Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 11

Kenca Erjabu

Kenca Erjabu

“Kekelengen e la erkeri-kerin.”​—1 KORINTI 13:8.

1, 2. Adi lit masalah bas perjabun, gagal nge perjabun e? Jelasken.

PERJABUN eme pemere arah Jahwe. E banci erban ukur reh riahna. Tapi tiap perjabun lit nge masalahna. Mon-mon la tempa banci dung-dung masalah e, janah perbulangen ras ndehara pe lanai tempa rembak bagi si tangtangna.

2 Ula min ateta mamang adi i bas perjabunta lit masalah. Sebap adi lit masalah labo ertina perjabunta gagal. Aminna pe lit masalah si serius i bas sada perjabun, lit ka nge jalan keluarna janah perjabun e banci reh paguhna. Uga maka banci bage?

REH REMBAKNA RAS DIBATA BAGE PE TEMAN GELUHTA

3, 4. Kenca nggo ndekah erjabu, kai si banci terjadi?

3 Perjabun erban dua kalak si la seri jadi ersada. Tiap perbulangen ras ndehara la seri kai si ngena atena ras si la atena ngena, sura-surana, bage pe carana ngelakoken sada dahin. Selain si e, perbulangen ras ndehara la seri adat ntah pe kebiasanna. Perlu melala waktu ras usaha gelah pasangen e tuhu-tuhu sitandan janah siangkan.

4 Kenca nggo reh dekahna, perbulangen ras  ndehara banci saja sibuk ngurus keperlunna sendiri, si e banci erban kalak e kurang rembakna. Banci saja kalak e tempa-tempa lanai ersada. Kai si banci nampati kalak e gelah reh rembakna?

Nasehat Pustaka penting gelah perjabun banci ermeriah ukur

5. (a) Kai si banci nampati kalak Kristen gelah reh rembakna ras teman geluhna? (b) Menurut Heber 13:4, uga arusna perukurenta kerna perjabun?

5 Ibereken Jahwe nasehat si seh kel ulina guna nampati kam ras teman geluhndu gelah reh rembakna, bage pe ras Jahwe. (Masmur 25:4; Jesaya 48:17, 18) Nina Jahwe, “Kerina kalak arus ngergai perjabun.” (Heber 13:4) Kai si akapndu penting pasti meherga kel iakapndu. Pasti ijagandu janah la kam nggit nggantikenca ras kai pe. Bage me ate Jahwe perukurenta kerna perjabun.

 NGKELENGI JAHWE NAMPATI PERJABUN

6. Kai si ikataken Matius 19:4-6 kerna perukuren Jahwe nandangi perjabun?

6 Jahwe me si tangtangna erban perjabun. Nina Jesus, AnakNa, “Lenga kin pernah ibaca kena maka tangtangna nari Dibata njadiken manusia selaku dilaki ras diberu? Nina Dibata, ‘Erkiteken si enda me sekalak dilaki nadingken bapakna ras mamakna jenari ersada ia ras ndeharana, janah duana jadi sada daging.’ Emaka kalak e lanai bo dua, tapi sada. Erkiteken si e, kai si nggo ipersada Dibata, la banci isirangken manusia.” (Matius 19:4-6) Tangtangna nari pe iban Jahwe perjabun gelah tahan rasa lalap. Ersura-sura Ia gelah keluarga tetap rembak janah ras-ras ermeriah ukur.

7. Uga perbulangen ras ndehara banci erban perjabunna tetap ersada?

7 Buen masalah si iadapi pasangen si gundari asangken si mbarenda. Mon-mon mberat kel masalah si iadapi kalak e seh maka lanai akapna banci tetap ersada, dungna nyerah kalak e. Tapi adi iangkai perbulangen ras ndehara perukuren Jahwe kerna perjabun, kalak e banci tersampati.​—1 Johanes 5:3.

8, 9. (a) Engkai perlu siikutken nasehat Jahwe kerna perjabun? (b) Uga banci sibuktiken maka merga kel siakap perjabunta?

8 Nasehat si ibereken Jahwe lalap erguna man banta. Bagi si nggo sipelajari ndai, inasehatiNa kita, “Kerina kalak arus ngergai perjabun.” (Heber 13:4; Pengerana 5:4) Adi siikutken nasehat Jahwe aminna pe mesera ngelakokenca, pasti sidatken gunana.​—1 Tesalonika 1:3; Heber 6:10.

