Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Ngelayani Jahwe, Dibata Kebebasen

Ngelayani Jahwe, Dibata Kebebasen

“I ja lit kesah si badia Jahwe, i je lit kebebasen.”​—2 KORINTI 3:17.

ENDE-ENDEN: 49, 73

1, 2. (a) Engkai maka pembahasen kerna perbudaken ras kebebasen penting bas jaman rasul Paulus? (b) Ise si ikataken Paulus jadi Sumber kebebasen situhu-tuhu?

KALAK Kristen abad pertama tading bas Kerajan Roma si kalakna bangga man hukum, cara pemerentahenna ngadili, ras kebebasen si idatna. Tapi kerajan e bergantung man budak-budak si arus kerja keras. Sebap bas Kerajan Roma, 1 arah 3 kalak si lit i je eme budak. Emaka pembahasen kerna perbudaken bage pe kebebasen jadi penting man kalak si lit i je termasuk kalak Kristen.

2 Rusur itulis rasul Paulus kerna kebebasen. Tapi labo iusahakenna guna ndungi masalah si lit i doni enda, bagi si iusahaken piga-piga kalak. Tapi, tutus kel ate Paulus ras kalak Kristen si debanna ngajari kalak berita si meriah kerna Kerajan Dibata janah nampati kalak e ngangkai maka tuhu-tuhu meherga kel korban tebusen Jesus Kristus. Ikataken Paulus man kalak Kristen ise Sumber kebebasen situhu-tuhu. Itulisna, “Jahwe e Roh kap, janah  i ja lit kesah si badia Jahwe, i je lit kebebasen.”​—2 Korinti 3:17.

3, 4. (a) Kai si ibahas Paulus sope itulisna 2 Korinti 3:17? (b) Kai si arus silakoken gelah banci sidat kebebasen arah Jahwe?

3 Bas suratna si peduaken man kalak Korinti, ikataken Paulus kai si terjadi man Musa sanga nusur ia arah Deleng Sinai kenca jumpa ras malekat Jahwe. Terang kel ayona! Sanga inen kalak Israel Musa, mbiar kalak e, emaka itutupi Musa ayona alu uis. (Keluaren 34:29, 30, 33; 2 Korinti 3:7, 13) Ijelasken Paulus, “Tapi adi lit sekalak jelma mulihken man Jahwe, kain penutup e ilepasken.” (2 Korinti 3:16) Kai nge maksud Paulus?

4 Bas artikel si lewat sipelajari maka Jahwe, si Nciptaken kerinana, eme Dibata si kebebasenNa la terbatas. Enda ertina ‘i ja lit Jahwe ras kesah si badia,’ i je lit kebebasen. Tapi ikataken Paulus maka adi sidat ateta kebebasen e, arus kita mulihken ku Jahwe. Ertina, arus kita ndeher ras Jahwe. Sanga kalak Israel bas taneh mesawang, cara rukurna ngikutken perukuren manusia, labo perukuren Jahwe. Enda tempa-tempa bagi itutupi kalak e pusuh ras perukurenna. Ipake kalak e kebebasenna guna ngelakoken sura-surana.​—Heber 3:8-10.

Kalak si ipenjaraken pe banci ndatken kebebasen

5. (a) Kebebasen kai si ibereken kesah Jahwe? (b) Ja nari siteh maka kalak si jadi budak ras kalak si ipenjaraken banci ndatken kebebasen arah Jahwe? (c) Penungkunen kai si perlu sijawap?

