Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

Kata Pendungi

Kata Pendungi

”Nggeluhlah kam ngusih kalak si enggo tek dingen saber, gelah ialokenndu kai si enggo ipadanken Dibata.”—HEBER 6:12.

1, 2. Engkai maka arus tuhu-tuhu sipebelin kinitekenta gundari? Ban anding-andingenna.

KINITEKEN. Enda kata si mejile, si maksudna sifat si seh kal ulina. Tapi, sanga sibegi kata e, arus ka siukuri kata si deban, eme, ”Mis!” Sabap, adi la lit kinitekenta, perlu mis siusahaken. Janah adi nggo lit kinitekenta, perlu mis sijaga ras sipertahanken. Engkai?

2 Bayangken, kam paksana mentasi sada gurun si seh kal belangna. Perlu kal kam lau. Sanga datndu lau e, perlu jagandu gelah ula kena matawari. Kenca si e, perlu isindu mulihi ingan laundu gelah la keri ngayak seh kam i tujunndu. Gundari enda, kerina kita nggeluh i gurun rohani, i bas sada doni i ja kiniteken situhu-tuhu, si bagi lau, nggo seh kal jarangna janah menukah kal bene adi la sijaga ras siisi mulihi. Perlu kal kita kiniteken situhu-tuhu e; bali bagi kita la banci nggeluh adi la lit lau, kita pe la banci megegeh secara rohani adi la lit kinitekenta.—Rom. 1:17.

3. Kai si nggo isikapken Jahwe guna mpebelin kinitekenta, janah dua hal kai si perlu siinget?

3 Ieteh Jahwe perlu kal kita kiniteken, janah ietehNa mesera kal mpebelin ras mpertahanken kiniteken gundari. Pasti, e me sabapna maka iberekenNa usihen-usihen man banta guna jadi usihenta. Ibere Jahwe kesah si badia man rasul Paulus guna nuratken, ”Nggeluhlah kam ngusih kalak si enggo tek dingen saber, gelah ialokenndu kai si enggo ipadanken Dibata.” (Heb. 6:12) Janah, e me sabapna maka iiahken organisasi Jahwe kita ngusih dilaki ras diberu si erkiniteken asa ngasupta, bagi si nggo sibahas i bas buku enda. Tapi, kai si arus silakoken gundari? Mari siinget dua hal: (1) Perlu terus sipegegehi kinitekenta; (2) perlu terus sijaga arapenta tetap jelas i bas ukurta.

4. Engkai maka Setan terbukti jadi musuh kiniteken, tapi ngkai maka ula bene arapenta?

4 Teruslah pegegehi kinitekenndu. Kiniteken lit musuhna si mbelin eme Setan. Penguasa doni e nggo erban doni enda jadi gurun si banci mbahayaken kinitekenta. Ndauh ia gegehen asangken kita. Arus nge bene arapenta janah lanai sipebelin ras sipertahanken kinitekenta? Ula pernah! Jahwe me Teman si mehulina arah kerina kalak si erusaha ndatken kiniteken situhu-tuhu. IpetetapNa ukurta maka Ia terus lit i deherta, janah alu bage banci silawan Iblis ras banci ka siban ia kiam i bas kita nari! (Jak. 4:7) Silawan ia alu erban waktunta tep-tep wari guna mpegegehi ras mpebelin kinitekenta. Uga carana?

5. Uga dilaki ras diberu si erkiniteken i bas Pustaka ndatken kiniteken? Jelasken.

 5 Bagi si nggo sinen, dilaki ras diberu si erkiniteken i bas Pustaka si Badia la mis erkiniteken tangtangna tubuh nari. Kegeluhen kalak enda jadi bukti maka kiniteken eme ulih kesah si badia Jahwe. (Gal. 5:22, 23, Terjemahan Dunia Baru) Ertoto kalak e mindo penampat, janah asilna, terus ipegegehi Jahwe kinitekenna. Mari siban ka bage, alu la pernah lupa maka simpar ibereken Jahwe kesah si badiaNa man kalak si mindosa janah nggeluh sentudu ras totona. (Luk. 11:13) Lit nge hal si deban si banci silakoken?

6. Uga gelah pelajarenta kerna kisah-kisah Pustaka mbelin kal gunana man banta?

6 I bas buku enda, sitik denga ngenca sibahas usihen kiniteken si luar biasa. Lit denga melala si deban! (Oge Heber 11:32.) Melala si menarik si banci sipelajari alu tutus i bas kalak enda sekalak-sekalak. Adi terjeng ngoge alu meter kisah-kisah Pustaka kerna kalak si erkiniteken, la banci sipebelin kinitekenta alu paguh. Gelah mbelin gunana pengogen e man banta, perlu siban waktunta mpelajari terbagesen kerina latar belakang kisah-kisah Pustaka. Adi lalap siinget maka dilaki ras diberu si la serta e ”manusia nge bali ras kita”, usihenna banci ertangkasna man banta. (Jak. 5:17) Alu sepenggejapen, banci sibayangken uga perasan kalak e sanga ngadapi erbage tantangen bage pe perbeben si seri ras kita.

