Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PASAL 19

Pendahin Pembangunen si Nghamati Jahwe

Pendahin Pembangunen si Nghamati Jahwe

INTI PASAL ENDA

Pendahin pembangunen sebelang doni guna kepentingen Kinirajan

1, 2. (a) Pendahin kai si meriah iakap juak-juak Jahwe ngelakokenca? (b) Kai si iergai Jahwe?

MERIAH ukur umat Jahwe si setia ngelakoken pendahin pembangunen si mereken pujin man gelar Dibata. Misalna, ergiah-giah kal kalak Israel i bas majekken tabernakel janah alu melumbar nikapken bahan-bahanna.​—Kel. 35:30-35; 36:1, 4-7.

2 Labo bahan-bahan bangunen si pentingna akap Jahwe si maba kehamaten man baNa, ntah pe bangunen si mehagana. (Mat. 23:16, 17) Si mehergana iakap Jahwe, pemere si maba kehamaten man baNa i babo kerinana, eme ibadat kempak Ia, termasuk kerelan ras pendahin juak-juakNa si ergiah-giah. (Kel. 35:21; Mrk. 12:41-44; 1 Tim. 6:17-19) Enda seh kal pentingna. Engkai? Erkiteken bangunen labo lalap lit. Misalna, tabernakel ras rumah pertoton nggo lanai lit. Banci saja bangunen-bangunen si ipajekken lanai lit, tapi la pernah ilupaken Jahwe sifat melumbar bage pe kerja keras juak-juakNa si setia si ndukung pembangunen e.​—Oge 1 Korinti 15:58; Heber 6:10.

3. Kai si man bahasenta i bas pasal enda?

3 Juak-juak Jahwe si gundari pe nggo erbintuas majekken ingan-ingan ibadat. Janah seh kal luar biasana kai si nggo sidatken i bas bimbingen Rajanta Jesus Kristus! Jelas me, Jahwe masu-masu upayanta. (Msm. 127:1) I bas pasal enda sibahas piga-piga pembangunen si nggo ilakoken ras uga si e maba kehamaten man Jahwe. Janah sibegiken ka kai nina piga-piga turang seninanta si ikut ndungi pembangunen e.

Mbangun Bale Kinirajan

4. (a) Engkai maka siperluken terbuen ingan ibadat? (b) Engkai maka erbage kantor cabang ipersada? (Nehen kotak ” Pembangunen Cabang—Isesuaiken ras Keperlun si Nggo Berubah”.)

4 Bagi si ibahas Pasal 16, ate Jahwe gelah kita pulung guna eribadat. (Heb. 10:25) Perpulungen labo mpeteguh kiniteken saja, tapi banci ka mpebelin semangatta guna erberita. Asum wari-wari pendungi terus erdalan, reh terna ibahan Jahwe pendahin e. Hasilna, ratusen ribu kalak reh erduyun-duyun ku organisasiNa tep-tep tahun. (Jes. 60:22)  Erkiteken reh buena rayat Kinirajan, iperluken fasilitas percetaken si terbelinen guna erbahan lektur erpalasken Pustaka. Siperluken ka terbuen ingan ibadat.

5. Engkai maka ingan perpulungen cocok igelari Bale Kinirajan? (Nehen ka kotak ” Gereja Terang si Mbaru”.)

5 I bas pemena sejarah modern umat Jahwe, isedari Ajar-Ajar Pustaka si Badia maka perlu lit ingan perpulungenta sendiri. Banci saja salah sada ingan ibadat si pemena si ipajekken eme i Virginia Barat, AS, i bas tahun 1890. Bas tahun 1930-en, ipajekken umat Jahwe ntah pe ipesikapna piga-piga bale, tapi ingan perpulungen enda lenga lit gelarna. Tapi bas tahun 1935, turang seninanta Rutherford reh ku Hawaii, si paksana lit pembangunen bale si ndeher ras kantor cabang si mbaru i je. Paksa isungkun kerna gelar bangunen e, ijabap turang seninanta Rutherford, ”La kin cocok akapndu adi sigelari ’Bale Kinirajan’, erkiteken kita mberitaken berita si meriah kerna Kinirajan?” (Mat. 24:14) Labo bale e saja si minter igelari alu gelar si cocok ndai, tapi  pe ingan perpulungen si ipake runggun umat Jahwe i belang-belang doni.

