Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL ENEM

Iturikenna Isi Pusuhna man Dibata bas Pertoton

Iturikenna Isi Pusuhna man Dibata bas Pertoton

1, 2. (a) Engkai maka la meriah ukur Hanna paksa ersikap guna lawes ku Silo? (b) Pelajaren kai si banci sidat bas kisah Hanna nari?

MERUDU-RUDU Hanna nikapken keperlun guna lawes ku Silo gelah la terus iukurina masalahna. Arusna, enda masa si meriah erkiteken perbulangenna, Elkana, maba kerina keluargana ku tabernakel i Silo tep-tep tahun guna eribadat. Ate Jahwe gelah perayan si bage mereken keriahen ukur. (Oge Ulangen 16:15.) La iraguken, kitik-kitikna nari pasti meriah ukur Hanna reh ku perayan enda. Tapi, bas tahun-tahun terakhir enda keadanna nggo berubah.

2 Ipasu-pasu ia erkiteken lit perbulangenna si ngkelengi ia. Tapi, lit ka ndehara Elkana si deban. Gelarna Penina, janah banci saja sengaja ia erban Hanna tersiksa. Enggo ka lit cara Penina gelah perayan tahunen enda erban ukur Hanna ceda. Uga carana? Tapi si lebih penting, uga kiniteken Hanna man Jahwe banci nampati ia tetap megenggeng amin gia bagi tempa la ngasup ia ngadapisa? Adi paksana kam ngadapi masalah si ngganggu keriahen ukur bas kegeluhen, kisah Hanna pasti banci mpegegehi kam.

’Engkai maka Kam Erndele Ate?’

3, 4. Kai dua masalah si mbelin si niadapi Hanna, janah ngkai maka duana enda seh kal beratna?

3 Pustaka si Badia nuriken dua masalah si mbelin i bas kegeluhen Hanna. Masalah si pemena seh kal serana ndungisa janah masalah si peduaken tuhu-tuhu la terdungi. Si pemena, lit kiduana janah segat kal ate kiduana e ia. Si peduaken, la banci ia mupus. Kerina ndehara si merhat mupus pasti gulut ukurna ngadapi keadan si bage; tapi bas kebudayan i jaman Hanna, enda kecedan ate si luar biasa. Tep-tep keluarga ngarapken gelah kesusurenna nerusken gelar keluargana. La banci mupus sada hal si man kemelanken.

4 Banci saja ngasup Hanna ngadapi masalah e adi la itambahi Penina. Payo, erkidua labo lit gunana. Megati terjadi persaingen,  perjengilen, ras ukur ceda. Erkidua la kal sentudu ras patoken perjabun si itetapken Dibata i Peken Eden. (Kej. 2:24) Emaka, ikataken Pustaka maka erkidua erban gulut ukur, salah sada contohna si terjadi bas rumah tangga Elkana.

5. Engkai maka ate Penina gelah ceda ukur Hanna, janah uga ia nakiti Hanna?

5 Ngenan ate Elkana si Hanna. Menurut cerita kalak Jahudi, leben ia erjabu ras Hanna, janah piga-piga tahun kenca e ras Penina. Tuhu ntah lang cerita e, melala kal cara si ibahan Penina, si seh kal cemburuna man Hanna, guna nakiti saingenna e. Telapen Penina asangken Hanna erkiteken banci ia mupus. Reh buena anak-anakna reh gombangna ia. Labo mekuah atena janah iapulina, malahen imanfaatken Penina kekurangen Hanna e. Ikataken Pustaka maka Penina nakiti ukur Hanna ”ras naling-naling ia”. (1 Sam. 1:6) Sengaja Penina ngelakoken si e kerina. Isakitina atena ukur Hanna, janah berhasil ia.

Seh kal cedana ukur Hanna erkiteken la banci mupus, janah iusahaken Penina kal gelah reh cedana ukur Hanna

6, 7. (a) Amin gia iusahaken Elkana ngapuli Hanna, ngkai maka la ituriken Hanna kerina permasalahenna? (b) Payo nge Hanna la banci mupus erkiteken la ngena ate Jahwe? Jelasken. (Nehen cataten i teruh.)

6 Banci saja, waktu si meriahna akap Penina nakiti Hanna eme sanga perayan tahunen i Silo. Man tep-tep anak Penina, ”anakna sekalak-sekalak”, ibereken Elkana bagin korban si ipersembahken man Jahwe. Tapi, man Hanna si ikelengina, iberekenna bagin si khusus. Erkiteken cemburu, igombangi Penina kal Hanna janah iingetkenna maka Hanna la banci mupus janah dungna tangis me diberu si liah enda ras lanai atena man. Pasti idah Elkana ndehara si ikelengina e sangana gulut ukurna janah la nggit man, emaka iusahakenna kal ngapuli Hanna. Isungkunna, ”Hanna, ngkai maka kam tangis? Engkai maka la kam nggit man? Engkai maka bage rusurna kam erndele ate? Ma ergan iakapndu aku asa sepuluh anak dilaki?”—1 Sam. 1:4-8.

