Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL 7

Cara Erberita—Nggunaken Erbage-bage Alat lako Mpeseh Berita man Nterem Jelma

Cara Erberita—Nggunaken Erbage-bage Alat lako Mpeseh Berita man Nterem Jelma

INTI PASAL ENDA

Umat Dibata nggunaken erbage cara i bas erberita guna mpeseh berita e man nterem jelma

1, 2. (a) Cara kai si igunaken Jesus sanga ngerana man jelma si nterem? (b) Uga ajar-ajar Kristus si setia ngikuti contoh si ibahanna, janah ngkai?

ENTEREM jelma ngkeleweti Jesus i tepi dano, tapi nangkih Jesus ku das perahu kenca e reh dauhna ia sitik bas tepi dano nari. Engkai? Ietehna maka permukan lau banci erbahan sorana reh gangna gelah berita si ipesehna banci ibegiken jelma si nterem alu lebih jelas.​—Oge Markus 4:1, 2.

2 I bas tahun-tahun sope ras kenca pajek Kinirajan, iikutken ajar-ajar Kristus si setia contoh si nggo ibahanna, nggunaken erbage cara si mbaru i bas mpeseh berita si meriah kerna Kinirajan man nterem jelma. Alu bimbingen Raja, terus ikembangken ras igunaken umat Dibata teknologi si lit asum keadanna berubah. Ateta mpeseh berita e man nterem jelma sope reh kedungenna. (Mat. 24:14) Perdiateken piga-piga cara si nggo sigunaken guna mpeseh berita e man nterem jelma i japa pe ia ringan. Ukuri ka uga carana banci iusihndu kiniteken kalak si mbarken berita si meriah i bas masa si pemena.

Mpeseh Berita man Nterem Jelma

3. Engkai maka segat ate nterem musuh kebenaren erkiteken sigunaken koran?

3 Koran. Enggo iterbitken turang seninanta Russell ras teman-temanna Watch Tower mulai 1879, guna mpeseh berita Kinirajan man nterem jelma. Tapi, puluhen tahun sope 1914, tempa bagi iatur Kristus keadan gelah reh buena kalak megiken berita si meriah. Uruten kejadinna ibenaken bas tahun 1903. Bas tahun e, Dr. E. L. Eaton, juru bicara terpuk rohaniwan Protestan i Pennsylvania, mindo man Charles Taze Russell gelah erbahan perdebaten erkelanjuten kerna doktrin Pustaka si Badia. I bas suratna man Russell, nina Eaton, ”Kuakap, adi sibahan perdebaten i lebe-lebe jelma si nterem kerna piga-piga pengangkanta si la seri . . . pasti meriah kal akap kalak.” Russell ras teman-temanna pe erpengakap bage, emaka iatur kalak e gelah perdebaten enda iterbitken i bas sada koran si terberita, The Pittsburgh Gazette. Melala kal kalak si meriah iakapna ngoge  artikel-artikel i bas koran e. Janah penjelasen Russell si tangkas kerna kebenaren Pustaka si Badia seh kal jilena piah dungna ipindo koran e gelah khotbah-khotbah Russell iterbitken tiap minggu. Kejadin si la isangka-sangka enda pasti erbahan segat ate musuh-musuh kebenaren!

I bas tahun 1914, lebih 2.000 koran si nerbitken khotbah Russell

4, 5. Sifat kai si icidahken Russell, ras uga turang senina si lit tanggung jabapna banci ngusih ia?

4 Koran-koran si deban pe la nggit ketadingen, ikut atena nerbitken khotbah-khotbah Russell. Bas tahun 1908, ilaporken Watch Tower maka khotbah-khotbah Russell iterbitken bas ”sepulu sada koran alu ratur”. Tapi, turang seninanta si lebih mbue pemetehna kerna koran, isarankenna gelah ipindahken Russell kantor Lembaga bas Pittsburgh nari ku kota si lebih terberita, alu bage lebih mbue kari koran si banci nerbitken artikel-artikel si erpalasken Pustaka si Badia. Kenca iukurina saran e bage pe faktor-faktor si deban, ipindahken Russell kantor ku Brooklyn, New York, bas tahun 1909. Kai hasilna? Piga-piga bulan saja kenca pindah, khotbah Russell iterbitken bas kira-kira 400 koran, ras daftar e terus erbuena. Paksa Kinirajan pajek bas 1914, lit lebih 2.000 koran i bas empat cakap si nerbitken khotbah ras artikel Russell!

