Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 KEGELUHEN KRISTEN

Uga Carana Kam Banci Erdame Lebe ras Turang Seninandu?

Uga Carana Kam Banci Erdame Lebe ras Turang Seninandu?

Bayangken kam tading bas jaman Jesus i Galilea. Kam sangana erdalan ku Jerusalem guna ndahi Perayan Sapo-sapo. Melala turang senina si reh arah erbage ingan si ngikuti perayan i kota e. Iberekenndu atendu sada persembahen man Jahwe. Ibabandu sada kambing janah ipala-palaindu erdalan radu ras jelma si enterem e, gelah banci seh ku rumah pertoton. Sanga kam nggo seh i je, nggo melala si mereken korban persembahenna. Dungna, seh me gilirenndu mereken kambingndu man imam. I bas paksa si e, rempet ingetndu turang seninandu si lit masalahna ras kam janah banci saja ia lit itengah jelma si enterem e ntah pe i kota e. Ituriken Jesus kai si arus ilakokenndu. (Baca Matius 5:24.) Uga kam banci erdame ras turang seninandu bagi si iperentahken Jesus? Ban tandana man jabapen si benar bas daftar i teruh enda.

KAM ARUS . . .

  • nggit ngerana man turang seninandu adi pas kapndu alasenna nembeh man bandu

  • ngataken maka turang seninandu e nukahsa megelut ras nggit ndarami salah kalak

  • mbegiken alu sabar sanga turang seninandu nuriken isi pusuhna. Amin gia la iangkaindu kerina, alu tutus mindo maaf kam man ia perban nggo ceda kel ukurna bandu, bage pe akibat arah perbahanen si la isengaja e

TURANG SENINANDU ARUS . . .

  • ndarami dukungen man turang senina si deban bas runggun alu nceritaken uga kam erban ia kecewa

  • ngerawai kam, turikenna kerina kesalahenndu alu jelas janah isuruhna kam gelah ngakui kesalahenndu

  • ietehna maka kam nggo erjuang gelah meteruk rukur ras pang guna ndahi ia, janah imaapkenna kam arah pusuhna nari

Amin gia gundari lanai kita mpersembahken binatang, bagi si iajarken Jesus, kai hubungenna erdame ras turang seninanta ras ibadat si ngena ate Dibata?