6, 7. Kai pengaruh cara pembangunen si meter?

6 I bas tahun 1970-en, iperluken terbuen Bale Kinirajan. Emaka ibahan turang seninanta i Amerika Serikat cara si tepat guna majekken bale i bas piga-piga wari saja, tapi bale e mejile janah erguna. Bas tahun 1983, lit kira-kira 200 Bale Kinirajan si seri si ipajekken i Amerika Serikat ras Kanada. Guna ndungi pendahin e, ibentuk turang seninanta me panitia pembangunen regional. Seh kal tepatna cara enda, emaka tahun 1986, isahken Badan Pinpinen pengaturen e, janah tahun 1987, lit 60 Panitia Pembangunen Regional (RBC) i Amerika Serikat. * Bas tahun 1992, ibentuk ka me RBC i Afrika Selatan, Argentina, Australia, Jepang, Jerman, Meksiko, Prancis, ras Spanyol. Jelas me, turang seninanta si erbintuas majekken Bale Kinirajan ras Bale Kebaktin metunggung ndatken dukungenta erkiteken pendahin kalak enda sada bagin i bas dinas si badia.

7 Bale-Bale Kinirajan si meter ipajekken jadi sada kesaksin man masarakat i sekelewetna. Misalna, sada koran i Spanyol, nulisken berita utama ”Kiniteken Banci Mindahken Uruk”. Paksa mereken pendapat kerna pembangunen Bale Kinirajan i kota Martos, isungkun koran e, ”Uga maka banci i bas doni si mentingken bana enda, lit sukarelawan i bas erbage daerah [i Spanyol] alu la mentingken bana reh  ku Martos guna majekken bangunen si nggo naluken bangunen-bangunen si deban i bas kecepaten, kesempurnan, bage pe pengaturenna?” Ijabap artikel e alu ngutip kata-kata salah sada sukarelawan Saksi, ”Si enda kerina banci terjadi erkiteken kami iajar Jahwe.”

Mbangun i Negeri si Terbatas Sumber Dayana

8. I bas tahun 1999, kai program si mbaru si isetujui Badan Pinpinen, janah ngkai?

8 Nandangi pendungi abad si pedua puluhken, i negeri-negeri si terbatas sumber dayana, nterem kalak erduyun-duyun masuk ku organisasi Jahwe. Asa bancina ipajekken runggun ingan perpulungen. Tapi i bas piga-piga negeri, kalak enda icurigai janah itokohi erkiteken seh kal kolotna Bale Kinirajanna ibandingken ingan ibadat si deban. Tapi, mulai tahun 1999, isetujui Badan Pinpinen sada program gelah pembangunen Bale Kinirajan reh terna i negeri-negeri si terbatas sumber dayana. Negeri si lebih makmur nikapken dana gelah serser pembangunen e. (Oge 2 Korinti 8:13-15.) Turang seninanta i bas negeri si deban pe meriah ukurna nampati pendahin enda.

9. Kai dahin si tempa-tempa seh kal beratna, tapi kai hasilna?

9 Tangtangna, tempa-tempa seh kal beratna pendahin e. Ituriken sada laporen i bas tahun 2001 maka lebih 18.300 Bale Kinirajan si perlu denga ipajekken i bas 88 negeri si terbatas sumber dayana. Tapi, alu penampat kesah si badia ras Rajanta Jesus Kristus, la lit dahin si la mungkin ilakoken.  (Mat. 19:26) I bas kira-kira 15 tahun, mulai tahun 1999 seh ku 2013, nggo ipajekken umat Dibata 26.849 Bale Kinirajan si jadi bagin i bas program enda. * Terus ipasu-pasu Jahwe pendahin erberita, emaka tahun 2013 iperluken denga sekitar 6.500 Bale Kinirajan i negeri-negeri e, janah gundari, tep-tep tahun lit ratusen nari si perlu ipajekken.