5 Kebebasen si ibereken kesah si badia Jahwe lebihen asangken kebebasen arah perbudaken nari. Kebebasen e ndauh belinen asangken kebebasen si banci ibereken manusia. Enda banci mbebasken kita arah perbudaken dosa ras kematen bage pe arah perbudaken agama palsu ras kebiasanna. (Roma 6:23; 8:2) Luar biasa kel kebebasen enda! Kalak si jadi budak ras kalak si ipenjaraken pe banci ndatken kebebasen enda. (Kejadin 39:20-23) Turang seninata Harold King si nggo ertahun-tahun ipenjaraken perban kinitekenna pe ndatken kebebasen enda. Banci itontonndu pengalamenna bas JW Broadcasting. (Nen bas bagin WAWANCARA RAS PENGALAMEN > MEGENGGENG I BAS NGADAPI PERBEBEN.) Gundari mari sijawap dua penungkunen enda. Uga carata mbuktiken maka siergai kebebasenta e? Janah uga carata nggunaken kebebasen e alu bijaksana?

MEHERGA KEL KEBEBASEN SI IBEREKEN DIBATA MAN BANTA

6. Uga kalak Israel nuduhken maka kalak e la ngata bujur man kebebasen si nggo ibereken Jahwe?

6 Sanga sialoken sada hadiah si meherga siakap, pasti bujur kel sikataken man kalak si merekenca. Tapi kalak Israel la ngata bujur kerna kebebasen si nggo ibereken Jahwe man bana. Piga-piga bulan denga kenca ndarat arah  Mesir nari, nggo merincuh kalak e man pangan ras inemen si lit i Mesir. Jungut-jungut kalak e kerna manna, pangan si isediaken Jahwe man kalak e. Janah mulihken ka atena ku Mesir! Pentingen akapna ‘nurung, cimen, semangka, pere, bawang merah, ras bawang putih’ asangken kebebasen si ibereken Jahwe guna ngelayani Ia. Emaka merawa kel Jahwe man kalak e. (Bilangen 11:5, 6, 10; 14:3, 4) Enda ngajarken kita sada pelajaren si penting.

7. Uga Paulus ndalanken nasehat si itulisna bas 2 Korinti 6:1? Uga carata ngusih ia?

7 Ipersingeti Paulus kerina kalak Kristen gelah ngataken bujur man kebebasen si nggo ibereken Jahwe erkelangken AnakNa Jesus Kristus. (Baca 2 Korinti 6:1.) Paulus labo sempurna, ia budak dosa ras kematen, enda erban ia menderita. Tapi nina, “Bujur kukataken man Dibata si nelamatken aku erkelangken Jesus Kristus Tuanta!” Engkai maka ikatakenna bage? Ijelasken Paulus man kalak Kristen, “Sebap undang-undang kesah si badia si mereken kegeluhen si ersada ras Kristus Jesus, nggo mbebasken kena arah undang-undang dosa bage pe kematen.” (Roma 7:24, 25; 8:2) Bali bagi Paulus, ula pernah silupaken maka nggo ibebasken Jahwe kita arah perbudaken dosa ras kematen. Tebusen erban kita banci ngelayani Dibata alu pusuh ras perukuren si bersih, janah enda erban kita bahagia.​—Masmur 40:9.

Igunakenndu nge kebebasenndu guna ngelakoken kai si ngena ate Jahwe ntah kai si meriah akapndu? (Nen paragrap 8-10)

8, 9. (a) Persinget kai si ibereken rasul Petrus kerna carata nggunaken kebebasenta? (b) Uga anak muda banci nggunaken kebebasenna alu cara si salah?

8 Ula min bas biber saja kita ngata bujur man Jahwe, tapi arus siusahaken gelah kebebasenta e sigunaken alu cara si benar. Contohna,  ipersingeti rasul Petrus kita gelah ula siban kebebasen e jadi alasen ngelakoken kai si salah. (Baca 1 Petrus 2:16.) Persinget enda ngingetken kita kerna kai si terjadi man kalak Israel i bas taneh mesawang. Gundari pe perlu kel kita persinget e. Itawarken Setan ras doni enda melala sura-sura daging, bagi pangan, inemen, baju, bage pe hiburen. Ipake tukang iklan kalak si mejile gelah situkur barangna e amin pe la kita perlu. Enda cara si gampang si ipake doni enda gelah sigunaken kebebasenta alu cara si salah.

