Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL 5

Raja e Nalsalken Terang Kinirajan

Raja e Nalsalken Terang Kinirajan

INTI PASAL ENDA

Dungna ieteh umat Dibata kebenaren si seh kal pentingna kerna Kinirajan, penguasana, ras rayatna bage pe kai ertina setia man Kinirajan

1, 2. Engkai maka banci sikataken Jesus e pemandu si pentar?

BAYANGKEN sekalak pemandu tur si erpengalamen maba kam erdalan-dalan ku sada kota si luar biasa jilena. Ibegikenndu kerina si ikataken pemandu erkiteken enda tangtangna kal kam ras teman-temanndu reh ku kota e. Lit piga-piga hal i bas kota e si erbahan kam ras teman-temanndu tersungkun-sungkun. Tapi, paksa isungkunndu man pemandu, la mis ijabapna, itimaina ngasa e teridah. Reh belinna pengerganndu nandangi kepentaren pemandu e erkiteken ipebetehkenna kai si perlu ietehndu tepat i bas waktuna.

2 Kalak Kristen situhu-tuhu mirip ras wisatawan e. Merhat kal kita meteh kerna sada kota si seh kal jilena, ”kuta si nteguh palasna”, eme Kinirajan Dibata. (Heb. 11:10) Paksa i doni, ibimbing Jesus pengikutna, itegu-teguna ku pemeteh si mbages kerna Kinirajan e. Mis nge ijabapna kerina penungkunen ras ipebetehkenna kerina kerna Kinirajan i bas paksa si e? Lang. Nina, ”Melala denga ateku kukataken man bandu, tapi genduari langa kam ngasup ngalokenca.” (Joh. 16:12) Selaku pemandu si seh kal pentarna, la pernah iberati Jesus ajar-ajarna alu pemeteh si lenga ngasup kalak e ngalokenca.

3, 4. (a) Uga Jesus terus ngajari kalak si setia kerna Kinirajan Dibata? (b) Kai si man bahasenta i bas pasal enda?

3 Ibelasken Jesus kata-kata si itulis i bas Johanes 16:12 bas berngi pendungi kegeluhenna i doni. Uga Jesus terus ngajari kalak si setia kerna Kinirajan Dibata kenca kematenna? Ipetetapna ukur rasul-rasulna, ”Kesah si naksiken kebenaren kerna Dibata, ipetangkasna me man bandu kebenaren kerna Dibata alu serta.” (Joh. 16:13) Banci sibayangken kesah si badia selaku pemandu si sabar. Kesah e me alat si igunaken Jesus i bas ngajari pengikutna kerna kerina si perlu ietehna nandangi Kinirajan Dibata tepat i bas waktuna.

4 Mari siperdiateken uga kesah si badia negu-negu kalak Kristen si tutus ku pemeteh si reh bagesna kerna Kinirajan e. Si pemena, sibahas uga maka banci sieteh ndigan  Kinirajan Dibata mulai merentah. Kenca si e, sibahas ise penguasa ras rayat Kinirajan bage pe arapen kalak e. Si pendungi, sipelajari ka uga pengikut Kristus ndatken pengertin si ertangkasna kerna kai erti setia man Kinirajan.

Ngangkai Tahun si Seh Kal Pentingna

5, 6. (a) Kai pendapat si salah i bas Ajar-Ajar Pustaka si Badia kerna Kinirajan ras masa rani? (b) Engkai maka la kita sangsi itegu-tegu Jesus pengikutna amin gia lit pendapat si salah e?

5 Bagi si nggo sipelajari i bas Pasal 2 buku enda, puluhen tahun dekahna Ajar-Ajar Pustaka si Badia ngataken maka tahun 1914 eme tahun si penting i bas penggenepen nubuat Pustaka. Tapi, i bas paksa si e kalak e tek maka kehadiren Kristus ibenaken i bas 1874, ia mulai merentah i surga i bas 1878, janah Kinirajan tuhu-tuhu pajek bas Oktober 1914. Masa rani ibenaken i bas tahun 1874 seh ku 1914 janah ujungna paksa terpuk si iminaki ipepulung ku surga. Payo nge erkiteken pendapat si salah e dungna mis siraguken maka Jesus negu-negu kalak si iminaki alu kesah si badia?

