Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 1

Keleng Ate Dibata Tetap Lit Rasa Lalap

Keleng Ate Dibata Tetap Lit Rasa Lalap

“Engkelengi Dibata ertina patuh man perentah-perentahNa. Janah, perentahNa e labo mberat.”​—1 JOHANES 5:3.

1, 2. Engkai maka keleng atendu Dibata Jahwe?

KELENG nge atendu Dibata? Banci saja keleng atendu Ia, emaka isembahndu Ia. Banci saja Ia akapndu Temanndu si rembakna. Tapi ope lenga ikelengindu Ia, nggo leben kam ikelengiNa. Nina Pustaka, “Kita ngkelengi, sebap leben kap Dibata si ngkelengi kita.”​—1 Johanes 4:19.

2 Ukurilah kerna kerina cara Jahwe ngkelengi kita. Enggo iberekenNa doni si seh kel jilena jadi inganta tading, bage pe kerina si iperluken kita gelah meriah siakap nggeluh. (Matius 5:43-48; Ketangkasen 4:11) Iban Jahwe carana gelah banci siteh kerna Ia, alu bage banci kita rembak ras Ia. Sanga sibaca Pustaka si Badia, sibegiken Jahwe. Sanga ertoto kita, ibegikenNa kita. (Masmur 65:3) Itegu-teguNa kita janah ipegegehiNa kita alu kesah si badiaNa. (Lukas 11:13) IsuruhNa ka AnakNa si ikelengiNa ku doni guna mbebasken kita arah dosa ras kematen.​—Baca Johanes 3:16; Roma 5:8.

3. Uga carana gelah tetap kita rembak ras Jahwe?

 3 Ukurilah kerna sekalak temanndu si rembak ras kam, teman si rusur ras kam i bas keadan senang ntah pe susah. Gelah terus bage pertemanenndu, iperluken usaha. Bage ka pe pertemanenta ras Jahwe, Temanta si rembakna. Pertemanenta ras Ia banci tahan rasa lalap. Ikataken Pustaka man banta, “Tetap kena i bas kekelengen Dibata.” (Judas 21) Uga carana? Ijawap Pustaka, “Engkelengi Dibata ertina patuh man perentah-perentahNa. Janah, perentahNa e labo mberat.”​—1 Johanes 5:3.

ERTINA NGKELENGI DIBATA

4, 5. Kai si erbanca tersuruh ukurndu ngkelengi Jahwe?

4 Itulisken rasul Johanes maka perlu sikelengi Dibata. Ingetndu nge tangtangna ikelengindu Jahwe?

Sanga iberekenndu geluhndu man Jahwe janah iperidiken, ibuktikenndu maka keleng atendu Ia janah ipatuhindu Ia seh rasa lalap

5 Cuba ingetndu mulihi, uga perasanndu sanga tangtangna itehndu maka merhat Jahwe kam nggeluh rasa lalap i bas doni si mbaru. Ipelajarindu kerna kerina si nggo ilakokenNa gelah si e terjadi, janah isadarindu uga mehergana kel pemere Jahwe man banta sanga isuruhNa AnakNa ku doni enda. (Matius 20:28; Johanes 8:29; Roma 5:12, 18) Sanga ipelajarindu kerna uga kelengna ate Jahwe man bandu, tersuruh ka ukurndu ngkelengi Ia.​—Baca 1 Johanes 4:9, 10.

6. (a) Kai si arus silakoken i bas ngkelengi kalak? (b) Perban keleng ateta Dibata, kai silakoken?

6 Perasan i bas ngkelengi Dibata e bena-benana denga nge. Contohna, sanga keleng ateta sekalak  jelma, labo bias sikataken “keleng ateku kam.” Adi keleng ateta ia, pasti sisenangken ia. Bage ka pe, adi keleng ateta Jahwe, pasti kita nggeluh bagi si ngena ateNa. Sanga reh kelengna ateta Ia, erjanji kita mereken geluhta man Jahwe janah iperidiken. Alu ngelakoken si e, erjanji kita ngelayani Jahwe seh rasa lalap. (Baca Roma 14:7, 8.) Uga carana gelah tetap sitepati janji e?

“PATUH MAN PERENTAH-PERENTAHNA”

7. (a) Adi keleng ateta Jahwe, kai silakoken? (b) Kai saja perentahNa?

