Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Kesah Dibata Ikut Ersaksi ras Pusuhta

Kesah Dibata Ikut Ersaksi ras Pusuhta

”Kesah Dibata ikut ersaksi ras tendinta [pusuhta] ngataken maka kita anak-anak Dibata kap.”​—ROM. 8:16.

ENDE-ENDEN: 109, 108

1-3. Kai si erbanca maka wari Pentakosta sada wari si istimewa, ras uga si e nggenepi nubuaten Pustaka si Badia? (Nehen gambar pemena artikel.)

SANGA SI E wari minggu i Jerusalem, tahun 33 M. Enda sada wari si istimewa. Enterem jelma paksana ngerayaken Pentakosta, sada perayan si badia i bas pemena peranin gandum. Paksa erpagi-pagi i rumah pertoton, imam si mbelin mpersembahken korban si biasa ipersembahkenna. Kenca si e kira-kira jam siwah, ipersembahkenna dua ngkibul roti si ibahan arah ulih peranin buah si pemena ntah pe gandum si pemena. Imam si mbelin ngendesken roti e guna persembahen man Jahwe.​—Im. 23:15-20.

2 Tiap tahun, sedekah ratusen tahun, imam si mbelin ngendesken roti e guna persembahen man Jahwe. Persembahen enda lit hubungenna ras sada hal si penting si terjadi i bas wari Pentakosta 33 M. Janah si e terjadi kempak 120 ajar-ajar Jesus si paksana ertoto bas sada loteng i Jerusalem. (Perb. 1:13-15) Waluh ratus tahun sope si e, nggo leben ituriken nabi Joel kerna kai si nandangi terjadi. (Joel 2:28-32; Perb. 2:16-21) Engkai maka peristiwa enda penting?

 3 Oge Perbahanen 2:2-4. I bas wari Pentakosta 33 M, Dibata mereken kesah si badia man kalak Kristen e, ije me ia iminaki. (Perb. 1:8) Kenca si e, nterem kalak reh janah ajar-ajar ndai nuriken kerna kejadin si luar biasa si edenga iidahna ras ibegina. Rasul Petrus njelasken kai si terjadi ras ngkai maka si e penting. Kenca si e, ngerana ia man jelma si nterem e, ”Jeralah janah alokenlah peridin i bas gelar Jesus Kristus, gelah dosa-dosandu ialemi Dibata, janah ialokenndu pe pemereNa eme kesah si badia.” I bas wari e, 3.000 kalak iperidiken janah ikut ngaloken kesah si badia.​—Perb. 2:37, 38, 41.

4. (a) Ngkai maka penting sieteh kerna kai si terjadi paksa Pentakosta? (b) Peristiwa penting si deban kai si terjadi i bas tanggal si seri ratusen tahun sope Pentakosta? (Nehen penjelasen tambahen.)

4 Imam si mbelin ras persembahen si ibahanna tiap Pentakosta ngelambangken kai? Imam si mbelin ngelambangken Jesus. Roti persembahen ngelambangken ajar-ajar Jesus si iminaki. Ajar-ajar e nggo ipilih i bas kalak si erdosa nari janah igelari buah si pemena. (Jak. 1:18) Dibata ngaloken kalak enda jadi anakNa guna merentah ras Jesus jadi raja i bas Kinirajan Dibata. (1 Pet. 2:9) Jahwe nggunaken KinirajanNa guna masu-masu kerina manusia si patuh. Emaka la soal arapenta nggeluh i surga ntah pe i doni, Pentakosta 33 M tetap penting kal man banta. [1]

KAI SI TERJADI PAKSA SEKALAK JELMA IMINAKIKESAH SI BADIA?

5. Kai buktina maka erbage-bage cara kalak iminaki?

5 Pasti la banci ilupaken ajar-ajar Jesus si terjadi bas loteng i Jerusalem. I babo takal kalak e lit dilah-dilah api. Jahwe mereken kengasupen man kalak enda guna ngerana i bas cakap si deban. Kalak e la sangsi maka ia nggo iminaki kesah si badia. (Perb. 2:6-12) Tapi kejadin si luar biasa enda la terjadi man kerina kalak Kristen paksa ia iminaki. Contohna, bas wari e, lit ka ribun kalak i Jerusalem iperidiken ras iminaki. Tapi la ituriken Pustaka si Badia lit dilah-dilah api i babo takal kalak e. (Perb. 2:38) Selain si e, la kerina kalak Kristen iminaki kesah si badia paksa ia iperidiken. Contohna, kalak Samaria la mis iminaki sanga ia iperidiken. (Perb. 8:14-17) Janah la bagi biasana, Kornelius ras isi jabuna iminaki sope kalak e iperidiken.​—Perb. 10:44-48.

