Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 106

Dua Perumpaman kerna Kebun Anggur

Dua Perumpaman kerna Kebun Anggur

MATIUS 21:28-46 MARKUS 12:1-12 LUKAS 20:9-19

  • PERUMPAMAN KERNA DUA ANAK DILAKI

  • PERUMPAMAN KERNA PERJUMA

Sanga i rumah pertoton, edenga isungkun imam-imam kepala ras peminpin-peminpin Jahudi kerna kuasa Jesus i bas kai si ilakokenna. Jawapen Jesus erban kalak e sinik. Gundari, iceritaken Jesus perumpaman si ncidahken kalak si uga situhuna kalak e.

Nina Jesus, “Sekalak dilaki lit dua anakna. Idahina sintua nina, ‘O Nakku, to erdahin kam gundari i bas kebun anggur.’ Ngaloi ia, ‘La aku nggit,’ tapi dungna nyesal ia janah lawes ku kebun anggur. Jenari ideherina anak si peduaken, ikatakenna ka bagi si ndai. Ijawapna, ‘Ue, Pak,’ tapi la ia lawes. Si apai i bas dua anak enda si ngelakoken sura-sura bapakna?” (Matius 21:​28-​31) Jawapenna jelas. Anak si pertama me si dungna ngelakoken kai si isuruh bapakna.

Jenari ngerana Jesus man kalak si la senang man bana, “Situhuna leben pagi pengalo cuke ras pelacur masuk ku bas Kerajan Dibata asangken kena.” Pengalo cuke ras pelacur tangtangna la nggit nembah Dibata. Tapi, bagi anak si pertama ndai, kalak enda dungna tobat janah nggit ngelayani ia. Beda kel ras peminpin-peminpin agama si seri bagi anak si peduaken, ngaku kalak e nembah Dibata tapi situhu labo. Nina Jesus ka, “Johanes [Peridiken] reh ndahi kena guna nuduhken dalan si benar, aminna pe bage la kena tek bana. Tapi, pengalo cuke ras pelacur tek bana. Enggo pe idah kena si e, la kena nyesal janah la kena tek man bana.”​—Matius 21:​31, 32.

Kenca si e, iceritaken Jesus ka perumpaman si deban, si ncidahken maka peminpin agama e labo ngenca la ngelayani Dibata, tapi jahat kel. Nina Jesus, “Sekalak dilaki erban kebun anggur, ipagarina i sekelilingna, ikurakna ingan mereh anggur i je janah ipajekkenna sada menara. Kenca si e, erbelah ia ras perjuma si deban janah lawes ia ku luar negri. Kenca seh paksa rani, isuruhna sekalak budakna ndahi perjuma e guna muat baginna i bas kebun anggur e nari. Tapi itangkap kalak e ia, ipekpekina, janah ipelawesna alu la maba kai pe. Isuruhna ka mulihi budak si deban, tapi ipekpeki kalak e takalna janah ihina kalak e. Isuruhna ka si deban, tapi ibunuh kalak e ia. Isuruhna ka nterem budak si debanna, tapi piga-piga ipekpekina janah deba ibunuhna.”​—Markus 12:​1-5.

Iangkai kalak e nge perumpaman Jesus? Ue, banci saja ingetna kata-kata Jesaya, “Israel kap peken anggur [Jahwe] si Mada Kuasa, kalak Juda me batang anggur si ngena ateNa. IarapkenNa bangsa e ngelakoken si mehuli tapi munuhi kepeken perasatna. Itimai-timai kebujuren idalankenna kepeken nderkuh kalak itindasna.” (Jesaya 5:7) Mirip ras perumpaman Jesus. Si mpuna kebun anggur eme Jahwe, janah kebun anggur eme bangsa Israel si ipagari ras ilindungi alu Undang-Undang Dibata. Isuruh Jahwe nabi-nabi guna ngajari umatNa ras nampati kalak e ngasilken buah si mejile.

Amin pe bage, isiksa ras ibunuh “perjuma” me “budak-budak” si isuruh. Ijelasken Jesus, “Sekalak nari ngenca si lit bas ia eme anak si ikelengina. Dungna isuruhna ia ndahi kalak e, sebap nina i bas ukurna, ‘Iergai kalak e nge kari anakku e.’ Tapi nina perjuma e sapih-sapih ia, ‘Enda kap ahli warisna. Eta sibunuh ia, gelah banta warisenna.’ Emaka itangkap kalak e ia, ibunuhna.”​—Markus 12:​6-8.

Gundari isungkun Jesus, “Kai nge kari si ilakoken si mpuna kebun anggur e?” (Markus 12:9) Ijawap peminpin agama e, “Erkiteken jahat, ikernepkenna kari kalak e janah ibelahkenna kebun anggur e man perjuma si deban, si nggit mere baginna paksa peranin.”​—Matius 21:41.

La sadar kalak e maka si sangana icakapken kalak e eme kerna kegeluhenna sendiri i bas wari si pepagi, sebap kalak e pe perjuma si jahat. Jahwe selaku si mpuna “kebun anggur” ngarap gelah perjuma bagi kalak e banci ngasilken buah, eme erkiniteken man AnakNa, si jadi Mesias. Inen Jesus peminpin-peminpin agama e janah nina, “La kin pernah ibaca kena ayat enda, ‘Batu si itulak tukang bangunen, batu enda nggo jadi batu si utama. Batu e rehna i bas Jahwe nari, janah luar biasa kel e man banta.’” (Markus 12:​10, 11) Ijelasken Jesus kai intina, “E me sebapna, ibuat kari pasu-pasu Kerajan Dibata i bas kena nari janah ibereken man sada bangsa si ngelakoken peraten Dibata.”​—Matius 21:​43.

Ahli-ahli Undang-Undang Musa ras imam-imam kepala sadar maka “kalak e si icakapken Jesus i bas perumpamanna.” (Lukas 20:19) Reh merhatna kalak e munuh Jesus eme si jadi ahli waris. Mbiar kalak e man jelma si nterem e, si erpengakap maka Jesus e nabi, emaka kalak e la pang ncubaken munuh Jesus i je.