7 Perban keleng ateta Jahwe, ‘sipatuhi perentah-perentahNa.’ Uga carana? Sipelajari Pustaka sebap i je ijelasken kerna uga arusna kita nggeluh bagi si ngena ate Jahwe. Contohna, ikatakenNa man banta maka mabuk, nangko, erbual, ntah erhubungen seks ras si labo teman geluh, e perbahanen si salah. Salah ka adi sisembah kai pe selain Dibata.​—1 Korinti 5:11; 6:18; 10:14; Epesus 4:28; Kolose 3:9.

8, 9. Labo kerina keadan ipebetehken alu jelas i bas Pustaka, jadi uga carana gelah siteh perukuren Jahwe kerna si e? Bereken contohna.

8 Guna erban Jahwe senang, la bias terjeng matuhi perentah-perentahNa saja. La lit ibereken Jahwe daptar peraturen si gedang si risiken kerna kerina keadan geluhta. Emaka mon-mon la lit aturen si jelas i bas Pustaka kerna kai si arus silakoken. Uga kita banci erban keputusen si tepat? (Epesus 5:17) Lit patoken bas Pustaka si jadi dasar kebenaren si  ngajarken kita kerna perukuren Jahwe. Sanga sibaca Pustaka, banci siteh ise kin situhuna Jahwe e, kerna kai si iukuriNa, kai si ngena ateNa, janah kai si segat ateNa.​—Baca Masmur 97:10; Kuan-kuanen 6:16-19; nen Penjelasen Tambahen 1.

9 Contohna: Uga kita erban keputusen kerna kai si banci sitonton i bas TV? Bage pe kerna kai si banci sinen i bas Internet? Labo ijelasken Jahwe kai si arus silakoken. Tapi iberekenNa patoken si nampati kita erban keputusen si benar. Melala kel gundari hiburen si lit kekerasen ras perbahanen seks. I bas Pustaka, ikataken Jahwe maka ‘nembeh kel ateNa kalak si erngena ate man si jahat’ janah “ihakimi Dibata me kalak si ngelakoken perbahanen seks si salah.” (Masmur 11:5; Heber 13:4) Uga patoken e nampati kita erban keputusen si tepat? Adi siteh lit perbahanen si segat ate Jahwe, ntah pe ianggapNa e perbahanen seks si salah, emaka arus sipedauh dirita arah perbahanen e.

10, 11. Engkai maka sipatuhi Jahwe?

10 Engkai maka sipatuhi Jahwe? Gelah ula iukum nge? Ntah gelah la kena masalah perban keputusen si salah? Pasti lang. (Galati 6:7) Tapi sipatuhi Jahwe perban keleng ateta Ia. Bali bagi anak-anak si merhat erban bapakna senang, kita pe merhat erban Bapakta i surga senang. La lit si terulin asangken meteh maka ngena ate Jahwe kita!​—Masmur 5:13; Kuan-kuanen 12:2; nen Penjelasen Tambahen 2.

11 Sipatuhi Jahwe aminna pe mesera janah labo  perban terpaksa. Labo sipilih-pilihi peraturenNa ntah pe patokenNa si man ikutenta ntah pe si la man ikuten. (Ulangen 12:32) Tapi tuhu-tuhu sipatuhi Ia, bali bagi si ikataken pemasmur, “I bas ngikutken perentahNdu, jumpa aku kemalemen ate, keleng pe ateku pedahNdu e.” (Masmur 119:47; Roma 6:17) Siusih min ateta Nuah. Ikataken Pustaka maka “ilakoken Nuah kerina.” (Kejadin 6:22) Ikelengina Jahwe alu ngelakoken kerina perentahNa. Merhat nge kam ikataken Jahwe bage kerna kam?

12. Uga carata erban Jahwe senang?

12 Uga perasan Jahwe sanga sipatuhi Ia? Meriah ukurNa. (Kuan-kuanen 11:20; 27:11) Ukurilah: Sanga sipatuhi Ia Si Nciptaken kerina si lit, meriah kel ukurNa. Tapi labo pernah ipaksaNa kita ngelakokensa. IbereNa kita kebebasen. E maksudna bebas kita milih guna ngelakoken kai si benar ras si salah. Ate Jahwe gelah kekelengenta man baNa ngiahken kita erban keputusen si tepat, alu bage banci sikap geluhta.​—Ulangen 30:15, 16, 19, 20; nen Penjelasen Tambahen 3.