6 Lang! Bayangken ka ilustrasi ndai. Sangsi nge kita nandangi kepentaren pemandu erkiteken metersa wisatawan mereken pendapat janah mbue nungkun? Pasti lang! Bage ka pe, amin gia maun-maun iupayaken umat Dibata ngangkai keterangen kerna tujun Jahwe sope kesah si badia mbimbing kalak e ku kebenaren, jelas me maka Jesus negu-negu kalak e. Emaka, kalak si setia nggit ikoreksi janah alu meteruk rukur isesuaikenna pendapatna.​—Jak. 4:6.

7. Alu terang rohani si uga nge umat Dibata ipasu-pasu?

7 I bas tahun-tahun kenca 1919, umat Dibata ipasu-pasu alu terang rohani si terus reh terangna. (Oge Masmur 97:11.) I bas tahun 1925, artikel ersejarah si erjudul ”Ketubuhen Sada Bangsa” terbit i bas The Watch Tower. Artikel enda mereken bukti Pustaka si erbahan kita tek maka Kinirajan Mesias pajek i bas tahun 1914. Janah nggenepi gambaren nubuat kerna diberu surgawi Dibata si mupus bagi si isuratken i bas Ketangkasen bindu 12. * Ijelaskenna ka maka penganiayan ras kesusahen umat Jahwe sedekah masa perang eme tanda si jelas maka Setan si nggo isampetken surga nari ’merawa sabap ietehna maka kentisik nari ngenca kesempaten lit i bas ia’.​—Ket. 12:12.

8, 9. (a) Uga nge pentingna Kinirajan Dibata e ijelasken? (b) Penungkunen kai saja si man bahasenta?

8 Sibar uga pentingna Kinirajan e? Bas tahun 1928, mulai ijelasken The Watch Tower maka pentingen nge Kinirajan asangken keselamaten pribadi erkiteken tebusen. Situhuna, alu Kinirajan Mesias me ipebadiaken Jahwe gelarNa, ibelaNa kedolatenNa, janah ilakokenNa kerina peratenNa nandangi umat manusia.

9 Ise si merentah ras Kristus i bas Kinirajan e? Ise pagi si jadi rayat Kinirajan e? Janah, pendahin kai si perlu ilakoken pengikut Kristus?

 Dahin Peranin guna Mpepulung Terpuk si Iminaki

10. Kai si nggo ndekah ieteh umat Dibata kerna 144.000?

10 Puluhen tahun sope 1914, ieteh kalak Kristen situhu-tuhu maka 144.000 pengikut Kristus si setia ikut pagi merentah ras Kristus i surga. * Iangkai Ajar-Ajar Pustaka si Badia maka jumlah e eme jumlah situhu-tuhu janah terpuk e mulai ipepulung i bas abad si pemena M.

11. Uga pengangkan calon anggota penganten Kristus reh majuna kerna tugasna i doni?

11 Kai tugas calon anggota penganten Kristus e paksa i doni denga? Iperdiateken kalak enda maka ituriken Jesus pentingna dahin erberita janah ihubungkenna ras masa rani. (Mat. 9:37; Joh. 4:35) Bagi si nggo sipelajari i bas Pasal 2, kalak enda pernah erpengakap maka masa rani e 40 tahun dekahna, janah ujungna paksa terpuk si iminaki ipepulung ku surga. Tapi, pendahin e lenga dung nggo pe lewat 40 tahun, emaka iperluken denga penjelasen. Gundari, sieteh maka masa rani eme masa nerapken page i bas sesa nari, nerapken kalak Kristen si iminaki si setia i bas kalak Kristen si palsu, si ibenaken i bas tahun 1914. Enda me waktuna mbulatken ukur guna mpepulung sisa golongen surgawi e!

I bas tahun 1914 ibenaken me masa rani (Nehen paragraf 11)

12, 13. Uga perumpaman Jesus kerna sepuluh singuda-nguda ras talenta igenepi i bas wari-wari pendungi?

