Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PEMBAHASEN UTAMA | ENGKAI PERLU JUJUR?

Perlu Denga nge Jujur Gundari?

Perlu Denga nge Jujur Gundari?

Hitoshi erdahin i bas bagin perduiten bas perusahan i Jepang. Paksa ia ras bosna mereksa perduiten, isuruh bosna ia erbahan laporen palsu. Ijelasken Hitoshi maka pusuh peratenna la ngijinken ia ngelakoken si e. Dungna Hitoshi ipecat i bas dahinna nari.

Piga-piga bulan kenca si e, latih kal ukur Hitoshi janah sangsi ia ntah lanai banci datna dahin. Paksa ia iwawancarai guna sada dahin, ikatakenna maka la atena terlibat i bas dahin si la jujur. Nina si mereken wawancara e, ”Aneh kal carandu rukur!” Keluarga Hitoshi ras teman-temanna terus mpegegehi ia gelah tetap mpertahanken kejujuren, perban Hitoshi mulai sangsi nandangi keputusenna. Nina Hitoshi, ”Sangsi aku, ntah labo lit gunana jujur e.”

Pengalamen Hitoshi ncidahken maka la kerina jelma ngergai kejujuren. Kenyatanna piga-piga kalak erpengakap maka kejujuren enda erban rugi, khususna bas bisnis. Nina sekalak si erdahin i bas Afrika Selatan, ”I sekelewetku kerina kalak la jujur, maun-maun mbelin kal tekanen gelah ikut-ikuten.”

Salah sada bentuk kinilajujuren si umum gundari eme erbual. Piga-piga tahun si nggo lewat, penelitin Robert S. Feldman, sekalak psikologi i bas Universitas Massachusetts Amherst ncidahken maka paksa ngerana-ngerana, 60 persen kalak dewasa erbual silang-langna sekali i bas sepuluh menit. Nina Feldman, ”La kal siarap bage, la kal sisangka erbual enda umum kal gundari.” Si parahna, menam kerina kalak la senang ibuali, tapi ia sendiri pe erbual.

Engkai maka erbual, nangko, ras bentuk-bentuk kinilajujuren si deban seh kal buena gundari? Kai pengaruh kinilajujuren i bas masarakat? Janah si pentingna, uga carana gelah banci kita tetap jujur?