6. Kai si nialoken kerina kalak si iminaki, ras kai pengaruhna man kalak e?

6 Jelas me, kalak Kristen si iminaki meteh maka cara ia ngaloken kesah si badia la seri. Piga-piga kalak minter ietehna maka Jahwe nangkuhken ia. Si deban sedar maka ia itangkuhken kenca piga-piga waktu dekahna. Tapi rasul Paulus njelasken kai si ialoken kerina kalak e. Nina, ”Tek kam man Kristus, janah itamaken Dibata cap i bas kam, tandana kam sikerajangenNa, alu mereken kesah si badia si nggo ipadankenna. Kesah e me jadi jaminen”. (Ep. 1:13, 14) Emaka Jahwe nggunaken kesah si badia gelah kalak enda tuhu-tuhu tek maka ia nggo ipilih guna lawes ku surga. Alu cara si e, kesah si badia mereken ”jaminen” man kalak e maka ia nggeluh rasa lalap i surga, labo i doni.​—Oge 2 Korinti 1:21, 22; 5:5.

7. Kai si arus ilakoken kalak Kristen si iminaki gelah ngaloken upahna bas surga?

7 Paksa sekalak Kristen iminaki, pasti nge ialokenna upahna? Lang. Ia tek maka ia iundang ku surga. Tapi ia ngaloken upahna adi ia tetap setia man  Jahwe. Nina Petrus, ”Dage, o senina-seninangku, usahaken tole gelah pendilo ras pemilihen Dibata nandangi kam tetap erteguhna. Adi bage perbahanndu, ndigan pe la kam banci ndabuh ku bas dosa. Alu bage ibereken man bandu dem hak bengket ku bas Kinirajan si la ermasap-masap, Kinirajan Tuhanta ras Si Engkelini kita Jesus Kristus.” (2 Pet. 1:10, 11) Emaka kerina kalak Kristen si iminaki la mpediat kai pe si banci erbanca ia ngadi ngelayani Jahwe. Amin pe ia nggo iundang, ntah pe idilo, guna lawes ku surga, tapi adi la ia tetap setia, labo ialokenna upahna.​—Heb. 3:1; Ket. 2:10.

UGA CARA METEHSA?

8, 9. (a) Ngkai maka mesera iakap nterem kalak ngantusi kai si terjadi nandangi kalak si iminaki? (b) Uga sekalak jelma banci meteh maka ia iundang ku surga?

8 Nterem juak-juak Dibata gundari mesera akapna ngangkai kerna kai si terjadi nandangi sekalak jelma si iminaki Dibata. Enda wajar, perban ia sendiri la iminaki. Dibata nepa manusia gelah nggeluh si rasa lalap i doni labo i surga. (Kej. 1:28; Msm. 37:29) Tapi Jahwe nggo milih piga-piga kalak guna jadi raja ras imam i surga. Paksa kalak enda iminaki, pengarapenna, ras carana rukur berubah. Emaka kalak enda nimai arapenna guna nggeluh i surga.​—Oge Epesus 1:18.

9 Tapi uga sekalak jelma banci meteh maka ia iundang ku surga? Perdiateken kai si ikataken Paulus man turang seninana si iminaki i Roma, ’si nggo ipilih Dibata jadi anak-anakNa’. Nina, ”Sabap Kesah si ibereken Dibata man bandu labo erbahanca kam jadi budak mulihken, seh maka kam mbiar rusur, tapi Kesah e erbahanca kam jadi anak-anak Dibata, janah erkiteken si e banci kita ngerana man Dibata, ’O Bapa! O Bapa kami!’ Kesah Dibata ikut ersaksi ras tendinta [pusuhta] ngataken maka kita anak-anak Dibata kap.” (Rom. 1:7; 8:15, 16) Erkelangken kesah si badiaNa, Dibata erbahan kalak e tuhu-tuhu tek maka ia iundang jadi raja guna merentah i surga ras Jesus.​—1 Tes.2:12.

10. Kai maksud 1 Johanes 2:27 si ngataken maka kidekah kesahna e lit i bas kam, la perlu kalak ngajari kam?

10 Kalak si nggo iundang Dibata la perlu sekalak jelma ngataken man bana maka ia nggo iminaki. Jahwe erban ia tuhu-tuhu tek. Nina rasul Johanes man kalak Kristen si iminaki, ”Tapi Kristus enggo mereken kesah si badia man bandu, gelah kerina kam meteh kata si tuhu-tuhu i bas Dibata nari.” Nina ka, ”Tapi man bandu nggo ibereken Kristus kesahna. Kidekah kesahna e lit i bas kam, la perlu kalak ngajari kam. Sabap iajari kesahna e me kam kerna kai pe, janah kai si iajarkenna tuhu kap, labo salah. Dage, ikutkenlah pengajaren kesah e, janah tetaplah kam ersada i bas persadan ras Kristus.” (1 Joh. 2:20, 27) Bali bagi juak-juak Dibata si deban kalak si iminaki pe perlu ndatken pengajaren i bas Jahwe nari. Tapi kalak enda la merluken kalak si deban guna erbahan ia tuhu-tuhu tek maka ia iminaki. Jahwe nggunaken kuasana si luar biasa, kesahNa si badia, guna erbahan kalak enda tuhu-tuhu tek maka ia nggo iminaki!