12 Kenca 1919, terus itegu-tegu Kristus juak-juak si tutus dingen pentar guna njelasken pentingna dahin erberita. Iberekenna tugas e i bas abad si pemena. (Mat. 28:19, 20) Icidahken Jesus ka sifat-sifat kai si iperluken pengikutna si iminaki e gelah banci ndalanken tugasna. Uga carana? I bas perumpamanna kerna sepuluh si nguda-nguda, ipebetehken Jesus maka terpuk si iminaki arus tetap erjaga-jaga, ersikap secara rohani, adi atena ndatken tujun utamana eme ndatken bagin i bas kerja erdemu bayu si mulia i surga, paksa Kristus ipersada ras 144.000 ”penganten”-na. (Ket. 21:2) Kenca si e, i bas perumpamanna kerna talenta, iajarken Jesus maka juak-juakna si iminaki arus mejingkat ngelakoken dahin erberita si nggo ipercayakenna man kalak e.​—Mat. 25:1-30.

 13 Sedekah sada abad enda, terpuk si iminaki terbukti metenget janah mejingkat. Pasti upaya kalak e guna erjaga-jaga ipasu-pasu! Tapi, payo nge dahin peranin si mbelin e tujunna mpepulung sisa si 144.000 teman Kristus merentah saja ngenca?

Ipepulung Kinirajan Rayatna i Doni!

14, 15. Banci turikenndu empat terpuk si ibahas i bas buku The Finished Mystery.

14 Enggo ndekah kal dilaki ras diberu si setia merhat meteh kerna ”kalak [ntah pe, ”rarasen”] si nterem” (”perpulungen si mbelin”, Terjemahan Lama) i bas Ketangkasen 7:9-14. Ope denga seh waktuna ipebetehken Kristus ise terpuk si mbelin e, wajar me adi penjelasen kerna topik e ndauh bedana ras kebenaren si jelas ras sederhana si nggo sieteh ras siergai gundari.

15 I bas tahun 1917, buku The Finished Mystery ngataken maka lit ”dua tingkat ntah pe dua jenis keselamaten i surga, ras dua tingkat ntah pe dua jenis keselamaten i doni”. Ise saja empat terpuk si la seri arapen keselamatenna? I surga eme terpuk si pemena, 144.000 kalak si merentah pagi ras Kristus. Terpuk si peduaken, perpulungen si mbelin. Paksa si e, perpulungen si mbelin ertina kalak si ngaku Kristen si lit i bas gereja-gereja Susunen Kristen denga. Lit nge kiniteken kalak e tapi kurang paguh i bas mpertahanken kesetian. Erkiteken si e, ibereken me man kalak e keduduken si lebih rendah i surga. I doni, lit terpuk si peteluken, ”tokoh-tokoh jaman si nuria” eme kalak si setia bagi Abraham, Musa, ras si debanna. Janah kalak enda erkuasa nandangi terpuk si peempatken, eme umat manusia.

16. Terang rohani kai si ersinalsal i bas tahun 1923 ras 1932?

16 Uga kesah si badia negu-negu pengikut Kristus ku pemeteh si tuhu-tuhu siergai gundari enda? Enda terjadi alu manjar-anjar, arah terang rohani si ersinalsal. Kenca 1923, nggo ituriken The Watch Tower kerna sada terpuk si pengarapenna labo ku surga tapi i doni i bas pemerentahen Kristus. I bas 1932, ibahas The Watchtower kerna Jonadap, si ikut ras Jehu, raja Israel si iminaki Dibata, guna ndukung ia i bas merangi ibadat palsu. (2 Raj. 10:15-17) Ikataken artikel e maka lit terpuk i bas jaman modern si bagi Jonadap, janah ibaba Jahwe me terpuk e ”mentasi kesusahen Harmagedon” guna nggeluh i doni.

17. (a) Bas tahun 1935, terang rohani kai si ersinalsal alu jelas? (b) Uga tanggapen kalak Kristen si setia kerna pengertin si mbaru e? (Nehen kotak ” Puas Kal Iakap si Pulung”.)

