Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 6

Anak si Ijanjiken

Anak si Ijanjiken

LUKAS 2:21-39

  • JESUS ISUNAT JANAH IBABA KU RUMAH PERTOTON

Jusup ras Maria tetap tading i Betlehem janah la mulih ku Nasaret. Sanga umur Jesus waluh wari, ia isunat bali bagi si iperentahken Undang-Undang Dibata man kalak Israel. (Imamat 12:​2, 3) Biasana, paksa si e me iban gelar man anak dilaki. Bagi si ikataken malekat Gabriel, iban kalak e gelar anakna Jesus.

Gundari nggo lewat sada bulan, janah umur Jesus pe nggo 40 wari. Ku ja ibaba orang tuana Jesus? Ku rumah pertoton i Jerusalem, la ndauh arah ingan kalak e tading. Menurut Undang-Undang Musa, 40 wari kenca anak dilaki lahir, arus ipersembahken nandena korban i rumah pertoton guna mbersihken diri.​—Imamat 12:​4-8.

Ipatuhi Maria Undang-Undang e. Menurut Undang-Undang Musa, persembahen si arus iberekenna eme sada biri-biri jantan ras sada perik. Tapi adi lit si la ngasup mpersembahken si e, banci ipersembahkenna dua ndukur ntah pe dua merpati. Emaka, ipersembahken Maria dua perik si kitik. E ncidahken keadan ekonomi Jusup ras Maria.

I bas rumah pertoton, sekalak dilaki si nggo metua ndahi Jusup ras Maria, gelarna Simeon. Enggo ipebetehken Dibata man bana maka ope lenga ia mate idahna pagi janji Jahwe kerna Kristus ntah pe Mesias. I bas wari e, itegu-itegu kesah si badia Simeon gelah masuk ku rumah pertoton. I je me ia jumpa ras Jusup bage pe Maria si maba anak kalak e si kitik denga. Jenari iangkip Simeon anak e.

Sanga iangkipna Jesus, ngata bujur Simeon man Dibata, nina, “Tuan Si Madakuasa, gundari budakNdu enda banci mate alu tenang sentudu ras si nggo ikatakenNdu, sebap nggo idah mataku uga Kam mere keselamaten si nggo isikapkenNdu gelah idah kerina bangsa, ia me terang guna nasapken kegelapen si nutupi bangsa-bangsa ras kemulian man umatNdu Israel.”​—Lukas 2:​29-​32.

Jengang Jusup ras Maria megi kata-katana e. Ipasu-pasu Simeon kalak e janah nina man Maria maka arah anakna e, “nterem me kalak Israel si ndabuh janah mulihken tedis.” Ipebetehken ipebetehkenna ka maka mesui kel pagi ate Maria bali bagi itebak sada pedang si ntelap.​—Lukas 2:​34.

I je lit ka nabi si umurna 84 tahun, gelarna Hanna. Rusur ia reh ku rumah pertoton. I bas wari e, ia pe ndahi Jusup, Maria, bage pe Jesus si kitik denga. Ngata bujur Hanna man Dibata janah iceritakenna kerna Jesus man kerina kalak si nggit megikenca.

Bayangkenlah uga riahna akap Jusup ras Maria nandangi kai si terjadi i rumah pertoton e! Pasti reh tekna kalak e maka anakna e Kalak si Ijanjiken Dibata.