7 Patut ipuji, iangkai Elkana maka gulut ukur Hanna erkiteken la banci mupus. Janah, pasti iergai Hanna bukti kekelengen si icidahken Elkana. * Tapi, la isinggung Elkana perbahanen Penina si la mehuli; janah la ka ikataken Pustaka maka ituriken Hanna perbahanen Penina. Banci saja menurut Hanna adi iturikenna  perbahanen Penina, keadanna reh kelekna. Ertindak nge kari Elkana? La kin kari reh belinna segat ate Penina nandangi ia, janah la kin anak-anak ras pelayan Penina pe ikut bage? Malahen reh la iergai kal kari Hanna bas rumah tanggana jine.

Paksa ngadapi perbahanen si la mehuli i rumah, idarami Hanna pengapul alu ernalem man Jahwe

8. Paksa iadapindu kinilaadilen ntah pe kejahaten si tempa sepele, ngkai maka terapuli kita adi siinget maka Jahwe e Dibata keadilen?

8 Ieteh Elkana ntah lang gia kerina perbahanen Penina si la mehuli, Dibata Jahwe ngidah kerinana. Ituriken Pustaka kerna si e gelah jadi persinget si tegas man ise pe si ngelakoken tindaken si erpalasken cian ras nembeh ate si akapna sepele. Bas pihak si deban, kalak si la ersalah ras si ngena atena perdamen, bagi Hanna, banci terapuli erkiteken ietehna maka ipepinter Dibata keadilen me kerina perkara bas waktu ras cara si nggo itetapkenNa. (Oge Ulangen 32:4.) Banci saja Hanna pe meteh kerna si e erkiteken ipindona penampat man Jahwe.

”Lanai Atena Ceda”

9. Kai pelajaren si banci sidat bas Hanna nari si nggit berkat ku Silo amin gia ietehna uga kari perbahanen saingenna?

9 Bas erpagi-pagi e, seh kal sibukna keluarga ndai. Kerinana ersikap guna berkat, anak-anak pe ikut sibuk. Keluarga si mbelin e tading i Rama, janah nandangi berkat ku Silo si dauhna lebih 30 kilometer alu mentasi daerah Eperaim si ikeleweti uruk. Perdalanen e banci sada ntah pe dua wari dekahna erdalan nahe. Ieteh Hanna uga kari perbahanen saingenna e. Tapi, la ia nggit tading i rumah. Alu bage, ia jadi usihen si luar biasa man kalak si nembah Jahwe gundari enda. La bijaksana mpediat perbahanen kalak si la mehuli ngambati ibadatta man Jahwe. Adi sipediat e terjadi, la banci sidat pasu-pasu ras gegeh si tuhu-tuhu si niperluken guna ngadapisa.

10, 11. (a) Paksa lit kesempaten, ngkai maka minter Hanna lawes ku tabernakel? (b) Uga Hanna nuriken kerina isi pusuhna man Bapana si ni surga bas pertoton?

10 Kenca nangkeng sada warin bas dalan si melala tikungenna, keluarga si mbelin e dungna nggo ndeher ku Silo. Kota e lit i datas uruk si menam ikeleweti uruk-uruk si deban si lebih meganjang. Paksa kalak e reh deherna, banci saja iukuri Hanna alu mbages kai si atena ikatakenna man Jahwe bas pertoton. Seh kenca i je, keluarga e man ras-ras. Paksa lit kesempaten, minter itadingken Hanna rombongenna guna lawes ku tabernakel Jahwe. Lit i je Imam si Mbelin eme Eli, si sangana kundul deherken tiang pintun. Tapi la iperdiateken Hanna, perban kempak Dibatana saja ukurna. Tek ia maka i tabernakel pasti lit si megiken ia. Adi la lit  kalak si deban si banci ngangkai kiniseranna, Bapana si ni surga pasti ngangkaisa. Reh bagesna ceda ukurna, janah mulai me ia tangis.

11 Asum nggirgir kerina dagingna erkiteken tangis, ngerana Hanna man Jahwe bas pusuhna. Kemuit biberna paksa iukurina kata-kata guna nuriken ceda ukurna. Janah, ndekah kal ia ertoto, nuriken isi pusuhna man Bapana. Tapi, labo atena terjeng mindo gelah ijabap Dibata pemindonna guna ndatken anak. Labo ka ate Hanna ngaloken pasu-pasu saja bas Dibata nari tapi iberena ka atena kai si ngasup iberekenna. Emaka erjanji ia, adi ipupusna sekalak anak dilaki, iberekenna kegeluhen anak e guna ngelayani Jahwe.—1 Sam. 1:9-11.

