Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 15

Carana Gelah Meriah Erdahin

Carana Gelah Meriah Erdahin

“Kita kerina banci . . . ermeriah-meriah ngenanami kerina ulih latihta.”​—PENGERANA 3:13.

1-3. (a) Uga perasan nterem kalak kerna dahinna? (b) Penungkunen kai kari sipelajari?

I SEBELANG doni, nterem kalak kerja keras cari makan man dirina ras keluargana. Enterem kalak la kapna meriah dahinna, janah kisat kel ia lawes erdahin tiap wari. Adi bage perasanta, kai si banci silakoken gelah meriah siakap ndahiken dahinta?  

2 Nina Jahwe, “Kita kerina banci man dingen minem janah ermeriah-meriah ngenanami kerina ulih latihta. Kerina e pemere Dibata kap.” (Pengerana 3:13) Iciptaken Jahwe kita gelah merhat erdahin janah perlu siakap erdahin. AteNa min gelah meriah siakap erdahin.​—Baca Pengerana 2:24; 5:18.

3 Jadi, kai si banci erban meriah siakap erdahin? Pendahin si uga si la banci idahiken kalak Kristen? Uga carana gelah la sitadingken ibadatta man Jahwe erkiteken dahinta? Janah, kai si pentingna si arus silakoken?

 DUA SIERDAHIN SI MEHULINA

4, 5. Uga nge perasan Jahwe kerna erdahin? Jelasken.

4 Meriah kel akap Jahwe erdahin. I bas Kejadin 1:1 ikataken, “Mula-mulana ijadiken Dibata langit ras doni.” Kenca dung iciptaken Jahwe doni ras kerina isina, ikatakenNa maka kerina si iciptakenNa e “tuhu-tuhu mehuli.” (Kejadin 1:31) Puas kel akap Jahwe ngidah kai si nggo iciptakenNa.​—1 Timotius 1:11.

5 Jahwe la pernah ngadi erdahin. Nina Jesus, “Bapakku terus erdahin ngayak gundari.” (Johanes 5:17) Kerina dahin Jahwe luar biasa kel. Memang labo kerina banci siteh, tapi lit si banci siteh. Misalna, ipilihNa kalak si merentah pagi ras AnakNa Jesus Kristus i bas KerajanNa. (2 Korinti 5:17) Jahwe pe mperdiateken ras ngelindungi manusia alu ngaturken pendahin erberita i sebelang doni, si erban jutan kalak nandai Ia janah erpengarapen nggeluh si rasa lalap i bas doni pardis.​—Johanes 6:44; Roma 6:23.

6, 7. Uga Jesus erdahin?

6 Bali bagi Bapakna, meriah akap Jesus erdahin. Ope lenga reh ku doni, Jesus kap sierdahin Dibata, beluh kel ia erdahin, janah ikut ia nciptaken kerina si lit i surga bage pe i doni. (Kuan-kuanen 8:22-31; Kolose 1:15-17) Sanga i doni, Jesus terus erdahin. Selaku anak muda, tutus atena erlajar jadi tukang kayu, contohna erban perabot ras rumah. Beluh kel Jesus i bas dahinna emaka itandai kalak ia “tukang kayu.”​—Markus 6:3.

 7 Tapi, dahin si pentingna akap Jesus eme meritaken berita si meriah ras ngajar kalak kerna Jahwe. Telu setengah tahun dekahna Jesus ndungi pelayanenna, janah tutus kel atena erdahin mulai kin pagi-pagi si lampas nari seh ku tengah berngi. (Lukas 21:37, 38; Johanes 3:2) Erdalan Jesus ratusen kilometer i bas dalan si rabu-abu. Iberitakenna berita si meriah man nterem jelma.​—Lukas 8:1.

8, 9. Engkai meriah akap Jesus erdahin?

8 Menurut Jesus, erdahin man Dibata bali bagi pangan. Dahin e mereken semangat ras gegeh. Pernah tutus kel ate Jesus erdahin, dungna lanai ia sempat man. (Johanes 4:31-38) Igunakenna kerina kesempaten ngajari kalak kerna Bapakna. E me sebapna nina man Jahwe, “Enggo kumuliaken Kam i doni enda, alu ndungi dahin si iberekenNdu man bangku.”​—Johanes 17:4.

9 Jelas me, Jahwe bage pe Jesus tutus kel ate kalak e erdahin. Meriah janah puas kel akap kalak e kerna dahinna. ‘Jadi kalak si ngusih Dibata’ min kita janah ‘siikutken dalan-dalan Jesus alu megermet.’ (Epesus 5:1; 1 Petrus 2:21) Emaka tutuslah ateta erdahin janah silakoken si mehulina.

