Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 12

Katakenlah Kai “Si Mehuli Guna Mpegegehi”

Katakenlah Kai “Si Mehuli Guna Mpegegehi”

“Ula pediat ranan si la mehuli ndarat arah babah kena nari. Tapi katakenlah kai si mehuli guna mpegegehi.”​—EPESUS 4:29.

1-3. (a) Kai pemere si mehuli si ibereken Jahwe banta? Uga carata ngergaisa? (b) Uga carata nggunaken pemere e?

SEKALAK perbapan mereken sepeda man anakna si nguda denga. Meriah ukurna mereken hadiah e. Tapi uga adi ate-ate anakna e mabasa, itabrakina kalak, janah ia pe suin? Uga perasan bapakna e?

2 Jahwe eme Si Mereken “kerina pemere si mehuli ras hadiah si sempurna.” (Jakup 1:17) Sada pemereNa si mehuli eme banci kita ngerana. Alu ngerana, banci sikataken isi pusuhta ras perasanta. Rananta banci nampati ras mpegegehi kalak si deban. Tapi rananta pe banci erban kalak sakit hati ntah megelut.

3 Rananta mbelin kel pengaruhna, janah iajarken Jahwe kita carana make pemereNa e alu mehuli. Nina Jahwe, “Ula pediat ranan si la mehuli ndarat arah babah kena nari. Tapi katakenlah kai si mehuli guna mpegegehi paksa iperluken, gelah erguna man kalak si megikenca.” (Epesus 4:29) Mari  sipelajari uga carata make pemere arah Dibata e guna erban meriah ukurNa, janah mpegegehi kalak si deban.

HATI-HATILAH SANGA NGERANA

4, 5. Kai si banci sipelajari kerna ranan arah buku Kuan-kuanen?

4 Mbelin kel pengaruh ranan, emaka perlu kel kita hati-hati kerna isi rananta ras carata ngerana. Nina Kuan-kuanen 15:4 (Terjemahan Dunia Baru [NW]), “Ranan si mehuli bali bagi batang kayu kegeluhen, tapi ranan si ngelukai pusuh erban putus asa.” Bali bagi batang kayu si mejile si mereken kegeluhen, rananta si mehuli pe erban kalak jadi semangat ras terpegegehi. Tapi, ranan si meser erban luka pusuh kalak ras lanai semangat.​—Kuan-kuanen 18:21.

Ranan si mehuli banci mpepalem pusuh

5 Nina Kuan-kuanen 12:18 (NW), “Ranan si la iukuri bali bagi pedang si banci ngelukai.” Ranan si meser banci ngelukai pusuh janah ncedai pertemanen. Banci saja siinget uga suina kel siakap sanga lit ranan kalak si meser. Tapi, ikataken Kuan-kuanen e ka, “Dilah kalak pentar mpepalem kap.” Adi siukuri lebe ope lenga ngerana, rananta banci mpepalem ukur si luka janah mpehuli pertemanen si ceda erkiteken la siangkan. (Baca Kuan-kuanen 16:24.) Adi siinget rananta e mbelin kel pengaruhna man kalak si deban, banci kita hati-hati sanga ngerana.

6. Engkai maka la menukah njaga rananta?

6 Alasen si deban ngkai maka penting manjar-anjar ngerana eme perban kerina kita la sempurna.  ‘Mulai kin kitik-kitikna nari, ukur manusia enggo jahat,’ janah rananta biasana ncidahken isi pusuhta. (Kejadin 8:21; Lukas 6:45) Memang arus kita erjuang njaga rananta. (Baca Jakup 3:2-4.) Tapi terus min siusahaken gelah rananta reh ulina.

7, 8. Kai pengaruh rananta man pertemanenta ras Jahwe?

