Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 134

Kuburen Kosong—Jesus Nggo Ipekeke!

Kuburen Kosong—Jesus Nggo Ipekeke!

MATIUS 28:3-15 MARKUS 16:5-8 LUKAS 24:4-12 JOHANES 20:2-18

  • JESUS IPEKEKE

  • ERBAGE-BAGE KEJADIN I KUBUREN JESUS

  • IJUMPAI JESUS PIGA-PIGA DIBERU

Sengget kel Maria Magdalena ras diberu-diberu si ikut ras ia ngidah kuburen e kosong! Kiam me Maria Magdalena njumpai “Simon Petrus bage pe murid si deban si ikelengi Jesus” eme rasul Johanes. (Johanes 20:2) Tapi diberu si ikut ras ia ndai ngidah malekat i kuburen e. Janah lit ka malekat si deban si “erjubah mentar” i deher ingan mayat Jesus iamparken.​—Markus 16:5.

Nina sada malekat e, “Ula mbiar, sebap kuteh maka idarami kena Jesus si nggo ibunuh i bas tiang. La ia i jenda, bagi si nggo ikatakenna, ia nggo ipekeke. Mari, nen inganna iamparken. Kenca si e mislah lawes janah kataken man murid-muridna maka ia nggo ipekeke i bas si mate nari. Gundari sangana ia i bas perdalanen ku Galilea ngelebei kena.” (Matius 28:​5-7) Emaka, “nggirgir kel kalak e janah mamang kel atena.” Kiam me kalak e ngelaporkenca man murid-murid.​—Markus 16:8.

Jumpa me Maria ras Petrus bage pe Johanes. Janahna kesah-kesahen nina, “Enggo ibuat kalak mayat Tuan i bas kuburen nari janah la iteh kami i ja ia itamakenna.” (Johanes 20:2) Kiam me Petrus ras Johanes ku kuburen, tapi leben Johanes seh. Itungkirna ku bas kuburen e. Idahna uis-uis si mbaluti mayat Jesus ndai, tapi la ia masuk ku bas.

Kenca seh Petrus mis ia masuk ku bas. Idahna uis linen ras uis si mbaluti takal Jesus ndai. Dungna masuk ka me Johanes janah gundari nggo tek ia kata-kata Maria ndai. La isadari Petrus ras Johanes maka Jesus nggo ipekeke bagi si nggo pernah ikatakenna. (Matius 16:21) Kemamangen kalak e jenari mulih kalak e. Tapi Maria mulihi ka reh ku kuburen e janah tetap ia i je.

Diberu-diberu si deban kiam guna ngataken man murid-murid si deban maka Jesus nggo ipekeke. I bas perdalanen, ijumpai Jesus kalak e janah nina, “Mejuah-juah!” Minter ideheri kalak e ia janah “erjimpuh man bana.” Nina Jesus, “Ula mbiar! Laweslah, kataken man senina-seninaku gelah lawes kalak e ku Galilea, i je me kari idahna aku.”​—Matius 28:​9, 10.

Sebelumna, sanga terjadi gempa janah malekat-malekat reh, prajurit si njaga kuburen e “nggirgir ia jenari lanai kemuit.” Kenca kalak e tenang masuk kalak e ku kota guna “ngelaporken man imam-imam kepala kerna kerina si nggo terjadi.” Arih-arih me imam-imam ras peminpin kalak Jahudi. Emaka ersada arih kalak e gelah prajurit e isogok, gelah ikatakenna bagenda, “I bas berngi wari reh murid-muridna janah itangkona mayat Jesus paksa kami medem.”​—Matius 28:​4, 11, 13.

Prajurit Roma banci iukum mate adi tunduh ia sanga ertugas. Emaka erjanji imam-imam e, nina, “Adi ibegi gubernur kari kerna si enda, kami kari si njelaskensa man bana, emaka ula kena kuatir.” (Matius 28:14) Nggit prajurit e isogok janah ilakokenna si ikataken imam-imam e. Emaka terberita me i tengah-tengah kalak Jahudi mayat Jesus nggo itangko kalak.

Maria Magdalena ngandung denga i kuburen e. Sanga itungkirna ku bas kuburen e idahna dua malekat erbaju mbentar! Sada kundul i deher takal Jesus iamparken ndai, sada nari i deher nahena. Nungkun kalak e, “Engkai kam tangis?” Nina Maria, “Lit si muat mayat Tuanku, janah la kuteh i ja ibanna.” Sanga itulihkenna ka idahna ka kalak si deban. Nungkun ka ia bagi penungkunen malekat ndai, nina, “Ise si idaramindu?” Iakap Maria ia tukang kebun emaka nina, “Pa, adi kam kin si muat mayatna, tolong kataken man bangku i ja itamakenndu, gelah kulegi ku je.”​—Johanes 20:​13-​15.

Situhuna, si ngerana ras Maria e eme Jesus si nggo ipekeke tapi la itandai Maria. Sanga ikataken Jesus, “Maria!” Emaka itandaina ia, sebap bage biasana Jesus ngelebuh ia. Meriah kel ukur Maria, nina, “Rabuni!” (si ertina “Guru!”) Perban mbiar Maria lawes Jesus ku surga, emaka itagangina ia. Tapi nina Jesus, “Ula lalap aku tagangindu, perban lenga bo kudahi Bapak. Laweslah, jumpailah senina-seninaku janah kataken man kalak e, ‘Lawes me aku ndahi Bapakku bage pe Bapak kena, ndahi Dibataku bage pe Dibata kena.’ ”​—Johanes 20:​16, 17.

Kiam me Maria ku ingan pulung rasul-rasul ras murid-murid si deban. Nina Maria, “Enggo kuidah Tuan!” Emaka gundari nggo ibegi murid-murid kerna si e arah Maria bage pe arah diberu si debanna. (Johanes 20:18) Aminna pe bage, la kalak e tek janah ‘la iakap kalak e masuk akal.’​—Lukas 24:11.