9 Nasehat Paulus pe banci sigunaken bas persoalen si lebih penting bas geluhta, contohna sanga milih pendidiken bage pe pendahin. Misalna, anak muda gundari ipaksa kel erlajar gelah banci masuk ku universitas si mejile. Mbue kalak ngatakenca maka adi meganjang sekolahna pasti datna pendahin si mejile, melala datna sen, janah iergai kalak ia. Ituduhkenna ka bukti-bukti maka kalak si nggo lulus kuliah lalan datna sen asangken kalak si tamat SMA. Tempa-tempa kuliah jadi pilihen si tepatna kel man anak muda sanga kalak e erban keputusen si mpengaruhi kegeluhenna. Tapi kai nge si arus iinget kalak e bage pe orang tuana?

10. Kai si arus siinget sanga kita erban keputusen kerna pilihen pribadi?

10 Iakap piga-piga kalak perban enda pilihen pribadi, bebas ia milih si bagi ukurna, adi e la kapna salah. Banci jadi kata-kata Paulus enda si igunakenna, “Labo ateku kebebasenku e erban aku ihakimi pusuh peraten kalak si deban.” (1 Korinti 10:29) Aminna pe bebas kita nentuken pendidiken bage pe pendahinta, arus siinget maka kebebasenta e lit batasna janah kerina keputusenta lit akibatna. Emaka ikataken Paulus, “Kerina banci ilakoken tapi labo kerina erguna. Kerinana banci ilakoken, tapi labo kerinana mpegegehi kita.” (1 Korinti 10:23) Jadi aminna pe bebas kita erban pilihen pribadi, tapi labo sura-surata si pentingna.

SIGUNAKEN KEBEBASENTA ALU BIJAKSANA ADI SILAYANI JAHWE

11. Kai alasen Jahwe mbebasken kita?

11 Sanga ipersingeti rasul Petrus kita gelah la nggunaken kebebasenta alu cara si salah, ikatakenna maka cara si benar eme jadi “budak Dibata.” Alasen Jahwe nggunaken Jesus mbebasken kita arah perbudaken dosa ras kematen eme gelah banci silayani Ia segedang geluhta.

Cara si mehulina kel nggunaken kebebasenta eme nggunaken kerina waktu ras gegehta ngelayani Jahwe

12. Contoh kai si ibereken Nuah ras keluargana?

12 Cara si mehulina kel nggunaken kebebasenta eme nggunaken kerina waktu ras gegehta ngelayani Jahwe. Alu bage, enda ngelindungi kita gelah la siban sura-sura doni bage pe sura-sura dagingta jadi si pentingna bas geluhta. (Galati 5:16) Cuba ukuri kai si ilakoken Nuah ras keluargana. Kalak e nggeluh bas doni si jahat ras si la mehuli perbahanenna. Tapi kalak e la nggit ngikutken sura-sura ras perbahanen kalak si lit i sekelilingna. Ipilih  kalak e tetap sibuk bas dahin si ibereken Jahwe man bana. Ibangunna bahtra, ipepulungna pangan man bana bage pe man binatang-binatang janah ipersingetina kalak si deban kerna Banjir si Mbelin. “Ilakoken Nuah kerina kai si iperentahken Dibata man bana.” (Kejadin 6:22) Hasilna, selamat Nuah ras keluargana arah banjir e.​—Heber 11:7.

13. Kai si iperentahken Jahwe man banta?

13 Kai si iperentahken Jahwe man banta gundari? Perban kita murid-murid Jesus, siteh maka iperentahken Jahwe kita erberita. (Baca Lukas 4:18, 19.) Gundari nggo melala jelma itipu Setan janah la kalak e sadar maka ia nggo jadi budak agama palsu, sen, ras politik doni enda. (2 Korinti 4:4) Bagi Jesus, lit tugasta nampati kalak si deban gelah nandai ras ngelayani Jahwe, Dibata kebebasen. (Matius 28:19, 20) Labo gampang erberita. Bas piga-piga ingan, lanai kalak merhat meteh kerna Dibata, janah piga-piga kalak merawa ia adi erberita kita man bana. Tapi perban nggo iperentahken Jahwe kita gelah erberita, arus sisungkuni banta, ‘Banci nge kugunaken kebebasenku gelah mereken terbuen bas ngelayani Jahwe?’

