Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL SEPULUH EMPAT

Erlajar Ia kerna Perkuah Ate

Erlajar Ia kerna Perkuah Ate

1. Perdalanen si uga si arus idalani Juna, janah uga perasanna kerna ingan si itujuna?

PASTI melala waktu Juna rukur. Nandangi berkat me ia ku ingan si dauhna lebih 800 kilometer, si dekahna sada bulan ntah lebih i bas perdalanen. Tangtangna, arus ipilihna dalan si arus idalanina, si terdeheren ntah si lebih aman, janah terus erdalan arah baluren ras uruk-uruk. Arus ibentasina Gurun Siria si mbelang, ngepari mbue lau anak termasuk lau Eprat si mbelin, janah ndarami ingan erberngi i kota-kota bage pe kuta-kuta i Siria, Mesopotami, ras Assur, si asing denga akapna. Asum wari-wari erdalan, iukurina ingan si itujuna si erbahan ia mbiar, kota si nggo reh deherna eme Niniwe.

2. Uga Juna erlajar maka la banci ia kiam bas tugasna nari?

2 Sada hal si pasti ieteh Juna: La ia banci mulihken janah kiam bas tugas e nari. Enggo pernah icubakenna. Bagi si nggo sipelajari bas pasal si nggo lewat, alu sabar iajari Jahwe me Juna alu erbahan sada badai i lawit janah alu mukjizat isuruhNa sada nurung si galang nelamatken ia. Telu wari kenca e, iutahken me Juna i pantai alu la lit sitik pe lukana. Pengalamen enda erbahan megah akap Juna, janah reh patuhna me ia.—Jun., bd. 1, 2.

3. Sifat kai si nggo icidahken Jahwe man Juna, tapi penungkunen kai si turah?

3 Paksa iperentahken Jahwe man Juna guna si peduakaliken gelah lawes ku Niniwe, patuh me nabi e janah berkat ia ku timur ndalani dalan si gedang e. (Oge Juna  3:1-3.) Tapi, nggo nge Juna tuhu-tuhu robah kenca idisiplin Jahwe? Contohna, nggo icidahken Jahwe perkuah ate man bana, iselamatkenNa ia gelah la gedap, la ia minter iukum perban mberontak, janah ibereken ia kesempaten si peduaken guna ndalanken tugasna. Kenca ngalami kerina e, nggo nge Juna erlajar guna ncidahken perkuah ate man kalak si deban? Biasana la menukah erlajar ncidahken perkuah ate perban kita manusia si la sempurna. Mari sinehen kai pelajarenna man banta kerna perjuangen Juna.

Berita Pengukumen ras Tanggapen si Luar Biasa

4, 5. Engkai maka ikataken Jahwe Niniwe e ’kota si mbelin’, ras kai si banci sipelajari kerna Jahwe jenari?

4 Perukuren Juna nandangi Niniwe la seri ras perukuren Jahwe. Kota enda penting iakap Jahwe. Lit telu kali ikutip cataten Juna kata-kata Jahwe si ngataken ’Niniwe, kota si mbelin e’. (Jun. 1:2; 3:2; 4:11) Engkai maka kota enda mbelin, ntah pe penting iakap Jahwe?

 5 Niniwe sada kota si nuria, salah sada kota si tangtangna ipajekken Namrut kenca Banjir si Mbelin. Seh kal belinna kota e janah mbelang, erkiteken banci saja lit piga-piga kota si deban i je, emaka perlu telu wari mentasisa ujung ku ujung. (Kej. 10:11; Jun. 3:3) Pasti Niniwe seh kal luar biasana, lit rumah persembahen si seh kal galangna, tembok-tembokna si paguh, ras bangunen si debanna. Tapi, labo enda si erban kota e penting iakap Dibata Jahwe. Si penting iakapNa eme pendudukna. Bas jaman e, penduduk Niniwe ndauh buen asangken kota si deban. Uga pe jahatna penduduk kota e, iperdiateken Jahwe ia. Meherga akapNa kegeluhen manusia janah ateNa gelah tep-tep jelma ertobat ras erlajar ngelakoken kai si benar.