5 Kai pelajarenna man banta? Kalak si lit tanggung jabapna bas organisasi Dibata gundari patut ngusih sifat Russell si meteruk rukur. Uga carana? Sope erbahan keputusen si penting, ukurilah saran kalak si deban.​—Oge Kuan-kuanen 15:22.

6. Uga kebenaren si terbit bas artikel i koran-koran banci mpengaruhi sekalak jelma?

6 Kebenaren Kinirajan i bas artikel i koran-koran e ngubah kegeluhen nterem jelma. (Heb. 4:12) Contohna, Ora Hetzel, si iperidiken tahun 1917, ia me salah sada i bas nterem jelma si ndatken kebenaren arah artikel si bage. Nina Ora, ”Kenca erjabu, kudahi Nandengku i Rochester, Minnesota. Seh kenca aku i je, kuidah iguntingna artikel bas koran nari. E khotbah Russell. Ijelasken Nande kai si nggo ipelajarina i bas artikel koran e nari.” Ialoken Ora kebenaren si ipelajarina janah jadi perberita Kinirajan Dibata si setia sedekah kira-kira 60 tahun.

7. Engkai maka kalak si ndalanken kepeminpinen perlu ngukuri mulihi penggunan koran?

7 I bas tahun 1916, lit dua peristiwa si erbahan kalak si ndalanken kepeminpinen perlu ngukuri mulihi penggunan koran i bas erberita. Si pemena, terjadi Perang si Mbelin si erbahanca mesera kal ndatken bahan-bahan percetaken. Bas tahun 1916, laporen i bas departemen koran i Inggris njelasken kesuliten e alu ngataken, ”Gundari, lebih 30 ngenca koran si nerbitken Khotbah-Khotbah. Mbelin kemungkinenna lanai ndekah jumlah e reh kurangna erkiteken merga kal kertas.” Si peduaken, i bas 31 Oktober 1916 turang seninanta Russell mate. Imomoken  The Watch Tower 15 Desember 1916, ”Erkiteken turang seninanta Russell nggo mate, rubrik khotbah [i koran-koran] tuhu-tuhu ipengadi.” Amin gia cara erberita e lanai igunaken, tapi cara si deban, ”Drama-Foto Penciptaan”, mereken hasil si luar biasa.

8. Kai saja si ilakoken guna erbahan ”Drama-Foto Penciptaan”?

8 Presentasi gambar. Russell ras teman-temanna erdahin kira-kira telu tahun dekahna erbahan ”Drama-Foto Penciptaan”, si ipetandaken i bas tahun 1914. (Kua. 21:5) ”Drama”, bage penggelarenna, eme karya si mbaru si risiken gabungen gambar bergerak, rekamen sora, ras slide kaca ergambar. Ratusen kalak ngelakoken adegan-adegan Pustaka si Badia si irekam i bas pita film, janah rubia-rubia pe ikut irekam. Nina sada laporen bas tahun 1913, ”Menam kerina rubia-rubia bas taman margasatwa si mbelin igunaken  i bas erbahan Gambar Bergerak alu efek sora i bas adegan Nuah bas pertunjuken utama.” Iwarnai seniman-seniman i London, New York, Paris, ras Philadelphia ratusen kaca ergambar e.

9. Engkai maka melala waktu ras sen si igunaken i bas erbahan ”Drama-Foto”?

9 Engkai maka melala waktu ras sen si igunaken i bas erbahan ”Drama-Foto”? Sada keputusen si ialoken i bas seri kebaktin tahun 1913 njelasken, ”Kesuksesen koran-koran Amerika i bas mbentuk perukuren jelma si nterem alu kartun ras ilustrasi i kolom berita ras majalah-majalahna, bage ka pe gambar bergerak si seh kal terberitana janah menukah ngatursa, mbuktiken maka enda tuhu-tuhu erguna. Emaka, tek kita selaku perberita ras guru kelas-kelas Pustaka si Badia si nggit erbahan kemajun, perlu sidukung alu bulat ukur penggunan gambar bergerak ras pemutar slide si jadi cara si erguna ras seh kal ulina man perberita ras guru.”