KALAK ENDA ”TUBUH PEDUA KALIKEN”

11, 12. Kai penungkunen si banci saja lit i bas kalak Kristen si iminaki, tapi kai si la pernah iraguken kalak enda?

11 Paksa kalak Kristen iminaki kesah si badia, mbue kal perubahen ibahanna, situhuna ikataken Jesus maka kalak enda, ”tubuh pedua kaliken,” ntah pe ”tubuh  datas (surga) nari”. (Joh. 3:3, 5) Nina ka, ”Ola atendu mamang adi ningku, ’Kerina kam arus tubuh pedua kaliken.’ Angin rembus ku ja atena, janah ibegindu sorana, tapi la ietehndu i ja nari rehna ntah ku ja perlawesna. Bage me pe kalak si tubuh i bas kesah dibata.” (Joh. 3:7, 8) Jelas me, la mungkin banci ijelasken uga tepatna perasan kalak si iminaki man kalak si la iminaki. [2]

12 Sekalak si iminaki banci saja tersungkun-sungkun, ’Ngkai maka aku si ipilih Jahwe la kalak si deban? Ncukupi sarat nge aku ndalanken tanggung jabap enda?’ Tapi ia la pernah sangsi maka Jahwe nggo milih ia, meriah kal ukurna janah ngataken bujur kal ia nandangi pemere enda. Kalak Kristen si iminaki banci nggejapken kai si ikataken Petrus, ”Sikatakenlah bujur man Dibata, Bapa Tuhanta Jesus Kristus! Erkiteken perkuah AteNa si mbelin, iberekenNa man banta kegeluhen si mbaru, alu mpekeke Jesus Kristus i bas si mate nari. Si enda mereken pengarapen si nggeluh man banta. Erkiteken si enda me maka siarapken pasu-pasu si mbelin jadi sikerajangenta, si isikapken Dibata man anak-AnakNa. Pasu-pasu si man bandu e ibuniken Dibata i surga, i ja pasu-pasu e la banci ceda, macik, ntah pe luntur.” (1 Pet. 1:3, 4) Paksa sekalak si iminaki ngoge kata-kata enda, ia tek kal maka Bapana sangana ngerana man bana.

13. Uga cara rukur sekalak jelma banci berubah paksa iminaki kesah si badia, janah kai si erbanca maka lit perubahen e?

13 Sope kalak Kristen iundang Jahwe guna lawes ku surga, arapen kalak enda nggeluh si rasa lalap i doni. Kalak enda nimai paksana ija doni enda jadi pardis janah lanai lit kejahaten. Mungkin ibayangken kalak enda ka uga ia ngalo-ngalo keluargana ntah pe temanna si ipekeke. Kalak e nimai paksana banci mbangun rumah, tading ije, nuan-nuan janah mangani buahna. (Jes. 65:21-23) Ngkai maka lit perubahen i bas cara rukur kalak enda? Perban melalasa ngadapi kiniseran nge? Ntah bosan ia nggeluh rasa lalap i doni ras la meriah akapna? Ntah pe merhat meteh saja uga nanamna nggeluh i surga? Lang. Sebalikna, Dibata nge si mutusken maka kalak enda nggeluh i surga. Paksa ngundang kalak e, igunakenNa kesahNa si badia guna ngubah cara rukur ras arapen kalak enda.

14. Uga perasan kalak si iminaki kerna kegeluhenna i doni?

14 Adi bage payo kin enda ertina kalak si iminaki e merhat mate? Paulus njelasken uga perasan kalak e. Ibandingkenna kula manusia kalak e ras sada ”kemah” janah nina, ”Kidekah kita ringan i bas kemah si i doni enda, kelsehen kita erkiteken bage beratna babanta. Labo perban ateta nangtangi si male e, tapi sura-suranta eme makeken si mbaru i babona, gelah si ermasap-masap e itelen kegeluhen.” (2 Kor. 5:4) Kalak Kristen si iminaki labo merhat mate. Meriah ukurna ndalani kegeluhenna janah atena ngelayani Jahwe tiap wari radu ras keluarga bage pe teman-temanna. Tapi la soal kai si ilakokenna, tetap niingetna janji Dibata man bana kerna wari si pepagi.​—1 Kor. 15:53; 2 Pet. 1:4; 1 Joh. 3:2, 3; Ket. 20:6.