Menurut Juna, Niniwe e kota si mbelin si dem kesalahen

6. (a) Engkai maka Juna mbiar nandangi Niniwe? (Nehen ka cataten i teruh.) (b) Kai si banci sipelajari kerna Juna i bas ia erberita?

6 Paksa seh Juna i Niniwe, banci saja reh biarna ia erkiteken pendudukna lebih 120.000 kalak. * Sada warin ia erdalan, seh me ia ku tengah-tengah kota si nterem jelma e, banci saja idaramina ingan si cocok guna mpeseh beritana. Uga ia ngerana man kalak e? Banci nge ia ngerana bas cakap Assur? Ntah, ibereken Jahwe nge kengasupen e arah mukjizat? La sieteh. Banci saja imomoken Juna berita e i bas cakapna sendiri eme cakap Heber, janah iterjemahken sekalak jelma man kalak Niniwe. Si pasti, beritana e sederhana janah banci erbahan segat ate kalak ia. Ikatakenna, ”Empat puluh wari nari ikernepken me kuta Niniwe!” (Jun. 3:4) Mulih-ulih ia ngerana alu la mbiar. Alu ngelakokenca, icidahkenna kinipangen ras kiniteken si luar biasa, sifat-sifat si seh kal pentingna man kalak Kristen gundari enda.

Beritana e sederhana janah banci erbahan segat ate kalak ia

7, 8. (a) Uga tanggapen kalak Niniwe nandangi berita si ipeseh Juna? (b) Kai si ilakoken raja Niniwe kenca ibegina berita si ipeseh Juna?

7 Enterem kalak Niniwe mperdiateken kai si ipeseh Juna. Pasti nggo isikapkenna dirina guna ngadapi tanggapen kalak si banci saja merawa ras kasar. Tapi, terjadi me sada hal si luar biasa. Ibegiken kalak kepeken ia! Beritana meter mbar bagi kilap. La ndekah kenca e, kerina kota ncakapken nubuat kerna  pengkernepen si imomoken Juna. (Oge Juna 3:5.) Kerina nggit ertobat subuk si bayak ras si musil, si megegeh ras si lemah, si metua ras si nguda. Erpuasa me kalak enda. Minter ibegi raja berita kerna pertobaten rayat enda.

Perlu Juna kinipangen ras kiniteken guna erberita i Niniwe

8 Paksa ibegi raja berita si ipeseh Juna, ia pe ertobat. Erkiteken mbiar man Dibata, nusur ia bas kursi kerajanna nari, itangtangina jubahna, jenari ipakena uis guni bagi si ipake rayatna, janah ”kundul ia i bas abu”. Iputusken raja me ras ”pegawai-pegawaina”, ntah pe bangsawan, gelah kerina si lit bas kota e ikut erpuasa. Iperentahkenna gelah kerina make uis guni, termasuk asuh-asuhen. * Alu meteruk ukur iakuina maka rayatna ersalah perban nggo ngelakoken kejahaten ras kekerasen. Ipindo raja e gelah erkusur ukur Dibata si benar ngidah pertobaten kalak enda, alu ngataken, ”Mbera-mbera olanai ateNa nembeh, maka ola kita mate!”—Jun. 3:6-9.

9. Kai si isangsiken kerna kalak Niniwe, tapi uga maka banci sieteh kalak enda salah?

9 Lit piga-piga si sangsi ngkai maka banci bage kal terna kalak Niniwe ertobat. Tapi, menurut pakar Pustaka si Badia perubahen si bage cukup wajar erkiteken i bas kebudayan si bage bas jaman mbarenda, biasana tek kalak man takhayul janah menukah erbahan perubahen. Alasen si deban ngkai kalak si sangsi e salah eme erkiteken bas pudi wari ituriken Jesus Kristus ka kerna pertobaten kalak Niniwe. (Oge Matius 12:41.) Pasti ia labo asal ngerana saja, perban nggo nggeluh ia i surga janah pernah idahna kejadin-kejadin e. (Joh. 8:57, 58) Si pasti, ula min pernah siakap la mungkin kalak ertobat, ugapa pe jahatna ia siakap. Jahwe ngenca si banci meteh kai si lit bas pusuh manusia.