Mbangun Bale Kinirajan i negeri si terbatas sumber dayana ngerehken sada tantangen

10-12. Uga pembangunen Bale Kinirajan maba kehamaten man gelar Jahwe?

10 Uga pembangunen Bale Kinirajan maba kehamaten man gelar Jahwe? Menurut laporen kantor cabang Zimbabwe, ”Biasana sebulan kenca Bale Kinirajan ipajekken, dua kali lipat tambahna kalak si reh pulung.” Bas mbue negeri, nterem kalak si nggit ikut ras kita kenca lit ingan ibadat si metunggung. Kenca pajek sada Bale Kinirajan, minter nterem kal si reh pulung piah dungna lanai siat, emaka perlu ka Bale si mbaru. Tapi, labo rupa bangunenna saja si narik kalak kempak Jahwe. Kekelengen Kristen si bas pusuh nari pe si icidahken kalak si majekken bale mpengaruhi pendapat kalak kerna organisasi Jahwe. Perdiateken piga-piga contoh.

11 Indonesia. Ibegi sekalak dilaki si mperdiateken pembangunen sada Bale Kinirajan maka kerina si erdahin e sukarelawan. Nina, ”Seh kal kena luar biasana! Meriah kal ukur kena erdahin, tutus kal ate kena, padahal labo igaji. Kuakap la lit agama si deban si bagi kena!”

12 Ukraina. Isimpulken sekalak diberu si tep-tep wari mentas i lebe-lebe proyek pembangunen Bale Kinirajan maka pasti Saksi-Saksi Jahwe si erdahin i je janah bangunen e pasti Bale Kinirajan. Nina, ”Kubegi kerna Saksi-Saksi Jahwe arah seninangku si Saksi. Kenca kuperdiateken pembangunen e, merhat aku jadi bagin i bas keluarga rohani enda. I jenda, tangkas teridah lit kekelengen.” Emaka nggit diberu e erlajar Pustaka si Badia janah iperidiken tahun 2010.

13, 14. (a) Kai si ipelajarindu arah tanggapen sekalak perbulangen ras ndeharana si mperdiateken pembangunen Bale Kinirajan? (b) Kai saja si banci ilakokenndu gelah ingan ibadatndu maba kehamaten man gelar Jahwe?

13 Argentina. Sekalak perbulangen ras ndeharana ndeheri turang seninanta si ngawasi pembangunen Bale Kinirajan. Ikataken perbulangen e, ”Sedekah enda, perdiateken kami kerina pendahin kena i pembangunen enda, janah . . . merhat kami erlajar kerna Dibata bas ingan enda.” Isungkunna ka, ”Kai si arus ilakoken kami gelah banci reh ku perpulungenna?” Kalak enda nggit erlajar Pustaka adi kerina keluargana pe banci ikut. Meriah ukur turang seninanta ngaloken sarat enda.

14 Banci saja la kam ikut i bas hak istimewa majekken Bale Kinirajan inganndu pulung. Tapi mbue denga si banci ilakokenndu gelah inganndu eribadat maba kehamaten man gelar Jahwe. Misalna, ergiah-giah kam ngundang kalak  si erlajar Pustaka si Badia, kalak si idahindu mulihi, ras si debanna guna perpulungen i Bale Kinirajan. Lit ka kesempatenndu ikut mbersihken ras ngerawatsa. Alu erbahan rencana si mehuli, banci saja ngasup kam mereken sumbangen guna perawaten Bale Kinirajanndu ntah pe pembangunen ingan ibadat si bage i negeri si debanna. (Oge 1 Korinti 16:2.) Kerina kegiaten enda nambah pujin man gelar Jahwe.

Kalak si Erdahin ”Alu Ukur Meriah”

15-17. (a) Ise si mbue dahinna i bas pendahin pembangunen? (b) Kai si ipelajarindu i bas pendapat turang seninanta si erdahin i erbage proyek pembangunen internasional?

15 Buen pendahin pembangunen Bale Kinirajan, Bale Kebaktin, ras fasilitas cabang ilakoken turang seninanta si tading i daerah e. Tapi megati isampati turang seninanta i bas negeri-negeri si deban nari si erpengalamen i bas pembangunen. Lit ka sukarelawan si nggo erban pengaturen gelah banci erdahin i bas proyek internasional piga-piga minggu. Si debanna nggit ngelayani ertahun-tahun dekahna, pindah-pindah i bas sada proyek ku proyek seterusna.

