Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL 4

Ipebadiaken Jahwe GelarNa

Ipebadiaken Jahwe GelarNa

INTI PASAL ENDA

Tuhu-tuhu iergai umat Dibata gelar Dibata

1, 2. Uga Terjemahan Dunia Baru mpebadiaken gelar Dibata?

I BAS wari Selasa pagi-pagi, wari si mbergeh tapi terang, tanggal 2 Desember 1947, sada terpuk si kitik turang senina si iminaki i bas Betel i Brooklyn, New York, nggo ersikap guna ngelakoken sada tugas si mbelin. Pendahin enda mberat, tapi ilakoken kalak enda alu tutus sedekah 12 tahun. Dungna, bas wari Minggu 13 Maret 1960, idungi kalak e teks pendungi terjemahen Pustaka si Badia si mbaru. Telu bulan kenca si e, i bas tanggal 18 Juni 1960, ipetandaken turang seninanta Nathan Knorr Kitab Suci Terjemahan Dunia Baru (i bas cakap Inggris) si lengkap man kerina si pulung bas kebaktin i Manchester, Inggris, janah meriah kal ukur kalak e. Alu tepat ipebetehkenna perasan kerina si pulung paksa ikatakenna, ’Enda me wari si dem alu keriahen ukur man Saksi-Saksi Jahwe i sebelang doni!’ Sada hal si utama i bas terjemahen si mbaru e, si erbahanca meriah kal iakap umat Dibata, eme erkiteken gelar Dibata isuratken i bas melala ayat.

Kitab-Kitab Yunani Kristen Terjemahan Dunia Baru i petandaken i bas Kebaktin Pertambahen Teokratis tahun 1950 (Kawes: Yankee Stadium, New York City; kemuhen: Ghana)

2 Melala terjemahen Pustaka si Badia nggo nasapken gelar Dibata. Tapi, juak-juak Jahwe si iminaki alu tegas ngelawan akal jahat Setan guna meneken gelar Dibata i bas ingeten manusia. Nina kata penaruh Terjemahan Dunia Baru si ipetandaken i bas wari e, ”Ciri utama terjemahen enda eme itama ka mulihi gelar Dibata ku inganna.” Payo, Terjemahan Dunia Baru nggunaken gelar Dibata, Jahwe, lebih 7.000 kali. Luar biasa kal cara terjemahen enda mpebadiaken gelar Bapanta si ni surga, Jahwe!

3. (a) Kai si ieteh turang seninanta kerna erti gelar Dibata? (b) Kai ertina kata-kata i bas Keluaren 3:13, 14? (Nehen kotak ” Erti Gelar Dibata”.)

3 I bas tahun-tahun si pemena, ieteh Ajar-Ajar Pustaka si Badia erti gelar Dibata eme ”aku tetap aku”. (Kel. 3:14) Emaka, nina The Watch Tower 1 Januari 1926, ”Gelar Jahwe ncidahken maka Ia Pribadi si lalap lit, . . . si la ermula ras la erkedungen.” Tapi, paksa penerjemah mulai nerjemahken Terjemahan Dunia Baru, isampati Jahwe umatNa guna meteh  maka gelarNa labo terjeng ncidahken maka Ia lalap lit, tapi si utamana eme Ia Dibata si ersura-sura janah terus erdahin. Ieteh kalak e maka erti gelar Jahwe i bas cakap aslina ”Ia si Erbahanca Kerina Jadi”. Payo, Ia si njadiken alam semesta ras mahluk-mahluk si pentar, janah terus ibahanNa peraten ras tujunNa terjadi. Engkai maka seh kal pentingna mpebadiaken gelar Dibata, janah uga kita banci ikut mpebadiakenca?

Gelar Dibata Ipebadiaken

4, 5. (a) Kai nge si nipindo paksa sitotoken, ”GelarNdu ipebadia min”? (b) Uga ras ndigan kin ipebadiaken Dibata gelarNa?

4 Ate Jahwe gelah gelarNa ipebadiaken. Situhuna, tujunNa si utama eme mpebadiaken gelarNa, bagi si tangkas teridah bas pemindon Jesus si pemena i bas contoh pertotonna, ”GelarNdu ipebadia min.” (Mat. 6:9) Paksa sitotoken e, kai nge sipindo?

