Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 2

Pusuh Peraten si Bersih i Lebe-Lebe Dibata

Pusuh Peraten si Bersih i Lebe-Lebe Dibata

“Jagalah pusuh peraten kena tetap bersih.”​—1 PETRUS 3:16.

1, 2. Engkai maka perlu kam si negu-negu i bas ingan si lenga itehndu? Kai si ibereken Jahwe guna negu-negu kita?

BAYANGKEN kam sangana erdalan i gurun pasir. Bentuk kersik si lit i je banci berubah-ubah ngikutken angin si megegeh. Emaka banci kam papak. Uga carana gelah itehndu dalan guna ndahi tujunndu? Perlu kam sekalak jelma ntah pe sada alat guna negu-negu kam. Alat e banci saja kompas, matawari, bintang, peta, GPS (guna nuduhken dalan ntah pe  ingan), ntah pe sekalak jelma si meteh daerah gurun pasir e. Penting kel lit si negu-negu kam, gelah banci itehndu dalan guna seh ku tujunndu e alu selamat.

2 Kerina kita ngadapi melala masalah i bas geluhta, janah maun-maun nyerah ateta. Tapi, ibereken Jahwe man banta sekalak-sekalak pusuh peraten si mehuli guna negu-negu kita. (Jakup 1:17) Mari sipelajari terbuen kerna pusuh peraten ras carana erpungsi. Kenca si e, sipelajari ka uga carana gelah tetap mehuli pusuh peratenta, ngkai maka arus siergai pusuh peraten kalak, janah uga pusuh peraten si bersih banci erban geluhta reh ulina.

KAI KIN PUSUH PERATEN E?

3. Kai kin pusuh peraten e?

3 Pusuh peratenta eme hadiah si luar biasa arah Jahwe. Enda perasan benar ntah salah si banci sigejapken. I bas Pustaka si Badia, kata “pusuh peraten” arah bahasa Junani ngertiken “pemeteh si lit i bas kita.” Sanga pusuh peratenta erpungsi alu mehuli, e nampati kita meteh kalak si uga kin kita situhuna. Isampatina ka kita jujur kerna kai si lit i bas perukurenta bage pe perasanta. E banci negu-negu kita ku si mehuli janah ndauh arah si la mehuli. Banci ka ibanna meriah ukurta sanga siban keputusen si mehuli, ntah pe latih ukurta ibanna perban keputusen si salah.​—Nen Penjelasen Tambahen 5.

4, 5. (a) Kai si terjadi sanga Adam ras Hawa la ngikutken pusuh peratenna si mehuli? (b) I bas Pustaka, ise saja si ngikutken pusuh peratenna si mehuli?

4 Kerina kita banci milih siikutken ntah lang  pusuh peratenta si mehuli. Adam ras Hawa ipilihna la ngikutken pusuh peratenna si mehuli, dungna erdosa kalak e. Kenca si e salah iakap kalak e bana, tapi lanai lit gunana. Kalak e la patuh man Dibata. (Kejadin 3:7, 8) Aminna pe pusuh peraten kalak e sempurna janah iteh kalak e salah adi la patuh man Dibata, ipilih kalak e la ngikutken pusuh peratenna si mehuli.

5 Tapi nterem kalak si la sempurna ngikutken pusuh peratenna si mehuli. Contohna Jop. Perban ibanna keputusen si mehuli, nina, ‘Pusuh peratenku la nalahken aku.’ (Jop 27:6) Tapi Daud pernah la ngikutken pusuh peratenna si mehuli janah la ipatuhina Jahwe. Dungna, latih kel ukurna janah “debet-debet” pusuhna. (1 Samuel 24:5) Pusuh peraten Daud nalahken ia. Alu bage, erlajar ia lanai ngelakoken kesalahen si seri.

6. Engkai banci sikataken pusuh peraten e hadiah arah Dibata?

6 Kalak si la nandai Jahwe pe biasana sadar kerna kai si benar ras kai si salah. Nina Pustaka, “Perukurenna banci nalahken ntah pe mbela dirina.” (Roma 2:14, 15) Contohna, teremen kalak si meteh maka munuh ntah pe nangko e salah. Alu la sadar, situhuna pusuh peratenna nge si ikutkenna. Pusuh peraten e me si iban Jahwe i bas diri kalak e guna ngangkai apai si salah ras apai si benar. Emaka, kalak e pe banci ngikutken patoken Jahwe guna erban keputusen si mehuli.

