Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 7

Iergaindu nge Kegeluhen Bali Bagi Dibata?

Iergaindu nge Kegeluhen Bali Bagi Dibata?

“Kam kap ulu kegeluhen.”​—MASMUR 36:10.

1, 2. Kai hadiah si meherga si ibereken Jahwe man banta?

ENGGO ibereken Jahwe man banta hadiah si luar biasa, eme kap kegeluhen. (Kejadin 1:27) Sikap min ateNa geluhta. Emaka iberekenNa patoken si ngajari kita erban keputusen si mehuli. Sigunaken min patoken-patoken e guna “mbedaken” kerna “kai si benar ras kai si salah.” (Heber 5:14) Sanga silakoken si e, sipediat Jahwe nampati kita rukur alu mehuli. Adi sipake patoken Dibata janah sigejapken geluhta reh ulina, sieteh maka seh kel ergana patokenNa e.

2 Geluhta banci saja reh susahna. Megati situasina la banci langsung idungi undang-undang si lit bas Pustaka si Badia. Contohna, perlu siban keputusen kerna pertambar si make dareh. Uga carana erban keputusen si erban Jahwe senang? Pustaka risiken patoken si ngajari kita meteh perukuren Jahwe kerna kesah ras dareh. Adi siangkai patoken e, banci siban keputusen si pentar janah pusuh peratenta tetap bersih. (Kuan-kuanen 2:6-11) Gundari, mari sipelajari patoken e.

 UGA PERUKUREN JAHWE KERNA DAREH?

3, 4. (a) Kai nina Jahwe kerna dareh? (b) Kai ertina dareh e?

3 Pustaka ngajarken maka dareh e badia perban dareh e eme kesah. Janah merga iakap Jahwe kesah. Kenca ibunuh Kain seninana, nina Jahwe, “Dareh agindu serko man bangKu i bas taneh nari.” (Kejadin 4:10) Dareh Abil eme kap kesahna. Sanga Kain munuh Abil, ibuatna kesah Abil.

4 Kenca Banjir si Mbelin bas jaman Nuah, ikataken Dibata man manusia maka kalak e banci man daging. Tapi nina, “Daging si lit denga darehna la banci ipanndu.” (Kejadin 9:4) Perentah e pe ibereken ka man kerina kesusuren Nuah, termasuk kita. Jelas me, menurut Jahwe, dareh eme kesah. Perukurenta kerna dareh pe arus bage.​—Masmur 36:10.

5, 6. Menurut Undang-Undang Musa, kai si ikataken Jahwe kerna kesah ras dareh?

5 I bas Undang-Undang si ibereken Jahwe man Musa, nina, ‘Ise si man daging si lit denga darehna, Jahwe jadi imbangna janah lanai ia ikira jadi bangsaNa. Asa kai si nggeluh, kesahna lit i bas darehna.’​—Imamat 17:10, 11.

6 Ikataken Undang-Undang Musa maka adi sekalak jelma munuh binatang gelah ipan, arus icurcurkenna darehna ku taneh. Enda ertina maka kesah binatang ibereken mulihi man Si Nciptakenca eme Jahwe. (Ulangen 12:16; Esekiel 18:4) Tapi labo ate Jahwe kalak Israel munuh binatang alu kejam. Asa bancina ula nai lit darehna, alu bage banci ipan kalak e daging e alu pusuh peraten si bersih. Adi iergai  kalak e dareh binatang, iergai kalak e ka Si Mereken kegeluhen eme Jahwe. Iperentahken Undang-Undang e ka gelah bangsa Israel mpersembahken binatang jadi korban guna nasapken dosa.​—Nen Penjelasen Tambahen 19 ras 20.

7. Uga Daud mbuktiken maka iergaina dareh?

7 Banci ka sipelajari uga mehergana dareh e arah Daud sanga erperang ia ngelawan kalak Pilisti. Idah prajurit Daud maka Daud sangana muas kel emaka masuk prajuritna e ku daerah musuhna si erbahaya janah ipertaruhken kalak e kesahna muat lau man Daud. Tapi sanga ibereken kalak e man Daud, la nggit Daud nginemsa janah ‘iamburkenna lau e jadi sada persembahen man Jahwe.’ Nina Daud, ‘O Jahwe, ndigan pe la aku nggit nginemsa lau e! E seri kap ras minem dareh kalak enda si mereken kesahna!’ Iangkai Daud maka merga kel iakap Dibata kesah ras dareh.​—2 Samuel 23:15-17.

8, 9. Gundari, uga arusna perukuren kalak Kristen kerna dareh?

