Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Jahwe Negu-Negu UmatNa i bas Dalan Kegeluhen

Jahwe Negu-Negu UmatNa i bas Dalan Kegeluhen

”Arah enda kap dalan. Ikutkenlah.”​—JES. 30:21.

ENDE-ENDEN: 65, 48

1, 2. (a) Kai persinget si nggo nelamatken nterem kalak? (Nehen gambar pemena artikel.) (b) Bimbingen kai si nialoken umat Dibata?

”NGADI, PERDIATEKEN, BEGIKEN.” Lebih 100 tahun, papan si risiken kata-kata enda ipasang i perlintasen kereta api i Amerika Utara. Tujunna gelah motor ula tabraken ras kereta api si mentas. Enterem kalak si selamat erkiteken mperdiateken persinget enda.

2 Jahwe labo mereken tanda persinget saja man banta. IbimbingNa umatNa gelah banci nggeluh si rasa lalap janah ndauh i bas bahaya nari. Jahwe bali bagi permakan si perkeleng, si ngarak-ngarak janah mpersingeti biri-biriNa.​—Oge Jesaya 30:20, 21.

TANGTANGNA NARI JAHWE MBIMBING UMATNA

3. Uga maka banci manusia lit i bas dalan si nuju ku kematen?

3 Mulai manusia itepa, ibereken Jahwe perentah ras petunjuk si jelas man umatNa. Contohna i bas Taman Eden. Adi manusia patuh nandangi perentah Dibata, ia banci nggeluh ermeriah ukur si rasa lalap. (Kej. 2:15-17) Tapi Adam ras Hawa nulak bimbingen i bas Bapana si perkeleng. Iikutken  Hawa arahen si iakapna rehna bas nipe nari, Adam pe ngikutken ndeharana. Kai akibatna? Kalak enda ngenanami kiniseran janah dungna mate si rasa lalap. Selain e, erkiteken kalak e la patuh, kerina manusia lit i bas dalan si nuju ku kematen.

4. (a) Engkai manusia merluken petunjuk si mbaru kenca banjir si mbelin? (b) Uga pandangen Dibata kerna kegeluhen teridah i bas perentahNa kerna dareh?

4 Sope banjir si mbelin, Dibata mereken petunjuk man Nuah si nelamatken ia bage pe keluargana. Kenca banjir si mbelin, ilarang Jahwe manusia man ras minem dareh. Engkai? Erkiteken mulai paksa si e, Jahwe ngijinken manusia man daging. Erkiteken perubahen e, manusia merluken petunjuk si mbaru, ”Daging si lit denga darehna la banci ipanndu.” (Kej. 9:1-4) I bas perentah enda, sieteh uga pandangen Dibata nandangi kegeluhen, erkiteken Ia si mpuna. Dibata si Nepa ras si Mereken kegeluhen, jadi lit hakNa erban aturen kerna kegeluhen. Misalna, ilarangNa manusia sibunuhen. I lebe-lebe Dibata, kegeluhen ras dareh e badia, janah iukumNa ise pe si ngelangar petunjukNa kerna si dua enda.​—Kej. 9:5, 6.

5. Kai si man bahasenta, janah kai tujunna?

5 Kenca jaman Nuah, Dibata terus mbimbing umatNa. I bas artikel enda, banci sipelajari piga-piga contoh. Pembahasen enda banci mpegegehi keputusenta guna ngikuti petunjuk Jahwe si mbimbing kita ku doni si mbaru.

BANGSA SI MBARU, PETUNJUK SI MBARU

6. Engkai kalak Israel perlu matuhi Undang-undang Musa, janah uga arusna tanggapen kalak e?

6 I bas jaman Musa, Jahwe mereken petunjuk si jelas man umatNa kerna lagu langkah ras ibadat. Engkai? Sekali nari, keadan nggo berubah. Lebih dua ratus tahun bangsa Israel tading i Mesir. Kalak Mesir nembah kalak mate, nembah berhala, janah mbue perbahanenna si la nghamati Dibata. Paksa umat Dibata ibebasken i bas Mesir nari, kalak e merluken petunjuk si mbaru. Kalak enda jadi bangsa si patuh man Undang-undang Jahwe. Menurut piga-piga pakar, kata Ibrani man ”undang-undang” lit kaitenna ras kata ”ngarahken, negu-negu, ras ngajari”. Undang-undang Musa ngelindungi kalak Israel i bas lagu langkah si la mehuli bage pe i bas agama palsu bangsa-bangsa i sekelewetna. Paksa bangsa e patuh man perentah Dibata, kalak e i pasu-pasu. Tapi, paksa kalak e la patuh, kalak e ngenanami kiniseran.​—Oge Ulangen 28:1, 2, 15.

7. (a) Jelasken ngkai maka ibereken Jahwe petunjuk si mbaru man umatNa. (b) Uga Undang-undang Musa banci jadi pembimbing man bangsa Israel?