14, 15. Keputusen kai si iban melala umat Jahwe? (Nen gambar pemena artikel.)

14 Meriah kel siakap meteh melala umat Jahwe si sadar maka nggo ndeher kel kedungen doni enda janah isederhanaken kalak e geluhna ras merintis. (1 Korinti 9:19, 23) Piga-piga kalak merintis bas daerahna, lit ka si pindah ku runggun si deban si merluken penampat. Bas lima tahun terakhir enda, lit lebih 250.000 kalak si mulai merintis, janah gundari nggo lit lebih 1.100.000 kalak si jadi perintis biasa. Enda luar biasa perban melala kel si nggunaken kebebasenna guna ngelayani Jahwe alu cara si bage!​—Masmur 110:3.

15 Kai si erban kalak e banci nggunaken kebebasenna alu bijaksana? Perdiateken pengalamen John ras Judith, si nggo 30 tahun ngelayani i bas piga-piga negara. Iceritaken kalak e maka sanga Sekolah Dinas Perintis imulai tahun 1977, teriahken kalak si ngikuti sekolah e gelah pindah ras ngelayani bas ingan si lebih merluken penampat. Guna ndatken tujunna e, arus tetap sederhana pergeluh John ras Judith. Emaka rusur iganti John pendahinna. Dungna, pindah me ia ku negara si deban. Uga cara kalak e ngatasi masalah kerna budaya, cuaca, ras bahasa si mbaru? Ertoto kalak e mindo penampat man Jahwe. Uga perasan John ras Judith perban ngelayani Jahwe  ertahun-tahun dekahna? Nina John, “Kunikmati kel pendahin e. Enda me pendahin si mehulina si pernah kudalani. Nggo reh deherna aku ras Jahwe, Ia bagi Bapa si perkeleng man bangku. Gundari nggo lebih kuangka isi Jakup 4:8 si ngataken, ‘Rembakkenlah diri kena ku Dibata, emaka irembakkenNa ka diriNa man kena.’ Gundari nggo kudat kai si kudarami, si erban geluhku puas.”

16. Uga ribun turang seninata nggunaken kebebasenna alu bijaksana?

16 Piga-piga si bagi John ras Judith, banci ndekah merintis. Perban keadan, si deban kentisik ngenca banci merintis. Lit ka si jadi sukarelawan bas dahin pembangunen sebelang doni. Contohna, lit 27.000 turang senina si nampati dahin pembangunen kantor pusat i Warwick, New York. Lit si nampati dua minggu, si deban piga-piga bulan, janah lit ka si nampati sada tahun ntah pe lebih. Nterem kalak e erban pengorbanen gelah banci nampati i Warwick. Kalak e jadi contoh si mejile kel si nggunaken kebebasenna guna muji ras ngelayani Jahwe, Dibata kebebasen!

17. Kai si banci sidat adi gundari sigunaken kebebasenta alu bijaksana?

17 Meriah kel siakap banci nandai Jahwe ras ndatken kebebasen perban ngelayani Ia. Mari sibuktiken maka meherga kel siakap kebebasen e arah keputusen si iban kita. Asangken nggunaken kebebasen alu cara si salah, marilah silayani Jahwe asa ngasupta. Alu bage, i bas waktuna banci sidat pasu-pasu si ijanjiken Jahwe sanga itepatiNa janji enda, “Kerina si ijadiken Dibata ibebasken me arah perbudaken dosa ras kematen, janah ngenanami kebebasen si mulia si bali bagi si inanami anak-anak Dibata.”​—Roma 8:21.