Perkuah Ate Dibata Ertentangenras Perkuah Ate Manusia

10, 11. (a) Uga tanggapen Jahwe nandangi pertobaten kalak Niniwe? (b) Engkai maka banci kita tek tanggapen Jahwe la salah?

10 Uga tanggapen Jahwe nandangi pertobaten kalak Niniwe? Bas pudi wari itulis Juna, ”Iidah Dibata kai si ilakoken kalak ndai;  iidahNa pe maka lanai ia ngelakoken perbahanen si jahat. Emaka salih ukur Dibata, janah la surung iukumNa kalak e aminna pe enggo ikatakenNa iukumNa ateNa.”—Jun. 3:10.

11 Payo kin enda ertina maka tanggapen Jahwe si ndube salah kerna Niniwe? Lang. Ikataken Pustaka maka keadilen Jahwe e serta. (Oge Ulangen 32:4.) Surut me dungna rawa Jahwe si adil dingen benar nandangi Niniwe erkiteken iperdiatekenNa maka lit perubahen bas kalak enda. Janah, ukumen si ateNa iberekenNa man kalak enda lanai perlu iakapNa. Gundari me waktuna ncidahken perkuah ate.

12, 13. (a) Uga Jahwe ncidahken maka Ia masuk akal, ermediate, janah perkuah ate? (b) Engkai maka nubuat Juna labo nubuat si palsu?

12 Tuhu-tuhu Jahwe labo Dibata si keras, labo Dibata si la ermediate, janah labo ka kejam bagi si megati igambarken peminpin agama. Sebalikna, masuk akal Ia, ermediate, janah perkuah ate. Adi iukumNa ateNa kalak jahat, ipersingetiNa lebe arah wakilNa i doni, erkiteken merhat kal Ia gelah kalak jahat ertobat janah mperobahi lagu langkahna, bagi kalak Niniwe. (Esek. 33:11) IpebetehkenNa man nabi Jeremia, ”Kune i bas sada paksa Kukataken maka ateKu ngeruah, ngeruntuhken ntah ngkerapken sada bangsa entah kerajan, tapi adi bangsa e ngasup nadingken kejahatenna, la Kusahunken kai si enggo Kukataken e.”—Jer. 18:7, 8.

Merhat kal Dibata gelah kalak jahat ertobat janah mperobahi lagu langkahna, bagi kalak Niniwe

13 Palsu nge nubuat Juna e? Lang; nubuat enda seh ku tujunna, eme jadi persinget. Persinget e ibereken erkiteken kejahaten kalak Niniwe, si bas pudi wari ertobat. Seumpama terus kalak Niniwe ngelakoken kejahaten, pasti iukum Dibata kalak enda. Janah terjadi me e bas pudi wari.—Sep. 2:13-15.

14. Uga tanggapen Juna nandangi perkuah ate Jahwe man Niniwe?

14 Uga tanggapen Juna paksa pengkernepen e la terjadi bas paksa si iarapkenna? Sioge, ”Erkiteken si e nembeh kal ate Juna, emaka merawa ia.” (Jun. 4:1) Ertoto ka Juna banci saja alu merawa man Si Mada Kuasa! Ikataken Juna maka arusna ia i rumah saja, bas kutana saja. Ikatakenna ka nggo leben ietehna maka la surung iukum Jahwe kota Niniwe, janah pe ibahanna enda jadi alasenna kiam ku Tarsis mbarenda. Kenca e, ipindona gelah mate saja ia, ikatakenna maka ulin ia mate asangken nggeluh.—Oge Juna 4:2, 3.

15. (a) Kai si erbanca reh cedana ate Juna? (b) Kai si ilakoken Jahwe nandangi nabi si sangana gulut ukurna e?

