Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 111

Rasul-Rasul Mindo Tanda

Rasul-Rasul Mindo Tanda

MATIUS 24:3-51 MARKUS 13:3-37 LUKAS 21:7-38

  •   EMPAT MURID-MURID MINDO TANDA

  • NUBUAT SI TERJADI I BAS ABAD PERTAMA RAS GUNDARI

  • KITA ARUS TERUS ERJAGA-JAGA

Gundari wari Selasa karaben, janah tanggal 11 Nisan kentisik nari nggo dung. Dahin Jesus guna erberita i doni pe nggo nandangi dung. Sanga ciger wari ngajar ia i rumah pertoton, janah sanga berngi wari erberngi ia i darat kota Jerusalem. Enterem kel kalak ‘i bas pagi-pagi si lampas, reh ku rumah pertoton guna megiken ia.’ (Lukas 21:​37, 38) Tapi gundari Jesus lanai i rumah pertoton, ia ras empat rasulna eme Petrus, Andreas, Jakup, ras Johanes kundul i Deleng Saitun.

Empatna kalak e ndahi Jesus. Perban merhat kalak e meteh erti nubuat si ikataken Jesus kerna rumah pertoton. Nina lanai pagi lit sada batu pe i datas batu si debanna. Tapi lit ka si deban si iukuri kalak e. Pernah ikataken Jesus man kalak e, “Tetaplah ersikap, sebap Anak manusia pe reh i bas jam si la isangka kena.” (Lukas 12:40) Ikatakenna ka kerna “wari Anak manusia ncidahken dirina.” (Lukas 17:30) Merhat kel rasul-rasul e metehsa lit ntah lang hubungenna kerina e ras kata-kata Jesus kerna rumah pertoton. Ning kalak e, “Kataken man kami, ndigan kin e terjadi, janah kai nge pagi jadi tanda kerehenndu ras kedungen jaman enda?”​—Matius 24:3.

Banci saja merhat kalak e metehsa kai kari si terjadi nandangi rumah pertoton si banci inen kalak e arah ingan kalak e kundul. Isungkun kalak e ka kerna kerehen Anak manusia. Banci saja inget kalak e perumpaman Jesus kerna “sekalak bangsawan” si “lawes ku negri si ndauh guna ndatken kuasa selaku raja, kenca si e mulih me ia.” (Lukas 19:​11, 12) Selain si e merhat ka kalak e metehsa kerna “kedungen jaman enda.”

Ijawap Jesus alu jelas kel. Iberekenna tanda si ncidahken ndigan Jerusalem ikernepken janah ndigan rumah pertoton si lit i je ikernepken. Selain si e, tanda enda nampati kalak Kristen pagi guna meteh maka kalak e nggeluh i bas masa “kerehen” Jesus ras pendungi jaman enda.

Tande tahunna nggo banci idah rasul-rasul maka nubuat Jesus e terjadi. Melala nubuat Jesus si mulai terjadi i bas jaman kalak e. Emaka i bas tahun 70 M, lit 37 tahun kenca ikataken Jesus nubuatna, kalak Kristen si nggeluh i bas paksa si e nggo ersikap i bas ngadapi Jerusalem si nandangi ikernepken bage pe rumah pertotonna. Tapi labo kerina nubuat Jesus terjadi i bas tahun 70 M. Lit ka nubuat si terjadi i bas kerehen Jesus selaku Raja Kerajan Dibata. Ikataken Jesus kerna si e man rasul-rasulna.

Inubuatken Jesus maka lit pagi “perang ras berita-berita kerna perang” janah “bangsa pagi ngelawan bangsa ras kerajan ngelawan kerajan.” (Matius 24:​6, 7) Nina Jesus ka, “I japa pe terjadi pagi gempa si megegeh, kurang pangan ras lit penakit si mekelek i bas erbage ingan.” (Lukas 21:11) Ipersingeti Jesus ka murid-muridna, “Itangkap kalak pagi kena janah isiksana.” (Lukas 21:12) Melala pagi nabi-nabi palsu janah nterem ibanna jelma papak. Reh buena pagi kejahaten janah nterem kalak reh kurangna kekelengenna. Tapi nina Jesus ka “berita si meriah kerna Kerajan e iberitaken pagi man manusia i belang-belang doni guna kesaksin man kerina bangsa, kenca si e reh me kedungen e.”​—Matius 24:14.

