Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL 1

”Reh min KinirajanNdu”

”Reh min KinirajanNdu”

INTI PASAL ENDA

Mpelajari terbagesen kai si niajarken Jesus kerna Kinirajan Dibata

1, 2. Kai si ikataken Jahwe man telu rasul Jesus, janah uga tanggapen kalak enda?

UGA tanggapenndu adi Dibata Jahwe sendiri mindo kam ngelakoken sada hal? Ugapa pe, pasti nggit kal kam ndalanken perentahNa e!

2 Piga-piga waktu kenca Paskah tahun 32 M, telu rasul Jesus eme Petrus, Jakup, ras Johanes ngalami si e. (Oge Matius 17:1-5.) Paksa kalak enda ras Guruna i ”deleng si meganjang”, idah kalak e pengenehenen si jadi gambaren si perlebe kerna Jesus selaku Raja surgawi si mulia. Pengenehenen e seh kal jelasna si erbahanca ate Petrus ngelakoken sada hal. Paksa Petrus ngerana denga, rempet nusur embun ku babo kalak enda. Kenca si e, Petrus ras teman-temanna ndatken sada hak kinihamaten si la banci idatken kerina jelma, megiken sora Jahwe alu jelas. Kenca mpebetehken maka Jesus eme AnakNa, alu tangkas ikataken Jahwe, ”Begikenlah ia.” Emaka idalanken rasul-rasul perentah Dibata e. Ibegikenna kai si niajarken Jesus, janah iahkenna ka kalak si deban ngelakokenca.—Perb. 3:19-23; 4:18-20.

Buen Jesus ncakapken kerna Kinirajan Dibata asangken topik si deban

3. Engkai maka ate Jahwe sibegiken AnakNa, ras topik kai si perlu sipelajari terbagesen?

3 Kata-kata ndai—”Begikenlah ia”—isuratken i bas Pustaka si Badia gelah banci sidatken pelajarenna. (Rom. 15:4) Engkai? Erkiteken Jesus me si ngerana (juru bicara) Jahwe janah tiap Jesus ngajar, ipebetehkenna kai si ate Bapana perlu sieteh. (Joh. 1:1, 14) Buen icakapken Jesus kerna Kinirajan Dibata, eme pemerentahen Mesias i surga si iperentah Jesus Kristus ras 144.000 kalak, asangken topik si deban. Emaka, mehuli kal sipelajari terbagesen alu megermet topik si seh kal pentingna enda. (Ket. 5:9, 10; 14:1-3; 20:6) Tapi, si perlebena kal, mari sipereksa ngkai maka rusur kal icakapken Jesus kerna Kinirajan Dibata.

”Si Erburak i bas Pusuh nari”

4. Kai buktina Kinirajan ndeher i bas pusuh Jesus?

4 Kinirajan ndeher bas pusuh Jesus. Engkai maka banci ikataken bage? Erkiteken kai si ibelasken ncidahken kai si lit i bas pusuh bage pe kai si tuhu-tuhu penting man banta.  Nina Jesus, ”Kai si ibelasken, e me si erburak i bas pusuh nari.” (Mat. 12:34) I bas tiap kesempaten, Jesus terus ncakapken kerna Kinirajan. Lit lebih 100 kali Kinirajan Dibata ituriken i bas empat kitap Injil, si isina buen kata-kata Jesus. Paksa ia erberita ibahanna topikna Kinirajan, alu ngataken, ”Berita si Meriah kerna Kinirajan Dibata arus kupeseh ku kuta-kuta si deban, sabap guna ngelakoken si e me kap aku isuruh Dibata.” (Luk. 4:43) Kenca kinikekenna pe, Jesus terus ncakapken kerna Kinirajan kempak ajar-ajarna. (Perb. 1:3) Jelas me, meherga kal iakap Jesus Kinirajan, emaka tersuruh ukurna ncakapken kerna si e.

5-7. (a) Janari banci sieteh maka Kinirajan ndeher bas pusuh Jahwe? Bahan anding-andingenna. (b) Adi Kinirajan ndeher bas pusuhta, kai si perlu silakoken?

5 Kinirajan pe ndeher bas pusuh Jahwe. Janari banci sieteh? Ingetlah, Jahwe ngutus AnakNa si tonggal ku doni; Jahwe me ulu kerina si ikataken ras si iajarken AnakNa. (Joh. 7:16; 12:49, 50) Jahwe pe ulu kerina si isuratken i bas empat kitap Injil kerna kegeluhen ras pelayanen Jesus. Cuba ukuri kai ertina e.