8 Kalak Kristen si pertama lanai perlu erban persembahen binatang. Tapi arus benar perukuren kalak e kerna dareh. Sada bagin i bas Undang-Undang Musa si ipindo Jahwe gelah ipatuhi kalak Kristen eme, ‘Pedauhlah diri kena arah dareh.’ Enda penting kel, bali ras mpedauh diri arah perbahanen seks si salah bage pe nembah berhala.​—Perbahanen Rasul-Rasul 15:28, 29.

Uga aku banci njelasken keputusenku kerna make bagin-bagin si terkitiken arah dareh?

9 Gundari pe bage ka. Selaku kalak Kristen, siteh maka Jahwe kap Sumber kegeluhen janah kerina kesah jangNa kap. Siteh ka maka dareh e badia janah  dareh e kesah. Emaka, sanga siban keputusen kerna pertambar si make dareh, arus sipastiken kai nina Pustaka.

CARA ERTAMBAR SI MAKE DAREH

10, 11. (a) Uga menurut Saksi Jahwe kerna empat bagin utama dareh? (b) Kai si arus iputusken kalak Kristen sekalak-sekalak?

10 Iangkai Saksi-Saksi Jahwe maka kata-kata ‘pedauhlah diri kena arah dareh’ labo saja maksudna la ipan ntah pe iinem. E maksudna dareh la simasukken ku bas dagingta, la sibereken man kalak si deban, janah la banci sisimpan darehta guna simasukken ku dagingta. La ka simasukken ku bas dagingta empat bagin utama dareh, eme dareh merah, dareh putih, trombosit, bage pe plasma dareh.

11 Empat bagin utama dareh e banci ibagi ku bagin si terkitiken si igelari bagin-bagin dareh si terkitiken. Tiap kalak Kristen arus iputuskenna sendiri kerna ialokenna ntah lang bagin-bagin dareh si terkitiken e. Bage ka pe, arus iputusken kalak Kristen kerna pertambar si make darehna sendiri. Tiap kalak arus iputuskenna kerna uga darehna igunaken sanga operasi, tes kesehaten, ntah pe terapi.​—Nen Penjelasen Tambahen 21.

12. (a) Engkai penting akap Jahwe keputusen si ngikutken pusuh peraten? (b) Uga kita banci erban keputusen si pentar kerna cara ertambar?

12 Tuhu-tuhu nge iperdiateken Jahwe keputusenta si ngikutken pusuh peraten? Pasti. Iperdiateken Jahwe perukuren ras sura-surata. (Baca Kuan-kuanen 17:3; 24:12.) Erkiteken si e, sanga siban keputusen kerna cara ertambar, perlu kita ertoto  mindo petunjuk Jahwe janah sidarami keterangen terbuen kerna cara ertambar e. Kenca si e, sipake pusuh peratenta si nggo ilatih Pustaka erban keputusen. Ula min sisungkun kalak kerna kai nge si ilakokenna adi ia i bas situasita, ntah pe sipediat ipengaruhina keputusenta. Tiap kalak Kristen “maba babanna sendiri.”​—Galati 6:5; Roma 14:12.

UNDANG-UNDANG JAHWE MBUKTIKEN KEKELENGENNA MAN BANTA

13. Kai si banci sipelajari kerna Jahwe arah undang-undangNa bage pe patokenNa kerna dareh?

13 Kai pe si isuruh Jahwe, gunana man banta nge janah e bukti keleng ateNa kita. (Masmur 19:8-12) Sipatuhi Dibata labo saja perban perentahNa e erguna man banta, tapi perban keleng ateta Ia. Emaka, la kita nggit masukken dareh ku bas dagingta. (Perbahanen Rasul-Rasul 15:20) Enda pe ngelindungi kesehatenta. Gundari, nterem kalak meteh maka lit bahayana adi simasukken dareh ku bas dagingta, janah nterem dokter tek maka operasi si la make dareh ulin man kesehaten pasien. Enda mbuktiken maka undang-undang Jahwe mehuli janah perkeleng.​—Baca Jesaya 55:9; Johanes 14:21, 23.

14, 15. (a) Undang-undang kai si ibereken Jahwe guna ngelindungi umatNa? (b) Uga kam banci ngelakoken patoken si lit bas undang-undang e?

14 Undang-undang Dibata lalap mereken si mehuli man umatNa. Ibereken Jahwe undang-undang man kalak Israel si mbarenda guna ngelindungi kalak e arah bahaya. Contohna, ikataken undang-undang e maka sekalak jelma si mbangun rumah  arus ibanna pagar tembok si gendek i bas atapna, gelah ula lit kalak ndabuh i je nari. (Ulangen 22:8) Ikataken undang-undang e ka uga perbahanen kalak e man binatang. Adi lit si mpuna lembu si merawa, arus ijagana lembu e gelah ula iserangna kalak ntah pe ibunuhna. (Keluaren 21:28, 29) Adi lit kalak Israel la matuhi undang-undang e, salah me ia adi lit kalak mate perban asuhenna e.

