Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 KEGELUHEN KRISTEN

Kerja Sama guna Erberita i bas Daerah si Melala Bahasana

Kerja Sama guna Erberita i bas Daerah si Melala Bahasana

Biasana reh riahna akap kalak megiken berita si meriah adi sipeseh bas bahasana sendiri. Banci jadi enda me alasenna bas Pentakosta 33 M, iban Jahwe “kalak Jahudi si tutus nembah Dibata si rehna arah erbage bangsa nari” megi berita si meriah bas ‘cakapna sekalak-sekalak,’ amin pe banci jadi iangkana nge bahasa si biasa ipake kalak, misalna bahasa Heber ntah pe Junani. (Perb 2:5, 8) Gundari, melala runggun si beda-beda bahasana, tapi seri daerahna erberita. Ateta ula min rusursa sidahi sada daerah, gelah ula segat ate kalak kita. Emaka, uga carana gelah perberita si beda bahasana banci kerja sama?

  • Cakapken (Kua 15:22): Arus icakapken pengawas dinas i bas tiap runggun uga cara si mehulina erberita i bas daerah si bage. Banci jadi ulin akap runggun bas bahasa si deban adi runggunta la erberita ku daerahna, perban banci saja la mbelang daerah kalak e erberita. Tapi adi la kapna ia ngasup erberita bas daerah e perban nggo mbelangsa daerahna, banci ipindokenna gelah runggunndu si erberita i je. Tapi adi lit kalak si berminat i je, perlu sikataken man runggun si ndai. (od-IN 93 par. 37) Ntah banci jadi, ipindoken runggun bas bahasa si deban gelah sidarami kalak bas daerahta erberita si make bahasa si ipake runggun ndai. Adi sidat, banci sikataken alamatna man runggun ndai. (km-IN 7/12 5, kotak) Janah ingetlah, mon-mon labo sada bahasa ngenca si ipake bas sada rumah. Adi sibereken ateta alamat kalak ndai man runggun si deban, arus sisungkuni ia lebe banci ntah lang sibereken alamatna, perban banci saja lit hukum si ngelarang kita mpebetehken alamat kalak si deban.

  • Kerja sama (Ep 4:16): Ikutilah petunjuk si ibereken pengawas dinas bas runggunndu. Banci jadi lit si erlajar Pustaka ras kam si riahen kapna make bahasa si deban. Banci jadi, pelajaren e lebih kena ku pusuhna janah reh terna ia erban perubahen adi sipindoken runggun ntah pe kelompok si make bahasana e si nampati ia erlajar Pustaka.

  • Erban persiapen (Kua 15:28; 16:1): Adi kalak si ijumpaindu make bahasa si deban, banci denga nge kam erberita man bana. Banci pikirkenndu lebe bahasa kai saja si lit i daerahndu, janah banci download-ndu Pustaka ras video bas bahasa e. Banci ka pelajarindu arah JW Language uga ngataken mejuah-juah bas bahasa e.