Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL DUA PULUH DUA

Setia Ia Ngadapi Erbage Ujin

Setia Ia Ngadapi Erbage Ujin

1, 2. Kai si banci saja iarapken Petrus sanga Jesus ngajar i Kapernaum, tapi kepeken kai si terjadi?

LA TENANG Petrus ngenehen ayo kalak si lit i sekelewet Jesus. Kalak enda paksana i sinagoga i Kapernaum. Petrus tading i kuta e. Usahana i bas penangkapen nurung lit i je, i pantai utara Dano Galilea. Teman, keluarga, bage pe teman bisnisna nterem tading i je. Pasti merhat kal Petrus gelah kalak si sada kuta ras ia ngenehen Jesus bagi cara ia ngenenca, janah nggejapken keriahen ukur bagi si nggo igejapkenna erkiteken erlajar kerna Kinirajan Dibata i bas guru si mbelinna enda nari. Tapi, kemungkinenna enda la banci terjadi.

2 Enterem kalak lanai nggit megiken Jesus. Lit si terang-terangen jungut-jungut, la setuju nandangi beritana. Tapi, si erbanca latih kal ukur Petrus eme tanggapen piga-piga murid Jesus. Lanai teridah keriahen ukur i bas ayona erkiteken ndatken pemeteh si mbaru, erkiteken ndatken pemeteh si erbagesna, bage pe erkiteken erlajar kebenaren. Gundari, teridah kalak e kurang senang janah merawa. Lit si ngataken maka ajaren Jesus e la bagi si iarapkenna. Erkiteken lanai nggit megikenca, itadingken kalak e sinagoga, janah lanai nggit ngikuti Jesus.—Oge Johanes 6:60, 66.

3. Kiniteken Petrus nampati ia ngelakoken kai?

3 Enda waktu si sulit man Petrus bage pe man rasul-rasul si deban. Lenga kal iangkai Petrus kai si ikataken Jesus i bas wari e. Pasti banci iangkai Petrus ngkai maka ciga ate kalak megiken ajaren Jesus erkiteken lenga iangkaina. Kai si ilakoken Petrus? Labo enda tangtangna kesetianna man Tuanna iuji, janah labo ka si terakhir. Mari sibahas uga kiniteken Petrus nampati ia berhasil ngadapi erbage tantangen janah tetap setia.

Setia Paksa Kalak si Deban Lanai Setia

4, 5. Uga tindaken Jesus ertentangen ras si iarapken nterem jelma?

4 Rusur Petrus sengget iban Jesus. Piga-piga kali, tindaken  Tuanna bage pe carana ngerana ertentangen ras si iarapken nterem jelma. Sada wari ngenca ope si e, ibere Jesus ribun kalak man alu mukjizat. Asilna, ijadiken kalak atena ia jadi raja. Tapi, mamang ate jelma si nterem ibanna sabap lawes ia janah isuruhna ajar-ajarna nangkih ku perahu gelah ngepar ku Kapernaum. Sanga murid-murid paksana erlayar i bas berngi e, mulihi kalak e sengget iban Jesus erkiteken erdalan ia i babo lau Dano Galilea si ergalumbang. Enda mere pelajaren si penting man Petrus kerna kiniteken.

5 Pepagina, mis idapeti kalak enda nterem jelma nggo reh ku lepar dano. Tapi, kalak e reh erkiteken merhat ngidah Jesus nikapken mulihi pangan alu mukjizat, labo erkiteken melihe nandangi kebenaren rohani. Ipersingeti Jesus kalak enda sabap merangap ia. (Joh. 6:25-27) Pembahasen enda iterusken ku sinagoga i Kapernaum. I je ilakoken Jesus mulihi kai si ertentangen ras si iarapken nterem jelma sanga iajarkenna atena sada kebenaren si penting tapi la menukah.