15 Arah undang-undang e banci siteh maka merga kel iakap Jahwe kesahta. Uga pengaruhna si e man banta? Sibuktiken maka merga siakap kesahta arah carata milih hiburen, ngurus rumah, motor, kreta, bage pe carata mabasa. Piga-piga kalak, terlebih anak muda erpengakap maka labo banci kalak e kena bahaya, emaka la diate kalak e bahaya si banci terjadi janah pang kalak e kena akibatna. Tapi ate Jahwe ula min silakoken bage. AteNa min gelah meherga siakap kesahta bage pe kesah kalak si deban.​—Pengerana 11:9, 10.

16. Uga tanggapen Jahwe kerna nggugurken anak?

16 Kerina kesah manusia penting akap Jahwe. Termasuk anak si lenga lahir pe meherga iakapNa. Menurut Undang-Undang Musa, adi lit diberu si sangana hamil cilaka iban kalak, janah diberu e ntah pe anak si lit bas beltekna mate, menurut Jahwe ia nggo munuh. Aminna pe ia la sengaja munuh, ia ianggap nggo meneken kesah, emaka kesah e arus iganti rugi. (Baca Keluaren 21:22, 23.) Anak si lenga lahir pe nggo iakap Dibata bagi manusia si nggeluh. Meteh si e, uga menurutndu tanggapen  Jahwe kerna nggugurken anak? Uga nge perasanNa sanga idahNa jutan anak si lenga lahir ibunuh tiap tahun?

17. Adi lit diberu si pernah nggugurken anakna ope lenga nandai Jahwe, kai si banci itekina?

17 Uga adi sekalak diberu nggo pernah nggugurken anakna ope lenga itehna tanggapen Jahwe kerna si e? Banci ia tek maka iampuni Jahwe nge ia erkiteken korban tebusen Jesus. (Lukas 5:32; Epesus 1:7) Diberu si nggo erban kesalahen si bage, la perlu lalap salah iakapna bana, sebap ‘Jahwe e perkuah dingen perkeleng kap . . . Bagi dauhna timur i barat nari, bage me ipedauhNa dosa-dosata i bas kita nari.’​—Masmur 103:8-14.

ULA RATE SEGAT

18. Kai bahayana adi segat ateta kalak?

18 Arus arah pusuh nari lebe siergai kegeluhen si ibereken Dibata. Enda termasuk uga perasanta man kalak si deban. Nina rasul Johanes, ‘Tiap kalak si segat atena turang seninana, pemunuh kap.’ (1 Johanes 3:15) Alu la sisadari, adi la ateta bage kalak si deban, banci dungna segat ateta ia. Adi segat ateta kalak, banci dungna lanai ia siergai, sipitnah, ntah pe siarapken gelah ia mate. Ieteh Jahwe nge uga perukurenta man kalak si deban. (Imamat 19:16; Ulangen 19:18-21; Matius 5:22) Adi lit kalak si segat ateta, arus siusahaken meneken perukuren si bage.​—Jakup 1:14, 15; 4:1-3.

19. Kai cara si deban si mbuktiken maka merga siakap kesah e?

19 Lit cara si deban guna mbuktiken merga siakap  kesah e. I bas Masmur 11:5, siteh maka ‘nembeh kel ate Jahwe man kalak si erngena ate man si jahat.’ Adi sipilih hiburen kekerasen, e buktina meriah siakap kekerasen. Ula min siukuri ranan, sura-sura, bage pe gambar si lit kekerasenna. Tapi, siukurilah kai pe si bersih ras si erban dame.​—Baca Pilipi 4:8, 9.

ULA IKUT BAS ORGANISASI SI LA NGERGAI KESAH MANUSIA

20-22. (a) Enterem kalak la ngergai kesah manusia. Uga tanggapen Jahwe kerna si e? (b) Uga umat Dibata mbuktiken kalak e “labo bagin i bas doni enda nari”?

20 Enterem kalak la ngergai kesah manusia, janah ianggap Jahwe e kesalahen si seri ras pemunuhen. Lebih ratusen tahun, kalak si erkuasa i bas politik bage pe pemerentah nggo erban nterem kalak mate, termasuk umat Jahwe. I bas jaman Pustaka kalak e ipeseri ras binatang si seh kel rawana janah kejam. (Daniel 8:3, 4, 20-22; Ketangkasen 13:1, 2, 7, 8) Gundari sukses kel bisnis senjata. Melala kel untung kalak e ndayaken senjata-senjata si erban nterem jelma mate. Jelas me, “kerina doni enda lit i bas kuasa si jahat.”​—1 Johanes 5:19.