 Piga-piga nubuat e terjadi sope bage pe paksa Jerusalem ikernepken kalak Roma. Tapi nubuat e terjadi belinen i bas jamanta gundari. Nggo nge lit idahndu buktina?

Salah sada tanda kerehen Jesus eme lit pagi teridah “si erban ciga ate si erban hancur.” (Matius 24:15) Si enda terjadi i bas tahun 66 M, paksa Jerusalem ikepung ‘tentera Roma si erkemah’ janah icedai kalak e tembok Jerusalem. Ibaba kalak e bendera-bendera si mbuktiken kalak e nembah berhala. (Lukas 21:20) Emaka “si erban ciga ate” e nggo lit i bas kota si ianggap kalak Jahudi “kota si badia.” Arusna la i je inganna.

Nina Jesus ka, “Lit pagi kiniseran si mbelin si lenga pernah terjadi mulai kin doni lit seh asa gundari, lang, janah ndigan pe lanai bo terjadi.” Bas tahun 70 M, Jerusalem ikernepken kalak Roma. “Kota si badia” e bage pe rumah pertoton ikernepken. Enda tuhu-tuhu kiniseran si mbelin man kalak Jahudi, janah ribun kalak ibunuh. (Matius 4:5; 24:21) Enda me serangen si parahna man kota Jerusalem ras kalak Jahudi. Perban rumah pertoton pe nggo kernep, lanai lit pengaturen kerna ibadat si nggo idalanken kalak Jahudi ratusen tahun dekahna. Pastilah adi terjadi ka pagi nubuat e sekali nari keadanna pasti seh kel parahna.

ULA MBIAR I BAS WARI-WARI PENDUNGI

Lenga dung icakapken Jesus kerna kerehenna selaku Raja Kerajan Dibata bage pe pendungi jaman enda. Gundari ipersingetina rasul-rasulna maka “reh me pagi Kristus-Kristus palsu ras nabi-nabi palsu.” Icubaken kalak enda pagi erban nterem jelma papak “termasuk kalak si ipilih e pe.” (Matius 24:​24) Tapi kalak si ipilih e labo pagi papak. Kristus-Kristus palsu e banci iidah. Tapi kerehen Jesus la banci idah.

Ijelasken Jesus ka kerna kiniseran si mbelin si terjadi pagi i bas pendungi jaman enda, nina, “Matawari jadi gelap, bulan lanai ersinar, bintang-bintang ndabuhen langit nari, janah kuasa-kuasa i langit pe mugur-ugur.” (Matius 24:29) Sanga ibegi rasul-rasul kata-kata Jesus e, la iteh kalak e kai pagi si terjadi. Tapi kejadin e pastilah erban kalak mbiar.

Uga pengaruhna kejadin e man manusia? Nina Jesus, “Pingsan pagi kalak perban biarna bage pe perban ngukuri kai si nandangi terjadi i doni, sebap kuasa-kuasa i langit pe mugur-ugur pagi.” (Lukas 21:26) Pastilah enda me kejadin si ngerina si pernah iidah manusia.

Tapi nina Jesus man rasul-rasul maka labo pagi kerina kalak mbiar sanga “Anak manusia reh i datas embun i langit alu kuasa ras kemulian si mbelin.” (Matius 24:30) Ikataken Jesus maka iselamatken Dibata nge pagi “kalak si ipilih.” (Matius 24:22) Emaka uga arusna tanggapen murid-murid si setia adi terjadi pagi kejadin si luar biasa e? Ipegegehi Jesus me pengikutna, nina, “Sanga enda mulai terjadi, tediskenlah janah jurgakken, sebap pembebasen kena nggo ndeher.”​—Lukas 21:28.

