Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 6

Uga Carata Milih Hiburen

Uga Carata Milih Hiburen

‘Lakokenlah kerina guna kemulian Dibata.’​—1 KORINTI 10:31.

1, 2. Engkai arus kita hati-hati milih hiburenta?

BAYANGKEN nandangi ipanndu buah si lit macikna. Kai nge si ilakokenndu? Ipanndu nge buah e ntah iambekkenndu? Ntah ipotongndu si macikna janah ipanndu si mejilena?

2 I bas piga-piga cara, hiburen seri ras buah e. Piga-piga hiburen banci meriah ngidahsa, tapi buen arah hiburen e macik ntah pe la mehuli, perban i je lit perbahanen seks si salah, kekerasen,  ntah pe lit hubungenna ras malekat jahat. Emaka sanga milih hiburen, ate-atendu nge hiburen si ipilihndu? Gelah meriah saja nge akapndu? Ntah la kapndu lit hiburen si mejile? Ntah hati-hati nge kam milihsa gelah banci ipedauhndu si la mehuli janah inenndu si mehuli?

3. Kai si arus siukuri sanga sipilih hiburenta?

3 Kerina kita perlu hiburen, janah sipilih ateta si mehuli. Perlu siukuri, ‘Kai pengaruh hiburen si kupilih man ibadatku man Jahwe?’

LAKOKENLAH KERINA GUNA KEMULIAN DIBATA

4. Kai patoken Pustaka si Badia si banci nampati kita milih hiburenta?

4 Sanga sibereken dirita man Jahwe, erjanji kita ngelayani Ia segedang geluhta. (Baca Pengerana 5:4.) Erjanji ka kita maka kai pe silakoken tujunna guna “kemulian Dibata.” (1 Korinti 10:31) Mereken dirita man Jahwe maksudna labo saja sanga kita i bas perpulungen ntah pe erberita, tapi termasuk sanga kita santai ntah pe sanga lit hiburenta.

5. Ibadat si uga si arus sibereken man Jahwe?

5 Kai pe si ilakoken kita, pasti lit hubungenna ras ibadatta man Jahwe. Ijelasken Paulus kerna si enda sanga nina, “Ipersembahken kena daging kena jadi persembahen si nggeluh, badia, janah ngena ate Dibata.” (Roma 12:1) Nina Jesus ka, “Arus ikelengindu Jahwe Dibatandu alu kerina kegeluhenndu,  pusuhndu, perukurenndu ras gegehndu.” (Markus 12:30) Lalap ateta mereken si mehulina man Jahwe. Jaman bangsa Israel mbarenda, sanga ipersembahken sekalak jelma korban binatang man Jahwe, arus ipastikenna binatang e sehat. Adi persembahen e lit cacatna, la nggit Dibata ngalokenca. (Imamat 22:18-20) Gundari pe bage, ibadatta pe banci la ialoken Jahwe. Engkai?

6, 7. Kai pengaruh hiburenta man ibadatta?

6 Nina Jahwe man banta, “Kena arus badia, sebap Aku pe badia.” (1 Petrus 1:14-16; 2 Petrus 3:11) Ibadatta si badia ngenca si ialoken Jahwe. (Ulangen 15:21) Ibadatta la banci badia adi silakoken kai si segat ate Jahwe, contohna perbahanen seks si salah, kekerasen, ntah pe si lit hubungenna ras malekat jahat. (Roma 6:12-14; 8:13) Adi si e lit i bas hiburenta, e pe banci erban Jahwe la senang. Enda banci erban ibadatta lanai badia janah la ialoken Jahwe, selain si e banci ka ncedai pertemanenta ras Ia.

7 Emaka uga kita milih hiburenta alu pentar? Patoken kai si nampati kita meteh apai hiburen si mehuli ras si la mehuli?

SEGATLAH ATETA SI LA MEHULI

8, 9. Hiburen si uga si arus sipedauh? Engkai?