7 Perlu ka siperdiateken isi rananta ras carata ngerana sebap ertanggung jawap kita man Jahwe. Nina Jakup 1:26, “Adi lit si erpengakap maka ia kalak eragama tapi la ijagana dilahna, itipuna kap dirina janah sia-sia ia eragama.” Emaka adi ate-ateta ngerana, banci ceda pertemanenta ras Jahwe, janah banci ka lanai kita erteman ras Ia.​—Jakup 3:8-10.

8 Jelas me, lit alasenta si mehuli gelah hati-hati ngerana, kerna carata ngerana bage pe isina. Gelah banci sipake pemere e alu cara si ngena ate Jahwe, perlu siteh ranan si uga si la banci sibelasken.

 RANAN SI NCEDAI

9, 10. (a) Kai ranan si biasa icakapken kalak jaman gundari enda? (b) Engkai maka la banci sibelasken ranan si lit hubungenna ras porno?

9 Gundari nggo biasa kalak ncakapken kata-kata si lit hubungenna ras porno ntah pe cakap kotor. Enterem kalak erpengakap maka perlu ia meser ngerana janah cakap kotor gelah mis iangkai kalak. Pelawak-pelawak pe biasana cakap kotor ntah pe ncakapken si lit hubungenna ras porno gelah banci kalak tawa. Tapi nina rasul Paulus, “Arus iambekken kena si e i bas diri kena nari, eme merawa, ngamuk, perbahanen si jahat, ngisak-ngisakken, janah ula belasken cakap kotor.” (Kolose 3:8, nen cataten i teruh) Nina ka “ula sempat belasken kena” ranan si ‘la erguna ntah pe si lit hubungenna ras porno’ i tengah-tengah kalak Kristen.​—Epesus 5:3, 4, cataten i teruh.

10 Ciga kel ate Jahwe bage pe umatNa nandangi ranan si lit hubungenna ras porno. Si e najis. I bas Pustaka si Badia, “kai pe si najis” teridah i bas “asil perbahanen daging.” (Galati 5:19-21) “Kai pe si najis” banci ngertiken erbage-bage jenis dosa, janah si e sada kebiasan najis si mabai ku perbahanen si najis si debanna. Adi nggo biasa sekalak jelma mbelasken cakap kotor ras porno, janah la nggit robah, ia banci ipecat arah runggun nari.​—2 Korinti 12:21; Epesus 4:19; nen Penjelasen Tambahen 23.

11, 12. (a) Kai bahayana cikurak? (b) Engkai maka la banci sipitnah kalak?

11 Ula ka min kita cikurak. Memang wajar adi  merhat kita meteh berita kalak janah siceritaken kai si mehuli kerna teman-teman bage pe keluarga. Mbarenda pe kalak Kristen si pertama merhat meteh keadan turang seninana janah banci iteh kalak e kai si man sampaten. (Epesus 6:21, 22; Kolose 4:8, 9) Tapi ncakapken kalak si deban banci menukah kel jadi cikurak. Adi sipeseh ka cerita e man si deban, ceritata e banci lanai tuhu ntah pe sibelasken cakap si la man katanken. Adi la kita hati-hati, ranan si la mehuli banci jadi pitnah. Ipitnah kalak Parisi Jesus alu nuduh ia ngelakoken si la pernah ilakokenna. (Matius 9:32-34; 12:22-24) Pitnah erban ceda gelar kalak, ncedai pertemanen, ncedai ukur, ras erban perubaten.​—Kuan-kuanen 26:20.

12 Ate Jahwe rananta banci nampati ras mpegegehi kalak, labo erban teman jadi musuh. Segat ate Jahwe ‘kalak si peturah perubaten nandangi temanna.’ (Kuan-kuanen 6:16-19) Tukang pitnah si pertama eme Setan si Iblis, ipitnahna Dibata. (Ketangkasen 12:9, 10) I bas doni si gundari, nggo biasa kalak erbual. Tapi si e la banci terjadi bas runggun Kristen. (Galati 5:19-21) Emaka arus sijaga rananta janah siukuri lebe ope lenga ngerana. Ope lenga ipesehndu ka sada cerita man kalak si deban, sungkuni bandu, ‘Tuhu nge cerita e? Mehuli nge isina? Lit kin gunana kuceritaken? Adi i je kalak si kucakapken e, pang nge aku nceritakenca? Uga nge perasanku adi lit kalak si ncakapken aku bagi cerita e?’​—Baca 1 Tesalonika 4:11.

