Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 89

Sanga bas Perdalanen ku Judea, Ngajar Jesus i Perea

Sanga bas Perdalanen ku Judea, Ngajar Jesus i Perea

LUKAS 17:1-10 JOHANES 11:1-16

  • ULA BAN KALAK TERTUKTUK

  • NGAMPUNI RAS ERKINITEKEN

Jesus i daerah Perea denga, i “sebrang Lau Jordan.” (Johanes 10:⁠40) Gundari, iterusken Jesus perdalanenna arah bagin selatan ku Jerusalem.

Jesus la sisada. Murid-muridna pe ikut ras ia, bage pe “nterem jelma” si debanna, termasuk pengalo cuke ras kalak perdosa. (Lukas 14:25; 15:1) Kalak Parisi ras ahli-ahli Undang-Undang Musa si rusur mandangi kai si ikataken ras si ilakoken Jesus pe lit i je. Melala si arusna iukuri kalak e perban edenga iceritaken Jesus perumpaman kerna biri-biri si bene, anak si bene, bage pe dilaki si bayak ras Lasarus.​—Lukas 15:2; 16:14.

Kalak si la senang man Jesus rusur mandangi ras nokohi ia. Emaka banci saja erkiteken e iulihi Jesus ngajari murid-murid kerna kai si nggo pernah iajarkenna i Galilea.

Contohna, ikataken Jesus, “La banci ipedauh kai si erbanca kalak tertuktuk. Tapi, cilaka me kalak si perban ia kalak tertuktuk! . . . Perdiatekenlah dirindu sendiri. Adi seninandu erdosa, ajarken ia, janah adi ertobat ia, ampunilah ia. Aminna pe ia erdosa pitu kali sada wari bandu janah idahina kam pitu kali guna ngataken, ‘Aku jera dingen robah,’ arus iampunindu ia.” (Lukas 17:​1-4) Banci saja kata-kata enda ngingetken Petrus man penungkunenna kerna ngampuni seh asa pitu kali.​—Matius 18:21.

Ngasup nge murid-murid ngelakoken kata Jesus e? Nina murid-murid, “Pegegehi min kiniteken kami.” Ijawap Jesus, “Adi lit kiniteken kena asa biji sawi galangna, banci ikataken kena man batang kayu murbei si mbiring enda, ‘Meruahlah janah turahlah i bas lawit!’ Pasti ipatuhina kena.” (Lukas 17:​5, 6) Payo, uga kitikna pe kiniteken e, e banci erban kai luar biasa terjadi.

Iajarken Jesus ka pentingna meteruk ukur, eme salah sada sipat Jesus, nina man rasul-rasulna, “Bicara lit budak kena si nenggala ntah pe mpermakani, paksa ia mulih juma nari, bagenda nge ning kena, ‘Mari ku jenda, manlah bas meja’? Entah, la kin bagenda ning kena, ‘Ganti uisndu, sikapken panganku berngi enda jenari layani aku ngayak dung aku man ras minem, kenca si e banci kam man ras minem.’ Pasti la perlu iakap kena ngata bujur man budak e, sebap kai si ilakokenna e nggo tugasna. Emaka, adi nggo ilakoken kena kerina si itugasken man kena, katakenlah, ‘Kami budak-budak si la erguna. Kai si ilakoken kami nggo kewajipen kami.’”​—Lukas 17:​7-​10.

Tiap budak Dibata arus iangkaina kerna pentingna mpelebe kepentingen Dibata. Arus ka iingetna maka kehamaten si mbelin kel banci ngelayani Dibata radu ras keluargaNa.

Banci saja, la ndekah kenca si e, reh me kalak si maba berita arah Maria ras Marta nari. Kalak e bage pe turangna eme Lasarus, tading i Betani, Judea. Nina kalak si isuruh e, “O Tuan, teman si ikelengindu sangana sakit.”​—Johanes 11:​1-3.

Aminna pe tehna temanna e sakit, labo sedihsa kel Jesus. Engkai? Nina Jesus, “Penakit e labo maba kematen, tapi maba kemulian man Dibata, gelah Anak Dibata imuliaken erkelangken si e.” Kenca si e, labo mis Jesus lawes ku Judea. Dua wari nari, emaka ikataken Jesus, “Ota kita mulihken ku Judea.” Protes murid-muridna, “O Guru, mbaru denga ibenteri kalak Judea atena kam alu batu, gundari ku jah ka atendu mulihi?”​—Johanes 11:​4, 7, 8.

Ijawap Jesus, “La kin 12 jam dekahna terang wari? Adi suari kalak erdalan labo ia tertuktuk, sebap idahna terang doni enda. Tapi adi berngi ia erdalan tertuktuk me ia, sebap la lit terang i bas ia.” (Johanes 11:​9, 10) Si imaksud Jesus eme lenga keri waktu pelayanenna si nggo itetapken Dibata. Tapi waktuna kentisik nari, emaka arus igunaken Jesus sisa waktuna alu mehuli.

Nina Jesus ka, “Temanta Lasarus nggo medem, lawes ateku ngingeti ia.” Banci saja iakap murid-murid adi Lasarus e sangana istirahat, emaka ikataken kalak e, “O Tuan, adi medem nge ia, malem nge ia kari.” Emaka ikataken Jesus alu terus terang, “Lasarus nggo mate . . . Otalah sidahi ia.”​—Johanes 11:​11-​15.

Iteh Tomas maka banci saja Jesus ibunuh i Judea, tapi isampatina atena Jesus, emaka ikataken Tomas man murid-murid si deban, “Ota kita ku jah, gelah mate kita ras ia.”​—Johanes 11:16.