7. Engkai maka banci saja mon-mon salah pusuh peratenta?

7 Pusuh peratenta banci mon-mon salah. Contohna,  banci saja pusuh peratenta lanai mehuli, perban perukuren ras perasanta si la sempurna maba kita ku dalan si salah. Pusuh peraten si mehuli labo rempet lit. (Kejadin 39:1, 2, 7-12) Si e arus ilatih. Guna nampati kita, ibereken Jahwe man banta kesah si badia ras patoken i bas Pustaka nari. (Roma 9:1) Mari sipelajari uga carana ngelatih pusuh peratenta.

UGA CARATA NGELATIH PUSUH PERATENTA?

8. (a) Kai akibatna adi siikutken perasanta saja? (b) Ope lenga erban keputusen, kai si arus sisungkun banta?

8 Lit si erpengakap megiken pusuh peraten ertina ngikutken perasan saja. Kalak e erpengakap maka kai pe si iakapna mehuli, banci ilakokenna. Tapi perasanta la sempurna, emaka banci ibanna kita papak. Perasanta e banci megegeh kel, emaka banci ipengaruhina pusuh peratenta. Nina Pustaka, ‘Ise ngasup meteh pusuh manusia? La lit si deban si bali ras pusuh manusia penipuna.’ (Jeremia 17:9) Emaka perasanta banci erban kita bahaya. Dungna, kai si salah banci saja siakap benar. Contohna, ope lenga Paulus jadi kalak Kristen, isiksana alu kejam umat Dibata, janah menurut pusuh peratenna kai si ilakokenna e benar. Tapi kenca si e, nina, “Jahwe kap si nghakimi aku.” (1 Korinti 4:4; Perbahanen Rasul-Rasul 23:1; 2 Timotius 1:3) Sanga iteh Paulus uga perasan Jahwe kerna kai si ilakokenna, isadarina maka perlu ia robah. Jelas me, ope lenga silakoken kai pe, perlu sisungkun banta, ‘Kai nge ate Jahwe si kulakoken?’

9. Erkiteken mbiar man Jahwe, kai arus silakoken?

 9 Adi keleng atendu sekalak jelma, la atendu erban ceda ukurna. Erkiteken keleng ateta Jahwe, la ateta ngelakoken kai pe si erban ceda ukurNa. Mbiar kel min kita erban ceda ukur Jahwe. Contohna Nehemia. La ipakena kedudukenna selaku gubernur gelah erban ia bayak. Engkai? Ikatakenna perban ‘mbiar ia man Dibata.’ (Nehemia 5:15) La ate Nehemia ngelakoken kai pe si erban ceda ukur Jahwe. Bali bagi Nehemia, la silakoken si salah perban mbiar kita erban ceda ukur Jahwe. Banci sipelajari kai si erban meriah ukur Jahwe arah Pustaka nari.​—Nen Penjelasen Tambahen 6.

10, 11. Kai patoken Pustaka si banci nampati kita erban keputusen si benar kerna alkohol?

10 Contohna, sekalak Kristen banci saja perlu erban keputusen inemna ntah lang inemen alkohol. Kai patoken si banci nampati ia erban keputusen si mehuli? Cuba ukuri enda: Labo isalahken Pustaka minem alkohol. Malahen ikatakenna anggur e pemere arah Dibata nari. (Masmur 104:14, 15) Ikataken Jesus man pengikutna gelah ula “mbuesa minem.” (Lukas 21:34) Ikataken Paulus ka man kalak Kristen gelah ula “erpesta pora” ras “mabuk.” (Roma 13:13) Ikatakenna maka pemabuk “la pagi iwarisina Kerajan Dibata.”​—1 Korinti 6:9, 10.

