Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PENUNGKUNEN 1

Ise Nge Aku Situhuna?

Ise Nge Aku Situhuna?

ENGKAI ENDA PENTING

Meteh ise kam situhuna ras uga pendirinndu, banci nampati kam erban keputusen si mehuli sanga kam i bas tekanen.

KAI SI ILAKOKENNDU?

Bayangken cerita enda: Sepuluh menit denga Klara lit i bas pesta e, janah ibegina sora si itandaina arah pudina.

”Engkai maka kam cinder saja?”

Itulihken Klara ku pudi, janah idahna temanna Jesika maba dua botol bir si enggo ibuka tutupna. Ieteh Klara inemen e lit alkoholna. Ibereken Jesika sada man Klara janah nina, ”Kita me enggo galang, enggom banci kita minem, me bage akapndu?”

Itulak Klara atena tapi mehangke ia erkiteken Jesika e temanna, mbiar Klara kalak erpengakap la meriah erteman ras ia. Janah, Jesika e teman si mehuli iakapna. ’Adi minem saja me labo dalih’, nina bas pusuhna. ’Enda me labo seri ras make narkoba.’

Adi kam jadi Klara, kai nge si ilakokenndu?

UKURI LEBE!

Gelah banci erban keputusen si mehuli i bas situasi e, perlu lit jati diri. Jati diri eme kengasupen rukur si mpebetehken man bandu ise kam situhuna ras kai pendirinndu. Adi igunakenndu kengasupenndu rukur, kam nge si ngatur kegeluhenndu labo kalak si deban.1 Korinti 9:26, 27.

Uga kam banci mpebelin kengasupenndu rukur? Alu njabap penungkunen enda kam banci tersampati.

 1 KAI SAJA KELEBIHENNDU?

Kam banci lebih percaya diri adi ietehndu kai saja kelebihenndu ras sifat-sifatndu si mehuli.

CONTOH I BAS PUSTAKA: Rasul Paulus nuratken, ”Banci jadi kurang beluhku ngerana, tapi labo si enda nuduhkenca maka kurang pemetehku.” (2 Korinti 11:6) Perban Paulus ngangkai Tulisen-Tulisen si Badia alu mehuli, ngasup ia nuriken pendirinna sanga itentang kalak si deban. La ipediatna perbahanen kalak si la mehuli erban lemah kinitekenna.2 Korinti 10:10; 11:5.

PERIKSA DIRINDU: Iteruh enda, tulisken kelebihen ras keterampilenndu.

Gundari tulisken sifatndu si mehuli. (Misalna, kalak si ermediate nge kam? melumbar nge kam? banci nge kam iarapken? tepat waktu nge kam?)

2 KAI SAJA KEKURANGENKU?

Bali bagi sada rante si megegeh banci peltep gara-gara sada mata rantena karaten, bage ka pe jati dirindu banci ceda adi ipediatndu kekurangenndu ngatur geluhndu.

CONTOH I BAS PUSTAKA: Paulus nggejapken kekurangenna. Isuratkenna, ”Pusuh peratenku ermeriah ukur nandangi Undang-Undang Dibata, tapi kugejapken lit sada biak si deban i bas ringringku si erlawanen ras biak si payo kuakap i bas ukurku. Si enda me erbahanca maka aku enggo itaban biak dosa si ringan i bas ringringku.”Roma 7:22, 23.

PERIKSA DIRINDU: Kai saja kekurangenku si perlu kukendaliken?

 3 KAI SAJA TUJUNKU?

Nggit nge kam nangkih taksi janah nuruh supirna mutar-mutar seh ngasa keri bensinna? Enda perbahanen si bodoh janah sia-sia!

Kai pelajarenna? Tujun, erban geluhndu lit arahna. Janah ietehndu ku ja kam arusna, janah lit rencanandu guna ndatkenca.

CONTOH I BAS PUSTAKA: Rasul Paulus nuratken, ”E me sabapna maka pinter aku kiam.” (1 Korinti 9:26) Asangken monce-once ntah pe pasrah, Paulus netapken tujunna janah nggeluh sentudu ras tujunna e.Pilipi 3:12-14.

PERIKSA DIRINDU: Iteruh enda, tulisken telu tujun si idatkenndu atendu i bas sada tahun enda.

4 KAI SAJA KINITEKENKU?

Adi paguh jati dirindu, kam bali bagi batang kayu si uratna megegeh, ngasup ngadapi angin si meter

Adi la lit kinitekenndu, kam banci jadi kalak si monce-once. Seri bagi bendoran, kam banci salih-salih gelah bali ras teman-temanndu—enda ncidahken maka la lit jati dirindu.

Adi kam nggeluh sentudu ras kinitekenndu, enda ncidahken lit pendirinndu la soal kai si ilakoken kalak si deban.

CONTOH I BAS PUSTAKA: Paksa nabi Daniel nguda denga, ”itetapkenna i bas ukurna” guna matuhi Undang-Undang Dibata, aminna gia ia ndauh i bas keluargana. (Daniel 1:8) Alu bage, tetap lit pendirinna. Daniel nggeluh sentudu ras kinitekenna.

PERIKSA DIRINDU: Kai saja kinitekenndu? Misalna: Tek nge kam man Dibata? Adi ue, engkai? Kai si erbahanca kam tek maka Dibata e lit?

Tek nge kam nandangi aturen moral Dibata si erguna man bandu? Adi ue, engkai?

Kedungenna, jadi kalak si uga atendu kam—bulung-bulung si nartar si iembus angin ku jah ku je, ntah jadi batang kayu si paguh nahan angin si meter? Pegegehilah jati dirindu, maka kam pe banci paguh bagi batang kayu e. Janah, kam pe banci njabap penungkunen, Ise nge aku situhuna?