5 Bagi si nggo sipelajari bas Pasal 1 buku enda, pemindon gelah ”GelarNdu ipebadia min” salah sada i bas telu pemindon contoh pertoton Jesus si lit hubungenna ras peraten Jahwe. Dua nari eme, ”Reh min KinirajanNdu; sehlah min peratenNdu.” (Mat. 6:10) Emaka, sipindo Jahwe ertindak gelah reh KinirajanNa, janah sipindo ka Jahwe ertindak gelah ipebadiakenNa gelarNa. Alu kata si deban, sipindo gelah Jahwe ertindak mbersihken gelarNa i bas kerina tuduhen kenca pemberontaken i Eden. Uga Jahwe njabap pertoton e? Nina, ’Kucidahken kebadian gelarKu si mbelin, gelar si enggo icemarken i tengah bangsa-bangsa.’ (Esek. 36:23; 38:23) Bas Harmagedon pagi, paksa ikernepkenNa kerina kejahaten, ipebadiaken Jahwe gelarNa i lebe-lebe kerina tinepaNa.

6. Uga maka banci kita ikut mpebadiaken gelar Dibata?

6 Segedang sejarah, ibereken Jahwe kesempaten man juak-juakNa guna ikut mpebadiaken gelarNa. Tentu saja, la banci lebih badia sibahan gelar Dibata. Situhuna gelar e nggo suci, ntah pe badia. Adi bage, uga kita banci mpebadiakenca? Nina Jesaya, ”Jahwe si erbala tentera—Ia me Pribadi si arus ipebadiakenndu [ntah pe, ”iakuindu selaku Pribadi si badia”].” Janah ikataken Jahwe ka man umatNa, ”I je pagi iakuindu maka Aku kap Dibata si Badia nu Israel. E maka ipehagandu Aku [ntah pe, ”iergaindu”].” (Jes. 8:13, Terjemahan Dunia Baru [NW]; 29:23) Emaka, kita mpebadiaken gelar Dibata alu ngakui maka gelar e gelar si unik ras belinen asangken kerina gelar si debanna, alu ngergai Pribadi si make gelar e, janah alu nampati kalak si deban gelah ia pe ngakui maka gelar e badia. Tuhu-tuhu siergai janah sihamati gelar Dibata adi siakui Jahwe selaku Penguasanta janah sipatuhi Ia alu bulat ukur.—Kua. 3:1; Ket. 4:11.

 Isikapken guna Maba ras Mpebadiaken Gelar Dibata

7, 8. (a) Engkai maka umat Dibata perlu waktu gelah banci maba gelar Dibata? (b) Kai si man bahasenta?

7 Mulai tahun 1870-en, igunaken juak-juak Dibata i bas jaman modern gelar Dibata i bas publikasina. Misalna, Zion’s Watch Tower Agustus 1879 ras Songs of the Bride, buku ende-enden si terbit i bas tahun si seri, nggunaken gelar Jahwe. Tapi banci saja, sope ibereken Jahwe umatNa maba gelarNa si badia i lebe-lebe jelma si nterem, ateNa gelah kalak e ncukupi sarat guna hak istimewa si mbelin e. Uga Jahwe nikapken Ajar-Ajar Pustaka si Badia i bas masa si pemena guna maba gelarNa?

8 I bas tahun 1800-en ras pemena tahun 1900-en, sieteh uga Jahwe mereken pemeteh si reh tangkasna man umatNa kerna kebenaren penting si lit hubungenna ras gelarNa. Mari sibahas telu kebenaren enda.

9, 10. (a) Engkai maka artikel-artikel Watch Tower i bas masa si pemena lebih ngutamaken Jesus? (b) Perubahen kai si terjadi i bas tahun 1919 ras seterusna, janah kai hasilna? (Nehen ka kotak ” Uga The Watchtower Mpebadiaken Gelar Dibata”.)

9 Si pemena, dungna ieteh juak-juak Jahwe cara rukur si benar kerna pentingna gelar Dibata. Ajar-Ajar Pustaka si Badia si setia i bas masa si pemena erpengakap maka tebusen ajaren utama Pustaka si Badia. Enda me sabapna ngkai maka Watch Tower lalap nuriken kerna Jesus. Misalna, i bas tahun pemena iterbitken, igunaken majalah enda gelar Jesus lit sepuluh kali buen asangken gelar Jahwe. Kerna Ajar-Ajar Pustaka si Badia i bas masa si pemena, The Watchtower 15 Maret 1976, ngataken maka ”iutamaken kalak enda kal” Jesus. Tapi dungna, isampati Jahwe kalak e ngangkai uga pentingna gelar Dibata i bas Pustaka si Badia. Uga enda mpengaruhi Ajar-Ajar Pustaka si Badia? Khususna mulai tahun 1919, ikataken artikel Watchtower e ka, ”Enggo mulai buen ibereken kalak enda kehamaten man Bapa Mesias, eme Jahwe.” Janah, sedekah sepuluh tahun kenca 1919, The Watch Tower nggunaken gelar Dibata lebih 6.500 kali!