17 Bas 1935, terang rohani si reh jelasna ersinalsal. Bas kebaktin i Washington, DC, perpulungen si mbelin itandai selaku terpuk i doni, si seri ras biri-biri bas perumpaman Jesus kerna biri-biri ras kambing. (Mat. 25:33-40) Perpulungen si mbelin eme bagin i bas ’biri-biri si deban’, si ikataken Jesus, ”Si e pe arus kubaba.” (Joh. 10:16) Paksa  J. F. Rutherford erkhotbah, nina, ”Si arapenna nggeluh si rasa lalap i doni banci tedis,” lebih setengah si pulung tedis! Janah nina, ”Nehen! Pepulungen si mbelin!” Melala si teriahken ukurna erkiteken dungna ietehna arapenna i bas wari si pepagi.

18. Kai upaya pengikut Kristus i bas erberita, janah kai hasilna?

18 Kenca si e, itegu-tegu Kristus pengikutna gelah iupayakenna mpepulung calon anggota rarasen si nterem si ndarat janah selamat pagi i bas kiniseran si mbelin. Tangtangna, hasilna biasa saja. Pernah ikataken turang seninanta Rutherford, ”Banci saja ’perpulungen si mbelin’ labo mbelin kal.” Gundari sieteh uga belinna pasu-pasu Jahwe nandangi peranin e! Alu bimbingen Jesus ras kesah si badia, terpuk si iminaki ras teman-temanna ’biri-biri si deban’ nggo bali bagi si inubuatken Jesus. Kalak enda jadi ”sada rarasen” si radu ras ngelayani Jahwe si ipinpin ’sada permakan’.

La banci iperkiraken turang seninanta Rutherford uga buena jumlah rarasen si nterem e (Kawes ku kemuhen: Nathan H. Knorr, Joseph F. Rutherford, ras Hayden C. Covington)

19. Uga carana kita banci ikut nambahi jumlah rarasen si nterem?

19 Teremen kalak si setia nggeluh si rasa lalap i doni pardis pagi, i bas pemerentahen Kristus ras 144.000 temanna merentah. La kin meriah siakap ngukuri cara Kristus negu-negu umat Dibata ku arapen wari si pepagi si seh kal jelasna i bas Pustaka si Badia? Tuhu-tuhu sada hak istimewa man banta guna mbagiken arapen e man kalak si deban i bas dahin erberita! Sidahikenlah alu mejingkat asa ngasupta gelah jumlah rarasen si nterem reh buena janah reh belinna sora muji gelar Jahwe!​—Oge Lukas 10:2.

Jumlah rarasen si nterem terus reh buena

Kai Ertina Setia man Kinirajan

20. Kai saja si lit hubungenna ras organisasi Setan, janah selaku kalak Kristen kai ertina setia?

20 Asum umat Dibata terus erlajar kerna Kinirajan, perlu ka tuhu-tuhu ieteh kalak e kai ertina setia man pemerentahen surga. Erkiteken si e, i bas tahun 1922, ijelasken The Watch Tower maka lit dua organisasi si sangana erdahin, organisasi Jahwe ras organisasi Setan. Si termasuk ku organisasi Setan eme kerina si lit hubungenna ras perdagangen, agama, ras politik. Kalak si setia man Kinirajan Dibata i teruh pinpinen Kristus arus tetap setia alu la nggit ikut i bas erbage bagin organisasi Setan. (2 Kor. 6:17) Kai maksudna?

21. (a) Uga juak-juak si tutus mpersingeti umat Dibata kerna bisnis si mbelin? (b) Bas tahun 1963, kai si ipebetehken The Watchtower kerna ”Babilon si Mbelin”?

21 Pangan rohani si ibereken juak-juak si tutus la erngadi-ngadi mpebetehken uga korupna bisnis si mbelin janah mpersingeti umat Dibata gelah ula ndabuh ku jerat kinibayaken. (Mat. 6:24) Publikasinta pe terus iperdiatekenna agama-agama si jadi bagin i bas organisasi Setan. I bas tahun 1963, alu jelas icidahken The Watchtower maka ”Babilon si Mbelin” labo ngertiken Susunen Kristen saja, tapi kerina agama palsu i doni enda. Enda me sabapna, bagi si nandangi sibahas lebih lengkap i bas Pasal 10 buku enda, umat Dibata i erbage-bage negeri ras budaya nggo isampati gelah  ’ndarat i bas si e nari’, mbersihken diri i bas kerina perbahanen agama palsu.​—Ket. 18:2, 4.

