Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 24

Uga nge Pendahin Kami i Belang-Belang Doni Ibiayai?

Uga nge Pendahin Kami i Belang-Belang Doni Ibiayai?

Nepal

Togo

Inggris

Organisasi kami ncetak ras mbagiken ratusen juta Pustaka si Badia ras publikasi si debanna tiap tahun alu la nggalar. Kami majekken janah mpesikap ras mpekena melala Bale Kinirajan ras kantor cabang. Kami mereken sokongen ribun sierdahin Betel ras utusan injil, janah kami pe mereken penampat guna kemanusian paksa lit mara. Mungkin tersungkun-sungkun kam, ’Uga nge enda kerina ibiayai?’

Kami la pernah mindo persepuluhen, adangen, ntah pe kolekte. Amin gia biaya man dahin kami guna mberitaken berita si meriah seh kal lalana, kami la pernah mindo-mindo sen. Lebih seratus tahun si nggo lewat, terbiten majalah Sora Ermomo si peduaken ngataken maka tek kami Dibata Jahwe pasti nampati kami, janah kami ”la kal pernah mindo-mindo ntah pe ngarap gelah manusia si nampatisa”—janah memang la nggo pernah!Matius 10:8.

Pendahin kami idukung arah sumbangen sukarela. Melala kalak ngergai pendidiken kerna Pustaka si Badia si nilakoken kami ras mereken sumbangen. Saksi-Saksi pe alu ukur meriah mereken waktu, tenaga, sen, ras sidebanna gelah jadi peraten Dibata i belang-belang doni. (1 Kronika 29:9) Kerina si atena mereken sumbangen banci tamakenna ku bas kotak sumbangen si lit i Bale Kinirajan ras ingan kebaktin. Ntah pe banci mereken sumbangen arah situs web kami, jw.org. Buen sen si nialoken rehna arah kalak si biasa-biasa saja, bali bagi diberu si enggo mbalu si musil si ipuji Jesus perbahan namaken dua peser ku ingan persembahen i rumah pertoton. (Lukas 21:1-4) Maka, ise pe banci alu ratur ”nerapken sada bagin” gelah mereken ”sue ras si enggo itetapkenna i bas ukurna”.1 Korinti 16:2; 2 Korinti 9:7.

Kami tek maka Jahwe pasti nge terus erban tergiah ukur kalak si ’mehamat man BaNa guna mpersembahken ulih pendahinna si mehulina’ gelah jadi peraten Dibata alu dahin mberitaken berita si meriah.Kuan-kuanen 3:9.

  • Kai si mbedaken organisasi kami ras agama sideban?

  • Man kai saja sumbangen sukarela igunaken?