Datas: Ruangen proyektor ”Drama-Foto”; teruh: Slide kaca-ergambar ”Drama-Foto”

10. Sibar uga belangna pemutaren ”Drama-Foto”?

10 I bas tahun 1914, ”Drama-Foto” iputarken i bas 80 kota tiap wari. Menam waluh juta kalak si ndedahsa i Amerika Serikat ras Kanada. I bas tahun e, ”Drama-Foto” pe iputarken i Australia, Denmark, Finlandia, Inggris, Jerman, Norwegia, Selandia Baru, Swedia, ras Swiss. ”Drama-Foto” si gendek, si la lit gambar bergerakna, ibahan man kota-kota si lebih kitik. Enda gelarna ”Drama Eureka” si lebih murah biaya pembuatenna janah menukah mabasa. Bas tahun 1916, ”Drama-Foto” bage ka pe ”Drama Eureka” iterjemahken ku cakap Armenia, Denmark-Norwegia, Italia, Jerman, Junani, Polandia, Prancis, Spanyol, ras Swedia.

I bas tahun 1914, iputarken ”Drama-Foto” bas gedung-gedung si nterem jelma

11, 12. Uga ”Drama-Foto” kena ku pusuh sekalak anak perana, janah kai si banci siusih bas ia nari?

11 Kena kal ku pusuh anak perana si umurna 18 tahun, si gelarna Charles Rohner paksa ndedah ”Drama-Foto” i bas cakap Prancis. Nina, ”Kutonton drama e i bas kutaku, Colmar, Alsace, Prancis. Mulai adegan si pemena, meriah kal ukurku ndedah drama kebenaren Pustaka si Badia si jelas.”

12 Dungna Charles iperidiken, janah bas tahun 1922 ikut ia bas dinas sepenuh waktu. Salah sada tugasna si pemena eme ikut mutarken ”Drama-Foto” man kalak si ndedahsa i Prancis. Kerna pendahinna, nina Charles, ”Erbage-bage tugasku, main biola, si ngaturken pembukun, ras si ngaturken lektur. Ipindo ka aku ngaturken si pulung gelah tenang sope acara ibenaken. Paksa istirahat, tawarken kami lektur. Tugasken kami sada senina ntah pe turang ku tiap blok i gedung. Kerina maba lektur janah ijumpai kami kerina kalak si lit i blok e. I bas pintu masuk gedung, ban kami ka melala lektur i datas meja.” Bas tahun 1925, Charles iundang guna ngelayani i Betel Brooklyn,  New York. I je, itugasken ia jadi dirigen orkestra guna stasiun radio WBBR si mbaru denga ibahan. Kenca siperdiateken usihen turang seninanta Rohner, banci sipereksa dirinta, ’Nggit nge aku ngaloken tugas kai pe guna ikut mberitaken berita Kinirajan?’​—Oge Jesaya 6:8.

13, 14. Uga radio igunaken i bas mberitaken berita si meriah? (Nehen ka kotak ” Acara i WBBR” ras ” Kebaktin si Ersejarah”.)

13 Radio. Bas tahun 1920-en, pemutaren ”Drama-Foto” nggo erkurangna, tapi radio jadi cara si penting i bas mberitaken berita si meriah kerna Kinirajan. I bas tanggal 16 April 1922, ipeseh turang seninanta Rutherford khotbahna si pemena i radio bas Metropolitan Opera House i Philadelphia, Pennsylvania. Kira-kira 50.000 kalak megiken khotbah si erjudul ”Jutan Kalak si Nggeluh Gundari La Pernah Banci Mate”. Kenca si e, bas tahun 1923, i jenda me tang-tangna acara kebaktin isiarken arah radio nari. Selain nggunaken stasiun-stasiun radio komersial, iputusken kalak si ndalanken kepeminpinen maka reh ulina adi lit stasiun radionta sendiri, si ipajekken i Staten Island, New York, ras idaftarken jadi WBBR. Siarenna si pemena ibahan i bas tanggal 24 Februari 1924.