22. I bas Perang Doni I, kai si iangkai umat Dibata kerna Roma 13:1?

22 Uga kerna politik i bas organisasi Setan? Banci nge kalak Kristen situhu-tuhu ikut i bas perang ras permasalahen bangsa-bangsa? I bas Perang Doni I, biasana nggo iangkai Ajar-Ajar Pustaka si Badia maka pengikut Kristus la banci munuh sapih-sapih ia. (Mat. 26:52) Tapi, melala si ngangkai perentah i bas Roma 13:1 guna patuh man ”pemerentah si erkuasa” ertina kalak e arus jadi tentera, make seragam militer, janah maba bedil; tapi, adi isuruh munuh musuh, itembakkenna saja ku datas.

23, 24. Uga pengertinta kerna Roma 13:1 i bas Perang Doni II, janah pemeteh kai si lebih jelas dingen tepat si ialoken pengikut Kristus?

23 Paksa terjadi Perang Doni II bas tahun 1939, ibereken The Watchtower penjelasen si mbages kerna kenetralen. Icidahken artikel e alu tangkas maka kalak Kristen tuhu-tuhu la banci ikut i bas kerina perang ras permasalahen bangsa-bangsa i doni Setan. Enda penjelasen si tepat waktu! Alu bage, pengikut Kristus la ikut i bas utang dareh si ilakoken bangsa-bangsa i bas perang e. Tapi i bas bena-bena tahun 1929, ijelasken publikasinta maka pemerentah si erkuasa si itulis i bas Roma 13:1 labo pemerentah i doni, tapi ngertiken Jahwe ras Jesus. Iperluken pemahamen si lebih jelas dingen tepat.

 24 I bas tahun 1962, itegu-tegu kesah si badia pengikut Kristus ku pemahamen e. Paksa si e terbit artikel-artikel si ersejarah kerna Roma 13:1-7 i bas The Watchtower 15 November ras 1 Desember. Dungna, iangkai umat Dibata prinsip kepatuhen si relatif si ituriken Jesus i bas kata-katana si terberita, ’Berekenlah man Kepala Pemerentah kai sikerajangen Kepala Pemerentah janah bereken man Dibata kai sikerajangen Dibata.’ (Luk. 20:25) Gundari nggo iangkai kalak Kristen situhu-tuhu maka pemerentah si erkuasa eme kerina pemerentah doni enda janah kalak Kristen arus patuh. Tapi, kepatuhen e relatif. Adi isuruh pemerentah kita la patuh man Dibata Jahwe, tanggapennta bali bagi rasul-rasul i bas jaman si mbarenda si ngataken, ”Kami arus ngikutken Dibata labo manusia.” (Perb. 5:29) I bas Pasal 13 ras 14 buku enda, banci sieteh terbuen kerna uga umat Dibata ndalanken prinsip kenetralen Kristen.

Seh kal belinna hak istimewanta i bas nuriken arapen kegeluhen si rasa lalap!

25. Engkai maka iergaindu bimbingen kesah si badia kerna Kinirajan Dibata?

25 Ukurindulah kerina si nggo iajarken man pengikut Kristus kerna Kinirajan sedekah sada abad enda. Enggo sieteh ndigan Kinirajan Dibata ipajekken i surga ras uga pentingna Kinirajan e. Enggo sidat gambaren si jelas kerna arapen si ibereken man kalak si setia, arapen i surga bage pe i doni. Janah, sieteh uga carana ncidahken kesetian man Kinirajan Dibata janahta patuh alu relatif man pemerentah i doni. Cuba siukuri, ’Adi la itegu-tegu Jesus Kristus juak-juakna si tutus i doni i bas ngangkai janah ngajarken kebenaren si meherga enda, banci kin kuangkai si e kerina?’ Seh kal belinna pasu-pasu si nggo sigejapken erkiteken Kristus ras kesah si badia negu-negu kita!

^ par. 7 Mbarenda, iangkai maka pengenehenen e ngertiken perang agama kafir Romawi ras kepausen Romawi.

^ par. 10 I bas Juni 1880, ikataken Zion’s Watch Tower maka si 144.000 e me kalak Jahudi jasmani si itobatken tahun 1914. Tapi, i bas pendungi tahun 1880, iterbitken penjelasen si menam seri pengertinna ras kai si nggo sieteh gundari.