6. Perumpaman kai si ibereken Jesus, janah uga tanggapen kalak?

6 Ate Jesus gelah kalak ngenen ia, labo selaku si nikapken pangan jasmani saja, tapi sebalikna selaku si nikapken pangan rohani i bas Dibata nari, selaku pribadi si kegeluhen ras kematenna banci erban kalak si deban nggeluh si rasa lalap. Emaka, ipesehna sada perumpaman, alu mpeseri dirina bagi manna, roti si nusur i bas surga nari sanga jaman Musa. Sanga lit si keberaten, dungna igunaken Jesus perumpaman si jelas, alu ngataken maka sekalak jelma perlu man daging ras minem darehna gelah banci ndatken kegeluhen. I bas paksa si e me, reh nembehna ate kalak. Lit si ngataken, ”Pengajarenna enda meserasa. Ise nge ngasup megikenca?” Ajar-ajar Jesus pe nterem si ngadi ngikuti ia. *Joh. 6:48-60, 66.

7, 8. (a) Kai si lenga iangkai Petrus kerna tanggung jabap Jesus? (b) Uga Petrus njabap penungkunen si ibereken Jesus man rasul-rasulna?

7 Kai si ilakoken Petrus? Pasti mamang ka atena megi kata-kata Jesus e. Lenga iangkaina maka arus Jesus mate gelah banci ngelakoken peraten Dibata. Tapi, tergoda nge Petrus nadingken Jesus i bas wari e bagi ajar-ajar si deban si la lit pendirinna? Lang; lit si penting si mbedaken Petrus ras kalak e. Kai kin e?

8 Itulihken Jesus rasul-rasulna janah ngataken, ”Kam pe itadingkenndu atendu aku?” (Joh. 6:67) Ngerana ia man rasul-rasulna si sepuluh dua kalak, tapi Petrus si ngaloisa. Enda rusur terjadi.  Banci saja Petrus si metuana i bas kalak e. Si pasti, ia terus terang kal ngerana lebih asa si deban; kemungkinen, jarang kal la ituriken Petrus kai si lit i bas pusuhna. I bas kejadin e, si lit bas pusuhna eme kata-kata si erbanca kena ku pusuh janah la terlupaken enda, ”O Tuan, kempak ise kami lawes? Katandu kap si mereken kegeluhen si tuhu-tuhu si la erkeri-kerin.”—Joh. 6:68.

9. Uga Petrus ncidahken kesetian man Jesus?

9 La kin kena ku pusuhndu kata-katana e? Kiniteken Petrus man Jesus nampati ia mpebelin sifat si seh kal mehergana eme kesetian. Jelas kal idah Petrus maka Jesus ngenca Juru Selamat, janah ibereken Jesus keselamaten arah ajarenna kerna Kinirajan Dibata. Ieteh Petrus maka bicara lit pe si erbanca mamang atena, la lit ingan si deban si banci idahina adi datna atena pasu-pasu Dibata ras kegeluhen si rasa lalap.

Perlu kita setia man ajaren Jesus, amin gia e erban kita sengget erkiteken la siangkai ntah pe la bagi ukurta

10. Uga kita gundari banci ngusih kesetian Petrus?

10 Bage ka nge perasanndu? Seh kal sayangna, nterem kalak i doni enda gundari ngaku ngkelengi Jesus tapi la setia sanga iuji. Adi sicidahken ateta kesetian situhu-tuhu man Kristus, arus seri perukurenta bagi Petrus nandangi ajaren Jesus. Arus sipelajari, siangkai, janah nggeluh sentudu ras ajarenna, amin gia e erban kita sengget erkiteken la siangkai ntah pe la bagi ukurta. Adi terbukti kita setia, banci siarapken nggeluh si rasa lalap bagi si iarapken Jesus man banta.Oge  Masmur 97:10.

