Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PENUNGKUNEN 2

Uga Adi Kurang Jile Kuakap Bangku?

Uga Adi Kurang Jile Kuakap Bangku?

ENGKAI ENDA PENTING

Lit piga-piga hal si pentingen asangken kai si idahndu i bas cermin.

KAI SI ILAKOKENNDU?

Bayangken cerita enda: Sanga Julia ercermin mbur kal iakapna bana. ”Terkertangen min sitik nari aku”, nina i bas pusuhna—aminna pe orang tuana ras temanna ngataken ia ”kertang”.

Kenca e, Julia ersura-sura ngelakoken diet si erbahaya guna ngurangi berat badanna ”2,5 kilogram”. Carana, ipediatna ia lumben piga-piga wari dekahna . . .

Adi kam pe nggejapken kai si igejapken Julia, kai nge si ilakokenndu?

UKURI LEBE!

Carandu rukur kerna dirindu banci saja seri ras gambarndu si lit i bas cermin si ceda

Labo salah adi perdiatekenndu penampilenndu. Pustaka pe mujiken penampilen piga-piga dilaki ras diberu bagi, Sara, Rahel, Abigail, Jusup, ras Daud. Pustaka ngataken maka sekalak diberu si gelarna Abisah ”seh kal jilena”.—1 Raja-Raja 1:4.

Tapi nterem anak muda si terobsesi man penampilenna. Si enda banci erban piga-piga masalah. Perdiateken si enda:

  • I bas sada penelitin, 58 persen singuda-nguda mbursa iakapna bana, situhuna 17 persen ngenca si tuhu-tuhu mbur.

  • I bas penelitin si deban, 45 persen diberu situhuna kurang berat badanna, tapi mbursa denga iakapna bana!

  • I bas upaya nurunken berat badan, piga-piga anak muda jadi korban anoreksia —eme kelainen perilaku man si mbahayaken kegeluhen, situhuna enda seri ras la man-man.

 Adina kam ngadapi gejala anoreksia ntah pe kelainen man si debanna, kam perlu penampat. Turikenlah man orang tuandu ntah pe kalak dewasa si itekindu. Nina Pustaka, ”Teman tetap encidahken atena keleng, kai gunana sekalak senina adi labo ikut i bas nggejapken kiniseran?”Kuan-kuanen 17:17.

KAM BANCI ERBAN PERUBAHEN SI MEHULI!

Situhuna, sifat-sifatta banci mpengaruhi pandangen kalak man banta. Perdiateken Absalom anak Raja Daud. Nina Pustaka si Badia:

’La lit sekalak pe si terberita si bagi ia jilena rupana. . . . Kai pe la lit si man pandangen.’2 Samuel 14:25.

Tapi, Absalom kalak si meganjang rukur, ambisi, ras penghianat! Emaka, Pustaka si Badia labo nuriken Absalom selaku kalak si mehuli; tapi selaku kalak si la meteh mela, la setia ras pemunuh.

Perban si e, Pustaka mereken kita pedah si mehuli:

”Pakekenlah manusia si mbaru.”Kolose 3:10.

”La perlu ibahanndu barang-barang tambahen si arah darat. . . . Tapi bahanlah maka jilendu e rehna i bas pusuh nari.”1 Petrus 3:3, 4.

Amin gia labo salah adi atendu mejile penampilenndu, tapi si ndahuh pentingen asangken penampilen eme sifat-sifatndu. Asum waktu erdalan, sifat-sifatndu si mehuli banci lebih menarik asangken daging si kekar ntah pe rupa si mejile! ”Rupa si mejile banci erban kalak tertarik”, nina Viona, sekalak singuda-nguda, ”Tapi banci dekahen inget kalak sifat ras perbahanen si mehuli.”

NEHEN UGA DIRINDU SITUHUNA

Rusur nge kam kecewa nandangi penampilenndu?

Pernah nge kam ersura-sura ngelakoken operasi plastik ntah pe diet si erbahaya guna mpejile bandu?

Adi ngasup kam ngubah penampilenndu kai si atendu iubahndu? (Pilih jabapenndu.)

  • GEDANG

  • BERAT BADAN

  • BUK

  • BENTUK TUBUH

  • AYO

  • WARNA KULIT

Adi jabapenndu ue man dua penungkunen si pemena ras ipilihndu telu ntah pe lebih i bas bagin peteluken, cuba ukuri enda: mbelin kemungkinenna mejile nge iakap kalak kam labo

bagi kam natap dirindu. Kita sendiri nge si megati kurang puas nandangi penampilenta.1 Samuel 16:7.