8 Melala jenis hiburen si lit gundari. Piga-piga cocok man kalak Kristen tapi buen lang. Pertama, mari sipelajari hiburen si uga kin si arus sipedauh.  

 9 Melala film, situs Internet, acara TV, video game, bage pe lagu-lagu si isina perbahanen seks si salah, kekerasen, ntah pe lit hubungenna ras malekat jahat. Kai si la mehuli rusur iban tempa-tempa la salah janah lucu. Tapi kalak Kristen arus hati-hati gelah banci itulakna hiburen si la cocok ras patoken Jahwe si badia. (Perbahanen Rasul-Rasul 15:28, 29; 1 Korinti 6:9, 10) Sanga situlak hiburen si bage, sibuktiken man Jahwe maka segat ateta si la mehuli.​—Masmur 34:15; Roma 12:9.

10. Kai akibatna adi sipilih hiburen si la mehuli?

10 Lit kalak erpengakap maka labo salah hiburen si lit kekerasenna, perbahanen seks si salah, bage pe si lit hubungenna ras malekat jahat. Menurut kalak e la bahaya adi labo pernah ilakokenna. Adi bage perukurenta, kita nggo tertipu. Nina Pustaka, “La lit si deban bali ras pusuh manusia penipuna; mekeleksa guna ipepalem.” (Jeremia 17:9) Adi meriah siakap hiburen si erban Jahwe la senang, la mungkin sikataken segat ateta perbahanen si lit bas hiburen e. Adi reh rusurna sipilih hiburen si bage, dungna lanai siakap salah hiburen e. Pusuh peratenta pe lanai erpungsi alu mehuli janah lanai ipersingetina kita sanga siban pilihen si salah.​—Masmur 119:70; 1 Timotius 4:1, 2.

11. Menurut Galati 6:7, kai si nampati kita milih hiburen?

11 Nina Kata Dibata, “Kai si isuan kalak, e ka nge si iperanina.” (Galati 6:7) Situhuna, adi meriah siakap hiburen si la mehuli, dungna banci pagi tuhu-tuhu  silakoken. Contohna, piga-piga kalak si nggo ipengaruhi hiburen si lit perbahanen seks si salah i je, dungna ilakokenna perbahanen e. Tapi ibereken Jahwe kita penampat adi sipilih ateta hiburen alu pentar.

PAKELAH PATOKEN PUSTAKA ERBAN KEPUTUSEN

12. Kai si banci nampati kita erban keputusen si benar kerna hiburenta?

12 Lit hiburen si nggo jelas kel teridah la ngena ate Jahwe, janah siteh maka arus sipedauh si e. Tapi, uga adi la jelas kel? Labo ibereken Jahwe man banta daptar peraturen kerna kai si banci ras si la banci sitonton, sibegiken, ntah pe sibaca. Tapi ateNa min sipake Pustaka ngelatih pusuh peratenta. (Baca Galati 6:5.) Ibereken Jahwe man banta patokenNa, eme kerna kai si benar, si ngajari kita meteh perukurenNa. Patoken e nampati kita ngelatih pusuh peratenta. Isampatina ka kita meteh “peraten Jahwe” gelah siban keputusen si erban Ia senang.​—Epesus 5:17.

Patoken Pustaka nampati kita milih hiburen

13. (a) Engkai maka keputusen kalak Kristen la seri kerna hiburen? (b) Kai tanggung jawap kerina kalak Kristen?

13 Pilihen sekalak Kristen kerna hiburen rusur la seri ras kalak si deban. Engkai? Perban kerina kita la seri. Bage ka pe, kai si cocok iakap sekalak jelma lenga tentu cocok man kalak si deban. Aminna pe bage, kerina kalak Kristen arus ngikutken patoken Pustaka gelah mehuli keputusenna. (Pilipi 1:9) Si e  nampati kita milih hiburen si ngena ate Dibata.​—Masmur 119:11, 129; 1 Petrus 2:16.