Setia Paksa Ibere Persinget

11. Ku ja ibaba Jesus pengikut-pengikutna? (Nehen ka cataten i teruh.)

11 La ndekah kenca wari-wari si sibuk e, ibaba Jesus rasul-rasulna ras piga-piga ajar-ajarna ku ingan si ndauh i utara. Tampuk Deleng Hermon si ersalju, i baleng Taneh Perjanjin bagin utara, maun-maun teridah arah Dano Galilea nari. Reh dekahna, teridah reh ganjangna deleng e asum kalak enda reh deherna, ngikuti dalan si nangkeng ku kuta-kuta i deher Kesarea Pilipi. * I bas daerah si mejile enda, si menam kerina Taneh Perjanjin teridah i selatan, ibere Jesus sada penungkunen si penting man pengikut-pengikutna.

12, 13. (a) Engkai isungkuni Jesus pendapat nterem jelma kerna dirina? (b) Arah kata-katana man Jesus, uga Petrus ncidahken kiniteken situhu-tuhu?

12 ”Ise kin aku nina kalak?” isungkunna erkiteken merhat ia metehsa. Banci sibayangken itatap Petrus mata Jesus, janah mulihi  igejapkenna kiniulin Tuanna e ras kepentarenna si luar biasa. Ermediate Jesus nandangi kesimpulen si iban kalak si pulung arah kai si idahna ras si ibegina. Ijabap ajar-ajar Jesus penungkunen e, ibelaskenna mulihi piga-piga pendapat kalak si la benar kerna ise kin situhuna Jesus. Tapi, Jesus merhat meteh terbuen. Seri nge pendapat ajar-ajarna ras pendapat kalak si deban? Emaka nungkun ia, ”Kam kuga nindu? Ise kin akapndu aku?”—Luk. 9:18-20.

13 Minter ka ijabap Petrus. Alu kata-kata si jelas ras tegas, iturikenna kesimpulen kai si lit i bas pusuh jelma si nterem. ”Kam kap Mesias, Anak Dibata si nggeluh,” nina. Banci sibayangken Jesus muji Petrus alu mehuli janahna cirem. Jesus ngingetken Petrus maka Dibata Jahwe, labo manusia, si erban kebenaren penting enda jadi jelas kal man kalak si tuhu-tuhu erkiniteken. Idat Petrus kesempaten guna ngangkai salah sada kebenaren si mbelinna si lenga ipebetehken Jahwe eme ise situhuna Mesias, ntah pe Kristus, si nggo ndekah ijanjiken!—Oge Matius 16:16, 17.

14. Hak istimewa penting kai saja si ibereken Jesus man Petrus?

14 Kristus enda me si igelari i bas nubuat i bas jaman si nai selaku batu si iambekken tukang. (Msm. 118:22; Luk. 20:17) Erpalasken nubuat-nubuat enda, ipebetehken Jesus maka ipajekken Jahwe pagi sada runggun i datas batu, ntah pe batu karang, bagi si nggo iangkai Petrus. Kenca si e, iberena Petrus piga-piga hak istimewa si seh kal pentingna i bas runggun e. Labo ibanna Petrus si pentingna asangken rasul-rasul si deban, bagi pengakap piga-piga kalak, tapi iberena piga-piga tanggung jabap. Iberena Petrus kunci-kunci kinirajan. (Mat. 16:19) Petrus me pagi si ndatken hak istimewa mbuka arapen guna bengket ku Kinirajan Dibata man telu terpuk manusia, si pemena man kalak Jahudi, peduaken man kalak Samaria, janah peteluken man kalak si labo Jahudi.

15. Kai nina Petrus man Jesus, janah ngkai?

15 Tapi, i bas pudi wari ikataken Jesus maka kalak si nggo ibere melala, i bas ia nari ituntut melala tanggung jabap, janah kata-kata e terbukti benar i bas diri Petrus. (Luk. 12:48) Terus ipebetehken Jesus erbage kebenaren penting kerna Mesias, termasuk maka lanai ndekah pasti inanamina kiniseran ras kematen i Jerusalem. Gulut kal ukur Petrus megikenca. Iawinna Jesus janah nina, ”Mbera-mbera ipedauh Dibata si e i bas kam nari o Tuan! Labo banci jadi e man bandu!”—Mat. 16:21, 22.

