Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 9

“Minterlah Tulak Perbahanen Seks si Salah!”

“Minterlah Tulak Perbahanen Seks si Salah!”

“Emaka, matekenlah kerina sura-sura daging kena si ngikutken doni, eme perbahanen seks si salah, perbahanen si najis, napsu seks si la terkuasai, sura-sura si jahat, bage pe rangap si seri ras nembah berhala.”​—KOLOSE 3:5.

1, 2. Kai si ilakoken Bilham gelah umat Jahwe cilaka?

SEKALAK dilaki lawes ngkawil janah ipilihna umpan si pas guna nangkap ikan. Kenca seh, mulai me ia ngkawil janah sabar ia nimaisa. Sanga ipan ikan umpanna e, itarik-tarikna kawilna e gelah leket kait kawil e ku babah ikan e, jenari itarikna ku darat.

2 Bage ka pe, manusia banci kena umpan. Contohna, sanga bangsa Israel nandangi seh i Taneh Perjanjin, erkemah kalak e i Kendit Moap. Adi isumpahi Bilham kalak Israel, erjanji raja Moap mereken melala sen man bana. Tapi, idat Bilham carana gelah kalak Israel sendiri si erban kalak e kena sumpah. Ipilihna umpan si pas, eme isuruhna singuda-nguda kalak Moap reh ku kemah kalak Israel guna nggoda dilaki-dilaki kalak Israel.​—Bilangen 22:1-7; 31:15, 16; Ketangkasen 2:14.

3. Uga kalak Israel banci kena umpan Bilham?

3 Berhasil nge umpan Bilham e? Berhasil. Ribun kalak Israel si dilaki ngelakoken ‘perbahanen seks  si salah ras diberu-diberu bangsa Moap.’ Mulai me isembah kalak e dibata-dibata palsu, termasuk dibata seks si erban ciga ate eme Baal Peor. Akibatna, 24.000 kalak Israel mate i perbatasen Taneh Perjanjin.​—Bilangen 25:1-9.

4. Engkai maka ribun kalak Israel ngelakoken perbahanen seks si salah?

4 Engkai maka nterem kalak Israel kena umpan Bilham? Sebap kesenangen kalak e saja si iukurina, janah ilupaken kalak e kerina si nggo ilakoken Jahwe. Melala alasen kalak Israel gelah tetap setia man Dibata. Enggo ibebaskenNa kalak e arah perbudaken i Mesir, ibereNa kalak e man i taneh mesawang, janah ibabaiNa kalak e selamat seh ku perbatasen Taneh Perjanjin. (Heber 3:12) Tapi kalak e tergoda alu perbahanen seks si salah. Nina rasul Paulus, ‘Ula silakoken perbahanen seks si salah bagi si ilakoken piga-piga arah kalak e nari, si erban mate.’​—1 Korinti 10:8.

5, 6. Kai si banci sipelajari arah kalak Israel?

5 Bali bagi kalak Israel si lit i perbatasen Taneh Perjanjin, kita pe gundari nggo ndeher kel ku doni si mbaru. (1 Korinti 10:11) Kalak si gundari enda meriah kel akapna seks, lebihen asangken kalak Moap si mbarenda. Enda menukah kel erban umat Jahwe terpengaruh. Situhuna, umpan si pasna si ipake Iblis eme perbahanen seks si salah.​—Bilangen 25:6, 14; 2 Korinti 2:11; Judas 4.

6 Sungkun bandu, ‘Madin nge kuakap ngelakoken kesenangenku saja i bas waktu si kentisik? Ntah madin nge nggeluh ermeriah ukur seh rasa lalap i bas doni si mbaru?’ Pasti ndauh ulin adi siusahaken kel  matuhi perentah Jahwe guna ‘minter nulak perbahanen seks si salah.’​—1 Korinti 6:18.

KAI KIN PERBAHANEN SEKS SI SALAH E?

7, 8. (a) Kai kin perbahanen seks si salah e? (b) Engkai maka e masalah si serius?

7 Gundari, nterem kalak ngelakoken perbahanen si la meteh mela janah la iergaina undang-undang Dibata kerna seks. Banci saja mehangke ntah pe megamang siakap mbahassa, tapi arus jelas siangkai kerna si e gelah ula silakoken kai si segat ate Dibata. I bas Pustaka si Badia, perbahanen seks si salah maksudna ngelakoken hubungen seks ope lenga sah erjabu menurut Pustaka. Perbahanen seks si salah e termasuk hubungen seks antara dilaki ras dilaki, diberu ras diberu, bage pe manusia ras binatang. Enda pe termasuk ka hubungen seks arah babah, hubungen seks arah anus, ntah pe njemak-njemak ras ngerangsang alat kelamin kalak.​—Nen Penjelasen Tambahen 23.