7 Petunjuk si mbaru iperluken ka perban Undang-undang Musa nikapken bangsa Israel guna kerehen Jesus Kristus, Mesias. Enda peristiwa si seh kal pentingna gelah peraten Jahwe banci terjadi. Undang-undang e ngingetken bangsa Israel maka ia labo sempurna janah merluken tebusen, eme korban si sempurna si banci nasapken kerina dosa kalak e. (Gal. 3:19; Heb. 10:1-10) Selain si e, Undang-undang Musa pe ngelindungi terombo Mesias janah nampati bangsa Israel guna nandai Mesias paksa ia reh. Jadi, Undang-undang Musa bali bagi ”pengawas [”pembimbing”, NW]” sementara si negu-negu kalak enda ku Kristus.​—Gal. 3:23, 24.

8. Engkai maka perlu ibimbing prinsip-prinsip i bas Undang-undang Musa?

 8 Petunjuk i bas Undang-undang Musa banci ka erguna man banta. Uga carana? Ngadilah kentisik guna mperdiateken prinsip-prinsip i bas Undang-undang e. Amin gia Undang-undang Musa lanai berlaku man banta, melala petunjukna banci denga sijadiken pedoman i bas geluhta tiap wari bage pe i bas ibadat man Jahwe. Dibata merentahken gelah Undang-undang e isuratken gelah banci sipelajari, ndatken bimbingen i bas prinsip-prinsip e nari, janah ngergai ajaren Jesus si ulin asangken Undang-undang e. Begiken kai si ikataken Jesus, ”Enggo ietehndu maka lit ikataken, ’Ola erlua-lua.’ Tapi genduari kukataken man bandu: Ise ngenehen sekalak diberu, jenari leket ukurna ras diberu e, si tuhuna ia enggo erlua-lua i bas ukurna.” Jadi, labo ngenca ula erlua-lua, tapi harus ka situlak perukuren ras sura-sura si la mehuli.​—Mat. 5:27, 28.

9. Engkai maka perlu ibereken Jahwe petunjuk si mbaru?

9 Kenca Jesus reh jadi Mesias, Jahwe mereken petunjuk si mbaru janah lebih mbue perincin kerna peratenNa. Engkai maka enda perlu? I bas tahun 33 M, Jahwe nulak bangsa Israel janah ipilihNa runggun Kristen jadi umatNa. Jadi, keadan umat Dibata berubah ka sekali nari.

PETUNJUK MAN ISRAEL ROHANI

10. Engkai maka ibereken undang-undang si mbaru man runggun Kristen, janah kai bedana undang-undang e ras Undang-undang Musa?

10 Jahwe mereken Undang-undang Musa man bangsa Israel guna ngajarken uga carana nembah Dibata ras ndalani kegeluhen. Mulai abad si pemena, umat Dibata lanai reh i bas sada bangsa saja, tapi i bas melala bangsa bage pe latar belakang. Kalak e igelari Israel rohani. Kalak enda erbahan runggun Kristen janah teriket i bas padan si mbaru. Emaka, Jahwe mereken petunjuk si mbaru si lebih terperinci. Jelas me, ”la erndobah iakap Dibata manusia e. Tep-tep manusia i bas bangsa si apai nari gia, adi ia erkemalangen man Dibata dingen mehuli perbahanenna, ialoken Dibata kap.” (Perb. 10:34, 35) Kalak e ngikutken ”undang-undang Kristus”, si palas utamana eme prinsip-prinsip si isuratken bas pusuhna, labo bas batu bali bagi Undang-undang Musa. Undang-undang si mbaru enda erguna janah mbimbing kalak Kristen i japa pe ia tading.​—Gal. 6:2.

11. Kai dua perentah si ibereken Jesus si lit hubungenna ras ”undang-undang Kristus”?

11 Israel rohani ndatken melala manfaat i bas petunjuk si ibereken Jahwe erkelangken Jesus. Sope padan si mbaru e mulai ipake, Jesus mereken dua perentah si penting. Si pemena eme kerna dahin erberita si meriah. Si peduaken eme kerna lagu langkah kalak Kristen janah uga carana mperlakoken sada ras si debanna. Perentah e berlaku man kerina kalak Kristen, termasuk man banta gundari la soal arapenta nggeluh si rasa lalap i surga ntah pe i doni.

12. Kai si mbaru i bas dahin erberita si meriah?

12 Mbarenda, kalak i bas bangsa si deban si atena ngelayani Jahwe arus reh ku Israel. (1 Raj. 8:41-43) Tapi kenca  si e, Jesus mereken perentah i bas Matius. 28:19, 20. (Oge.) Isuruhna ajar-ajarna ’lawes’ ku kerina jelma. I bas Pentakosta 33 M, icidahken Jahwe maka ateNa gelah berita si meriah iberitaken ku belang-belang doni. I bas wari e, kira-kira 120 anggota runggun si mbaru dem alu kesah si badia janah banci ngerana i bas erbage-bage cakap man kalak Jahudi ras proselit. (Perb. 2:4-11) Kenca e, daerah erberita pe ipebelang. Kalak enda erberita man kalak Samaria, janah i bas tahun 36 M, ku kalak si labo Jahudi si la isunat. Enda ertina kalak Kristen arus erberita man kerina kalak i belang-belang doni!