15 Kai nge si erbanca maka nembeh kal ate Juna? La sieteh kai saja si lit i bas pusuhna, tapi sieteh maka nggo imomoken  Juna pengkernepen Niniwe i lebe-lebe jelma si nterem. Enggo tek kalak enda man bana. Tapi gundari, pengkernepen e la terjadi. Mbiar nge ia itokohi ntah pe icap selaku nabi si palsu? Kai pe masalahna, la meriah ukurna nandangi pertobaten kalak e ntah pe perkuah ate Jahwe. Sebalikna, teridah maka reh cedana atena janah mekuah ka atena bana. Selain si e, nggo ceda akapna gelarna. Tapi, Dibata si isembah Juna tuhu-tuhu perkuah. IdahNa denga kai si mehuli bas nabi si sangana gulut ukurna e. Asangken ngukum Juna si la ngergai, alu manjar-anjar isungkun Jahwe me Juna alu tujun mereksa ia, nina, ”Bujur kin kam merawa?” (Jun. 4:4) Ijabap Juna nge penungkunen e? La ipebetehken Pustaka.

16. Kai si banci saja erban kalak la setuju ras Dibata, janah kai pelajaren si banci sidat bas usihen Juna nari?

16 Situhuna menukah ngakimi Juna erkiteken lagu langkahna, tapi mehuli adi siinget maka sada hal si wajar adi manusia si la sempurna la setuju ras Dibata. Banci saja lit si ngataken maka arusna la ipediat Jahwe terjadi kiniseran ntah pe arusna minter saja iukumNa kalak jahat ntah arusna min nggo idungiNa doni Setan enda mbarenda nari. Usihen Juna ngingetken kita maka paksa la kita setuju man Dibata Jahwe, si perlu lalap sipesikap eme caranta rukur, labo cara Dibata rukur.

Cara Jahwe Ngajari Juna

17, 18. (a) Kai si ilakoken Juna kenca lawes nadingken Niniwe? (b) Kai pengaruh sinuan-sinuan e man Juna?

17 Lawes me nabi si sangana gulut ukurna e nadingken Niniwe, lawes ia ku arah timur, ku daerah si erdeleng-deleng, labo ku kuta kemulihenna. Ibahanna sapo-sapona janah i je me ia cilinggem, kundul nimai ntah kai si nandangi terjadi man Niniwe. Banci saja iarapkenna denga ngidah kota e ikernepken. Uga Jahwe ngajari dilaki si mersik enda gelah jadi perkuah?

18 Bas berngi wari, ipeturah Jahwe sada sinuan-sinuan i babo Juna. Medak kenca ia, idahna me sinuan-sinuan e, mbelang-mbelang bulungna, cocok jadi inganna cilinggem asangken sapo-sapo si ibahanna ndai. Sikap iakapna. ”Meriah kal iakap Juna” kerna sinuan-sinuan ndai, banci saja iakapna perturah sinuan-sinuan e sada tanda pasu-pasu ras ngena ate Dibata. Tapi, labo ate Jahwe terjeng ngelinggemi Juna saja bas matawari ras mpengadi rawana si la metunggung. Iiahken Jahwe ka ateNa pusuh Juna. Emaka, ibahan Jahwe me mukjizat si deban. IsuruhNa nipe-nipe mangani sinuan-sinuan ndai seh mate sinuan-sinuan  e. Kenca e, ”isuruh Dibata rembus angin i timur nari, emaka narus ia labuh erkiteken iparpari las matawari”. Kote ka ia mulihi, janah ipindona man Dibata gelah mate saja.—Jun. 4:6-8.

19, 20. Uga Jahwe nampati Juna gelah rukur kerna sinuan-sinuan e?

19 Sekali nari, nungkun Jahwe man Juna kerna bujur kin ia merawa ntah lang, sekali enda erkiteken sinuan-sinuan si nggo mate e. Labo ia ertobat, malahen ibenarken Juna bana, nina, ”Seh kal bujurna aku merawa janah pangen aku mate perban nembehna ateku!” Gundari me waktu si tepat iakap Jahwe guna njelasken pelajarenna.—Jun. 4:9.