13, 14. (a) Kai bahayana ranan si ngisakken? (b)  Kai ertina nghina? (c) Engkai maka kalak Kristen la banci nghina?

 13 Mon-mon, sibelasken ranan si dungna erban kita nyesal. Tapi ula min terbiasa kita mandangi kalak, ntah ncakapken si la mehuli, bage pe meser ngerana. Kita la banci ngisakken kalak. Nina Paulus, “Tadingkenlah kerina perasan dendam, merawa, ngamuk, serko, janah ngisakken.” (Epesus 4:31) Pustaka si deban nerjemahken kata “ngisakken” jadi “kata-kata si meser.” Ranan si ngisakken banci erban kalak lanai akapna merga bana ras la erguna. Biasana anak-anak si nukahna jadi korban, emaka arus sijaga rananta gelah la ceda pusuh kalak e.​—Kolose 3:21.

14 Ipersingeti Pustaka kita gelah ula kita nghina. Nghina eme terus ngisak-ngisakken kalak gelah ceda ukurna. Seh kel sedihna adi lit sekalak jelma si nghina teman geluhna ntah pe anak-anakna! Situhuna, sekalak jelma si terus nghina kalak, lanai banci jadi anggota runggun. (1 Korinti 5:11-13; 6:9, 10) Bagi si nggo sipelajari, adi sibelasken ranan si porno, la tuhu, ntah pe si la mehuli, banci ceda pertemanenta ras Dibata, bage pe ras kalak si deban.

RANAN SI MPEGEGEHI

15. Ranan si uga si banci mpegegehi pertemanen?

15 Uga carata make pemere eme rananta bagi cara si ngena ate Jahwe? Aminna pe la ijelasken Pustaka kel kerna kai si banci ras si la banci ibelasken, tapi kita isuruh mbelasken “kai si mehuli guna mpegegehi.” (Epesus 4:29) Ranan si mpegegehi eme ranan si la kotor, si mehuli, janah tuhu. Ate Jahwe rananta  mpegegehi ras nampati kalak. Banci saja mesera ngelakoken si e, sebap tabehen siakap rate-ate ngerana janah nukahen melasken ranan si meser asangken si mehuli. (Titus 2:8) Mari sipelajari uga cara mpegegehi kalak alu rananta.

16, 17. (a) Engkai maka arus sipuji kalak si deban? (b) Ise saja si banci sipuji?

16 Jahwe bage pe Jesus rusur ipuji kalak e kalak si deban. Siusih ateta kalak e. (Matius 3:17; 25:19-23; Johanes 1:47) Gelah pujinta banci tuhu-tuhu mpegegehi kalak, arus siukuri lebe janah siperdiateken ia. Nina Kuan-kuanen 15:23, “Seh kel riahna ukur adi terbelasken kata si payo i bas paksa si payo.” Terpegegehi kel kita sanga lit si muji kerja kerasta ntah pe iergaina si nggo silakoken.​—Baca Matius 7:12; nen Penjelasen Tambahen 27.