11 Sekalak Kristen banci isungkunna bana, ‘Uga kin pentingna alkohol e man bangku? Perlu kin aku alkohol gelah aku tenang? Gelah hebat nge kuakap bangku maka kuinem alkohol? Banci nge kuatur asa  buena ras uga rusurna kuinem alkohol? * Meriah denga nge kuakap pulung ras teman-temanku bicara la pe lit i je inemen alkohol?’ Banci sipindo man Jahwe gelah isampatiNa kita erban keputusen si mehuli. (Baca Masmur 139:23, 24.) Alu bage pusuh peratenta banci ngikutken patoken Pustaka. Tapi lit ka si perlu siukuri, mari sipelajari terbuen.

ENGKAI SIERGAI PUSUH PERATEN KALAK SI DEBAN?

12, 13. Engkai maka banci la seri kerina pusuh peraten kalak? Uga kita nanggapisa?

12 Labo seri kerina pusuh peraten kalak. Banci saja ipediat pusuh peratenndu kam ngelakoken kai si menurut kalak la banci ilakoken. Contohna, banci saja nggit kam minem inemen alkohol tapi kalak si deban la nggit. Engkai maka banci dua kalak jelma la seri carana rukur kerna si e?

Pusuh peraten si terlatih nampati kam erban keputusen kerna inemndu ntah lang inemen alkohol

13 Perukuren sekalak jelma biasana ipengaruhi arah: Inganna ipebelin, keluargana, pengalamenna, ras si debanna. Banci saja sekalak jelma pernah candu minem inemen alkohol, emaka sanga lit inemen alkohol, lanai ia nggit minemsa sitik pe. (1 Raja-Raja 8:38, 39) Emaka, adi iberekenndu inemen alkohol man kalak si pernah candu janah itulakna, uga tanggapenndu? Kecewa nge kam? Ipaksandu nge ia minem? Arus nge itehndu ngkai maka itulakna? Tentu lang, perban iergaindu pusuh peratenna.

14, 15. Kai si terjadi bas jaman Paulus? Kai nasehat si mehuli si ibereken Paulus?

 14 I bas jaman rasul Paulus, lit keadan si ncidahken maka pusuh peraten e la seri. Piga-piga daging si idayaken i bas pajak nggo ipake i bas ibadat si palsu janah nggo ipersembahken man berhala. (1 Korinti 10:25) Menurut Paulus labo salah nukur ras man daging e. Menurutna kerina pangan rehna arah Jahwe nari. Tapi la bage perukuren piga-piga turang senina si mbarenda nembah berhala. Menurut kalak e salah adi ipan daging e. Banci saja nina Paulus, ‘E labo ngganggu pusuh peratenku. Hakku man kai pe si ateku kupan.’

15 Tapi labo bage nina Paulus. Penting kel akapna perasan turang senina e, emaka lit piga-piga hakna si la ipelebena. Nina Paulus maka arusna ula min “sisenangken dirita saja.” Nina ka, “Sebap Kristus pe labo isenangkenna dirina.” (Roma 15:1, 3) Bali bagi Jesus, pentingen iakap Paulus kalak si deban asangken dirina sendiri.​—Baca 1 Korinti 8:13; 10:23, 24, 31-33.

16. Engkai maka la banci sihakimi pusuh peraten turang seninata?

16 Bicara lit pusuh peraten kalak si erban ia ngelakoken kai siakap la banci ilakoken, uga tanggapenta? Arus kita hati-hati gelah ula sipandangi ia, janah ula sikataken kita si benar janah ia si salah. (Baca Roma 14:10.) Ibereken Jahwe man banta pusuh peraten guna nghakimi dirita, labo nghakimi kalak si deban. (Matius 7:1) Aminna pe e hakta sendiri, labo ateta keputusenta erban perpecahen  i runggun. Tapi siusahaken gelah sikeleng-kelengen ras tetap ersada.​—Roma 14:19.

MANPAAT PUSUH PERATEN SI BERSIH

17. Kai si terjadi adi sekalak jelma terus ngelakoken kai si salah?

17 Nina rasul Petrus, “Jagalah pusuh peraten kena tetap bersih.” (1 Petrus 3:16) Adi lalap la ngikutken patoken Jahwe, dungna pusuh peraten banci lanai erpenggejapen. Ikataken Paulus kerna pusuh peraten si bage “nggo lanai erpenggejapen” bali bagi kena “besi si itutung.” (1 Timotius 4:2) Pernah nge kam kena tutung? Sanga kena tutung, lit bekasna  janah si kena tutung e lanai gejapna kai pe. Adi sekalak jelma terus ngelakoken kai si salah, pusuh peratenna banci lanai erpenggejapen janah dungna lanai erpungsi.