 9 Perban merga kel siakap perjabunta, la ateta sicedai alu perbahanen ntah pe rananta. Ateta min gelah reh rembakna kita ras teman geluhta. Uga carana?

ERGAILAH PERJABUNNDU ALU RANAN RAS PERBAHANEN

10, 11. (a) Kai saja masalah si serius si terjadi i bas piga-piga perjabun? (b) Engkai maka penting kel carata ngerana man teman geluhta?

10 Lit erbage-bage cara si banci erban ceda ukur teman geluhta. Siteh maka kalak Kristen la banci mekpeki teman geluhna. Tapi, banci saja siban teman geluhta rate mesui alu rananta. Ranan banci jadi pedang. Nina sekalak diberu, “Ranan perbulangenku erban mesui kel kuakap. Rusur ikatakenna, ‘Kam jadi sinanggel saja janah la erguna!’ Memang labo luka dagingku, tapi rananna ngelukai pusuhku, ceda kel ukurku.” Ikataken sekalak perbulangen maka diberuna la ngergai ia alu rananna janah rusur ibanna sambar gelarna, nina perbulangen e, “Perban serna rananna, lanai terbelaskenku kai si ikatakenna e. E me sebapna lanai aku ngasup ngerana ras ia, janah pangen kuakap ndekah i bas ingan erdahin asangken mulih ku rumah. Tenangen kuakap i je asangken i rumah.” Ranan si meser, si kasar, bage pe si la mehuli banci erban ceda ukur, e me si rusur terjadi gundari.

11 Adi meser ranan perbulangen bage pe ndehara man teman geluhna, e erban pusuh luka janah mesera erbanca malem. Jelas me labo bage ate Jahwe  perbahanen sekalak perbulangen ntah pe ndehara. Tapi banci saja la isadarindu nggo ceda ibanndu ukur teman geluhndu. Enggo mehuli akapndu perbahanenndu man teman geluhndu, tapi bage kin si igejapken teman geluhndu e? Adi lit rananndu si erban ceda ukur teman geluhndu, nggit nge kam mperobahisa?​—Galati 5:15; baca Epesus 4:31.

12. Kai si banci mpengaruhi pertemanenndu ras Jahwe?

12 Carandu ngerana man teman geluhndu, lit pengaruhna man Jahwe. Si e termasuk sanga kam ngerana i lebe-lebe jelma si nterem ntah pe sanga la lit si ngidahsa. (Baca 1 Petrus 3:7.) Inasehati Jakup  1:26 kita, nina, “Adi lit si erpengakap maka ia kalak eragama tapi la ijagana dilahna, itipuna kap dirina janah sia-sia ia eragama.”

13. Kai ka si banci erban teman geluhta rate mesui?

13 Lit ka si arus iukuri perbulangen ras ndehara. Contohna, uga perasan teman geluhndu adi dekahen kam ras kalak si deban? Aminna pe alasenna masuk akal, misalna, dahin erberita ntah pe ndungi masalah kalak, meriah nge akap teman geluhndu? Sekalak ndehara Kristen ngataken, “Adi kuidah perbulangenku buen waktuna janah lebih ermediate man senina si deban i bas runggun, e ncedai pusuhku. La kuakap erguna bangku.”

14. (a) Kai kebenaren si banci sipelajari i bas Kejadin 2:24? (b) Kai si perlu siukuri?

14 Selaku kalak Kristen, lit tanggung jawapta man orang tuata bage pe man turang seninata i bas runggun. Tapi adi nggo erjabu kita, tanggung jawapta si utamana eme man teman geluhta. Nina Jahwe maka perbulangen ‘ersada ras ndeharana.’ (Kejadin 2:24) Penting kel min siakap perasan teman geluhta. Ukurilah: ‘Kubereken nge waktuku man teman geluhku? Kuperdiateken nge ia? Janah kukelengi nge ia bagi si iarapkenna ras bagi si iperlukenna?’

15. Engkai maka kalak Kristen si nggo erjabu la cocok rembak ras kalak si deban si labo teman geluhna?

15 Adi rembaken kita ras kalak si deban asangken teman geluhta, e banci jadi masalah. Banci kita terpusuh janah turah ateta ngena man kalak si deban. (Matius 5:28) Perasan e banci reh bagesna janah  erban kam ngelakoken perbahanen si la ngergai perjabunndu.

