Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 14

Jujurlah i bas Kai pe

Jujurlah i bas Kai pe

“Ersura-sura kami gelah jujur i bas kai pe.”​—HEBER 13:18.

1, 2. Uga perasan Jahwe sanga idahNa erusaha kel kita jujur?

SANGA pulang sekolah, lit sekalak anak dilaki datna sada dompet si isina melala sen. Kai si ilakokenna? Situhuna banci nge man bana dompet e. Tapi iulihkenna man si mpunasa. Sanga iteh mamakna kerna si e, megah kel akapna.

2 Teremen orang tua ermeriah ukur sanga anakna jujur. Bapakta si i surga, eme Jahwe “Dibata si Setia,” pasti meriah ukurNa adi kita jujur. (Masmur 31:6) Meriah min siban ukurNa janah ‘jujur kita i bas kai pe.’ (Heber 13:18) Mari sipelajari uga kita banci jujur i bas empat bagin geluhta aminna pe mesera, bage pe manpaatna.

JUJURLAH MAN DIRITA

3-5. (a) Uga kita banci jujur man dirita? (b) Kai si banci erban kita jujur man dirita?

3 Adi jujur ateta man kalak si deban, arus jujur lebe kita man dirita. Ngelakoken si e labo lalap menukah. I bas abad pertama, turang senina i runggun Laodikea ibualina bana, iakapna isenangkenna Dibata padahal situhuna labo. (Ketangkasen 3:17) Kita pe banci ka bage.

 4 Nina Jakup, “Adi lit si erpengakap maka ia kalak eragama tapi la ijagana dilahna, itipuna kap dirina janah sia-sia ia eragama.” (Jakup 1:26) Banci saja erkiteken terus silakoken si mehuli, la siakap ipermasalahken Dibata aminna pe kita kasar, nggit mandangi ntah pe erbual. Adi bage perukurenta, sibuali kap banta. Uga carana gelah ula bage?

5 Adi kita erkaca, banci siidah uga penampilenta arah darat. Tapi adi sibaca Pustaka si Badia, banci siteh uga kin kita situhuna. Pustaka banci nampati kita meteh kelebihen ras kekurangenta. Alu bage banci siubah carata rukur, carata ngerana, bage pe perbahanenta. (Baca Jakup 1:23-25.) Tapi adi la siakap lit kurangta, la banci siubah dirita. Emaka perlu sipake Pustaka guna mereksa dirita alu jujur. (Perngandungen 3:40; Hagai 1:5) Selain si e, i bas toto sipindo man Jahwe gelah isampatiNa kita mereksa dirita janah gelah isampatiNa kita meteh kekurangenta, alu bage banci kita robah. (Masmur 139:23, 24) Siinget maka ‘Jahwe ernembeh ate man kalak jahat, tapi ibanNa bujur man kalak si ndalanken si ngena ateNa.’​—Kuan-kuanen 3:32.

JUJURLAH I BAS KELUARGA

6. Uga perbulangen ras ndehara banci jujur?

6 Penting kel jujur i bas keluarga. Adi perbulangen ras ndehara ngerana alu terus terang, kalak e banci tek sada ras si debanna janah tenang iakap  kalak e. Lit melala situasi si erban kalak la jujur i bas perjabun. Contohna, kalak si nggo erjabu banci saja igodana kalak si deban, ntah itontonna pornograpi, ntah mulai atena ngena kalak si deban i bas pusuhna. Nina si nulis Masmur, ‘Aku la nggit erteman ras kalak penipu, ras kalak munapik la aku nggit rembak.’ (Masmur 26:4) Adi la kita jujur man teman geluhta, aminna pe i bas pusuhta, e banci ncedai perjabunta.

Mislah tulak kai pe si erban ceda perjabun

7, 8. Uga kita make Pustaka sanga ngajari anak-anakta kerna pentingna jujur?

7 Anak-anak pe perlu itehna penting kel jujur. Banci ipake orang tua Pustaka guna ngajari  kalak e. I je lit contoh-contoh si la mehuli kerna kalak si la jujur. Contohna: Akan eme sekalak pinangko. Gehasi, erbual ia gelah dat sen. Judas, itangkona sen janah dungna ihianatina Jesus gara-gara sen 30 logam pirak.​—Josua 6:17-19; 7:11-25; 2 Raja-Raja 5:14-16, 20-27; Matius 26:14, 15; Johanes 12:6.