Perlu sisungkuni banta sekalak- sekalak, ’Ndeher nge Kinirajan Dibata bas pusuhku?’

6 Bayangken kam nusun album foto keluargandu. Melala kal fotona, tapi la kerina siat i bas album e. Kai si ilakokenndu? Pasti ipilihndu si apai saja si perlu imasukken. Banci ikataken, Kitap-Kitap Injil bali bagi album foto si mereken gambaren si jelas kerna Jesus. La isuruh Jahwe penulis-penulis Injil nuratken kerina si ikataken bage pe si ilakoken Jesus paksa ia i doni. (Joh. 20:30; 21:25) Tapi, kesah si badia Jahwe mbimbing kalak enda guna nuratken kata-kata ras perbahanen Jesus. Enda banci nampati kita ngangkai tujun pelayanen Jesus ras kai si pentingna kal man Jahwe. (2 Tim. 3:16, 17; 2 Pet. 1:21) Erkiteken kitap Injil dem alu ajaren Jesus kerna Kinirajan Dibata, banci sisimpulken maka Kinirajan ndeher bas pusuh Jahwe. Bayangken, ate Jahwe gelah sieteh kerna KinirajanNa e!

7 Perlu sisungkuni banta sekalak-sekalak, ’Ndeher nge Kinirajan Dibata bas pusuhku?’ Adi ndeher, tentu nggit kita megiken kai si ikataken ras si iajarken Jesus kerna Kinirajan, uga pentingna Kinirajan e, janah uga ras ndigan Kinirajan e reh.

”Reh min KinirajanNdu”—Uga?

8. Uga Jesus nuriken kerna pentingna Kinirajan?

8 Perdiateken contoh pertoton. Alu sederhana tapi mbages, ituriken Jesus uga pentingna Kinirajan alu ncidahken kai si nandangi ilakoken Kinirajan e. Pertoton e risiken pitu pemindon. Telu pemindon si perlebe lit hubungenna ras peraten Jahwe eme mpebadiaken gelarNa, kerehen KinirajanNa, bage pe gelah jadi peratenNa i doni bagi i surga.  (Oge Matius 6:9, 10.) Teluna enda lit hubungenna. Kinirajan Mesias me si igunaken Jahwe guna mpebadiaken gelarNa ras nehken peratenNa.

9, 10. (a) Paksa Kinirajan Dibata reh pagi, kai si ilakokenna? (b) Janji Pustaka si Badia si apai si itima-timaindu?

9 Uga Kinirajan Dibata e pagi reh? Paksa ertoto, ”Reh min KinirajanNdu”, sipindo gelah Kinirajan e erbahan tindaken si tegas. Paksa Kinirajan e reh pagi, ia erkuasa i belang-belang doni. Ikernepkenna kerina si jahat, bage pe kerina pemerentahen si ibahan manusia, janah njadiken doni si mbaru si dem alu keadilen. (Dan. 2:44; 2 Pet. 3:13) Kenca si e, sebelang doni jadi pardis i bas pemerentahen Kinirajan. (Luk. 23:43) Kerina kalak si lit i bas ingeten Dibata ipegeluh mulihi janah ipersada ras kalak si ikelengina. (Joh. 5:28, 29) Manusia si patuh jadi sempurna janah ngenanami kegeluhen si la erkeri-kerin. (Ket. 21:3-5) Dungna, jadi me peraten Dibata Jahwe i doni bagi i surga! La kin kam merhat ngidah janji Pustaka si Badia e jadi? Ingetlah maka tiap kam ertoto mindo gelah Kinirajan Dibata reh, itotokenndu gelah jadi janji si meherga e.

10 Payo, Kinirajan Dibata lenga ”reh” guna njabap pertotonta e. Selain si e, pemerentahen si ibahan manusia erkuasa denga gundari janah doni si mbaru si dem alu keadilen lenga terjadi. Tapi, lit berita si meriah. Kinirajan Dibata nggo ipajekken, enda sibahas kari i bas pasal seterusna. Gundari, mari sipelajari terbagesen kai si ikataken Jesus kerna ndigan Kinirajan e ipajekken janah ndigan Kinirajan e reh.

Ndigan Kinirajan Dibata Ipajekken?

11. Kai si icidahken Jesus kerna pajekna Kinirajan Dibata?

11 Jesus ncidahken maka Kinirajan labo ipajekken i bas abad si pemena M, amin gia piga-piga ajar-ajarna ngarapken si e. (Perb. 1:6) Perdiateken kai si ikataken Jesus i bas dua perumpaman si iberekenna i bas waktu la seh dua tahun.