PERJABUN LA BANCI IBAN JADI NAJIS

16. Kai perentah si ibereken Pustaka kerna perjabun?

16 Kenca ikataken Pustaka, “Kerina kalak arus ngergai perjabun,” ikatakenna ka maka perjabun e “la banci iban jadi najis, sebap ihakimi Dibata me kalak si ngelakoken perbahanen seks si salah bage pe si erlua-lua.” (Heber 13:4; Kuan-kuanen 5:18) Uga kita banci ngergai perjabunta janah la siban najis?

17. (a) Uga perukuren kalak kerna erlua-lua jaman gundari? (b) Uga arusna perukuren kalak Kristen kerna erlua-lua?

17 Gundari, lit kalak si erpengakap la salah adi selingkuh. Ula sipediat dirita ipengaruhi perukuren e. Jelas kel iban Jahwe maka segat ateNa perbahanen seks si salah bage pe erlua-lua. (Baca Roma 12:9; Heber 10:31; 12:29) Adi erhubungen seks kita ras si labo teman geluhta, siban me perjabunta jadi najis, janah la siergai patoken Jahwe, ras sicedai pertemanenta ras Ia. Emaka, arus sipedauh kai pe si banci erban kita erlua-lua. E termasuk pedauh perukuren si la patut man kalak si deban.​—Jop 31:1.

18. (a) Engkai maka erlua-lua seri ras nembah berhala? (b) Uga perukuren Jahwe kerna erlua-lua?

18 Kalak Israel nggeluh i bas Undang-Undang Musa, janah ikataken i bas Undang-Undang e maka erlua-lua eme dosa si serius, si e seri ras nembah berhala. Duana dosa e ukumenna eme kematen. (Imamat 20:2, 10) Engkai maka erlua-lua seri ras nembah berhala? Adi lit kalak Israel nembah  berhala, lanai itepatina janjina guna setia man Jahwe. Adi ia erlua-lua, lanai itepatina janjina guna setia man teman geluhna. (Keluaren 19:5, 6; Ulangen 5:9; baca Maleaki 2:14.) Jelas me, mbarenda pe erlua-lua ianggap Jahwe dosa si serius kel.

19. Kai si banci nampati kita gelah ula erlua-lua?

19 Uga adi gundari? Aminna pe lanai kita nggeluh i bas Undang-Undang Musa, perukuren Jahwe kerna erlua-lua la berubah. Perban la ateta nembah berhala, arusna labo ka min ateta erlua-lua. (Masmur 51:3, 6; Kolose 3:5) Adi kita erlua-lua, lanai siergai perjabunta bage pe Dibatata Jahwe.​—Nen Penjelasen Tambahen 26.

CARANA ERBAN PERJABUN PAGUH

20. Uga kam banci erban perjabunndu reh paguhna?

20 Uga kam banci erban perjabunndu reh paguhna? Nina Kata Dibata, ‘Jabu ibangun alu kepentaren ras pengertin.’ (Kuan-kuanen 24:3) I bas sada rumah, banci siakap melungun tapi banci ka siakap meriah ras tenang. Rumah e bali ras perjabun. Kalak si pentar ipastikenna perjabunna ermeriah ukur ras tenang.

21. Uga pemeteh banci erban perjabun reh paguhna?

21 Kenca ncakapken kerna rumah, nina Pustaka ka, ‘I ja lit pemeteh, i je lit ruangen-ruangen si dem alu barang-barang si meherga ras mehuli.’ (Kuan-kuanen 24:4) Ertina, erlajar Kata Dibata banci erban perjabunndu reh sikapna. (Roma 12:2; Pilipi 1:9) Sanga kam radu ras teman geluhndu mbaca Pustaka bage pe buku-buku arah Saksi-Saksi Jahwe,  cakapken uga kam banci ngelakokenca. Teruslah kam mehuli janah ermediate man teman geluhndu. Daramilah kesempaten mbuktiken kekelengenndu ras pengerganndu man bana. Pindolah man Jahwe gelah banci ipebelinndu sipat-sipat si erban reh paguhna perjabunndu, janah si erban reh ngenana ate teman geluhndu nandangi kam.​—Kuan-kuanen 15:16, 17; 1 Petrus 1:7.

Pindolah petunjuk Jahwe sanga kam kebaktin jabu

22. Engkai maka arus sikelengi, siergai, janah sihamati teman geluhta?

22 Arus silakoken kai pe si mbuktiken maka keleng ateta teman geluhta, siergai, janah sihamati ia. Alu bage, perjabunta reh riahna janah reh paguhna. Si pentingna, siban Jahwe ermeriah ukur.​—Masmur 147:11; Roma 12:10.