16. Uga Jesus mpersingeti Petrus, janah pedah si erguna kai si banci sidatken i bas kata-kata Jesus nari?

 16 Tentu mehuli nge ukur Petrus, emaka jabapen Jesus pasti erban ia sengget. Ipudiken Jesus me Petrus, itatapna ajar-ajarna si deban, si kemungkinen bage ka perukurenna, janah nina, ”Laweslah i bas aku nari [ntah pe, ”Laweslah kam ku pudiku”], o, Iblis! Isidingindu kap aku. Perukurenndu perukuren manusia, labo perukuren Dibata.” (Mat. 16:23; Mrk. 8:32, 33) I bas kata-kata Jesus e lit pedah si erguna man banta kerina. Menukah kal siakap ngutamaken perukuren manusia asangken perukuren Dibata. Adi bage silakoken, aminna pe sura-suranta nampati, banci saja alu la sengaja sidukung peraten Setan, labo peraten Dibata. Tapi, uga tanggapen Petrus?

17. Kai maksud Jesus sanga ikatakenna man Petrus ”laweslah kam ku pudiku”?

17 Pasti ieteh Petrus maka labo maksud Jesus ia Setan Si Iblis. Selain si e, kata-kata Jesus man Petrus la seri ras kata-katana man Setan. Man Setan ikataken Jesus, ”Laweslah”; man Petrus ikatakenna, ”Laweslah kam ku pudiku.” (Mat. 4:10) Labo itulak Jesus rasulna enda, erkiteken melala sifat si mehuli i bas ia, tapi terjeng mpersingeti cara rukur Petrus si salah saja ngenca. La mesera ngangkai maka Petrus la banci jadi siding i lebe-lebe Tuanna tapi mulihken ku pudina selaku pengikut si mere dukungen.

Adi kita meteruk rukur ngaloken ajar ntah disiplin dingen ndalankenca, banci terus reh rembakna kita ras Jesus Kristus bage pe ras Bapana, Dibata Jahwe

18. Uga Petrus ncidahken kesetian, janah uga kita banci ngusihsa?

18 Nogan nge Petrus man Jesus? Merawa ntah pe nembeh nge ia? Lang; alu meteruk ukur ialokenna persinget e. Alu bage, icidahkenna mulihi kesetianna. Kerina pengikut Kristus perlu terus ipersingeti. Adi kita meteruk rukur ngaloken ajar ntah disiplin dingen ndalankenca, banci terus reh rembakna kita ras Jesus Kristus bage pe ras Bapana, Dibata Jahwe.—Oge Kuan-kuanen 3:11.

Petrus tetap setia aminna pe sanga ia ipersingeti

Kesetianna Iupahi

19. Kata-kata kai si ibelasken Jesus si erbanca sengget, janah kai si banci saja iukuri Petrus?

19 La ndekah kenca si e, ibelasken Jesus kata-kata si deban si erban sengget, ”Ingetlah! I bas si pulung enda lit piga-piga kalak  si langa mate ope denga idahna Anak manusia si isuruh Dibata i bas kinirajanna.” (Mat. 16:28) Kata-kata e pasti erban Petrus penasaren. Kai kira-kira maksud Jesus? Banci saja tersungkun-sungkun Petrus maka payo nge erkiteken e denga ia ipersingeti alu tegas, lanai banci ialokenna hak istimewa enda.

20, 21. (a) Turiken pengenehenen si isaksiken Petrus. (b) Uga percakapen si lit i bas pengenehenen e nampati Petrus mpekena carana rukur?

20 Tapi, kira-kira seminggu kenca si e, Jesus maba Jakup, Johanes, ras Petrus nangkih ku ”das deleng si meganjang”, banci saja Deleng Hermon, si dauhna piga-piga kilometer ngenca. Kemungkinen paksa si e nggo berngi, erkiteken iusahaken kalak enda kal gelah ula terpedem. Tapi, sanga Jesus ertoto, lit sada kejadin si erbanca lanai madat mata kalak enda.—Mat. 17:1; Luk. 9:28, 29, 32.