8 I bas Pustaka, alu jelas ikataken adi sekalak jelma terus ngelakoken perbahanen seks si salah, ia arus ipecat arah runggun. (1 Korinti 6:9; Ketangkasen 22:15) Selain si e, kalak si ngelakoken perbahanen seks si salah lanai akapna merga bana janah lanai ia tek man kalak. Perbahanen seks si salah lalap jadi masalah. Biasana isalahken pusuh peratenta kita, terjadi hamil si la isuraken, masalah perjabun, pinakit, ntah pe kematen. (Baca Galati 6:7, 8.) Adi sekalak jelma tuhu-tuhu ngukuri akibat perbahanen e, mungkin labo ia nggit ngelakokenca. Tapi pornograpi me si tangtangna maba ia ku perbahanen seks si salah. Paksa si e kepuasenna saja ngenca si iukurina.

 TANGTANGNA EME PORNOGRAPI

9. Kai bahayana pornograpi?

9 Pornograpi iban gelah turah napsu seks. Gundari, pornograpi lit i japa pe, bagi majalah, buku, musik, bage pe acara TV, ras Internet. Enterem kalak la akapna bahaya pornograpi, tapi situhuna e seh kel bahayana. Si e banci erban sekalak jelma jadi candu seks ras mpebelin napsu seks si salah. Sekalak jelma si nggo candu pornograpi, banci erban ia terbiasa njemak-njemak alat kelaminna seh asa puas napsu seksna, ermasalah perjabunna, janah banci dungna cerai.​—Roma 1:24-27; Epesus 4:19; nen Penjelasen Tambahen 24.

Kita perlu hati-hati sanga make Internet

10. Kai persinget si lit bas Jakup 1:14, 15?

10 Penting kel siangkai uga perbahanen seks si salah banci jadi umpan si ngkenai kita. Perdiateken persinget si lit bas Jakup 1:14, 15, “Tiap kalak icubai paksa itarik janah igoda alu sura-surana sendiri. Jenari kenca sura-sura e reh belinna, turah me dosa. Adi dosa e nggo ilakoken, akibatna eme kematen.” Emaka, sanga turah perukuren si salah i bas pusuhndu, minterlah tulak. Adi la sengaja idahndu gambar porno, mis ula nai nen. Mateken komputerndu ntah pe ganti siarenna. Ula sempat iukurindu napsu seks si salah, sebap si e erban sura-sura si salah jadi reh belinna, janah mesera kel ngkuasaisa.​—Baca Matius 5:29, 30.

11. Uga Jahwe banci nampati kita sanga salah perukurenta?

11 Lebih itandai Jahwe kita asangken dirita sendiri. ItehNa kita la sempurna. Tapi itehNa ka ngasup  nge kita ngkuasai sura-sura si salah. Nina Jahwe, “Matekenlah kerina sura-sura daging kena si ngikutken doni, eme perbahanen seks si salah, perbahanen si najis, napsu seks si la terkuasai, sura-sura si jahat, bage pe rangap si seri ras nembah berhala.” (Kolose 3:5) Amin pe la menukah ngelakokenca, Jahwe sabar janah nggit nampati kita. (Masmur 68:20) Lit sekalak turang senina si nguda denga si dungna terbiasa nonton pornograpi janah terbiasa njemak-njemak alat kelaminna seh asa puas napsu seksna. Wajar nge si e akap teman-teman sekolahna sebap kalak e nguda denga, tapi nina turang seninata ndai, “Enda erban ceda pusuh peratenku, janah dungna melala kulakoken perbahanen seks si salah.” Sadar ia maka arus ikuasaina napsuna, janah alu penampat Jahwe, ngasup ia mpengadi kebiasanna  e. Emaka, adi iukurindu perbahanen seks si salah, pindolah man Jahwe ‘kengasupen si luar biasa’ gelah tetap bersih perukurenndu.​—2 Korinti 4:7; 1 Korinti 9:27.

12. Engkai kita perlu ‘njaga perukurenta’?

12 Nina Salomo, “Manjar-anjar kam rukur, sabap perukurenndu kap si mabai dalan kegeluhenndu.” (Kuan-kuanen 4:23) ‘Perukurenta’ ncidahken kalak si uga kin kita situhuna, janah si e me si inen Jahwe. Kai si inen kita banci mbelin kel pengaruhna man banta. Nina Jop si setia, ‘Ersumpah aku i bas pusuhku, ndigan pe la kutatap singuda-nguda alu mengga ate.’ (Jop 31:1) Bagi Jop, perlu siukuri kai si man tontonenta ras si man ukurenta. Janah, ertoto kita bagi si nulisken Masmur, ‘Jagai min aku maka ula kuayaki si sia-sia.’​—Masmur 119:37.

