Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 14

Kai Saja Sekolah si Tersedia man Kerina Perintis?

Kai Saja Sekolah si Tersedia man Kerina Perintis?

Amerika Serikat

Sekolah Gilead, Patterson, New York

Panama

Pendidiken rohani nggo ndekah jadi ciri khusus Saksi-Saksi Jahwe. Lit piga-piga sekolah si tersedia man kalak si mereken kerina waktuna lako mberitakan Kinirajan, gelahna banci ’ndalanken tanggung jabapna jadi suruh-suruhen Dibata’.2 Timotius 4:5.

Sekolah Dinas Perintis. I bas ujung tahun si pemena ia jadi perintis biasa, ia terdaftar jadi siswa i bas sekolah enda si dekahna enem wari. Sekolah enda banci saja ilakoken i Bale Kinirajan si ndeherna. Tujun sekolah e lako nampati sekalak perintis gelah reh deherna ras Jahwe, reh berhasilna i bas erbage bentuk pelayanen, janah gelah tetap setia ndalanken tugasna.

Sekolah Perberita Kinirajan. Sekolah si dekahna dua bulan enda irancang guna ngajari perintis-perintis si enggo erpengalamen ras si nggit nadingken kutana, guna ngelayani ijapa pe ia iperluken. Kalak e tempa-tempa ngaloi ’Enda aku, suruhlah aku’, bagi usihen si itadingken Jesus Kristus, Perberita si Meriah Simbelinna si pernah ngelayani i doni. (Jesaya 6:8; Johanes 7:29) Erkiteken ndauh i bas kuta ntah pe negerina nari, ia mungkin perlu nesuaiken dirina kempak kebiasan geluh si lebih sederhana. Kebudayan, iklim ntah pe cuaca, janah erbage pangan banci saja beda kal ras si lit i kuta ntah pe negeri asalna. Bage ka pe, kalak e mungkin saja perlu mpelajari cakap si mbaru. Sekolah enda nampati turang senina sada kiniteken si anak perana ras singuda-nguda denga bage ka pe pasangen si enggo erjabu, si umurna 23 seh ku 65 tahun, gelahna dem alu biak-biak rohani si iperluken i bas dahinna. Janah, kalak e isampati guna ndatken erbage keterampilen gelah reh bancina i pake Dibata ras organisasiNa.

Sekolah Pustaka si Badia Gilead Menara Pengawal. I bas cakap Heber, kata ”Gilead” ertina ”Gun-gunen si Jadi Saksi”. Kenca sekolah e ibenaken tahun 1943, lebih 8.000 lulusenna enggo iutus jadi utusen injil lako mereken kesaksin ”seh ku kerina doni”, janah asilna luar biasa. (Perbahanen Rasul-Rasul 13:47) Tangtangna lulusen Gilead seh ku Peru, lenga lit runggun i negeri e. Genduari, nggo lit lebih 1.000 runggun i je. Paksa utusan injil kami mulai ngelayani i Jepang, la lit sepuluh kalak pe Saksi i jah. Tapi gundari, nggo lebih 200.000 Saksi i negeri e. Pelatihen si ibereken i Gilead si dekahna lima bulan enda, termasuk ka nge mpelajari Pustaka si Badia alu lengkap dingen tepat. Si iundang ku sekolah Gilead eme perintis istimewa, utusen injil, si erdahin i kantor cabang ntah pe pertua keliling. Sekolah e mereken pelatihen khusus man kalak enda, gelah dahin lako mberitaken berita si mehuli i belang-belang doni reh paguhna.

  • Kai tujunna Sekolah Dinas Perintis?

  • Sekolah Perberita Kinirajan irancang man ise?