8 I bas Pustaka pe lit melala contoh si mehuli kerna kalak si jujur. Contohna: Jakup, isuruhna anakna ngulihken sen si idat kalak e. Jepta ras anakna, nepati janjina man Dibata, janah Jesus tetap jujur aminna pe bas situasi si mesera. (Kejadin 43:12; Hakim-Hakim 11:30-40, Terjemahan Dunia Baru [NW]; Johanes 18:3-11) Contoh-contoh e banci nampati anak-anakta ngergai pentingna jujur.

9. Kai gunana man anak-anak adi orang tuana jujur?

9 Banci ipelajari orang tua patoken Pustaka si penting enda, “Kalak si deban iajari kena, tapi ngkai la iajari kena diri kena? Ikataken kena man kalak, ‘Ula nangko,’ tapi ngkai kena nangko?” (Roma 2:21) Bicara lit orang tua si perbahanenna la cocok ras si iajarkenna, banci idah anakna kerna si e. Contohna, isuruh orang tua anakna jujur, tapi orang tuana e erbual. Anakna banci jadi bingung. Aminna pe orang tua e erbual i bas perkara si kitik, anakna e banci jadi perbual. (Baca Lukas 16:10.) Tapi, adi idah anak-anak orang tuana jujur, anak-anak jadi tek man orang tuana janah  kalak e pe jujur ka pagi man anak-anakna.​—Kuan-kuanen 22:6; Epesus 6:4.

JUJUR I BAS RUNGGUN

10. Kai maksudna jujur sanga ngerana man teman sada kiniteken?

10 Kita pe arus jujur man teman sada kinitekenta. Tiap wari, menukah kel rananta jadi cikurak ntah pe sipitnah kalak. Adi siceritaken ka kerna kai si lenga siteh uga situhuna, banci dungna siceritaken kai si la tuhu. Emaka, ndauh ulin adi sijaga rananta. (Kuan-kuanen 10:19) Jadi kalak jujur labo maksudna sikataken kerina si lit bas ukurta, kai si nggo siteh, bage pe kai si nggo sibegi. Aminna pe tuhu si nandangi siceritaken e, tapi banci saja e la urusenta, ntah pe la cocok janah la mehuli iceritaken man kalak. (1 Tesalonika 4:11) Kalak si meser rananna banci saja benar kapna bana alu ngataken, “Tuhu kap si kukataken e.” Tapi selaku umat Jahwe, mehuli min ateta lalap rananta janah erban kalak senang.​—Baca Kolose 4:6.

11, 12. (a) Kai akibatna adi sibuniken kesalahenta si serius? (b) Penungkunen kai si perlu siukuri adi ilakoken temanta kesalahen si serius? (c) I bas kai kita arus jujur man organisasi Jahwe?

11 Enggo ibereken Jahwe tanggung jawap man pertua guna nampati runggun. Menukah iakap pertua nampati kita adi jujur kita man kalak e. Engkai? Adi sakit kita janah ertambar ku dokter, sibuniken nge penakitta? Adi sibuniken, uga ia banci nambari kita? Bage ka pe, adi lit  kesalahenta si serius, ula sibuniken. Tapi sidahilah pertua janah sikatakenlah alu jujur. (Masmur 12:3; Perbahanen Rasul-Rasul 5:1-11) Bicara itehndu lit temanndu ngelakoken kesalahen serius, kai si ilakokenndu? (Imamat 5:1) Ukurilah: ‘Adi tuhu-tuhu kin aku temanna, kurahasiaken nge salahna e? Ntah kuinget nge maka pertua banci nampati ia mpehuli pertemanenna ras Jahwe?’​—Heber 13:17; Jakup 5:14, 15.

12 Kita pe arus jujur man organisasi Jahwe sanga siisi laporen, contohna laporen erberita. Jujur ka kita sanga siisi formulir perintis ntah pe formulir pelayanen si debanna.​—Baca Kuan-kuanen 6:16-19.

13. Kai si arus silakoken gelah jujur sanga erbisnis ras teman sada kiniteken?

13 Kalak Kristen arus ipisahkenna urusen bisnis ras ibadat. Contohna, la kita erbisnis i bas Bale Kerajan ntah pe sanga erberita. Janah la simanpaatken teman sada kinitekenta i bas urusen bisnis. Adi lit temanta sada kiniteken erdahin ras kita, sigalarilah gajina bagi si nggo ijanjiken janah berekenlah tepat waktu, janah sibereken keperlun sierdahinta bagi peraturen pemerentah. Contohna, asuransi ntah pe cuti. (1 Timotius 5:18; Jakup 5:1-4) Adi bosta e teman sada kinitekenta, ula siarapken ulin ia man banta asangken si deban. (Epesus 6:5-8) Adi nggo ersada arihta kerna waktu ras gajina, silakokenlah bage.​—2 Tesalonika 3:10.