10 Alu mereken pengergan si patut man gelar Jahwe, turang seninanta ncidahken kekelengenna nandangi gelar Dibata. Bagi Musa mbarenda, kalak enda nggo ersikap ”muji gelar [JAHWE]”. (Ul. 32:3; Msm. 34:4) Kenca si e, bagi si ijanjiken i bas Pustaka, iperdiateken Jahwe kekelengen kalak e nandangi gelarNa janah ngena ateNa.—Msm. 119:132; Heb. 6:10.

11, 12. (a) I bas hal kai publikasinta berubah kenca tahun 1919? (b) Jahwe nampati juak-juakNa guna ngantusi kai, janah ngkai?

11 Si peduaken, kalak Kristen situhu-tuhu ndatken pemeteh si benar kerna pendahin si itugasken Dibata. La ndekah kenca tahun 1919, tersuruh ukur turang senina si iminaki si ndalanken kepeminpinen mereksa nubuat Jesaya. Kenca si e, kai si iutamaken publikasinta berubah. Engkai maka perubahen enda ikataken ’pangan i bas paksana’?—Mat. 24:45.

12 Sope tahun 1919, la pernah ibahas The Watch Tower keterangen kai pe kerna kata-kata Jahwe si isuratken  Jesaya, ”Kam kap saksingKu; Kupilih kam gelah jadi suruh-suruhenKu.” (Oge Jesaya 43:10-12.) Tapi, la ndekah kenca tahun 1919, mulai iperdiateken publikasinta kata-kata Pustaka si Badia ndai. Iiahkenna ka kerina kalak si iminaki gelah ikut i bas pendahin si itugasken Jahwe, eme mereken kesaksin kerna Ia. Janah, i bas tahun 1925 seh ku tahun 1931 saja, Jesaya bindu 43 ibahas i bas 57 terbiten The Watch Tower. I bas tiap terbiten, kata-kata Jesaya e itujuken man kalak Kristen situhu-tuhu. Jelas me, sedekah tahun-tahun e, isampati Jahwe juak-juakNa gelah ngangkai pendahin si arus ilakoken kalak e. Engkai? Banci ikataken, gelah kalak e ”iuji lebe”. (1 Tim. 3:10) Sope metunggung Ajar-Ajar Pustaka si Badia maba gelar Dibata, arus ibuktikenna man Jahwe arah pendahinna maka ia tuhu-tuhu saksi-saksiNa.—Luk. 24:47, 48.

13. Uga Kata Dibata mpebetehken persoalen si seh kal pentingna si arus idungi?

13 Si peteluken, dungna iangkai umat Jahwe uga pentingna mpebadiaken gelar Dibata. Bas tahun 1920-en, ieteh kalak e maka mpebadiaken gelar Dibata eme persoalen si seh kal pentingna si arus idungi. Uga Kata Dibata mpebetehken kebenaren si penting enda? Perdiateken dua contoh. Kai alasen utama Dibata nelamatken kalak Israel i Mesir nari? Nina Jahwe, ”Gelah gelarKu ipuji i belang-belang doni enda.” (Kel. 9:16) Janah, ngkai maka icidahken Jahwe perkuah ateNa man Israel paksa kalak e mberontak man baNa? Sekali nari ikataken Jahwe, ”Sabap adi Kuukum ia, igombangi kalak kap denggo gelarKu i tengah-tengah bangsa.” (Esek. 20:8-10) Kai si banci ipelajari Ajar-Ajar Pustaka si Badia i bas kisah enda nari bage pe kisah si deban bas Pustaka?

14. (a) Nandangi akhir tahun 1920-en, pemeteh kai si idat umat Dibata? (b) Uga pemeteh si terbagesen e mpengaruhi dahin erberita Ajar-Ajar Pustaka si Badia? (Nehen ka kotak ” Alasen Penting guna Erberita”.)