12. Bagi si icidahken usihen Hanna, persinget kai si arus siukuri paksa ertoto?

12 Emaka, Hanna mereken usihen kerna pertoton man kerina umat Dibata. Iundang Jahwe kerina umatNa gelah bebas ngerana, la ragu-ragu, nuriken kearun atena man baNa bagi sekalak anak si tek man orang tuana si perkeleng. (Oge Masmur 62:9; 1 Tesalonika 5:17.) Isuruh Dibata me rasul Petrus nuratken kata-kata si ngapuli enda kerna pertoton man Jahwe, ”Ampekenlah kerina kearun atendu man Dibata, sabap Ia kap si mperdiateken kam.”—1 Pet. 5:7.

13, 14. (a) Kai si alu meter isimpulken Eli kerna Hanna? (b) Uga tanggapen Hanna nandangi Eli jadi usihen kiniteken si luar biasa?

13 Tapi, pengertin ras perkuah ate manusia la bagi Jahwe. Asum tangis Hanna janah ertoto, sengget ia megi sada sora. Enda sora Imam si Mbelin Eli si ndube nari mperdiateken ia. Nina, ”Pengadi perlangkahndu si bagi kalak mabuk ena! Ngadiken minem-minem jenari pejore-jorelah ukurndu!” Enggo ndube nari inehen Eli biber Hanna erkemuit, perngandungna, bage pe lagu langkahna. Labo isungkunina lebe, tapi minter isimpulkenna maka Hanna mabuk.—1 Sam. 1:12-14.

14 Seh kal suina iakap Hanna, erkiteken paksa dem kal perbebenna, ituduh ka ia alu la lit dasarna janah si nuduh ia pe sekalak si meganjang kedudukenna! Tapi, iberena ka mulihi usihen kiniteken si luar biasa. La ipediatna kinilasertan sekalak jelma ngambati ibadatna man Jahwe. Ijabapna Eli alu dem pengergan janah ijelaskenna masalahna. Ijabap Eli, banci saja alu manjar-anjar, ”Mulihlah alu dame, . . . ibereken Dibata Israellah man bandu kai si ipindondu.”—1 Sam. 1:15-17.

15, 16. (a) Kai pengaruhna man Hanna kenca iturikenna isi pusuhna man Jahwe janah eribadat i tabernakel? (b) Paksa gulut ukurta, uga banci siusih Hanna?

15 Kai pengaruhna man Hanna kenca iturikenna isi pusuhna  man Jahwe janah eribadat i tabernakel? Ituriken kisah e, ”Kenca bage lawes ia, man ia, janah lanai atena ceda.” (1 Sam. 1:18) Nina Pustaka terjemahen J.H. Neumann, ”Enggo siang ayona.” Salang kal iakap Hanna. Tempa-tempa nggo ipindahkenna kinilatihen ukurna ku bara Bapana si ni surga si ndauh belinen janah ndauh gegehen. (Oge Masmur 55:23.) Lit kin masalah si mberatsa iakapNa? Lang. Mbarenda lang, gundari lang, bas wari si pepagi pe lang!

16 Paksa gulut ukurta, latih siakap, ntah pe sangana ceda ukurta, arus min siusih Hanna janah situriken kerinana man Pribadi si ikataken Pustaka ”Si Megiken pertoton”. (Msm. 65:3) Adi silakoken e alu kiniteken, sigejapken ka maka ceda ukurta igantiken alu ”kemalemen ate si rehna i bas Dibata nari, si la terukuri manusia”.—Pil. 4:6, 7.

”La Lit Sekawal bagi Dibatanta”

17, 18. (a) Kai buktina idukung Elkana janji Hanna? (b) Kai perbahanen Penina si lanai erpengaruh man Hanna?

17 Pepagina, lawes mulihi Hanna ras Elkana ku tabernakel. Banci saja, nggo iturikenna man Elkana kerna pemindon ras janjina, erkiteken menurut Undang-Undang Musa lit hak perbulangen mbatalken janji si ibahan ndeharana adi lenga iijinkenna. (Bil. 30:10-15) Tapi, la ibatalken dilaki si erkiniteken e. Malahen, ras-ras ia ras Hanna eribadat man Jahwe i tabernakel sope mulih ku rumah.

18 Ndigan isedari Penina maka perbahanenna si megombang e lanai lit pengaruhna man Hanna? La ituriken kisah e, tapi kata-kata ”lanai atena ceda” ncidahken maka nggo reh riahna iakap Hanna janah lanai aru atena kenca si e. Si pasti, minter isedari Penina maka perbahanenna si la mehuli e lanai erpengaruh man Hanna. Lanai pernah ituriken Pustaka gelar Penina.