17 Adi sibiasaken ndarami si mehuli i bas diri kalak, reh nukahna siakap mereken pujin. Contohna, banci saja siperdiateken lit turang senina si nikapken kotbahna alu mehuli, lit si iusahakenna mereken komentar i bas perpulungen, lit ka anak muda si mbela kinitekenna i bas sekolah, ntah pe nini bulang si rajin erberita. Banci saja kalak e perlu pujin arah kam. Selain si e, penting kel sekalak perbulangen ngataken maka keleng atena ndeharana janah iergaina kel ia. (Kuan-kuanen 31:10, 28) Bali bagi sinuan-sinuan si perlu lau ras matawari, manusia pe perlu pujin gelah merga akapna bana, janah si perluna kel ipuji eme anak-anak. Daramilah kesempaten guna muji sipat-sipat ras usaha kalak e. Pujin  banci erban kalak e pang ras semangat, alu bage tersuruh ukurna gelah iusahakenna kel ngelakoken si benar.

Banci sipegegehi janah siapuli kalak arah isi rananta ras carata ngerana

18, 19. (a) Engkai maka arus siusahaken kel mpegegehi ras ngapuli kalak? (b) Uga carata ngelakokenca?

18 Siusih Jahwe alu mpegegehi ras ngapuli kalak si deban. Ermediate kel Ia man kalak si “meteruk rukur” janah man kalak si “erkadiola kerna dosa-dosana.” (Jesaya 57:15) Ate Jahwe kita ‘terus siiah-iahen’ janah ‘ngapuli kalak si sangana susah.’ (1 Tesalonika 5:11, 14) Adi terus siusahaken ngelakoken si e, idah Jahwe janah iergaiNa usahata e.

 19 I bas runggun, banci saja lit siidah kalak si sangana kitik ukurna ntah pe gulut kel tangkelenna. Kai si banci sikataken guna nampati ia? Memang la banci sidungi masalahna, tapi banci siperdiateken ia. Contohna, banci siban waktuta nemani ia. Banci sibacaken ayat Pustaka si mpegegehi janah banci kita ertoto ras ia. (Masmur 34:19; Matius 10:29-31) Ban ia tek maka keleng ate turang senina i bas runggun nandangi ia. (1 Korinti 12:12-26; Jakup 5:14, 15) Janah banlah alu rananta maka tuhu-tuhu igejapkenna sikelengi ia i bas pusuh nari.​—Baca Kuan-kuanen 12:25.

20, 21. Kai si erban kalak reh nukahna ngaloken nasehat?

 20 Banci ka sipegegehi kalak alu nasehat si mehuli. Selaku manusia si la sempurna, kerina kita perlu nasehat. Nina Kuan-kuanen 19:20, “Adi kam nggit megiken kata dingen nggit erlajar, i bas sada paksa kam la banci lang jadi pentar.” Labo pertua saja ngenca si banci mereken nasehat ntah pe persinget. Orang tua pe perlu ngajarken anak-anakna. (Epesus 6:4) Turang senina si diberu pe banci ka mereken nasehat man sada ras si debanna. (Titus 2:3-5) Perban keleng ateta turang seninata, sipastiken min carata mereken nasehat la erban kalak e sakit hati. Uga carana?

21 Mungkin siinget pernah kita inasehati kalak alu cara si mehuli janah menukah siakap ngalokenca. Engkai? Banci saja perban tuhu-tuhu iperdiatekenna siakap kita, ntah perban mehuli carana ngerana ras perkeleng. (Kolose 4:6) Banci saja nasehatna e erpalasken Pustaka. (2 Timotius 3:16) Jadi, sanga sinasehati kalak, sipake min Pustaka, la soal langsung sibacaken ntah pe lang. La banci sipaksaken pendapatta man kalak ntah pe siban ayat Pustaka guna ndukung pendapatta. Adi siinget cara kalak mereken nasehat si mehuli man banta, e banci nampati kita sanga mereken nasehat man kalak si deban.

22. Uga atendu nggunaken kengasupenndu i bas ngerana?

22 Kengasupen ngerana eme hadiah arah Dibata nari. Perban keleng ateta Ia, mehuli min rananta. Ingetlah rananta banci ncedai ntah pe mpegegehi. Emaka silakokenlah asa ngasupta gelah rananta banci mpegegehi kalak.