12. I bas perumpaman kerna page ras sesa, keterangen kai si ncidahken maka Kinirajan la ipajekken i bas abad pemena M?

12 Perumpaman kerna page ras sesa. (Oge Matius 13:24-30.) Kenca nuriken perumpaman e, kira-kira i bas musim semi tahun 31 M, ijelasken Jesus ertina kempak ajar-ajarna. (Mat. 13:36-43) Enda me inti ras erti perumpaman e: Kenca kematen rasul-rasul, Iblis ngamburken sesa (kalak Kristen palsu) i tengah-tengah page (”kalak si enggo ngendesken dirina man Dibata”, ntah pe kalak Kristen si iminaki). Page ras sesa ipelepas radu turah sedekah sada masa seh ku masa rani, eme ”kedungen doni enda”. I bas bena-bena masa rani, sesa ipepulung. Kenca si e page pe ipepulung. Emaka, perumpaman enda ncidahken maka  Kinirajan ipajekken, labo i bas abad si pemena M, tapi kenca dung masa perturah page ras sesa e. Masa perturahna e dung i bas tahun 1914 janah i je me ibenaken masa rani.

13. Perumpaman kai si ibahan Jesus guna njelasken maka labo ia mis itangkuhken jadi Raja Mesias kenca mulihken ku surga?

13 Perumpaman kerna duit mina. (Oge Lukas 19:11-13.) Jesus mereken perumpaman enda i bas tahun 33 M i bas perdalanenna si perpudi ku Jerusalem. Piga-piga si megiken ia erpengakap maka Jesus majekken Kinirajanna seh kenca kalak e i Jerusalem. Guna mpesikap tanggapen e janah ncidahken maka Kinirajan e ipajekken i bas wari si pepagi, Jesus mpeseri dirina bagi ”sekalak si biak raja” si lawes ”ku kuta si ndauh guna iesahken jadi raja”. * I bas hal enda, ”kuta si ndauh” eme surga, ingan Jesus ngaloken kuasa selaku Raja i bas Bapana nari. Tapi, ieteh Jesus maka labo mis ia itangkuhken jadi Raja Mesias kenca mulihken ku surga. Sebalikna, ia kundul arah kemuhen Dibata janah nimai ngasa waktu si enggo itentuken. Masa ia nimai erabad-abad dekahna.—Msm. 110:1, 2; Mat. 22:43, 44; Heb. 10:12, 13.

Ndigan nge Kinirajan Dibata Reh?

14. (a) Uga Jesus njabap penungkunen empat rasulna? (b) Kai si icidahken arah penggenepen nubuat Jesus kerna kerehenna ras kerna Kinirajan?

14 Piga-piga wari sope Jesus ibunuh, nungkun empat rasulna man bana, ”Kai nge pagi tanda-tanda kerehenndu [ntah pe, ”kehadirenndu”] dingen kai nge pagi tanda-tanda kedungen jaman enda?” (Mat. 24:3; Mrk. 13:4) Ijabap Jesus  alu nuriken nubuat si mbue pengertinna i bas Matius bindu 24 ras 25. Jesus nuriken kejadin-kejadin sebelang doni si jadi tanda sada jangka waktu si igelari ”kehadiren”-na. Kehadiren Jesus ibenai radu ras pajekna Kinirajan; janah ujung kehadirenna radu ras rehna Kinirajan. Mbue kal bukti maka nubuat Jesus paksana igenepi mulai tahun 1914. * Emaka, tahun e jadi tanda imulaina kehadiren Jesus ras pajekna Kinirajan.

15, 16. Ise maksudna ”generasi enda”?

15 Tapi, ndigan kin Kinirajan Dibata e reh? La ituriken Jesus ndigan tepatna e terjadi pagi. (Mat. 24:36) Tapi, ikatakenna sada hal si banci erban kita tek maka Kinirajan e enggo seh kal deherna. Ituriken Jesus maka Kinirajan e reh pagi kenca ”kalak si genduari enda [ntah pe, ”generasi enda”]” naksiken penggenepen tanda nubuat e. (Oge Matius 24:32-34.) Ise maksudna ”generasi enda”? Mari siperdiateken kata-kata Jesus.