UGA ARUSNA PERUKURENTA KERNA DAHINTA?

10, 11. Kai si nampati kita gelah mejile carata rukur kerna dahinta?

10 Selaku umat Jahwe, tutus ateta erdahin guna keperlunta bage pe keluargata. Meriah min ateta erdahin, tapi adi la siakap meriah, kai si arus silakoken?

Mejile min perukurenta kerna dahinta, gelah reh riahna siakap erdahin

 11 Mejile min carandu rukur. Mungkin la banci siubah i ja inganta erdahin ntah asa buena waktuta erdahin, tapi banci siubah carata rukur. Adi siteh kai si iarapken Jahwe, e banci nampati kita. Contohna: Iarapken Jahwe kepala keluarga mereken si mehulina guna keperlun keluargana. Nina Pustaka si Badia, ise pe si la mereken keperlun keluargana “jahaten asangken kalak si la erkiniteken.” (1 Timotius 5:8) Adi kam kepala keluarga, pasti kerja keras kam ncukupi keperlun keluargandu. La soal meriah ntah lang akapndu dahinndu, ingetlah adi icukupindu keperlun keluargandu, ibanndu kap Jahwe senang.

12. Kai gunana adi tutus ras jujur?

12 Tutus ras jujur. Sipat e banci erban reh riahna siakap erdahin. (Kuan-kuanen 12:24; 22:29) Kalak si jujur eme kalak si la nangko sen, barang, ntah pe waktu. Adi kita jujur, bosta pe tek man banta janah iergaina kita. (Epesus 4:28) Si pentingna, iteh Jahwe adi kam tutus erdahin ras jujur, ‘pusuh peratenndu’ pe jujur perban isenangkenndu Dibata si ikelengindu.​—Heber 13:18; Kolose 3:22-24.

13. Kai ka gunana adi kita jadi usihen?

13 Ingetlah maka arah pendahinndu banci ipuji kalak Jahwe. Enda alasen si deban ngkai maka meriah siakap erdahin. (Titus 2:9, 10) Banci saja lit temanndu sada dahin nggit erlajar Pustaka perban usihenndu si mehuli.​—Baca Kuan-kuanen 27:11; 1 Petrus 2:12.

 DAHIN SI UGA NGE SI BANCI SIPILIH?

14-16. Kai si perlu siukuri sanga milih sada dahin?

14 Labo lit bas Pustaka daptar dahin si banci ras si la banci idahiken kalak Kristen. Tapi lit patoken si nampati kita erban keputusen si tepat kerna dahin. (Kuan-kuanen 2:6) Alu nggunaken patoken Pustaka, banci siukuri penungkunen enda.

Daramilah dahin si cocok ras patoken Jahwe

15 Salah nge dahin si kulakoken e menurut Jahwe? Nggo siteh kai si segat ate Jahwe, contohna  nangko ras erbual. (Keluaren 20:4; Perbahanen Rasul-Rasul 15:29; Epesus 4:28; Ketangkasen 21:8) Emaka perlu kita hati-hati gelah ula sidahiken dahin si la cocok ras patoken Jahwe.​—Baca 1 Johanes 5:3.

16 Ndukung perbahanen si salah nge iakap Jahwe dahin enda? Contohna, uga adi isuruh kam erdahin jadi tukang bersih-bersih bas ingan nggugurken anak? Memang labo salah dahin bersih-bersih, tapi itehndu perukuren Jahwe kerna nggugurken anak. Aminna pe la kam ikut nampati nggugurkenca, uga perasan Jahwe adi erdahin kam i bas ingan si bage?​—Keluaren 21:22-24.

17. Kai si nampati kita erban keputusen si erban Dibata senang?

17 Alu ngukuri patoken Dibata, kita banci jadi kalak si mehuli bagi si itulis i bas Heber 5:14, “si kengasupen rukurna rusur ipakena, alu bage terlatih ia i bas mbedaken kai si benar ras kai si salah.” Sungkuni bandu, ‘Adi kualoken dahin enda, cocok nge akap kalak? Perban dahin enda, arus nge aku lawes ku ingan si deban janah kutadingken teman geluhku ras anak-anakku? Kai pengaruhna man keluargaku?’