Igunaken Dibata sada sinuan-sinuan guna ngajar Juna kerna perkuah ate

20 Ibahan Dibata me Juna rukur, ikatakenNa maka ndele ate nabi e kerna sinuan-sinuan si turah bas sada berngi saja janah pepagina nggo masap, padahal labo Juna si nuanca ntah pe si mpeturahsa. Kenca e, ikataken Jahwe, ”Dage, tentu kuahen denga ka ateKu ngenehen Niniwe, kuta si mbelin e. Apai denga ka i bas kuta e [lebih] 120.000 danak-danak [ntah pe, ”kalak”] si  langa meteh apai salah apai benar janah asuh-asuhen pe seh buena!”—Jun. 4:10, 11.

21. (a) Pengajaren kai si ibereken Jahwe man Juna? (b) Uga kisah Juna banci nampati kita mereksa diri alu jujur?

21 Idahndu nge uga bagesna pelajaren si ibereken Jahwe enda? La pernah Juna latih ngurus sinuan-sinuan e. Tapi sebalikna, Jahwe me Ulu kegeluhen penduduk Niniwe janah si ngepkep kegeluhen kalak e bagi ngepkep kerina tinepaNa i doni. Uga maka banci ergan akap Juna sada sinuan-sinuan saja asangken kegeluhen 120.000 kalak, lenga ka kerina asuh-asuhenna? La kin enda erkiteken nggo ipediat Juna carana rukur nggo mentingken bana? Apai ka, mekuah atena sinuan-sinuan e erkiteken banci mereken keuntungen bana. La kin rawana nandangi Niniwe e erkiteken alasen si mentingken bana, sura-sura si sombong gelah la ia mela, gelah terbukti benar? Kisah Juna enda banci nampati kita alu jujur mereksa diri. Ise i bas kita si la lit sifat si mentingken bana? Ngata bujur kal kita perban sabar Jahwe ngajari kita gelah lebih siukuri kalak si deban, sepenggejapen, ras lebih perkuah ate, bali bagi Ia!

22. (a) Uga kira-kira tanggapen Juna nandangi pengajaren Jahwe si pentar kerna perkuah ate? (b) Pelajaren kai si perlu siperdiateken?

22 Penungkunenna: Erlajar nge Juna bas kerina pengalamen enda nari? I bas cakap aslina, kitap Juna idungi alu penungkunen Jahwe si lenga erkedungen. Piga-piga kalak si sangsi banci saja ngataken maka enda la pernah ijabap Juna. Tapi, situhuna, nggo lit jabapenna, eme buku e sendiri. Bagi si ietehndu, nggo terbukti maka Juna me si nulis buku si make gelarna enda. Cuba bayangken nabi e, si sekali nari selamat seh ku kuta kemulihenna, paksana nulis kisah enda. Gundari nggo reh tuana ia, reh pentarna, reh meterukna ukurna, janah alu erkadiola ikupirkenna takalna asum iturikenna kesalahenna sendiri, pemberontakenna, ras perbahanenna si keras kepala paksa la nggit ncidahken perkuah ate. Jelas me, tuhu-tuhu erlajar Juna bas pengajaren Jahwe nari, Dibata si pentar. Erlajar ia jadi kalak si perkuah. Adi kita uga?—Oge Matius 5:7.

^ par. 6 Menurut perkiran, i bas jaman Juna jumlah penduduk i Samaria, ibu kota Israel, lit kira-kira 20.000 seh ku 30.000 kalak, la seh seperempat penduduk Niniwe. Bas masa kejayanna, banci saja Niniwe kota si mbelinna kal i doni.

^ par. 8 Banci saja keterangen enda bagi tempa aneh, tapi enda nggo pernah terjadi. Ahli sejarah Junani eme Herodotus nuratken maka paksa kalak Persia si nuria erceda ate erkiteken sekalak jenderal si ikelengi rayat mate, asuh-asuhenna pe iikutken bas upacara erceda ate e.