Adi bage, uga carana banci iteh kalak Kristen maka nggo ndeher kedungen e? Iceritaken Jesus perumpaman kerna batang ara, nina, “Kenca dahanna si nguda reh janah erbulung, mis iteh kena maka musim perlego nggo ndeher. Bage ka pe, sanga idah kena kerina enda, arus iteh kena maka Anak manusia nggo i deher pintu. Situhuna, lit sada kelompok kalak si la pagi mate seh asa kerina enda terjadi.”​—Matius 24:​32-​34.

 Emaka sanga iidah murid-murid Jesus tanda-tanda e nggo terjadi, iteh kalak e maka kedungen e nggo ndeher. Kenca si e ipersingeti Jesus pengikutna si nggeluh i bas wari pendungi, nina:

“Kerna wari ras jamna, ise pe la metehsa, malekat-malekat i surga pe lang, Anak pe lang, tapi Bapak ngenca. Sebap bali bagi jaman Nuah, bage me pagi kerehen Anak manusia. Ope lenga Banjir si Mbelin, kalak i bas jaman e man ras minem, dilaki-dilaki erjabu ras diberu-diberu ipejabuken, seh asa Nuah masuk ku bas bahtra. Kalak e la ermediate seh ngayak reh Banjir si Mbelin ras ngkernepken kerina kalak e, bage me pagi kerehen Anak manusia.” (Matius 24:​36-​39) Bali bagi Banjir si Mbelin si terjadi i belang-belang doni, bage ka me pagi kerehen Jesus erpengaruh man kerina manusia.

Iangkai rasul-rasul si megiken Jesus i Deleng Saitun maka kalak e perlu tetap erjaga-jaga. Ipersingeti Jesus kalak e, “Perdiatekenlah diri kena gelah ula pusuh kena iberati alu mbuesa man, mbuesa minem, ras perasan kuatir kerna kegeluhen enda, gelah wari e la rempet reh man kena bagi siding. Sebap wari e terjadi pagi man kerina kalak si tading i belang-belang doni. Emaka, teruslah erjaga-jaga ras teruslah ertoto gelah banci kena selamat ngelewati kerina si arus terjadi e janah cinder i lebe-lebe Anak manusia.”​—Lukas 21:​34-​36.

Sekalenda pe, si icakapken Jesus labo kerna pengkernepen kota Jerusalem saja, si mpengaruhi kalak Jahudi. Si imaksudkenna eme kai si “terjadi pagi man kerina kalak si tading i belang-belang doni.”

Ikataken Jesus maka murid-muridna arus tetap erjaga-jaga ras ersikap-sikap. Guna njelasken kerna si e, iceritaken Jesus perumpaman si deban. Nina, “Ukuri enda: Adi nggo iteh tuan rumah jam piga reh pinangko, pasti terus ia erjaga-jaga janah la ipediatna rumahna ibongkar. Emaka, pastiken kena nggo ersikap, sebap Anak manusia reh i bas jam si la isangka kena.”​—Matius 24:​43, 44.

Kenca si e ikataken Jesus alasenna ngkai maka murid-muridna la perlu mbiar. Ikatakenna man kalak e maka sanga nubuatna e terjadi, lit pagi “budak” si erjaga-jaga ras tutus. Iceritaken Jesus perumpaman enda, “Ise situhuna budak si setia janah pentar, si ipilih tuanna guna ngurus pelayan-pelayan rumahna ras mere pangan man kalak e i bas waktu si tepat? Ermeriah ukur me budak e adi sanga tuanna reh, idapeti tuanna ia ngelakoken pendahinna! Situhuna, ipilih tuanna kari ia ngurus kerina erta-ertana.” Tapi, adi budak e jadi jahat janah la mehuli perbahanenna man kalak si deban, ‘seh kel beratna kari iban tuanna ukumen man kalak e.’​—Matius 24:​45-​51; bandingken Lukas 12:​45, 46.

Labo maksud Jesus lit kari piga-piga pengikutna si jadi jahat. Adi bage, kai maksud Jesus? Atena mpersingeti pengikutna gelah terus erjaga-jaga ras tutus erdahin. Iberekenna penjelasenna i bas perumpaman si deban.