Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 116

Ngajarken Sipat Meteruk Ukur i bas Paskah si Terakhir

Ngajarken Sipat Meteruk Ukur i bas Paskah si Terakhir

MATIUS 26:20 MARKUS 14:17 LUKAS 22:14-18 JOHANES 13:1-17

  • IPAN JESUS PANGAN PASKAH SI TERAKHIR RAS RASUL-RASUL

  • ICUCI JESUS NAHE RASUL-RASUL GUNA NGAJARKEN SIPAT METERUK UKUR

Petrus ras Johanes nggo leben seh i Jerusalem guna nikapken Paskah bagi si isuruh Jesus. Dungna, Jesus ras sepuluh rasul si deban pe berkat ku Jerusalem. Wari nggo ben sanga kalak e nusur arah Deleng Saitun nari. Enda me wari si terakhir Jesus ngidah kota Jerusalem arah deleng e seh asa ia ipekeke.

Seh kenca Jesus ras rasul-rasul i Jerusalem, lawes kalak e ku rumah si nggo isikapken guna man pangan Paskah. Naik kalak e ku ruangen si lit i loteng. Idapeti kalak e kerinana nggo isikapken. Enggo itima-timai Jesus kesempaten enda, janah nina, “Merincuh kel aku man pangan Paskah enda ras kena ope lenga aku ngenanami kiniseran.”​—Lukas 22:15.

Paksa si e, biasana piga-piga calung anggur ibereken ku tengah-tengah jelma si reh pulung. Kenca ngaloken sada calung, ertoto Jesus ngata bujur nina, “Buatlah enda, minemlah kena sekalak-sekalak je nari. Sebap mulai gundari nari lanai kuinem anggur seh ngayak reh Kerajan Dibata.” (Lukas 22:​17, 18) Arah kata-kata Jesus e jelas teridah maka kematenna nggo ndeher.

Sanga acara man pangan Paskah e, lit kejadin si la biasa. Cinder Jesus, itangtangina bajuna si arah darat janah ibuatna sada anduk. Jenari itamana lau tare baskom. I bas jaman e, biasana isuruh tuan rumah gelah nahe tamuna icuci budakna. (Lukas 7:​44) Tapi sekalenda tuan rumah la lit i je, emaka Jesus me si ngelakoken tugas e. Situhuna rasul-rasul pe banci nge ilakokenna si e, tapi sada pe kalak e la nggit ngelakokenca. Banci saja perban lit denga persaingen antara kalak e. Kai pe alasenna, pasti mela kel kalak e ngidah Jesus si nuci nahe kalak e. 

Sanga seh giliren Petrus, protes ia, “Asa ndigan pe ula cucindu naheku.” Nina Jesus, “Adi la kucuci nahendu la kam banci ras aku.” Ngaloi Petrus, “O Tuan, adi bage kin ula naheku saja cuci. Tapi cuci ka tanku ras takalku.” Sengget kel ia megi jawapen Jesus, “Kalak si nggo ridi, nahena saja ngenca perlu icuci perban kerina dagingna nggo bersih. Kena nggo bersih, tapi labo kerina kena bersih.”​—Johanes 13:​8-​10.

Icuci Jesus nahe 12 rasulna, termasuk nahe Judas Iskariot. Kenca ipake Jesus bajuna si arah darat, mulihi ia kundul. Nungkun Jesus, “Angkai kena nge ngkai maka bagenda kulakoken man kena? Ilebuh kena aku ‘Guru’ ras ‘Tuan,’ janah payo si ikataken kena e. Adi aku saja Tuan ras Guru kena pe nuci nahe kena, kena pe arus sicuci-cucin nahe. Enggo kuban si man usihen kena gelah banci iban kena bagi si nggo kuban enda. Situhuna sekalak budak labo belinen asangken tuanna, janah kalak si isuruh labo belinen asangken kalak si nuruh ia. Adi iteh kena kerina enda, meriah me ukur kena adi idalanken kena.”​—Johanes 13:​12-​17.

Seh kel ulina pelajaren si ibereken Jesus kerna meteruk ukur! Pengikut Jesus ula min penting akapna bana janah arus ia ilayani kalak. Tapi, arus iikutken kalak e usihen Jesus, labo maksudna arus sicuci nahe kalak, tapi nggit kita ngelayani kalak si deban alu meteruk ukur janah seri perbahanenta man kerina.