Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL 17

Mereken Pelatihen man Pelayan Kinirajan

Mereken Pelatihen man Pelayan Kinirajan

INTI PASAL ENDA

Sekolah-sekolah teokratis nikapken pelayan Kinirajan ndalanken tugasna

1-3. Uga Jesus mpebelang dahin erberita, janah penungkunen kai si lit kerna e?

DUA tahun dekahna, Jesus erberita i sebelang Galilea. (Oge Matius 9:35-38.) Idahina melala kota ras kuta, ngajar ia i rumah pertoton kalak Jahudi janah mberitaken berita si meriah kerna Kinirajan. Ku japa pe ia erberita, nterem kalak ngkeleweti ia. ”Mbelang man peranin,” nina Jesus, janah perlu terbuen kalak si erdahin.

2 Iaturken Jesus gelah pendahin erberita ipebelang. Uga carana? Alu ngutus 12 rasulna guna ”meritaken kerna Kinirajan Dibata”. (Luk. 9:1, 2) Banci saja tersungkun-sungkun rasul-rasulna kerna cara ngelakoken pendahin e. Sope ngutus rasul-rasulna, alu cara si perkeleng ibereken Jesus pelatihen si nggo ialokenna i bas Bapana si ni surga.

3 Tersungkun-sungkun i bas pusuhta: Pelatihen kai nge si ialoken Jesus i bas Bapana nari? Pelatihen kai si ibereken Jesus man rasul-rasulna? Janah, ibereken Raja Mesias denga nge pelatihen man pengikutna gundari guna ngelakoken pelayanenna? Adi ue, uga carana?

”Kai si Iajarken Bapa man Bangku, e me si Kukataken”

4. Ndigan janah i ja Jesus iajari Bapana?

4 Alu jelas iakui Jesus maka ia iajari Bapana. Paksa ngelakoken pelayanenna, ikataken Jesus, ”Kai si iajarken Bapa man bangku, e me si kukataken.” (Joh. 8:28) Ndigan janah i ja Jesus iajar? Banci saja la ndekahsa kenca ia itepa selaku Anak sintua Dibata. (Kol. 1:15) Paksa Jesus i sebelah Bapana i surga, ibegikenna janah iperdiatekenna ’Guru si Beluh’ e la ersibar dekahna. (Jop 36:22) Hasilna, ialoken Anak enda pendidiken si seh kal ulina kerna sifat, pendahin, bage pe peraten Bapana.

5. Petunjuk kai si ibereken Bapa man Anak kerna pelayanen si nandangi ilakokenna i doni?

5 I bas paksana, iajar Jahwe me AnakNa kerna pelayanen si nandangi ilakokenna i doni. Perdiateken nubuat si nggambarken hubungen Guru si Beluh ras AnakNa sintua. (Oge Jesaya 50:4, 5.) Nina nubuat e, iingeti Jahwe AnakNa ”tep-tep erpagi-pagi”. Gambaren e nuriken kerna sekalak  guru si ngingeti muridna tiap erpagi-pagi guna ngajarisa. Ikataken sada buku kerna Pustaka si Badia, ”Ibaba Jahwe ia ku sekolah bagi sekalak murid, janah iajariNa cara erberita.” I bas ”sekolah” surgawi e, iajari Jahwe AnakNa kerna ”kai si arus ipebetehkenna ras kai si arus ikatakenna”. (Joh. 12:49) Janah ibereken Bapa me petunjuk man AnakNa kerna uga carana ngajar. * Paksa Jesus i doni, igunakenna alu mehuli pelatihenna labo ngenca alu ngelakoken pelayanenna, tapi pe alu mereken pelatihen man pengikutna gelah kalak enda banci ndalanken pelayanen.

6, 7. (a) Pelatihen kai si ibereken Jesus man rasul-rasulna, janah enda mperlengkapi kalak e guna ngelakoken kai? (b) Pelatihen kai si ipastiken Jesus gelah idatken kerina pengikutna i bas jamanta?