14. (a) Engkai maka penting siukuri carata nggunaken waktu? (b) Nasehat kai si ibereken Paulus man kalak Kristen?

14 Si perlu ka siukuri kerna hiburen eme asa buena sikeriken waktu guna si e. Jenari teridah uga pentingna hiburen e man banta. Selaku kalak Kristen, si pentingna siakap eme ngelayani Jahwe. (Baca Matius 6:33.) Tapi banci kita la sadar nggo melala kel waktu sikeriken man hiburen e. Inasehati Paulus kalak Kristen, nina, “Perdiatekenlah cara kena nggeluh, gelah kena nggeluh selaku  kalak pentar, labo selaku kalak si la pentar. Gunakenlah waktu kena alu mehuli.” (Epesus 5:15, 16) Emaka arus sibatasi waktuta man hiburen, janah terus sipastiken maka ngelayani Dibata jadi si pentingna i bas geluhta.​—Pilipi 1:10.

15. Uga kita ngelindungi dirita arah hiburen si banci ncedai pertemanenta ras Jahwe?

15 Jelas me, arus situlak hiburen si nggo siteh erban Jahwe la senang. Tapi uga kerna hiburen si ragu denga kita? Perlu nge kita hati-hati? Ukuri kerna si enda: Adi erdalan kam i bas sada deleng, nggit nge kam erdalan i tepi embang? Tentu lang. Adi merga akapndu kesahndu, pasti la ideherindu embang e. Enda seri ras pilihenta kerna hiburen. Nina Kata Dibata, ‘Sada langkah pe ola kam nilah i bas dalan si benar nari.’ (Kuan-kuanen 4:25-27) Labo saja sipedauh hiburen si nggo siteh la mehuli, tapi arus ka kita ndauh arah hiburen si nggo siakap la mehuli pengaruhna man banta, janah banci ncedai pertemanenta ras Jahwe.

METEH PERUKUREN JAHWE

16. (a) Kai saja si erban segat ate Jahwe? (b) Uga kita mbuktikenca maka segat ateta si segat ate Jahwe?

16 Nina si nulis Masmur, ‘O kam si erkeleng ate man Jahwe, cigalah atendu kejahaten.’ (Masmur 97:10) Iajari Pustaka kita kerna perukuren ras perasan Jahwe. Contohna, siteh segat ate Jahwe ‘dilah perbual, tan si munuh kalak si la ersalah, ukur si erbahanca sura-sura jahat, nahe si mejingkat ngelakoken  kejahaten.’ (Kuan-kuanen 6:16-19) Selain si e, arus sipedauh ‘perbahanen seks si salah, nembah berhala, kai pe si lit hubungenna ras malekat jahat, cemburu, merawa, rate cian, mabuk, pesta pora, ras kerina si bage rupana.’ (Galati 5:19-21) Kenca siteh si e, ukurilah, ‘Uga carana kuusih perukuren Jahwe? Uga patoken Pustaka enda nampati aku milih hiburen?’ Pasti siikutken ateta patoken Jahwe, sanga kita ras kalak si deban bage pe sanga sisada. (2 Korinti 3:18) Situhuna, pilihenta sanga kita sisada mbuktiken kalak si uga kin kita situhuna.​—Masmur 11:4; 16:8.

17. Ope lenga milih hiburen, kai si arus sisungkun banta?

17 Emaka sanga ipilihndu hiburen, sungkunlah bandu: ‘Kai pengaruh hiburen e man pertemanenku ras Jahwe? Kai pengaruh hiburen e man pusuh peratenku?’ Mari sipelajari patoken si deban si nampati kita milih hiburen.

18, 19. (a) Kai nasehat si ibereken Paulus man kalak Kristen? (b) Patoken kai si nampati kita milih hiburenta?

