Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 9

Mbelin-Mbelin i Nasaret

Mbelin-Mbelin i Nasaret

MATIUS 13:55, 56 MARKUS 6:3

  • REH TEREMNA ANAK-ANAK JUSUP RAS MARIA

  • JESUS ERLAJAR JADI TUKANG KAYU

Jesus ipebelin i Nasaret, kota si kitik janah la penting. Kota e letakna i sebelah utara Judea, i uruk daerah Galilea, sebelah barat danau si mbelang si igelari Lawit Galilea.

Sanga umur Jesus kira-kira dua tahun, ia ibaba Jusup ras Maria ku jenda arah Mesir nari. Paksa si e, Jesus denga ngenca anak kalak e, dungna lahir me adek-adek tiri Jesus, eme Jakup, Jusup, Simon, ras Judas. Lit ka anak-anak Jusup ras Maria si diberu, si jadi turang Jesus. Emaka silanglangna lit enem adek tiri Jesus..

Pastilah lit ka kade-kade Jesus si deban. Enggo siteh kerna Elisabet ras anakna Johanes, si tading piga-piga kilometer arah selatan i Judea. Si deheren ku Galilea eme bibi Jesus si gelarna Salome, senina Maria. Dilaki Salome eme Sebedeus. Lit dua anak kalak e, eme Jakup ras Johanes, kalak enda senina sipemeren ras Jesus. La siteh asa dekahna kalak enda radu ras main-main sanga anak-anak denga, tapi si pasti i bas pudi wari kalak e kompak ras Jesus janah jadi rasulna.

Jusup arus kerja keras encari guna keperlun keluargana. Dahinna tukang kayu. Ipebelin Jusup me Jesus bagi anak kandungna, emaka Jesus igelari “anak tukang kayu.” (Matius 13:55) Jusup pe ngajari Jesus jadi tukang kayu, janah tutus kel ate Jesus mpelajarisa. Emaka, ikataken kalak me Jesus “tukang kayu.”​—Markus 6:3.

Penting kel akap keluarga Jusup nembah Dibata Jahwe. Guna matuhi Undang-Undang Dibata, terus iajari Jusup ras Maria anak-anakna kerna Dibata. Si e ilakoken kalak e ‘sanga i rumah, sanga i bas perdalanen, sanga ngadi-ngadi ntah pe sanga erdahin.’ (Ulangen 6:6-9) I bas Nasaret lit ingan pulung kalak Jahudi. Tek kita Jusup pasti ratur maba keluargana nembah Dibata ku je. I bas pudi wari, lawes Jesus ku ingan pulung kalak Jahudi “bagi kebiasanna i bas wari Sabat.” (Lukas 4:16) Keluarga Jusup pe ermeriah ukur paksa lawes alu ratur ku rumah pertoton Jahwe i Jerusalem.