6 Pelatihen kai si ibereken Jesus man rasul-rasulna, bagi si ituriken ndai? Menurut Matius bindu 10, iberekenna petunjuk si khusus kerna pelayanen, si termasuk: daerah erberita (ayat 5, 6), isi beritana (ayat 7), pentingna ernalem man Jahwe (ayat 9, 10), cara ndeheri si mada jabu (ayat 11-13), cara ngadapi kalak si nulak (ayat 14, 15), ras cara ngadapi penganiayan (ayat 16-23). * Pelatihen si jelas si ibereken Jesus man rasul-rasulna mperlengkapi kalak enda guna jadi si mbuka dalan pendahin erberita si meriah i bas abad si pemena M.

7 Uga i bas jamanta? Selaku Raja Kinirajan Dibata, nggo ibereken Jesus man pengikutna tugas si seh kal pentingna, eme mberitaken ”berita si meriah kerna Kinirajan . . . man manusia i belang-belang doni enda, jadi saksi man kerina bangsa”. (Mat. 24:14) Enggo nge ibereken Raja pelatihen man banta i bas ndalanken tugas si seh kal pentingna enda? Enggo! I bas surga nari, nggo ipastiken Raja e gelah kerina pengikutna dat pelatihen kerna cara erberita ras cara ndalanken tanggung jabap khusus si lit ije.

Mereken Pelatihen man Pelayan guna Jadi Penginjil

8, 9. (a) Kai tujun utama Sekolah Pelayanen Teokratis? (b) Uga perpulungen pertengahen minggu nampati kam gelah reh beluhna erberita?

8 Organisasi Jahwe nggo ndekah nggunaken erbage kebaktin ras perpulungen, misalna Perpulungen Dinas, guna mereken pelatihen man umat Dibata i bas ngelakoken pelayanen. Tapi, mulai tahun 1940-en, turang senina si ndalanken kepeminpinen i kantor pusat mulai ngaturken pelatihen arah erbage sekolah.

9 Sekolah Pelayanen Teokratis. Bagi si nggo sipelajari bas pasal si nggo lewat, sekolah enda ibenaken i bas tahun 1943. Payo kin tujun sekolah enda terjeng mereken pelatihen man murid-murid gelah reh beluhna erkhotbah i bas runggun? Lang. Tujun utama sekolah enda eme mereken pelatihen man umat Dibata gelah banci nggunaken kinibeluhenna i bas ngerana lako muji Jahwe i bas pelayanen. (Msm. 150:6) Sekolah enda mperlengkapi turang seninanta si nggo  terdaftar gelah reh beluhna mberitaken Kinirajan. Gundari pelatihen enda lit i bas perpulungen pertengahen minggu.

10, 11. Gundari, ise si banci ikut Sekolah Gilead, janah kai tujun kurikulumna?

10 Sekolah Alkitab Gilead Menara Pengawal. Sekolah Alkitab Gilead Menara Pengawal ibenaken i bas wari Senin, 1 Februari 1943. Tangtangna sekolah enda ibahan guna mereken pelatihen man perintis-perintis ras turang senina si sepenuh waktu si debanna guna dinas utusen injil i juma sebelang doni. Tapi, mulai bulan Oktober 2011, pendaftaren pe ibatasi man kalak si nggo i bas dinas sepenuh-waktu khusus saja, eme perintis istimewa, pertua keliling ras ndeharana, anggota Betel, bage pe utusen injil lapangen si lenga ikut bas sekolah enda.

11 Kai tujun kurikulum Sekolah Gilead? Sekalak guru i sekolah e si nggo erpengalamen ngataken, ”Guna mpegegehi kiniteken murid-murid arah pelajaren Pustaka si Badia si megermet janah nampati kalak e guna mpebelin sifat-sifat rohani gelah banci ngadapi tentangen i bas tugasna. Tujun utama si deban eme gelah reh paguhna sura-surana i bas ndalanken pendahin penginjilen.”​—Ep. 4:11.

12, 13. Kai pengaruh Sekolah Gilead nandangi dahin erberita sebelang doni? Bereken contohna.

12 Kai pengaruh Sekolah Gilead nandangi pendahin erberita sebelang doni? Mulai tahun 1943, lebih 8.500 kalak nggo ndatken pelatihen i bas sekolah enda, * janah utusen injil Gilead nggo ngelayani i bas lebih 170 negeri i belang-belang doni. Idalanken utusen-utusen injil enda pelatihen si nggo idatna, kalak enda jadi usihen si ergiah-giah i bas erberita bage pe mereken pelatihen man kalak si deban gelah ikut ngelakokenca. Utusen injil enda megati jadi si mbuka dalan i bas pendahin i daerah si la nterem perberita Kinirajanna.