“PERENTAHNA E LABO MBERAT”

13, 14. Engkai maka perentah Dibata labo meserasa matuhisa? Ban contohna.

13 Uga adi meserasa siakap matuhi perentah-perentah Jahwe ntah e erbanca lanai siakap bebas? Nina Pustaka alu jelas, “PerentahNa e labo mberat.” (1 Johanes 5:3) I bas bahasa Junani, kata “mberat” ertina “meserasa.” I bas ayat si deban,  kata enda ipake guna ngataken peraturen si la masuk akal, ntah pe kerna kalak si nggit ngatur janah erban kalak sakit hati. (Matius 23:4; Perbahanen Rasul-Rasul 20:29, 30) Emaka, perentah-perentah Jahwe e labo mberati perban labo meserasa matuhisa. Dibata lalap masuk akal i bas mereken perentah.

14 Contohna, bayangken isampatindu sekalak temanndu si pindah ku rumah si mbaru. Enggo isusunna kerina barangna e ku kardus-kardus. Lit si menahang janah menukah mabasa, tapi lit ka si mberat janah arus dua kalak si mabasa. Ipindoken temanndu nge kam maba barang si mberat e? Pasti lang! Engkai? Perban la atena kam cilaka. Bali bagi teman e, la pernah ipindo Jahwe kai pe si meserasa. (Ulangen 30:11-14) Iangkai Jahwe nge ise kita. ‘IetehNa i bas kai nari kita iciptakenNa, ingetNa maka abu kap kita.’​—Masmur 103:14.

15. Engkai kita tek perentah Jahwe e guna kepentingenta?

15 Ikataken Musa man bangsa Israel maka perentah Jahwe e ‘erbanca mehuli’ janah adi patuh kalak e, kalak e tetap nggeluh. (Ulangen 5:28-33; 6:24) Bage ka nge gundari. Kai pe si ipindo Jahwe man banta gelah kegeluhenta reh ulina. (Baca Jesaya 48:17.) Bapakta Jahwe lalap itehNa kai si mehulina man banta. (Roma 11:33) Nina Pustaka, “Dibata kekelengen kap.” (1 Johanes 4:8) Enda ertina kerina si ikataken ras si ilakoken Jahwe perban keleng ateNa.

16. Aminna pe kita la sempurna ras nggeluh i bas doni si jahat, kai si banci nampati kita tetap patuh?

 16 Labo lalap menukah siakap matuhi Dibata. Kita nggeluh i doni si jahat si ikuasai Setan. Terus icubakenna mpengaruhi kalak ngelakoken si salah. (1 Johanes 5:19) Si e kerina banci erban kita la patuh man Dibata, emaka arus ka kita erjuang ngelawan perukurenta ras perasanta si la sempurna. (Roma 7:21-25) Tapi kekelengenta man Jahwe mere gegeh banta guna ngelakoken si benar. IdahNa usahata guna matuhi Ia, janah ibereNa kesah si badiaNa guna nampati kita. (1 Samuel 15:22, 23; Perbahanen Rasul-Rasul 5:32) Kesah si badia nampati kita gelah reh jilena sipat-sipatta, alu bage reh nukahna siakap matuhi Ia.​—Galati 5:22, 23.

17, 18. (a) Kai kari sipelajari bas buku enda? (b) Kai kari sipelajari i bas pelajaren seterusna?

17 I bas buku enda sipelajari kari uga carata nggeluh si erban Jahwe senang. Sipelajari ka uga carana ngelakoken patokenNa ras mpedauh lagu langkah si la mehuli. Ingetlah maka labo pernah ipaksa Jahwe kita matuhi Ia. Si pentingna eme sipatuhi Ia, e mbuktiken asa bagesna kekelengenta man Dibata.​—Nen Penjelasen Tambahen 4.

18 Gelah siteh apai si benar ras si salah, ibereken Jahwe man banta sekalak-sekalak pusuh peraten si mehuli. Adi terlatih pusuh peraten e, e banci nampati kita “patuh man perentah-perentahNa.” I bas pelajaren seterusna sipelajari kari terbuen kerna pusuh peraten.