Pusuh peraten si mehuli banci negu-negu kita i bas geluhta janah mereken keriahen ukur i bas pusuhta

18, 19. (a) Kai gunana perasan ersalah ntah pe mela? (b) Adi lalap salah siakap banta padahal kita nggo ertobat, kai si perlu siinget?

18 Sanga salah siakap banta, banci saja pusuh peratenta nge si mpebetehken maka nggo silakoken kai si salah. E banci nampati kita ngukuri kai si nggo silakoken janah lanai kita nggit ngelakokenca. Erlajar ateta arah kesalahenta gelah lanai siulangi. Contohna, sanga Raja Daud erdosa, isuruh pusuh peratenna ia ertobat. Segat atena kai si nggo ilakokenna janah iusahakenna gelah terus ipatuhina Jahwe. Banci  ikataken Daud arah pengalamenna maka Jahwe ‘mehuli kap dingen nggit ngampuni.’​—Masmur 51:3-21; 86:5; nen Penjelasen Tambahen 7.

19 Tapi aminna pe nggo ndekah sekalak jelma ertobat arah dosana nari, banci saja salah denga akapna bana. Perasan ersalah banci erban ceda kel ukur, janah lanai merga kapna bana. Adi mon-mon bage perasanndu, ingetlah maka labo banci iubahndu kai si nggo terjadi. La soal mbarenda iangkaindu alu jelas ntah lang kerna kai si salah ras si benar, gundari tuhu-tuhu iampuni Jahwe kam janah dosa-dosandu e nggo imasapkenNa. Kam nggo bersih i lebe-lebe Jahwe janah itehndu maka gundari nggo ilakokenndu si benar. Banci saja lalap denga isalahken pusuhndu kam, tapi nina Pustaka,  “Belinen kap Dibata asangken pusuhta.” (Baca 1 Johanes 3:19, 20.) Enda maksudna maka kekelengenNa ras pengampunenNa belinen asangken perasan ersalah ntah pe perasan mela si lit bas kita. Teklah maka nggo iampuni Jahwe kam. Sanga ialoken sekalak jelma pengampunen Jahwe, pusuh peratenna banci dame janah meriah ukurna ngelayani Dibata.​—1 Korinti 6:11; Heber 10:22.

20, 21. (a) Kai gunana buku enda? (b) Kebebasen kai si ibereken Jahwe man banta? (c) Uga kita banci nggunaken kebebasenta?

20 Buku enda nampati kam ngelatih pusuh peratenndu. Alu bage banci ipersingetina kam janah ilindungina i bas wari-wari pendungi si susah enda. Isampatina ka kam ngelakoken patoken Pustaka i bas erbage-bage keadan. Pastilah buku enda la mereken daptar peraturen kerna kai si banci ilakokenndu i bas tiap situasi. Kita nggeluh alu “undang-undang Kristus” si pas menurut patoken Dibata. (Galati 6:2) Erkiteken la lit undang-undang si jelas kel kerna kai si arus silakoken, bebas kita erban keputusen sendiri, tapi e la jadi alasen ngelakoken kai si salah. (2 Korinti 4:1, 2; Heber 4:13; 1 Petrus 2:16) Sigunakenlah kebebasenta e guna mbuktiken kekelengenta man Jahwe.

21 Sanga siukuri alu mbages patoken Pustaka janah silakoken, erlajar kita nggunaken ‘kengasupen rukurta’ ras sipelajari cara rukur Jahwe. (Heber 5:14) Hasilna, terlatih pusuh peratenta janah itegu-teguna kita, ras isampatina kita gelah tetap i bas keleng ate Dibata.

^ par. 11 Melala dokter si ngataken maka kalak si candu inemen alkohol mesera kel akapna ngatur asa buena si man inemenna. Menurut dokter, padin la padah inem kalak e sitik pe.