13 Perdiateken kai si terjadi i Jepang. Paksa Perang Doni II, dahin erberita si ratur lanai erdalan. I bas bulan Agustus 1949, perberita i Jepang la seh sepuluh kalak. Tapi i bas pendungi tahun e, lit 13 utusen injil tamaten Gilead sibuk erberita i Jepang. Kenca si e, rehen me terbuen utusen injil. Tangtangna, iutamaken utusen-utusen injil enda erberita i kota-kota si mbelin; kenca e, kalak e pindah ku kota-kota si debanna. Meriah ukur kalak enda ngiahken kalak si erlajar Pustaka ras ia bage pe turang senina si deban gelah ikut merintis. Tuhu-tuhu simpar ulih latih kalak enda. Gundari, lebih 216.000 perberita Kinirajan i Jepang, janah menam 40 persen si merintis! *

14. Sekolah-sekolah teokratis mbuktiken kai? (Nehen ka kotak ” Sekolah-Sekolah si Mereken Pelatihen man Pelayan Kinirajan”, halamen 188.)

14 Sekolah teokratis si debanna. Sekolah Dinas Perintis, Sekolah Alkitab bagi Pasangan Kristen, ras Sekolah Alkitab bagi Saudara Lajang nggo nampati kalak si ikut gelah reh majuna dingen reh matangna secara rohani janah jadi  usihen si ergiah-giah i bas pendahin penginjilen. * Kerina sekolah teokratis enda jadi bukti si jelas maka nggo iperlengkapi Rajanta kita guna tuhu-tuhu ndalanken pelayanenta.​—2 Tim. 4:5.

Mereken Pelatihen man Turang Senina si Dilaki guna Ngelakoken Tanggung Jabap Khusus

15. Uga turang seninanta si dilaki si lit tanggung jabapna banci ngusih Jesus?

15 Ingetlah mulihi nubuat Jesaya kerna Jesus si iajari Jahwe. I bas ”sekolah” surgawi e, Anak e erlajar ’mpegegehi kalak si latih alu kata-kata’. (Jes. 50:4) Idalanken Jesus pelajaren e; paksa i doni, malem ibahanna pusuh kalak si ”latih janah beraten”. (Mat. 11:28-30) Ate turang seninanta si dilaki si lit tanggung jabapna pe ngusih Jesus gelah banci jadi ulu kemalemen ate man turang seninana. Emaka, ibahan me erbage-bage sekolah guna nampati turang seninanta si beluh gelah reh beluhna ngelayani teman sada kinitekenna.

16, 17. Kai tujun Sekolah Pelayanen Kinirajan? (Nehen ka cataten i teruh.)

16 Sekolah Pelayanen Kinirajan. Kelas si pemena sekolah enda ibenaken tanggal 9 Maret 1959, i South Lansing,  New York. Pertua keliling bage pe hamba runggun iundang gelah reh ku kursus enda sada bulan dekahna. Bas pudi wari, kursus enda iterjemahken cakap Inggris nari ku cakap si debanna, janah alu ertahap mulai ibereken sekolah enda pelatihen man turang senina si dilaki i belang-belang doni. *

Turang seninanta Lloyd Barry paksana ngajar i Sekolah Pelayanen Kinirajan i Jepang, 1970

17 Kerna tujun Sekolah Pelayanen Kinirajan, ikataken Buku Tahunan Saksi-Saksi Yehuwa 1962 (i bas cakap Inggris), ”I bas doni si seh kal sibukna enda sekalak pengawas i bas runggun saksi-saksi Jahwe arus min sekalak dilaki si banci ngatur kegeluhenna gelah banci mperdiateken kerina kalak i bas runggun janah jadi pasu-pasu man kalak e. Amin gia bage, ula min sempat la iperdiatekenna keluargana perban ngepkep runggun, tapi arus igunakenna akal sehat. Sada kesempaten si mehuli si ibereken man hamba runggun i belang-belang doni si reh ku Sekolah Pelayanen Kinirajan guna ndatken pelatihen si banci nampati ia ncukupi sarat Pustaka si Badia selaku pengawas!”​—1 Tim. 3:1-7; Tit. 1:5-9.