7-9. (a) Uga kira-kira perasan piga-piga dilaki ras diberu si erkiniteken i bas jaman Pustaka bicara banci ia nembah Jahwe bagi kita gundari? (b) Engkai arus sipegegehi kinitekenta alu perbahanenta?

7 Kinitekenta pe banci ka sijaga arah perbahanenta. Sabap ”kiniteken la rikut ras perbahanen mate kap”. (Jak. 2:26) Bayangken uga riahna iakap dilaki ras diberu si nggo sibahas bicara itugasken kalak e ngelakoken pendahin si seri ras si itugasken Jahwe man banta gundari!

8 Contohna, uga bicara ipebetehken man Abraham maka banci ia nembah Jahwe, labo i bas batar-batar persembahen i bas batu nari si ipajekken i taneh mesawang, tapi ras terpuk Saksi-Saksi Jahwe i Bale-Bale Kinirajan si mejile ras kebaktin-kebaktin si mbelin, i ja janji-janji si mbarenda idahna ”i dauh-dauh nari” ngenca, ibahas ras ijelasken alu cara si menarik? (Oge Heber 11:13.) Janah, uga bicara ipebetehken man Elia maka pendahinna labo munuh nabi-nabi Baal janahna ngelayani Jahwe i bas pemerentahen raja si murtad dingen jahat, tapi alu dame ndahi kalak guna mpeseh berita pengapul ras arapen? Ue, pasti mis ialoken dilaki ras diberu si erkiniteken bas Pustaka tugas guna nembah Jahwe bagi si ilakoken kita gundari.

9 Emaka, marilah terus sipegegehi kinitekenta alu perbahanenta. Carana alu ngikutken usihen dilaki ras diberu si erkiniteken i bas Pustaka. Bagi si ituriken i bas Kata Penaruh,  reh rembakna siakap ras kalak e bagi sekalak teman si kompak. Tapi, kentisik nari hubungen si rembak e reh jelasna.

10. Keriahen ukur si uga pagi sinanami i bas Pardis?

10 Jagalah arapenndu tetap jelas bas perukurenndu. Dilaki ras diberu si erkiniteken lalap ndatken gegeh i bas arapen si ibereken Dibata. Adi kam uga? Contohna, bayangken uga riahna iakapndu pagi sanga jumpa ras juak-juak Dibata si erkiniteken si nggeluh mulihi i bas ”kekeken . . . kalak si bujur”. (Oge Perbahanen 24:15.) Kai saja si atendu isungkunndu man kalak e?

11, 12. I bas doni si mbaru, penungkunen kai saja atendu sungkunndu man (a) Abil? (b) Nuah? (c) Abraham? (d) Rut? (e) Abigail? (f) Ester?

11 Sanga jumpa kam ras Abil, isungkunndu nge atendu uga ayo orang tuana? Ntah, banci saja isungkunndu, ”Pernah nge kam ngerana ras kerubim si njaga dalan bengket ku Eden? Ijabapna nge kam?” Uga ka Nuah? Banci saja isungkunndu man bana, ”Pernah nge kam mbiar man Nefilim? Uga kam ngurus kerina rubia-rubia e sanga kena bas bahtera?” Adi jumpa kam ras Abraham, banci saja sungkunndu, ”Pernah nge kam jumpa ras Sem? Ise si ngajari kam kerna Jahwe? Mesukah nge iakapndu nadingken kuta Ur?”

12 Bage ka pe, ukuri piga-piga penungkunen enda si banci saja isungkunndu atendu man diberu-diberu si erkiniteken si nggo ipekeke. ”Rut, kai si erbanca kam nggit nembah Jahwe?” ”Abigail, mbiar nge kam sanga ipebetehkenndu man Nabal maka nggo isampatindu Daud?” ”Ester, kai si terjadi man bandu bage pe man Mordekai kenca kisah i bas Pustaka e dung?”

13. (a) Penungkunen kai saja si mungkin isungkun kalak si nggo ipekeke man bandu? (b) Uga perasanndu sanga ietehndu kam banci jumpa ras dilaki bage pe diberu si erkiniteken bas jaman si nai?

13 Tentu saja, dilaki ras diberu si setia e pe melala ka penungkunenna man bandu. Pasti meriah kal siakap mpebetehkenca man kalak e kerna wari-wari pendungi ras uga Jahwe masu-masu umatNa i bas masa-masa si sulit! Pasti kena kal ku pusuh kalak e kenca ietehna maka nggo igenepi Jahwe kerina janjiNa. I bas wari-wari si nandangi reh e, lanai mesera siakap mbayangken juak-juak Dibata si setia si lit bas Pustaka. Ras kalak e pagi kita i je, i Pardis! Emaka, teruslah lakoken kerina si banci ilakokenndu gundari guna erban kalak e jelas man bandu. Teruslah usih kiniteken kalak enda. Mbera meriah iakapndu ngelayani Jahwe ras kalak e selaku teman si rembak seh rasa lalap!