IUNDANG JAHWE NGE KAM?

15. Kai si mbuktiken maka sekalak jelma lenga tentu iminaki kesah si badia?

15 Banci saja tersungkun–sungkun ukurndu, ’Iundang Jahwe nge aku ku surga?’ Adi bage pengakapndu, cuba ukuri penungkunen enda: Ergiah-giah nge kam erberita si meriah? Meriah nge ukurndu erlajar Pustaka si Badia ras  erlajar kerna ”biak-biak Dibata si terbuni”? (1 Kor. 2:10) Igejapkenndu nge maka ibereken Jahwe hasil si luar biasa paksa kam erberita si meriah? Pentingen nge iakapndu ngelakoken peraten Dibata asangken kai pe? Keleng nge atendu kalak si deban janah ertanggung jabap nge akapndu kam nampati ia gelah ngelayani Jahwe? Idahndu nge bukti maka Jahwe nampati kam i bas bidang-bidang si kitikna kal pe i bas kegeluhenndu? Adi ue jabapndu i bas kerina penungkunen enda, payo nge enda ertina kam iundang ku surga? Lang. Engkai maka lang? Perban kerina juak-juak Dibata banci njabap ue i bas penungkunen ndai, la soal ia iminaki ntah lang. Janah erkelangken kesahNa si badia, Jahwe banci mereken kuasaNa kempak kerina juak-juakNa la soal ija arapenna nggeluh. Si pasti, adi sangsi denga kam nggeluh i surga ntah lang, enda ertina kam labo iundang. Kerina kalak si ipilih Jahwe lanai sangsi maka ia nggeluh i surga! Kalak enda tek!

16. Janari banci sieteh maka la kerina kalak si ngaloken kesah si badia iundang ku surga?

16 I bas Pustaka si Badia, melala juak-juak Jahwe si setia ngaloken kesah si badia tapi labo lawes ku surga. Salah sada eme Johanes Peridiken. Nina Jesus la lit kalak si belinen asangken Johanes, tapi nina, Johanes Peridiken labo merentah jadi raja i surga. (Mat. 11:10, 11) Daud pe ndatken kesah si badia. (1 Sam 16:13) Enda nampati ia ngangkai hal-hal si mbages kerna Jahwe ras nuratken bagin-bagin Pustaka si Badia. (Mar. 12:36) Amin bage, nina rasul Petrus, ’Daud labo nangkih ku surga.’ (Perb. 2:34) Alu kesah si badiaNa, Jahwe mereken kuasa man kalak e guna ngelakoken hal-hal si luar biasa, tapi labo igunakenNa lako ngundang kalak e ku surga. Payo nge enda ertina kalak e kurang setia ntah pe kurang ncukupi sarat guna merentah i surga? Lang. Tapi enda ertina ate Jahwe kalak enda ipekeke guna nggeluh mulihi i Pardis i doni enda.​—Joh. 5:28, 29; Perb. 24:15.

17, 18. (a) Teremen juak-juak Dibata gundari nimai arapen kai? (b) Penungkunen kai si man bahasenta i bas artikel selanjutna?

17 Teremen juak-juak Dibata gundari labo ku surga. Bagi Abraham, Daud, Johanes Peridiken ras nterem dilaki bage pe diberu i bas jaman Pustaka si Badia, kalak e nimai guna nggeluh i doni paksa pemerentahen Dibata mulai merentah. (Heb. 11:10) Lit 144.000 si merentah ras Jesus i surga. Tapi nina Pustaka si Badia, i bas wari-wari pendungi enda sitik nari ngenca kalak si iminaki tading i doni. (Ket. 12:17) Emaka buen arah si 144.000 enda nggo mate janah gundari lit i surga.

18 Tapi adi lit kalak si ngataken maka ia iminaki, uga arusna tanggapen kalak si erpengarapen nggeluh i doni? Adi bas runggunndu lit sekalak si mulai man roti ntah pe minem anggur i bas acara Peringeten, uga arusna perbahanenndu man bana? Janah adi jumlah kalak si iminaki terus reh buena, perlu nge latih ukurndu kerna si e? Banci sijabap penungkunen-penungkunen e i bas artikel selanjutna.

^ [1] (paragraf 4) Perayan Pentakosta mungkin irayaken i bas tanggal si seri paksa hukum Musa ibereken i deleng Sinai. (Kel. 19:1) Emaka mbelin kemungkinenna, tanggal paksa Musa jadi perantara Dibata ras bangsa Israel seri ras tanggal paksa Jesus jadi perantara perjanjin si mbaru antara Dibata ras kalak si iminaki.

^ [2] (paragraf 11) Guna ndatken terbuen keterangen kerna tubuh pedua kaliken, nehen Menara Pengawal, 1 April 2009, halamen 3-11.