16 ”Generasi enda”. Payo nge si imaksudken Jesus e kalak si la tek? Labo. Perdiateken ise si megiken ia. Jesus mpeseh nubuat enda kempak piga-piga rasul si ”ndeheri ia”. (Mat. 24:3) La ndekah kenca si e, rasul-rasul enda iminaki alu kesah si badia. Perdiateken ka konteksna. Sope ngerana kerna ”generasi enda”, ikataken Jesus, ”Bahanlah batang ara jadi pelajaren man bandu. Adi idahndu dahanna meratah janah erbulung nguda ia, ietehndu maka musim perlego enggo ndeher. Bage me pe, adi idahndu pagi jadi kerina si kukataken enda ndai, ietehndu me maka enggo ndeher kedungen doni enda.” Kalak si ngidah kai si inubuatken Jesus ras si meteh maka kehadiren Jesus ”enggo ndeher” eme pengikut-pengikutna si iminaki, labo kalak si la tek. Emaka, paksa ikataken Jesus kerna ”generasi enda”, maksudna eme pengikut-pengikutna si iminaki.

17. Kai erti ”generasi” ras erti ’si enda kerina’?

17 ”Si enda pagi kerina jadi ope denga keri mate.” Uga kata-kata enda jadi kenyatan? Guna njabapsa, perlu sieteh dua hal, erti ”generasi” ras erti ’si enda kerina’. Istilah ”generasi” biasana ngertiken kerina kalak i bas erbage-bage umur si sempat radu nggeluh sedekah jangka waktu tertentu. Sada generasi labo gedangsa janah lit nge kedungenna. (Kel. 1:6) Kata-kata ’si enda kerina’ ngertiken kerina kejadin si inubuatken sedekah kehadiren Jesus, mulai tahun 1914 seh ku ujungna eme kiniseran si mbelin.—Mat. 24:21.

18, 19. Uga carana banci siangkai kata-kata Jesus kerna ”generasi enda”, janah kai kesimpulenta?

18 Adi bage, uga banci siangkai kata-kata Jesus kerna ”generasi enda”? Generasi e ibagi jadi dua terpuk kalak si iminaki si sempat radu nggeluh. Si pemena, kalak si iminaki si ngidah tangtangna tanda i bas tahun 1914 igenepi.  Si peduaken, kalak si iminaki si sedekah sada masa nggeluh sejaman ras terpuk si pemena ndai. Silang-langna lit piga-piga kalak i bas terpuk si peduaken enda ngidah permulan kiniseran si mbelin e pagi. Dua terpuk enda jadi sada generasi, erkiteken kalak enda sempat radu nggeluh selaku kalak Kristen si iminaki i bas sada waktu. *

19 Kai kesimpulenta? Sieteh maka tanda kehadiren Jesus i bas kuasa Kinirajan jelas teridah i belang-belang doni. Siidah ka maka kalak si iminaki si jadi bagin i bas ”generasi enda” reh tuana; tapi, labo kerina pagi mate sope kiniseran si mbelin ibenai. Emaka, banci sisimpulken maka kentisik nari Kinirajan Dibata reh janah ndalanken kekuasanna i doni! Seh kal luar biasana pagi ngidah pertoton si niajarken Jesus terjabap, ”Reh min KinirajanNdu”!

20. Topik penting kai si nandangi ibahas i bas buku enda, janah kai si ipelajari i bas pasal seterusna?

20 Mbera la pernah silupaken kata-kata ”begikenlah ia”, si ibelasken Jahwe surga nari kerna AnakNa. Selaku kalak Kristen situhu-tuhu, merhat kal kita ndalanken petunjuk Dibata e. Nggit kal kita meteh kerina si ikataken ras si niajarken Jesus kerna Kinirajan Dibata. Kai si enggo ras si nandangi ilakoken Kinirajan i bas wari si pepagi sada topik si seh kal pentingna guna sipelajari, janah si e ibahas i bas buku enda. Pasal seterusna mbahas perkembangen si erbahan meriah ukurta kerna pajekna Kinirajan Dibata i surga.

^ par. 13 Mbelin kemungkinenna, perumpaman Jesus ngingetken kalak si megiken ia kempak Arkelaus, anak Herodes Agung. Sope Herodes mate, iwariskenna man Arkelaus pemerentahen Judea ras daerah si debanna. Tapi, sope merentah, tangtangna Arkelaus arus erban perdalanen si ndauh ku Roma guna mindo ijin man Kaisar Agustus.

^ par. 18 Kalak si iminaki kenca si perpudina i bas terpuk si pemena mate, si naksiken ’permulan kinisuin’ i bas tahun 1914, labo bagin i bas ”generasi enda”.—Mat. 24:8.