Timo ras Lina Lappalainen (Nehen paragraf 16)

16 Pendahin pembangunen internasional ngerehken tantangen bage pe kepuasen. Misalna, Timo ras Lina, nggo lawes ku negeri-negeri i Amerika Selatan, Asia, ras Eropa guna erdahin i bas pembangunen Bale Kinirajan, Bale Kebaktin, ras fasilitas cabang. Nina Timo, ”Rata-rata tiap dua tahun sedekah 30 tahun terakhir enda kudat tugas si mbaru.” Lina, si erjabu ras Timo 25 tahun si nggo lewat ngataken, ”Aku ras Timo nggo ngelayani i sepuluh negeri. Perlu mbue tenaga ras waktu guna nesuaiken diri ras pangan si mbaru, cuaca si mbaru, cakap si mbaru, ras daerah erberita si mbaru, bage pe guna ndatken teman-teman si mbaru.” *  Sebanding nge pengorbanen kalak enda ras kai si idatkenna? Nina Lina, ”Kerina kesuliten enda maba pasu-pasu si mbelin. Igejapken kami kiniulin ras kekelengen turang seninanta bage pe kekelengen Jahwe si terus mperdiateken kami. Idah kami ka uga janji Jesus si iberekenna man ajar-ajarna igenepi si itulis i Markus 10:29, 30. Lit seratus kali lipat turang, senina, ras nande kami secara rohani.” Nina Timo, ”Igejapken kami kepuasen si mbelin erkiteken nggunaken kinibeluhen kami i bas tujun si seh kal muliana, ikut nambahi erta sekerajangen Raja.”

17 Darren ras Sarah, si nampati proyek pembangunen i Afrika, Amerika Selatan, Amerika Tengah, Asia, Eropa, ras Pasifik Selatan, nggejapken maka nggo buen si ialokenna asangken si iberekenna. Amin gia ngadapi erbage tantangen, ikataken Darren, ”Erdahin ras turang senina i bas erbage bagin doni sada hak istimewa. Enggo kuidah maka kekelengenta man Jahwe bagi tinali si ngelilet doni, ngiket kita kerina.” Ikataken Sarah, ”Mbue si kupelajari i bas turang seninanta i bas erbage budaya nari! Ngidah pengorbanen kalak enda guna ngelayani Jahwe, reh merhatna aku terus mereken si mehulina.”

18. Uga nubuat si itulis i Masmur 110:1-3 igenepi?

18 Inubuatken Raja Daud maka amin gia rayat Kinirajan Dibata ngadapi tantangen, ”alu ukur meriah” kalak enda terus ngelayani guna kepentingen Kinirajan. (Oge Masmur 110:1-3.) Kerina si ikut i bas pendahin enda nggenepi kata-kata nubuat e. (1 Kor. 3:9) Buena bangunen kantor cabang, ratusen Bale Kebaktin, ras puluhen ribu Bale Kinirajan i belang-belang doni, enda sada bukti si jelas maka Kinirajan Dibata tuhu-tuhu lit janah paksana merentah. Seh kal belinna hak istimewanta ngelayani Raja Jesus Kristus i bas pendahin si maba kehamaten man Jahwe, si seh kal tunggungna ialokenNa!

^ par. 6 Bas tahun 2013, lebih 230.000 sukarelawan isetujui guna erdahin i bas 132 RBC i Amerika Serikat. I negeri enda, tep-tep tahun iaturken panitia e pembangunen kira-kira 75 Bale Kinirajan si mbaru janah isampatina mpesikap kira-kira 900 bale.

^ par. 9 Jumlah enda la termasuk piga-piga Bale Kinirajan si ipajekken i negeri-negeri si la ikut i bas program enda.

^ par. 16 Mbue waktu si igunaken hamba ras sukarelawan internasional guna erdahin i bas pembangunen, tapi idukungna ka runggun i bas pendahin erberita bas akhir minggu ntah pe bas karaben.