19. Pasu-pasu kai si ialoken Hanna, janah uga ia ncidahken pengerganna man Dibata?

19 Tande minggu tande bulanna, kedamen bas pusuh Hanna dungna jadi keriahen ukur si luar biasa. Mehuli kulana! Bas keadan si meriah enda, la pernah sedetik pe ilupaken Hanna janari rehna pasu-pasu e. Paksa tubuh anakna, igelarina Samuel, si ertina ”Gelar Dibata” janah pastilah maksudna ngelebuh gelar Dibata bagi si nggo ilakoken Hanna. Bas tahun e, la ia ikut ras Elkana bage pe keluargana ku Silo. Tetap ia i rumah ras anakna sedekah telu tahun, ngasa ia ngadi minem. Kenca e, ipegegehina dirina guna ngadapi kesirangen ras anak si ikelengina.

20. Uga Hanna ras Elkana nepati janjina man Jahwe?

20 Sirang ras anak pasti la menukah. Payo, ieteh Hanna maka  lit nge si ngurus Samuel alu mehuli i Silo, banci saja iurus diberu-diberu si ngelayani i tabernakel. Tapi, kitik denga kal Samuel, janah pasti mberat iakap kerina pernanden sirang ras anakna. Amin gia bage, ibaba Hanna ras Elkana me anak e, la alu mberat ukur, tapi dem alu pengataken bujur. Ipersembahken kalak e korban i rumah Dibata, janah kenca e iberekenna Samuel man Eli, janahna ngingetken kerna janji Hanna piga-piga tahun si nggo lewat.

Hanna terbukti jadi pasu-pasu man Samuel anakna

21. Uga pertoton Hanna man Jahwe ncidahken uga bagesna kinitekenna? (Nehen ka kotak ” Dua Pertoton si Luar Biasa”.)

21 Ertoto me Hanna, pertoton si metunggung iakap Dibata isuratken bas Pustaka. Paksa sioge kata-katana bas 1 Samuel 2:1-10, idahndu i je uga bagesna kiniteken Hanna bas tep-tep kalimat si ibelaskenna. Ipujina Jahwe erkiteken nggunaken kiningasupenNa si la tersibar guna mpeteruh si megombang, masu-masu kalak si tertindas, janah mpengadi kegeluhen ntah pe nelamatken kegeluhen bas kematen nari. Ipuji Hanna me Bapana erkiteken kinibadianNa, keadilen, bage pe kesetianNa si luar biasa. Alu bage, banci ikataken Hanna, ”La lit sekawal bagi Dibatanta.” Tuhu-tuhu Jahwe Dibata si banci iteki, janah la pernah mobah, ingan cicio man kerina kalak si tertekan ras tertindas si reh man baNa guna ndarami penampat.

22, 23. (a) Engkai maka banci kita tek asum Samuel reh belinna, ietehna maka keleng ate orang tuana ia? (b) Kai ka pasu-pasu si ibereken Jahwe man Hanna?

22 Tuhu-tuhu hak istimewa man Samuel si kitik denga erkiteken mbages kal kiniteken nandena man Jahwe. Amin gia tedeh ate Samuel nandena asum ia reh belinna, la pernah akapna ia ilupaken. Tiap tahun, reh Hanna ku Silo, maba jubah man Samuel guna ipakena bas pelayanenna i  tabernakel. Tiap jaiten bas jubah e mbuktiken keleng atena anakna janah iperdiatekenna ia. (Oge 1 Samuel 2:19.) Banci sibayangken uga Hanna makeken jubah si mbaru e man Samuel, ipesikapna janah itatapna Samuel alu dem kekelengen janahna mpegegehi ia alu kata-kata si mehuli. Ipasu-pasu kal Samuel erkiteken lit nandena si mehuli, janah paksa nggo mbelin, ia jadi pasu-pasu man orang tuana bage pe man kerina Israel.

23 Hanna pe la ilupaken. Ipasu-pasu Jahwe ia alu banci ka mupus lima anak nari man Elkana. (1 Sam. 2:21) Tapi, banci saja pasu-pasu si mbelinna kal si ialoken Hanna eme hubungenna ras Bapana, Jahwe, si terus reh paguhna tahun ku tahun. Mbera kam pe nggejapken kai si igejapken Hanna, asum iusihndu kinitekenna.

^ par. 7 Amin gia ikataken Pustaka maka ’la lit ibere [Jahwe] pupus Hanna’, la lit bukti si ncidahken maka la ngena ate Jahwe diberu si meteruk ukur ras erkiniteken enda. (1 Sam. 1:5) Maun-maun, paksa ikataken maka Dibata si erbahan kejadin tertentu, si imaksudken Pustaka eme iijinkenNa nge ngenca si e terjadi i bas sada waktu.