18. Uga kerina umat Dibata ndatken kegunan i bas Sekolah Pelayanen Kinirajan?

 18 Kerina umat Dibata ndatken kegunan i bas Sekolah Pelayanen Kinirajan. Uga carana? Adi idalanken pertua ras sinampati perpulungen kai si ipelajarina i bas sekolah e, bagi Jesus, kalak enda jadi ulu kemalemen ate man teman sada kinitekenna. Iergaindu nge ranan si mehuli, kalak si nggit megiken, ntah pe kata pergegeh i bas pertua ras sinampati perpulungen nari paksa ndahi kita? (1 Tes. 5:11) Tuhu-tuhu sada pasu-pasu man runggun erkiteken lit turang seninanta si dilaki si beluh e!

19. Sekolah kai ka si iawasi Panitia Pengajaren, janah kai saja tujunna?

19 Sekolah teokratis si debanna. Panitia Pengajaren i bas Badan Pinpinen nari ngawasi sekolah-sekolah si deban si nikapken pelatihen man turang senina si dilaki si ndatken tanggung jabap i bas organisasi. Tujun sekolah-sekolah enda nampati turang senina si dilaki si ertanggung jabap, eme pertua runggun, pertua keliling, ras anggota Panitia Cabang, gelah reh beluna ndalanken mbue tanggung jabapna. Kursus si erpalasken Pustaka enda ngiahken turang seninanta e guna njaga kerohaninna bage pe ndalanken prinsip Pustaka paksa erurusen ras biri-biri si meherga si ipercayaken Jahwe man bana.​—1 Pet. 5:1-3.

Kelas si pemena Sekolah Pelatihen Pelayanen si ibahan i Malawi, 2007

20. Engkai maka banci ikataken Jesus kita kerina ’iajari Jahwe’, janah kai tekadndu?

20 Jelas me, nggo ipastiken Raja Mesias gelah kerina pengikutna ndatken pelatihen alu mehuli. Kerina pelatihen enda rehna datas nari ku teruh: Jahwe mereken pelatihen man AnakNa, janah Anak mereken pelatihen man pengikutna. Emaka, banci ikataken Jesus maka kita kerina ’iajari Jahwe’. (Joh. 6:45; Jes. 54:13) Mbera kita ertekad gelah ndatken mbue manfaat i bas pelatihen si nggo isikapken Rajanta. Janah, ingetlah maka tujun utama kerina pelatihen enda eme nampati kita guna terus njaga kerohaninta tetap paguh gelah banci tuhu-tuhu ndalanken pelayanenta.

^ par. 5 Uga banci sieteh maka iajari Bapa e Anakna kerna cara ngajar? Cuba pertimbangkenndu: Jumlah perumpaman si ipake Jesus paksa ngajar nggenepi sada nubuat si itulis erabad-abad sope ia tubuh. (Msm. 78:2; Mat. 13:34, 35) Jelas me, ipastiken Jahwe, Pengarang nubuat e, gelah AnakNa ngajar alu anding-andingen, ntah pe perumpaman.​—2 Tim. 3:16, 17.

^ par. 6 Erbulan-bulan kenca si e, ’ipilih Jesus pitu puluh kalak nari jadi ajar-ajarna janah isuruhna dua-dua kalak sendalanen’ guna erberita. Kalak enda pe iberena pelatihen.​—Luk. 10:1-16.

^ par. 12 Lit si labo sekali ngenca ngikuti Sekolah Gilead.

^ par. 13 Guna penjelasen si terdauhen kerna pengaruh utusen-utusen injil tamaten Gilead nandangi juma sebelang doni, nehen buku Saksi-Saksi Yehuwa— Pemberita Kerajaan Allah, pasal 23.

^ par. 14 Dua sekolah si terakhir si ituriken ndai nggo iganti jadi Sekolah man Perberita Kinirajan.

^ par. 16 Gundari, kerina pertua ndatken kegunan i bas pelatihen Sekolah Pelayanen Kinirajan si erbage-bage dekahna, janah ibahan piga-piga tahun sekali. Mulai tahun 1984, sinampati perpulungen pe ndatken pelatihen i sekolah enda.