14. Selaku kalak Kristen, kai si arus ilakoken ope lenga erbisnis ras temanta sada kiniteken?

 14 Uga adi erbisnis kita ras teman sada kinitekenta? Contohna bisnis si mereken modal ntah pe minjamken sen. I bas situasi si bage lit patoken Pustaka si erguna kel: Banlah surat perjanjin! Sanga itukur nabi Jeremia taneh, ibanna dua surat perjanjin janah sada arah surat e itandatangani saksi-saksi. Duana surat e isimpan jadi jaminen. (Jeremia 32:9-12; nen ka Kejadin 23:16-20.) Lit si erpengakap adi iban surat perjanjin, tempa-tempa la kita tek man temanta sada kiniteken. Tapi situhuna, surat perjanjin e banci mpedauh masalah, kecewa, bage pe perubaten. I bas urusen bisnis pe, ingetlah pentingen perdamen i bas runggun asangken perjanjin bisnis si apai pe.​—1 Korinti 6:1-8; nen Penjelasen Tambahen 30.

JUJUR I BAS DONI ENDA

15. Uga perasan Jahwe nandangi bisnis si la jujur?

15 Kita arus jujur man kerina kalak, termasuk si la Saksi Jahwe. Penting kel iakap Jahwe kejujuren. ‘Nembeh ate Jahwe ngenen kalak si make sukat-sukat si la bujur, tapi meriah akapNa adi ipake timbangen si bujur.’ (Kuan-kuanen 11:1; 20:10, 23) Mbarenda, timbangen rusur ipake sanga erbinaga. Tapi piga-piga perbinaga itokohina kalak si nukur alu mereken kurang asa si arusna, ntah pe itambahina ergana. Gundari pe bage denga ka, nggo biasa kalak la jujur i bas erbisnis.  Mbarenda segat ate Jahwe kalak si la jujur, gundari pe bage.

16, 17. Kai kebiasan si la jujur si arus sipedauh?

16 Kerina kita pasti ngadapi situasi si nguji kejujurenta, contohna, sanga ngelamar dahin, ngisi dokumen pemerentah, ntah pe sanga ujian i bas sekolah. Enterem kalak erpengakap labo salah adi erbual, nambah-nambahi, ntah pe mereken jawapen si erban salah sangka. Si e labo ateta mamang sebap nggo ikataken Pustaka maka i bas wari-wari pendungi, manusia jadi ‘ngkelengi dirina saja, mata duiten, janah la atena ngena si mehuli.’​—2 Timotius 3:1-5.

17 Mon-mon, kalak si la jujur teridah sukses. (Masmur 73:1-8) Perban jujur, sekalak Kristen banci saja lanai erdahin, itokohi, ntah pe la mehuli perbahanen kalak i bas inganna erdahin. Tapi pentingen kejujuren asangken si e kerina. Engkai?

PASU-PASUNA ADI JUJUR

18. Engkai penting kel jujur?

18 Gundari jarang kel kalak banci terteki ras jujur. Padahal sipat si bage meherga kel janah situhuna kerina kita banci jujur. (Miha 7:2) Memang lit kalak si mandangi kita adi kita jujur janah motu akapna kita. Tapi lit ka si ngergai kejujurenta janah tek ia man banta. I sebelang doni, Saksi-Saksi Jahwe itandai perban kalak e jujur, emaka piga-piga kalak meriah akapna adi sierdahinna Saksi Jahwe. Adi lit kalak si ipecat perban la jujur,  biasana Saksi Jahwe la ikut ipecat sebap kalak e jujur.

Banci simuliaken Jahwe alu kerja kerasta

19. Kai manpaatna adi kita jujur?

19 Adi jujur kita i bas kai pe, pusuh peratenta bersih janah dame pusuhta. Perasanta banci seri ras Paulus si ngataken, “Tek kami maka jujur kap pusuh peraten kami.” (Heber 13:18) Si pentingna, Bapakta Jahwe, iperdiatekenNa janah iergaiNa usahata guna jujur i bas kai pe.​—Baca Masmur 15:1, 2; Kuan-kuanen 22:1.