Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 110

Wari Terakhir Jesus i Rumah Pertoton

Wari Terakhir Jesus i Rumah Pertoton

MATIUS 23:25–24:2 MARKUS 12:41–13:2 LUKAS 21:1-6

  • ISALAHKEN JESUS KA PEMINPIN-PEMINPIN AGAMA

  • IKERNEPKEN PAGI RUMAH PERTOTON

  • SEKALAK DIBERU MBALU SI MUSIL NUMBANG DUA SEN LOGAM

I bas wari terakhir Jesus i rumah pertoton, terus ipebetehken Jesus perbahanen ahli Undang-Undang Musa ras kalak Parisi si munapik. Alu terus terang ikataken Jesus kalak e munapik. Nina, “Ibersihken kena cangkir ras piring kena si arah darat tapi si arah bas dem kerangapen ras napsu si la terkuasai. O kalak Parisi si pentang, bersihken lebe cangkir ras piring si arah bas e, gelah si arah darat pe banci ka bersih.” (Matius 23:​25, 26) Kalak Parisi ermediate kel nandangi kebersihen ras penampilen si arah darat, tapi la ibersihkenna pusuh ras perukurenna.

Teridah kel kalak e munapik arah perbahanenna sanga mbangun ras nghiasi kuburen nabi-nabi. Tapi ikataken Jesus maka kalak e “anak-anak si munuh nabi-nabi.” (Matius 23:31) Buktina, ibunuh kalak e atena Jesus.​—Johanes 5:​18; 7:​1, 25.

Jenari ituriken Jesus pagi si inanami peminpin-peminpin agama adi la kalak e ertobat. Nina, “O nipe, kesusuren nipe si erbisa, uga kena banci pulah i bas ukumen Gehena nari?” (Matius 23:33) Gehena ntah pe Lembah Hinom eme ingan nutung sampah si lit i daerah e. Si e cocok ras kai pagi si inanami ahli Undang-Undang Musa ras kalak Parisi eme ikernepken si rasa lalap.

Igantiken murid-murid Jesus pagi ia selaku “nabi-nabi ras kalak si pentar bage pe guru.” Uga pagi perbahanen kalak man murid-murid e? Nina Jesus man peminpin-peminpin agama, “Piga-piga i bas [murid-muridku] ibunuh kena pagi, iukum kena bas tiang seh asa mate, piga-piga iligasi kena i bas ingan-ingan pulung kalak Jahudi, janah isiksa kena arah kota ku kota. Emaka man kena dabuhna dareh kerina kalak benar si mambur i doni, mulai dareh Abil eme kalak si benar, seh ku dareh Sakaria . . . si ibunuh kena.” Ipersingeti Jesus kalak e, nina, “Situhuna, kerina ukumen e pagi ndabuh ku kena kalak si nggeluh gundari enda.” (Matius 23:​34-​36) Eme si terjadi i bas tahun 70 M, sanga ikernepken kalak Roma kota Jerusalem janah nterem kalak Jahudi mate ibunuh.

Sedih ras latih kel ukur Jesus ngukuri keadan si terjadi pagi man kota Jerusalem. Nina, “O Jerusalem, Jerusalem, pemunuh nabi-nabi ras si mbenteri kalak si isuruh ndahi kam, seh kel rusurna ateku mpepulung anak-anakndu bali bagi indung manuk mpepulung anak-anakna i teruh kabengna! Tapi la kena nggit. Emaka, rumah pertoton kena itadingken pagi.” (Matius 23:​37, 38)

Kenca si e nina Jesus ka, “Mulai gundari nari lanai kari idah kena aku seh ngasa ikataken kena, ‘Ipasu-pasu me ia si reh i bas gelar Jahwe!’” (Matius 23:39) Ibelasken Jesus nubuat si lit i Masmur 118:​26: “Ketuahen kalak reh i bas gelar [Jahwe] i bas Rumah Pertoton nari ipasu-pasu kami kam.” Jadi, ikernepken me rumah pertoton si lit i Jerusalem e, janah ise pe lanai banci nembah Dibata i je.

Kenca si e, lawes Jesus ku ingan si deban si lit i bas rumah pertoton e. I je lit kotak-kotak sumbangen. Imasukken kalak sumbangenna arah lubang si kitik si lit arah datas kotak e. Idah Jesus erbage-bage kalak Jahudi termasuk kalak bayak “namaken melala sen logam” ku kotak e. Jenari iperdiateken Jesus sekalak diberu mbalu si musil namaken “dua sen logam si kitikna kel ergana.” (Markus 12:​41, 42) Tek kel Jesus maka meriah kel ukur Dibata ngidah diberu e.

Ilebuh Jesus murid-muridna janah nina, “Situhuna, buen nge si itamaken diberu mbalu si musil enda asangken sen si itamaken kerina kalak ku bas kotak persembahen.” Uga maka banci bage? Nina Jesus, “Kerina kalak e mere arah kelebihen ertana, tapi diberu e, aminna gia musil, itamana kerina si lit i bas ia, kerina si lit i bas geluhna.” (Markus 12:​43, 44) Seh kel bedana diberu mbalu e ras peminpin-peminpin agama!

Itadingken Jesus rumah pertoton paksa tanggal 11 Nisan. Nina sekalak muridna, “O Guru, nenlah! Luar biasa kel batu-batu ras bangunen enda!” (Markus 13:⁠1) Piga-piga batu dingding rumah pertoton e galang kel janah paguh, emaka la mungkin hancur rumah pertoton e. Kai si ikataken Jesus kenca si e pasti erban kemamangen, nina, “Idah kena nge kerina bangunen si galang enda? Situhuna, lanai pagi lit sada batu pe si lit i jenda itadingken i datas batu si debanna janah kerina iruntuhken.”​—Markus 13:2.

Kenca bage nina Jesus, lawes ia ras rasul-rasulna ngelewati Lembah Kidron jenari nangkeng kalak e ku Deleng Saitun. Lit empat rasul si ikut ras ia eme Petrus, Andreas, Jakup, ras Johanes. Arah deleng e nari banci itatap kalak e alu jelas rumah pertoton e.