I bas tahun 1922, alu siaren radio lit kira-kira 50.000 kalak megiken khotbah ”Jutan Kalak si Nggeluh Gundari La Pernah Banci Mate”

14 Kerna tujun WBBR, ijelasken The Watch Tower 1 Desember 1924, ”Tek kita maka radio cara si mehuli ras la melala biayana i bas mberitaken berita kebenaren sedekah enda.” Ikatakenna ka, ”Adi cocok iakap Tuan majekken stasiun radio si debanna guna mberitaken kebenaren, pasti isikapkenNa sen alu cara si mehuli iakapNa.” (Msm. 127:1) Bas tahun 1926, lit enem stasiun radio umat Jahwe. Dua i Amerika serikat, eme WBBR i New York ras WORD deher Chicago. Empat si debanna i Kanada, eme i Alberta, British Columbia, Ontario, ras Saskatchewan.

15, 16. (a) Uga tanggapen peminpin agama nandangi siaren radionta? (b) Uga khotbah i radio ras pendahin arah rumah ku rumah ngelengkapi sada ras si debanna?

15 Siaren radio kerna kebenaren Pustaka si Badia si mbelang penyebarenna iperdiateken peminpin agama Susunen Kristen. Albert Hoffman, si mbue pengalamenna bas erdahin i stasiun radio i Saskatchewan, Kanada, ngataken, ”Reh buena kalak si mulai nandai Ajar-Ajar Pustaka si Badia [penggelaren Saksi-Saksi Jahwe paksa si e]. Kesaksin si luar biasa ibereken seh ku tahun 1928. I bas tahun e, ipengaruhi peminpin agama pejabat-pejabat si erbahanca kerina stasiun radio Saksi i Kanada icabut ijinna.”

16 Amin gia stasiun radionta i Kanada itutup, khotbah-khotbah Pustaka si Badia terus isiarken arah stasiun-stasiun komersial. (Mat. 10:23) Gelah program-program radio e reh buena gunana, The Watch Tower ras The Golden Age (gundari Awake!, ntah pe Sadarlah!) erbahan daftar stasiun radio komersial si niarken kebenaren Pustaka gelah perberita si erberita arah rumah ku rumah banci ngiahken kalak  guna megiken khotbah i stasiun radio i daerahna. Kai hasilna? Nina Bulletin Januari 1931, ”Radio tuhu-tuhu ngiahken turang seninanta i bas erberita rumah ku rumah. Melala laporen si ialoken kami ngataken maka nterem kalak isetelna radiona janah, erkiteken ibegikenna khotbah turang seninanta Rutherford, mis ia nggit ngaloken buku-buku si itawarken.” Bulletin nggambarken siaren radio ras pendahin arah rumah ku rumah jadi ”dua cara erberita si mbelin kal gunana i bas organisasi Tuan”.

17, 18. Amin gia lit perubahen keadan, uga radio tetap igunaken?

17 Bas tahun 1930-en, reh buena tentangen i bas dahin erberita arah stasiun-stasiun radio komersial. Emaka, i bas pendungi tahun 1937, erkiteken perubahen keadan e umat Jahwe erbahan penyesuaien. Lanai igunaken kalak e stasiun radio komersial tapi fokusna erberita arah rumah ku rumah. * Tapi, radio tetap jadi alat si penting i bas mberitaken berita Kinirajan i bas piga-piga bagin doni si mesuni ntah pe si ibatasi secara politik. Misalna, mulai tahun 1951 seh ku tahun 1991, sada stasiun radio i Berlin Barat, Jerman, alu ratur niarken khotbah Pustaka si Badia si erbahanca penduduk si tading i daerah si mbarenda igelari Jerman Timur banci megiken berita Kinirajan. Mulai tahun 1961 janah lebih 30 tahun kenca si e, isiarken sada stasiun radio nasional i Suriname, Amerika Selatan, acara tiap minggu si dekahna 15 menit si mberitaken kebenaren Pustaka si Badia. Mulai tahun 1969 seh ku 1977, organisasi ngasilken lebih 350 rekamen program radio i bas bagin ”Kerina si Tersurat i bas Pustaka si Badia Erguna”. I Amerika Serikat, 291 stasiun radio, i bas 48 negara bagin, niarken program e. I bas tahun 1996, sada stasiun radio i Apia, ibu kota Samoa i Pasifik Selatan, tiap minggu niarken acara si erjudul ”Jabapen Penungkunenndu kerna Pustaka si Badia”.