PILIHEN DINA SI LA PENTAR

13. Kalak si uga nge teman-teman si ipilih Dina?

13 Mbelin kel pengaruh teman-temanta man banta, banci erban kita reh ulina ntah pe jadi la mehuli. Adi ipilihndu teman si ngikutken patoken Dibata, kam pe banci isampatina ngikutken patoken Dibata. (Kuan-kuanen 13:20; baca 1 Korinti 15:33.) Banci sipelajari arah pengalamen Dina kerna pentingna milih teman. Ia anak Jakup, emaka ia ipebelin i bas keluarga si nembah Jahwe. Dina labo diberu si gutul, tapi kompak ia ras diberu-diberu Kanaan si la nembah Jahwe. Umat Dibata la seri ras kalak Kanaan si meriah akapna ngelakoken perbahanen seks si salah. (Imamat 18:6-25) Sanga jumpa Dina  ras teman-temanna e, jumpa ka ia ras anak perana Kanaan gelarna Sikem, si ngena atena Dina. Sikem me kalak “si mehergana” i bas keluargana. Tapi la ikelengina Jahwe.​—Kejadin 34:18, 19.

14. Kai si terjadi man Dina?

14 Ilakoken Sikem kai si akapna cocok ras biasa saja. Perban ngena atena Dina, “itagangina” ia jenari ‘iperkosana.’ (Baca Kejadin 34:1-4.) Enda me bena-benana kejahaten si dungna erban melala masalah si mbelin man Dina bage pe keluargana.​—Kejadin 34:7, 25-31; Galati 6:7, 8.

15, 16. Uga kita banci jadi pentar?

15 La perlu sinanami bagi Dina guna meteh maka patoken Jahwe e erguna. “Adi kam erteman ras kalak pentar kam pe ikut jadi pentar, tapi adi kalak bodoh temanindu, kam pe ikut jadi bodoh.” (Kuan-kuanen 13:20) Banlah tujunndu guna ngangkai “kai si arus ilakokenndu,” gelah ula kam rate mesui janah ngenanami kesusahen si la perlu.​—Kuan-kuanen 2:6-9; Masmur 1:1-3.

16 Kita banci jadi kalak pentar adi sipelajari Kata Dibata, ertoto ope lenga erban keputusen, janah siikutken nasehat si mehuli arah budak si setia janah pentar. (Matius 24:45; Jakup 1:5) Memang kerina kita lemah ras la sempurna. (Jeremia 17:9) Bicara kam i bas situasi si bahaya si banci dungna ngelakoken perbahanen seks si salah, janah lit si mpersingeti kam, uga tanggapenndu? Sangkut nge ukurndu? Ntah ialokenndu nge persinget e alu meteruk ukur?​—2 Raja-Raja 22:18, 19.

17. Bereken sada contoh uga nasehat arah teman sada kiniteken banci nampati kita.

 17 Contohna, bayangken situasi enda. I bas ingan erdahin, lit sekalak dilaki si mulai ideherina sekalak turang seninata. Rusur iperdiatekenna ia janah iajakna ngerondong. Dilaki e teridah mehuli, tapi ia la nembah Jahwe. Lit turang senina si deban si ngidah kalak e erdua-dua, emaka icubakenna mpersingeti ia. Uga tanggapen turang senina si ipersingeti e? Ibelana nge dirina? Ntah iukurina manpaat persinget e? Banci saja keleng nge atena Jahwe janah ilakokenna atena si benar. Tapi, adi terus ia ras dilaki e, ‘itulakna nge perbahanen seks si salah’? Ntah ‘perukurenna saja nge si ikutkenna’?​—Kuan-kuanen 22:3; 28:26; Matius 6:13; 26:41.

 NDATKEN PELAJAREN ARAH CONTOH JUSUP

18, 19. Jelasken uga Jusup nulak perbahanen seks si salah.

18 Sanga nguda denga, Jusup jadi budak i Mesir. Tiap wari, iajak diberu tuanna ia erhubungen seks, tapi ieteh Jusup e salah. Jusup ngkelengi Jahwe janah isenangkenna atena Jahwe. Tiap igoda diberu e Jusup, lalap itulakna. Perban ia budak, la banci itadingkenna tuanna bage saja. Tapi, i bas sada wari sanga ipaksa diberu tuanna ia erhubungen seks, ‘kiam Jusup ku darat.’​—Baca Kejadin 39:7-12.

19 Pasti la bage jadina adi rusur iukuri Jusup perbahanen seks si salah, ntah pe adi rusur ibayang-bayangkenna diberu e. Tapi pentingen akap Jusup pertemanenna ras Jahwe asangken kai pe. Nina man diberu e, ‘Kerina nggo ibereken tuanku man bangku selain kam perban kam ndeharana. Adi bage ja nge banci kulakoken perbahanen si la mehuli, janah erdosa man Dibata?’​—Kejadin 39:8, 9.

