, 35) Beda kel ia ras Jakup, adi Jakup ipastikenna diberu si iempoina e nembah Dibata situhu-tuhu ngenca!​—Kejadin 28:6, 7; 29:10-12, 18.

Pelajaren kai si banci sidat arah keterangen Pustaka kerna nini bulang Mesias? Piga-piga arah kalak e anak sintua, janah lit ka si lang. Ieteh kalak Jahudi enda janah iakuina. Ja nari sieteh? Perban iakui kalak e maka Kristus eme keturunen Daud, anak Isai singuda.​—Matius 22:42.