18 I bas pendungi abad si pedua puluhken, radio lanai jadi alat utama i bas erberita. Tapi, lit teknologi si deban si banci nampati kita mpeseh berita si meriah ku terbuen jelma.

19, 20. Engkai maka ibahan umat Jahwe jw.org, janah uga keberhasilenna? (Nehen ka kotak ” JW.ORG”.)

19 Internet. Bas tahun 2013, lebih 2,7 miliar kalak, menam 40 persen penduduk i doni enda make Internet. Menurut sada perkiran, kira-kira dua miliar kalak nggunaken Internet alu alat elektronik, misalna handphone si canggih ras tablet. I belang-belang doni jumlah e terus erbuena, tapi peningkaten si mbelinna kal gundari i Afrika, i ja lit lebih 90 juta paket langganen Internet. Erbage perkembangen enda tuhu-tuhu ngubah cara nterem jelma ndatken informasi.

 20 Mulai tahun 1997, umat Jahwe ngikutken cara erkomunikasi si igunaken nterem jelma. Bas tahun 2013, situs Web jw.org banci ibuka i bas kira-kira 300 cakap, ras keterangen si erpalasken Pustaka si Badia banci i-download i bas lebih 520 cakap. Tiap wari, lebih 750.000 kalak mbuka situs enda. Tiap bulan, selain nonton video, lit lebih 3 juta buku, 4 juta majalah, ras 22 juta fail audio si i-download nterem kalak.

21. Pelajaren kai si banci idatndu i bas pengalamen Sina?

21 Situs Web jadi alat si erguna i bas mberitaken berita si meriah kerna Kinirajan Dibata, termasuk i negeri-negeri si mbatasi pendahinta. Misalna, bas pemena tahun 2013, sekalak dilaki si gelarna Sina ndatken situs jw.org. Kenca e, iteleponna kantor pusat i Amerika Serikat guna mindo terbuen keterangen kerna Pustaka si Badia. Engkai maka enda luar biasa? Latar belakang Sina eme Muslim janah tading i kuta si mesuni bas sada negeri si tuhu-tuhu mbatasi pendahin Saksi-Saksi Jahwe. Hasilna, ibahan pengaturen gelah Sina erlajar Pustaka dua kali seminggu ras sekalak Saksi i Amerika Serikat. Pelajaren enda ipinpin alu nggunaken sada layanen video Internet.

Ngajari Kalak Sada per Sada

22, 23. (a) Payo nge erbage cara guna mpeseh berita si meriah ibahan guna nggantiken cara erberita arah rumah ku rumah? (b) Uga Raja e masu-masu upayanta?

22 Cara-cara si nggo sigunaken i bas mpeseh berita e ku nterem jelma, bagi koran, ”Drama-Foto”, program radio, ras situs Web, labo ibahan guna nggantiken cara erberita arah rumah ku rumah. Engkai? Erkiteken umat Jahwe  erlajar i bas contoh si nggo ibahan Jesus. Ia labo ngenca erberita man jelma si nterem; tapi isampatina kalak sada per sada. (Luk. 19:1-5) Jesus pe ngajari ajar-ajarna ngelakoken hal si seri, janah iberekenna berita man kalak e guna ipeseh. (Oge Lukas 10:1, 8-11.) Bagi si ibahas i bas Pasal 6, rusur iiahken kalak si ndalanken kepeminpinen kerina umat Jahwe guna ngerana langsung man nterem jelma.​—Perb. 5:42; 20:20.

23 Seratus tahun kenca Kinirajan pajek, lebih 7,9 juta perberita si ergiah-giah ngajari kalak si deban kerna sura-sura Dibata. Tuhu-tuhu ipasu-pasu Raja e erbage cara si nggo sigunaken i bas mpeseh berita Kinirajan. Bagi si ibahas bas pasal seterusna, ibereken Raja e ka man banta alat si iperluken guna mberitaken berita si meriah man kerina bangsa, suku, ras cakap.​—Ket. 14:6.

^ par. 17 I bas tahun 1957, kalak si ndalanken kepeminpinen mutusken guna nutup WBBR i New York, stasiun radionta si terakhir.