18 Sanga sipilih hiburenta, kita sangana milih kai si nandangi simasukken ku bas perukurenta. Nina Paulus, “Teruslah ukuri kai pe si benar, kai pe si penting, kai pe si ngena ate Dibata, kai pe si bersih, kai pe si erban turah ate keleng, kai pe si mehamat, kai pe si mehuli, ras kai pe si patut ipuji.” (Pilipi 4:8) Sanga siukuri kai si mehuli, ninta, ‘Ngena min ateNdu rananku ras perukurenku, o Jahwe.’​—Masmur 19:15.

 19 Sungkuni bandu: ‘Kai nge si kuukuri kerna hiburen e? Kenca nonton film ntah pe si debanna, meriah nge ukurku? Dame nge kuakap perban bersih pusuh peratenku? (Epesus 5:5; 1 Timotius 1:5, 19) Bebas nge kuakap ertoto man Jahwe? Ntah, kenca nonton e, lanai nge kuakap meriah? Kekerasen ras perbahanen seks si salah nge si kuukuri kenca si e? (Matius 12:33; Markus 7:20-23) Arah hiburen e, “ipengaruhi doni enda” nge aku?’ (Roma 12:2) Jawapenta si jujur banci nampati kita meteh kai si perlu silakoken gelah tetap rembak ras Jahwe. Bagi si nulisken Masmur min kita ertoto, nina, ‘Jagai min aku maka ola kuayaki si sia-sia.’ *Masmur 119:37.

KEPUTUSENTA MPENGARUHI KALAK

20, 21. Engkai perlu siukuri perasan kalak sanga sipilih hiburenta?

20 Patoken si deban si penting siinget eme: “Kerina banci ilakoken tapi labo kerina erguna. Kerinana banci ilakoken, tapi labo kerinana mpegegehi kita. Tiap kalak arus min ngukuri kepentingen kalak si deban, labo kepentingenna saja.” (1 Korinti 10:23, 24) Perban bebas kita ngelakoken kai pe, labo ertina arus silakoken kerinana. Tapi arus siukuri alu manjar-anjar kai pengaruh keputusenta man turang seninata.

21 Labo seri kerina pusuh peraten kalak. Contohna,  labo dalih akapndu nonton sada acara TV, tapi dungna itehndu la cocok akap turang seninandu acara e. Kai nge si ilakokenndu? Aminna pe lit hakndu nontonsa, banci iputuskenndu gelah la tontonndu. Engkai? Perban la atendu ‘erdosa man turang seninandu’ ntah pe ‘erdosa man Kristus.’ (1 Korinti 8:12) La ateta ngelakoken kai pe si erban ceda ukur temanta sada kiniteken.​—Roma 14:1; 15:1; 1 Korinti 10:32.

22. Uga kita banci masuk akal adi la seri keputusenta ras kalak si deban?

22 Selain si e, uga adi la cocok akap pusuh peratenndu nandangi tontonen, bacan, ntah pe si debanna si iakap kalak la masalah? Perban keleng janah iergaindu turang seninandu, la ipaksandu ia erban keputusen si seri ras kam. Sekalak supir itehna maka supir si deban banci lebih meter ntah pe lebih melet asangken ia, tapi la banci isalahkenna supir si deban perban la seri ras ia. Bage ka pe, aminna pe kam ras turang senina si deban radu ras ngikutken patoken Pustaka, banci saja lit sitik perbedan pendapat kerna hiburen si banci ras si la banci.​—Pengerana 7:16; Pilipi 4:5.

23. Kai si nampati kita milih hiburen alu mehuli?

23 Kai si nampati kita milih hiburen alu mehuli? Sanga sipake pusuh peratenta si nggo ilatih patoken Pustaka, janah tuhu-tuhu siukuri turang seninata, pilihenta pasti mehuli. Janah kita pe ermeriah ukur perban ‘silakoken kerina guna kemulian Dibata.’

^ par. 19 Guna nampati kita milih hiburen, banci ka sipelajari patoken si deban si lit bas Kuan-kuanen 3:31; 13:20; Epesus 5:3, 4; ras Kolose 3:5, 8, 20.