21 Tapi kalak Kristen situhu-tuhu “labo bagin i bas doni enda nari.” Umat Jahwe la ikut i bas politik bage pe i bas perang. Perban la kalak e nggit munuh, la ate kalak e ndukung organisasi si apai pe si munuh jelma. (Johanes 15:19; 17:16) Sanga kalak Kristen isiksa, la ibalas kalak e alu kekerasen. Sebap nggo iajarken Jesus musuhta pe arus sikelengi.​—Matius 5:44; Roma 12:17-21.

 22 Agama pe ikut ertanggung jawap i bas kematen jutan kalak. Sanga ncakapken kerna Babilon si Mbelin, eme agama palsu si lit i sebelang doni, nina Pustaka, “I bas diberu e me idapeti dareh nabi-nabi, kalak si badia, bage pe kerina kalak si nggo ibunuh i doni enda.” Nina Jahwe, “Ndaratlah, o umatKu!” Banci nge iangkaindu ngkai isuruh Jahwe kita ndarat? Sebap kalak si nembah Jahwe labo bagin i bas agama si palsu e.​—Ketangkasen 17:6; 18:2, 4, 24.

23. Kai saja maksudna “ndaratlah” arah Babilon si Mbelin e nari?

23 Gelah banci tuhu-tuhu ‘ndarat’ arah Babilon si Mbelin, arus sibuktiken arah perbahanenta maka la kita ikut i bas agama palsu. Contohna, arus sipastiken maka gelarta lanai lit i bas daptar anggota gereja. Tapi labo e saja ngenca. Arus ka segat ateta janah situlak perbahanen si la mehuli si ilakoken agama palsu, sebap i bas agama palsu lit perbahanen seks si salah, politik, bage pe kerangapen. (Baca Masmur 97:10; Ketangkasen 18:7, 9, 11-17) Akibatna, ertahun-tahun dekahna, nggo jutan kalak mate.

24, 25. Engkai maka nandai Jahwe erban dame siakap janah bersih pusuh peratenta?

24 Ope lenga nandai Jahwe, banci saja pernah sidukung perbahanen si la mehuli. Tapi gundari kita nggo robah. Nggo sialoken tebusen janah nggo sibereken geluhta man Dibata. Sigejapken maka ‘ibereken Jahwe man banta kemalemen ate.’ Pusuh peratenta bersih ras dame perban nggo siteh meriah ukur Dibata siban.​—Perbahanen Rasul-Rasul 3:19; Jesaya 1:18.

 25 Aminna pe pernah kita ikut i bas organisasi si la ngergai kesah manusia, banci kita iampuni Jahwe erkelangken tebusen. Pasti siergai kel kegeluhen si ibereken Jahwe. Uga carana? Alu nampati kalak si deban asa ngasupta guna nandai Jahwe, la kita nggit ipengaruhi doni enda, janah ndeher kita ras Dibata.​—2 Korinti 6:1, 2.

BERITAKENLAH KERNA KERAJAN

26-28. (a) Kai dahin si penting si ibereken Jahwe man Esekiel? (b) Kai si ipindo Jahwe silakoken gundari?

26 I bas jaman Israel, ikataken Jahwe man Esekiel gelah ipersingetina kalak si lit i bas Jerusalem maka kentisik nari ihancurken me kota e, janah iajarina kalak e gelah banci selamat. Bicara kalak e mate perban la ipersingeti Esekiel, ia me si ertanggung jawap. (Esekiel 33:7-9) Ibuktiken Esekiel maka merga iakapna kesah alu ngelakoken asa ngasupna guna mpeseh berita e. 

27 Isuruh Jahwe kita mpersingeti kalak kerna doni si nandangi ikernepken, isuruhNa ka kita nampati kalak gelah nandai Ia janah meteh carana gelah selamat ku doni si mbaru. (Jesaya 61:2; Matius 24:14) Silakoken min kai pe guna mberitaken berita e man kalak si deban. Mbera banci sikataken bagi kata-kata Paulus, “Aku bersih arah dareh kerina kalak, sebap nggo kupeseh man kena alu jelas kerna sura-sura Dibata.”​—Perbahanen Rasul-Rasul 20:26, 27.

28 Lit ka bagin si deban i bas geluhta si arus bersih. Mari sipelajari kerna si e i bas pelajaren selanjutna.