14 Nandangi akhir tahun 1920-en, iangkai umat Dibata erti kata-kata Jesaya si itulis kira-kira 2.700 tahun sebelumna. Kerna Jahwe, ikatakenna, ”Itegu-teguNa bangsaNa erkiteken si e ermulia [ntah pe, ”badia”] gelarNa.” (Jes. 63:14) Ieteh Ajar-Ajar Pustaka si Badia maka persoalen si pentingna, labo keselamaten pribadi, tapi mpebadiaken gelar Dibata. (Jes. 37:20; Esek. 38:23) I bas tahun 1929, ituriken buku Prophecy inti kebenaren e alu ngataken, ”Gelar Jahwe sada persoalen si seh kal pentingna i lebe-lebe kerina tinepa.” Pemeteh si isesuaiken enda ngiahken juak-juak Dibata guna mereken kesaksin kerna Jahwe janah mbersihken gelarNa i bas fitnah nari.

15. (a) Kai si ieteh turang seninanta i bas tahun 1930-en? (b) Enggo seh waktuna guna kai?

15 I bas pemena tahun 1930-en, ieteh turang seninanta cara rukur si benar kerna pentingna gelar Dibata, pemeteh si reh tangkasna kerna pendahin si itugasken Dibata man kalak e, bage pe pemeteh si terbagesen kerna persoalen si pentingna si arus idungi. Gundari, nggo seh waktuna Jahwe  mereken kehamaten man juak-juakNa guna maba gelarNa bas lebe-lebe jelma si nterem. Gelah sieteh uga enda terjadi, mari sibahas piga-piga peristiwa i bas masa si nggo lewat.

Jahwe Erbahan ’Sada Bangsa Jadi SikerajangenNa’

16. (a) Kai cara si luar biasa si ilakoken Jahwe guna mpebadiaken gelarNa? (b) Mbarenda, ise si jadi umat man gelar Dibata?

16 Sada cara si luar biasa si ilakoken Jahwe guna mpebadiaken gelarNa eme alu erbahan sada umat i doni si maba gelarNa. I bas tahun 1513 SM ras seterusna, iwakili bangsa Israel Dibata Jahwe selaku umatNa. (Jes. 43:12) Tapi, terus ilanggar kalak e perjanjinna ras Dibata, janah i bas tahun 33 M, bene me hubungenna si istimewa ras Dibata. La ndekah kenca si e, ’idahi Jahwe kalak si la nandai Dibata janah  ipilihNa sada bangsa i bas kalak e nari jadi sikerajangenNa’. (Perb. 15:14) Umat si mbaru ipilih e itandai selaku ”Israel Dibata”, eme pengikut-pengikut Kristus si iminaki i bas erbage-bage bangsa nari.—Gal. 6:16.

17. Kai tujun jahat Setan si berhasil ilakokenna?

17 Kira-kira tahun 44 M, alu bimbingen Dibata ajar-ajar Kristus ”igelari Kristen”. (Perb. 11:26) Tangtangna, gelar e unik, erkiteken kalak Kristen situhu-tuhu ngenca makesa. (1 Pet. 4:16) Tapi, bagi si icidahken i bas perumpaman Jesus kerna sesa ras page, Setan berhasil ngelakoken tujunna si jahat guna erbahan gelar Kristen si unik e ipake kerina kalak Kristen si palsu. Emaka erabad-abad dekahna, kalak Kristen situhu-tuhu la banci teridah i bas kalak Kristen si palsu nari. Tapi, enda mulai berubah i bas ”paksa peranin”, si ibenaken bas tahun 1914. Engkai? Erkiteken mulai iserapken malekat kalak Kristen si palsu i bas kalak Kristen situhu-tuhu nari.—Mat. 13:30, 39-41.

18. Kai si nampati turang seninanta meteh maka iperluken gelar si mbaru si cocok?

18 Kenca juak-juak si tutus itangkuhken i bas tahun 1919, isampati Jahwe umatNa ngangkai dahin si itugaskenNa. Mis ieteh kalak e maka pendahin arah rumah ku rumah erbahan kalak e la seri ras kerina kalak Kristen si palsu. Kenca isedarina kenyatan e, minter ietehna maka gelar ”Ajar-Ajar Pustaka si Badia” lanai unik. Tujun utama i bas kegeluhen kalak e labo terjeng erlajar Pustaka si Badia saja, tapi mereken kesaksin kerna Dibata janah nghamati ras mpebadiaken gelarNa. Emaka, gelar kai si cocok man pendahin si ilakoken kalak e? Penungkunen enda ijabap bas tahun 1931.

Daftar acara kebaktin, 1931

19, 20. (a) Keputusen kai si ipeseh i bas tahun 1931? (b) Uga tanggapen turang seninanta?

