Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Surat arah Badan Pinpinen

Surat arah Badan Pinpinen

Nina Pustaka, kita arus “jadi guru.” (Heb. 5:12) Cuba bayangken, Jahwe me Guru si mantapna, janah ipindoNa kita guna ngajari kalak kerna Ia. Tugasta eme ngajarken kebenaren kerna Jahwe i bas keluarga, runggun, bage pe i bas pelayanen. Enda tugas si penting janah luar biasa. Uga carana gelah banci silakoken?

Jawapenna lit i bas surat rasul Paulus man Timotius, “Teruslah kam mbaca i lebe-lebe jelma si nterem alu tutus, mereken nasehat, ras ngajar.” Nina Paulus ka, “Alu bage iselamatkenndu dirindu bage pe kalak si megiken kam.” (1 Tim. 4:13, 16) Berita si ipesehndu e banci nelamatken kalak. Emaka siusahakenlah gelah reh beluhna mbaca ras ngajar. Buku enda banci nampati kam ngelakokenca. Kai saja kin si lit bas buku enda?

I bas tiap halamen lit ayat si risiken pedah Pustaka si lit hubungenna ras pelajaren si ibahas ntah pe risiken contoh kerna uga carana ndalanken pelajaren e

Jahwe me “Guru si Hebatna.” (Jes. 30:20, Terjemahan Dunia Baru) Memang, buku enda banci nampati kam gelah reh beluhna mbaca ras ngajar, tapi ingetlah maka berita si ipesehndu e rehna arah Jahwe janah Ia me si narik kalak ku Ia. (Joh. 6:44) Emaka, lalaplah ertoto mindo kesah si badia, janah lalaplah gunaken Pustaka. Teruslah ajarken kai nina Jahwe, ula pendapatndu sendiri. Usahakenlah gelah kalak si megiken kam reh kelengna atena Jahwe.

Enggo ipilih kam guna ngajarken berita si seh kel pentingna e. Tek kami maka adi ipindondu “gegeh si ibereken Dibata,” pasti kam berhasil.​—1 Pet. 4:11.

Teman-temanndu sada dahin,

Badan Pinpinen Saksi-Saksi Jahwe