13, 14. (a) Kai saja si termasuk i bas ”pedah si mbaru” si ibereken Jesus? (b) Kai si banci sipelajari i bas usihen si itadingken Jesus?

13 Ibereken Jesus ka ”pedah si mbaru” kerna uga arusna perbahanenta nandangi turang senina. (Oge Johanes 13:34, 35.) Arus sicidahken kekelengenta man kalak enda tiap wari. Tapi, labo e saja. Kita pe arus nggit mereken kegeluhenta. Enda la iwajibken i bas Undang-Undang Musa.​—Mat. 22:39; 1 Joh. 3:16.

14 Jesus me usihen si mehulina i bas ncidahken kekelengen si la mentingken bana. Tuhu-tuhu keleng kal atena ajar-ajarna emaka nggit ia mate guna kalak e. Ate Jesus pe gelah kerina ajar-ajarna ngusih ia. Jadi, kita pe arus nggit ngenanami kiniseran janah mate guna turang seninanta.​—1 Tes. 2:8.

PENTUNJUK MAN JAMAN SI GUNDARI RAS WARI SI PEPAGI

15, 16. Perubahen kai saja si nialami umat Dibata, janah uga Dibata mbimbing kita?

15 Jesus nangkuhken ”juak-juak si tutus dingen pentar” guna ”mbagiken pangan [rohani] i bas paksana” man banta. (Mat. 24:45-47) Si termasuk ku pangan enda eme erbage petunjuk si penting man umat Dibata adi keadan berubah. Perubahen kai saja si nialami umat Dibata?

16 Kita gundari nggeluh bas ”wari-wari pendungi” janah lanai ndekah, sihadapi kiniseran si seh kal ngerina si lenga pernah terjadi. (2 Tim. 3:1; Mrk. 13:19) Selain si e, Setan ras begu-beguna nggo isampetken surga nari ku doni si erbanca manusia ngenanami kiniseran. (Ket. 12:9, 12) Sidatken ka perentah i bas Jesus nari guna erberita man nterem jelma ras i bas mbue cakap, lebih asa si nggo-nggona!

17, 18. Uga arusna pandangenta nandangi petunjuk si ibereken organisasi Dibata?

17 Organisasi Dibata mereken man banta melala perlengkapen guna erberita. Gunakenndu nge e? I bas perpulungen, sidatken petunjuk kerna uga cara si mehulina nggunakenca. Adi menurutndu i bas Dibata nari nge rehna kerina petunjuk e?

18 Guna ndatken pasu-pasu Dibata, kita perlu mperdiateken kerina petunjuk si ibereken i bas runggun Kristen nari. Adi gundari pe kita patuh, reh nukahna siakap ngikuti petunjuk i bas ’kiniseran si mbelin’ e, paksa kerina doni Setan i kernepken. (Mat. 24:21) Kenca e, kita merluken petunjuk si mbaru guna kegeluhen i bas doni si mbaru si bebas i bas pengaruh Setan nari.

I doni si mbaru, sialoken me kitap-kitap si risiken petunjuk si mbaru guna kegeluhen i Pardis (Nehen paragraf 19, 20)

19, 20. Kitap-kitap kai nge si nandangi ibukaken, janah kai hasilna?

19 I bas jaman Musa, bangsa Israel merluken petunjuk si mbaru, jadi  ibereken Dibata Undang-undang Musa man kalak e. Tapi kedungenna, runggun Kristen arus matuhi ”undang-undang Kristus.” Menurut Pustaka, i doni si mbaru pagi, sialoken kitap-kitap si risiken melala petunjuk si mbaru. (Oge Ketangkasen 20:12.) Mbelin kemungkinenna, kerina kitap enda pagi njelasken kai si niarapken Jahwe i bas manusia nari. Alu mpelajarisa, kerina kalak, termasuk si ipekeke, banci meteh kai peraten Dibata kempak manusia. Bas kitap e, banci sipelajari terbuen kerna perukuren Jahwe. Janah, erkiteken nggo lebih ngangkai Pustaka, i bas Pardis pagi kita sikeleng-kelengen, siergan, janah sihamaten. (Jes. 26:9) Bayangken uga buena si banci sipelajari ras siajarken man kalak si deban alu petunjuk si ibereken Jesus Kristus, Rajanta!

20 Adi siikutken petunjuk i bas kitap-kitap e janah tetap setia kempak Jahwe seh ngasa ujin si pendungi, gelarta banci isuratken seh rasa lalap i bas ”kitap kegeluhen”. Ertina, kita banci nggeluh si rasa lalap! Jadi kita perlu NGADI kentisik guna ngoge Pustaka si Badia, MPERDIATEKEN kai pelajarenna man banta, janah MEGIKEN ras matuhi petunjuk si ibereken Dibata gundari. Alu bage, kita banci selamat i bas kiniseran si mbelin ras erlajar kerna Jahwe, Dibatanta si pentar ras si perkeleng, seh rasa lalap.​—Peng. 3:11; Rom. 11:33.