21 Jesus mulai salih i lebe-lebe mata kalak e. Ayona jadi ersinalsal bagi matawari. Uisna pe jadi mbentar ersinalsal. Kenca si e,  dua kalak dilaki teridah ras Jesus, si sekalak bagi Musa, janah sekalak nari bagi Elia. Ercakap-cakap kalak enda kerna ”kematen Jesus si lanai ndekah jadi i Jerusalem sue ras si enggo iaturken Dibata” bage ka pe kerna kinikekenna. Jelas-jelas Petrus salah sanga ikatakenna la mungkin Jesus ngenanami kiniseran si bage!—Luk. 9:30, 31.

22, 23. (a) Uga Petrus ncidahken maka ia kalak si semangat ras ermediate? (b) Upah si deban kai si ialoken Petrus, Jakup, ras Johanes i bas berngi e?

22 Tersuruh ukur Petrus muat bagin i bas pengenehenen si luar biasa enda. Erkiteken iakapna Musa ras Elia nandangi lawes nadingken Jesus, ngerana ia, ”O Guru! Malem kal ate kami i jenda. Ibahan kami saja telu sapo-sapo, sada man bandu, sada man Musa, janah sada nari man Elia.” Erkiteken enda pengenehenen, pasti juak-juak Jahwe si nggo ndekah mate e la merluken sapo-sapo. La mbages iukuri Petrus ope denga ngerana. Tapi, la kin kam tertarik nandangi dilaki si semangat ras ermediate enda?—Luk. 9:33.

Petrus, Jakup, ras Johanes iupahi alu pengenehenen si luar biasa

23 Petrus, Jakup, ras Johanes ngaloken upah si deban i bas berngi e. Reh embun ngelinggemi kalak enda i bas deleng e. I bas embun e nari terbegi me sora, sora Dibata Jahwe! Nina, ”Enda me AnakKu si enggo Kupilih. Begikenlah ia.” Kenca si e, dung me pengenehenen e, janah kalak enda nari ngenca ras Jesus i deleng e.—Luk. 9:34-36.

24. (a) Manfaat kai si idat Petrus arah pengenehenen enda? (b) Uga carana kita banci ndatken manfaat arah pengenehenen enda?

24 Pengenehenen e tuhu-tuhu sada pemere si luar biasa man Petrus bage pe man banta! Puluhen tahun kenca si e, isuratkenna kerna hak istimewa si idatna i bas berngi e, eme tuhu-tuhu isaksikenna gambaren si perlebe kerna Jesus selaku Raja surgawi si mulia janah jadi salah sada saksi mata kemulianna. Pengenehenen e mbuktiken kebenaren melala nubuat Pustaka ras mpegegehi kiniteken Petrus guna ngadapi erbage ujin si arus denga iadapina. (Oge 2 Petrus 1:16-19.) Manfaat si seri banci ka sigejapken adi, bagi Petrus, tetap kita setia man Majiken si nggo itangkuhken Jahwe man banta, erlajar i bas ia nari, ngaloken ajar bage pe persingetna, janah alu meteruk ukur terus ngikuti ia.

^ par. 6 Teridah la tetap pendirin kalak si pulung i sinagoga e adi sibandingken tanggapenna nandangi kata-kata Jesus i jenda ras tanggapenna sada wari ope si e, sanga semangat kal ia ngelebuh Jesus e nabi Dibata.—Joh. 6:14.

^ par. 11 I bas pantai Dano Galilea nari, kalak enda erdalan 50 kilometer dauhna, mulai arah ingan si ganjangna kira-kira 210 meter i teruh lawit seh asa ingan si ganjangna kira-kira 350 meter i datas lawit, mentasi erbage daerah si seh kal jilena.