20. Kai buktina meriah ukur Jahwe ngidah Jusup?

20 Aminna pe Jusup ndauh arah rumah ras keluargana, ia tetap setia man Dibata, emaka ipasu-pasu Jahwe ia. (Kejadin 41:39-49) Meriah kel ukur Jahwe ngidah kesetian Jusup. (Kuan-kuanen 27:11) Memang mesera nulak perbahanen seks si salah. Tapi ingetlah kata-kata enda, ‘O kam si erkeleng ate man Jahwe, cigalah atendu kejahaten. Sebap ilindungi Jahwe kap kalak si setia man baNa; iselamatkenNa ia i bas kuasa kalak jahat nari.’​—Masmur 97:10.

21. Uga anak muda banci ngusih Jusup? Bereken contohna.

21 Tiap wari, umat Jahwe pang mbuktiken maka  ‘ciga atena si jahat’ janah ‘ngena atena si benar.’ (Amos 5:15) La soal asa kai umurndu, kam banci setia man Jahwe. Contohna, lit sekalak anak muda Kristen si iuji kinitekenna bas sekolah. Iajak sekalak diberu ia erhubungen seks adi isampatina ngerjaken ujian matematika. Kai si ilakoken anak muda e? Iusihna Jusup. Nina, “Minter kutulak ajakenna e. Perban tetap setia, merga denga kuakap bangku.” Kai pe “kesenangen si kentisik” arah perbahanen seks si salah rusur erban kesusahen ras ceda ate. (Heber 11:25) Patuh man Jahwe ngenca si erban meriah ukur seh rasa lalap.​—Kuan-kuanen 10:22.

PEDIAT JAHWE NAMPATI KAM

22, 23. Uga Jahwe nampati kita aminna pe dosata serius?

22 Igunaken Setan perbahanen seks si salah jadi umpan guna nangkap kita, janah enda tuhu-tuhu tantangen si mberat. Mon-mon kerina kita banci saja salah perukurenta. (Roma 7:21-25) Iangkai Jahwe kerna si e janah ingetNa maka “abu kap” kita. (Masmur 103:14) Emaka, uga adi sekalak Kristen ngelakoken dosa si serius eme perbahanen seks si salah? Lanai nge banci isampati? Pasti banci. Adi tuhu-tuhu ia ertobat, isampati Jahwe nge ia. Dibata ‘nggit ngampuni’ kita.​—Masmur 86:5; Jakup 5:16; baca Kuan-kuanen 28:13.

23 Ibereken Jahwe ka kita manusia selaku “pemere,” eme pertua-pertua si perkeleng ras ermediate. (Epesus 4:8, 12; Jakup 5:14, 15) Pertua-pertua e nampati kita mpekena pertemanenta ras Dibata.​—Kuan-kuanen 15:32.

 BELUHLAH KAM RUKUR

24, 25. Kai manpaatna adi beluh kita rukur?

24 Sanga erban keputusen si mehuli, perlu siangkai manpaat undang-undang Jahwe man banta. La ateta bagi dilaki si iceritaken bas Kuan-kuanen 7:6-23. Perban ia “bodoh,” kena umpan ia, dungna ilakokenna perbahanen seks si salah. Kalak si beluh rukur labo terjeng pentar saja. Gelah beluh kita rukur, sipelajari perukuren Dibata janah siusih. Ingetlah kata-kata enda, ‘Ise si beluh rukur, ikelengina kap dirina, janah ise si nginget kai si ipelajarina jumpa kap ia si mehulina.’​—Kuan-kuanen 19:8.

25 Tuhu-tuhu nge kam tek patoken Dibata e benar? Tuhu-tuhu nge kam tek adi ikutkenndu patokenNa e erban kam ermeriah ukur? (Masmur 19:8-11; Jesaya 48:17, 18) Adi ragu denga kam, ingetlah kerina si mehuli si nggo ilakoken Jahwe bandu. ‘Malem kel ate kalak si erlindung man baNa, gejapkenlah uga ulina kel Jahwe.’ (Masmur 34:9) Reh rusurna iukurindu kerna si e, reh kelengna atendu Dibata. Kelengilah kai si ikelengiNa, janah segatlah atendu kai si segat ateNa. Ukurilah kai si mehuli, eme kai pe si benar, kai pe si ngena ate Dibata, kai pe si bersih, kai pe si erban turah ate keleng, ras kai pe si mehamat. (Pilipi 4:8, 9) Banci kita seri ras Jusup si ndatken manpaat arah kepentaren Jahwe.​—Jesaya 64:8.

26. Kai kari sipelajari seterusna?

26 La soal kam lenga erjabu ntah pe nggo erjabu, ate Jahwe meriah min akapndu nggeluh. Dua pelajaren selanjutna kari nampati kita meteh uga carana gelah perjabunta banci ermeriah ukur.