“BANCI IPASTIKEN KENA KAI SI LEBIH PENTING”

18. Engkai banci saja mesera siakap mpelebe ibadatta?

18 Gundari “masa si sulit si dem kiniseran,” emaka banci mesera siakap mpelebe ibadatta man Jahwe. (2 Timotius 3:1) Ndarami dahin bage pe gelah banci terus erdahin, tuhu-tuhu mesera. Siteh  maka arus sibereken keperlun keluargata tapi arus ka sipelebe ibadatta. La banci siakap pentingen sen i bas geluhta. (1 Timotius 6:9, 10) Emaka, uga cara ‘mastiken kai si lebih penting’ janah sibereken ka keperlun keluargata?​—Pilipi 1:10.

19. Engkai kita perlu tek man Jahwe?

19 Teklah man Jahwe. (Baca Kuan-kuanen 3:5, 6.) Nina Pustaka, “Ula min kena mata duiten janah puaslah kena nandangi kai si lit, sebap nggo ikataken Dibata, ‘Labo ndigan pe kam Kutadingken janah labo ndigan pe kam Kupediat.’” (Heber 13:5) Siteh maka iangkai Jahwe keperlunta janah tuhu-tuhu iperdiatekenNa kita. (Masmur 37:25; 1 Petrus 5:7) Ate Jahwe ula min kita terus kuatir kerna ncukupi keperlun keluargata. Lalap nge ibuktikenNa maka iberekenNa keperlun umatNa. (Matius 6:25-32) La soal uga situasi dahinta, tetap min sipelajari Kata Dibata, erberita, janah reh ku perpulungen Kristen.​—Matius 24:14; Heber 10:24, 25.

20. Uga kita banci mpelebe ibadatta man Jahwe?

20 Jagalah matata. (Baca Matius 6:22, 23.) Ertina sijaga geluhta tetap sederhana gelah banci sipelebe ibadatta man Jahwe. Pasti labo siakap cocok adi siban sen, pergeluh si ntabeh, ntah pe alat elektronik jadi si pentingna asangken pertemanenta ras Dibata. Jadi, uga carana gelah sipelebe si pentingna? Siusahaken gelah ula kita rutang. Adi lit utangta, usahakenlah ngurakisa ntah pe silunasi. Adi la kita hati-hati, banci melala keri waktuta  ras gegehta perban ngurusi ertata, dungna lanai lit waktuta ertoto, erlajar Pustaka, ntah pe erberita. Pasti la ateta sibuksa ngurusi erta. Emaka puaslah siakap adi lit “pangan ras pakenta.” (1 Timotius 6:8) Uga pe situasita, rusurlah siperiksa keadanta guna meteh carana ngelakoken terbuen i bas ngelayani Jahwe.

21. Engkai perlu sitentuken kai si pentingna bas geluhta?

21 Pelebelah si pentingna. Arus kita beluh nggunaken waktu, gegeh, bage pe ertata. Adi la kita hati-hati,  banci keri waktuta man si kurang penting, bagi sekolah si meganjang ntah pe la erngadi-ngadi ndarami sen. Nina Jesus, “Teruslah pelebe Kerajan.” (Matius 6:33) Pilihenta, kebiasanta, dahinta tiap wari, bage pe tujunta mbuktiken kai si pentingna i bas pusuhta.

DAHIN SI PENTINGNA SI BANCI SILAKOKEN

22, 23. (a) Selaku kalak Kristen, kai dahinta si pentingna? (b) Kai si nampati kita gelah meriah siakap erdahin?

22 Dahin si pentingna siakap eme ngelayani Jahwe ras mberitaken berita si meriah. (Matius 24:14; 28:19, 20) Bali bagi Jesus, asa bancita silakoken ateta dahin e. Piga-piga kalak lawes ku ingan si merluken perberita. Lit ka si mpelajari bahasa si deban gelah banci ia erberita man kalak si make bahasa e. Ercakap-cakaplah kam ras kalak si pernah ngelakoken si e janah sungkuni kalak e. Iceritakenna kari bandu kegeluhenna si reh riahna ras erguna.​—Baca Kuan-kuanen 10:22.

Ngelayani Jahwe kap dahin si pentingna

23 Gundari, teremen kita kerja keras kel erdahin i bas ncukupi keperlun keluargata tiap wari. Iteh Jahwe nge kerna si e, janah iergaiNa kerina si ilakoken kita i bas mereken keperlun keluargata. Emaka teruslah siusih Jahwe bage pe Jesus alu tutus ateta erdahin, la soal kai pe dahinta. Siingetlah dahinta si pentingna, eme ngelayani Jahwe janah mberitaken berita si meriah kerna Kerajan Dibata. Pasti meriah ukurta ngelakoken e.