19 I bas Juli 1931, kira-kira 15.000 Ajar-Ajar Pustaka si Badia seh i Columbus, Ohio, AS, guna ngikuti kebaktin. Paksa idahna daftar acara, tersungkun-sungkun kalak enda kai ertina huruf J ras W i bas halamen lebe. Lit si erpengakap ertina, ’Just Watch’ (Perdiateken Saja); si debanna erpengakap, ’Just Wait’ (Timai Saja). Kenca si e, i bas Minggu 26 Juli, ipeseh turang seninanta Joseph Rutherford keputusen si alu tegas ngataken, ”Merhat kal kami itandai kalak janah ilebuh alu gelar, saksi-saksi Jahwe.” Mis ieteh kerina si pulung kai erti dua huruf si erbahan bingung ndai eme singkaten Jehovah’s Witnesses (Saksi-Saksi Jahwe), gelar si ibuat i bas Jesaya 43:10 nari.

20 Kerina si pulung ngaloken keputusen e alu meriah ukur janah ndekah kal ertepuk tan. Arah radio, sambuten si meriah i Columbus terbegi ku bagin doni si debanna! Ernest ras Naomi Barber i Australia nginget mulihi, ”Paksa terbegi tepuk tan i Amerika, minter tedis turang senina i Melbourne janah terus ertepuk tan. La banci ilupaken kami!” *

 Gelar Dibata Terus Ipebadiaken i Sebelang Doni

21. Uga gelar si mbaru e ngiahken dahin erberita?

21 Maba gelar Saksi-Saksi Jahwe si ibuat i bas Pustaka si Badia nari mereken gegeh tambahen man juak-juak Dibata guna ikut i bas pendahin erberita. Edward ras Jessie Grimes, perbulangen ras ndehara si perintis i Amerika Serikat si reh ku kebaktin tahun 1931 i Columbus, ngataken, ”Berkat kami rumah nari Ajar-Ajar Pustaka si Badia denga, tapi mulih nggo jadi Saksi-Saksi Jahwe. Meriah ukur kami erkiteken gundari lit gelar si nampati kami mpebadiaken gelar Dibatanta.” Kenca kebaktin e, piga-piga Saksi nggunaken cara si mbaru si sentudu ras gelar e. Ipetandaken kalak e dirina man si mada jabu alu mereken kartu nama si risiken kata-kata, ”Salah sada saksi-saksi JAHWE si mberitaken Kinirajan JAHWE Dibata kami.” Payo, megah iakap umat Dibata maba gelar Jahwe, janah kalak e nggo ersikap guna mberitaken erti penting gelar e ku japa pe.—Jes. 12:4.

”Berkat kami rumah nari Ajar-Ajar Pustaka si Badia denga, tapi mulih nggo jadi Saksi-Saksi Jahwe”

22. Kai buktina maka jati diri umat Jahwe unik?

22 Enggo ertahun-tahun ilewati paksa Jahwe ngiahken turang seninanta si iminaki guna make gelar si unik. Kenca si e, banci nge ibuniken Setan jati diri umat Dibata? Ngasup nge ia mpeseri kita ras agama-agama si debanna i doni enda? Sitik pe lang! Sebalikna, jati dirinta si unik selaku saksi-saksi Dibata reh tangkasna. (Oge Miha 4:5; Maleaki 3:18.) Janah, reh ersadana kita ras gelar Dibata emaka ise pe si ncakapken gelar e gundari mis ihubungken ras Saksi-Saksi Jahwe. Ibadat si tuhu-tuhu man Jahwe labo la jelas teridah i bas barisen uruk-uruk agama palsu, tapi ’pajek ganjangen asa kerina uruk-uruk’. (Jes. 2:2) Gundari, ibadat man Jahwe ras gelarna si badia tuhu-tuhu imuliaken.

23. Erpalasken Masmur 121:5, kai kebenaren penting kerna Jahwe si tuhu-tuhu mpegegehi kita?

23 Tuhu-tuhu ipegegehi kita erkiteken sieteh maka ikawali Jahwe kita i bas serangen Setan nari, gundari bage pe wari si pepagi! (Msm. 121:5) Enda me sabapna banci sigejapken perasan si nuratken buku Masmur, ”Malem kal ate bangsa si ngakui [JAHWE] jadi Dibatana, sangap kal bangsa si terpilih jadi sikerajangenNa.”—Msm. 33:12.

^ par. 20 Nehen Pasal 7, halamen 72-74, guna ndatken keterangen kerna penggunan radio.