Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 86

Enggo Mulih Anak si Bene

Enggo Mulih Anak si Bene

LUKAS 15:11-32

  • PERUMPAMAN KERNA ANAK SI BENE

Sanga iceritaken Jesus perumpaman kerna biri-biri ras koin pirak si bene, banci saja ia i Perea denga, bagin timur arah Lau Jordan. Duana perumpaman e ngajarken maka kita aras ermeriah ukur sanga lit kalak si ertobat janah mulih ku Dibata. Ipandangi kalak Parisi ras ahli-ahli Undang-Undang Musa me Jesus perban ialoken Jesus kalak si nggo ertobat ndai. Kenca ibegi kalak e perumpaman Jesus e, berubah nge cara rukur kalak e? Angkai kalak e nge uga perasan Bapakta si i surga nandangi kalak si nggo ertobat? Gundari, iceritaken Jesus ka perumpaman si deban.

Perumpaman enda kerna sekalak bapak si lit dua anakna dilaki. Anakna si nguda enda me si rusurna iceritaken i bas perumpaman e. Kalak Parisi ras ahli-ahli Undang-Undang Musa bage kalak si deban banci ndatken pelajaren arah anak si nguda e. Tapi mejile ka adi siperdiateken kerna bapakna ras anakna sintua.

Jenari nina Jesus, “Lit sekalak dilaki dua anakna dilaki. Nina anakna si nguda man bapakna, ‘O Bapak, bereken man bangku erta si jadi baginku.’ Emaka ibagikenna erta-ertana man duana anakna e.” (Lukas 15:​11, 12) Ipindo anakna e warisen, padahal bapakna lenga mate. I bas paksa si e pe, ialokenna atena warisen si jadi baginna, gelah banci ate-atena nggeluh janah bebas. Kenca ialokenna, kai si ilakokenna?

Nina Jesus ka, “Piga-piga wari kenca si e, ipepulung anakna si nguda e kerina ertana jenari lawes ia ku negri si ndauh, i je isia-siakenna kerina ertana e alu ndalani kegeluhen si la mehuli.” (Lukas 15:13) Aminna pe banci ia sikap tading i rumah, tading ras bapakna si perkeleng si mereken keperlunna, tapi lawes anakna e ku negri si deban. Ipekerina ertana e alu ngayaki kerincuhen dagingna. Kenca keri ertana e, susah me geluhna.

 Nina Jesus, “Kenca nggo keri kerinana, terjadi me kelihen si parah i bas negri e. Dungna mesera me ia. Ipindona pendahin man sekalak penduduk negri e. Emaka isuruhna ia njaga babi i juma. Perban seh kel lihena, ipanna atena nakan si ipan babi-babi e. Tapi kai pe la lit ibereken kalak bana.”​— Lukas 15:​14-​16.

Menurut Undang-Undang Dibata, babi ianggap najis, tapi e ngenca si banci ipanna. Perban lihena, pangan si ipan babi e pe nggit ia manca. Paksa susah bage, sadar me ia. Iukurina, “Seh kel buena sierdahin bapakku janah riba-iba roti kalak e, tapi aku i jenda menam mate kelihen! Berkatlah aku ndahi bapakku janah ningku bana, ‘O Bapak, nggo erdosa aku man Dibata bage pe man bandu. Lanai aku cocok igelari anakndu. Banlah aku jadi sierdahinndu saja.’” Emaka berkat me ia mulih ku rumah ndahi bapakna.​—Lukas 15:​17-​20.

Irawai bapakna e nge e anakna e perban keputusenna si motu guna nadingken rumah? Itulakna nge anakna e? Adi kam si jadi bapakna e, kai si ilakokenndu? Uga bicara kam si jadi anak si bene e?

 ANAK SI BENE NGGO IDAT MULIHI

Iceritaken Jesus kai si ilakoken bapakna e: “Sanga ia [anak e] ndauh denga, idah bapakna ia janah mekuah atena. Emaka kiam bapakna e ngayakisa jenari idakepna janah iemana alu lembut.” (Lukas 15:20) Banci saja nggom ibegi bapakna e kerna uga gutulna anakna e. Tapi tetap ialo-alona anakna e. Perbahanen bapakna e ncidahken perasan Jahwe nandangi kalak si ertobat. Kerna peminpin-peminpin agama Jahudi si ngaku nandai ras nembah Jahwe, iangkai kalak e nge perasan Jahwe nandangi kalak si nggo ertobat? Sadar nge kalak e maka perbahanen Jesus bali bagi perbahanen Jahwe?

Bapakna si pentar meteh maka anakna nggo ertobat, si e idahna arah ayo anakna si seh kel sedihna. Jenari iakui anak e salahna. Menukah akap anak e ngakui salahna perban melias kel bapakna e janah ialo-alona ia. Nina anak e, “O Bapak, nggo erdosa aku man Dibata bage pe man bandu. Lanai aku cocok igelari anakndu.”​—Lukas 15:21.

Tapi nina bapak e man budak-budakna, “Pedasken! Buat jubah si mejilena janah pakeken bana. Tama cincin ku jarina janah pakeken selopna. Potong ka anak lembu si mbur, gelah man-man kita janah sirayaken, sebap anakku enda nggo mate tapi nggeluh mulihken; ia nggo bene janah dat mulihi.” Kalak enda pe “ermeriah ukur.”​—Lukas 15:​22-​24.

Anakna sintua sangana i juma. Nina Jesus, “Paksa ia mulih janah nggo ndeher ku rumah, ibegina sora musik ras kalak landek. Emaka ilebuhna salah sada pelayan janah isungkunina kai si terjadi. Ngaloi ia, ‘Agindu nggo mulih, janah ipotong bapakndu anak lembu si mbur sebap nggo mulih ia i bas keadan sehat.’ Tapi merawa ia janah la ia nggit masuk. Emaka ndarat me bapakna janah ipindona kel bana. Tapi nina man bapakna, ‘Enggo ertahun-tahun aku erdahin bagi budak bandu, janah la pernah sekali pe kutogan perentahndu, tapi la pernah sekali pe berendu aku anak kambing gelah kupan ras teman-temanku. Tapi mulih kenca anakndu ah, si nggo ngkeriken ertandu ras diberu perlua-lua, ipotongndu anak lembu si mbur man bana.’”​—Lukas 15:​25-​30.

Ahli-ahli Undang-Undang Musa ras kalak Parisi bali bagi anak sintua e, si mandangi Jesus erkiteken mekuah ate Jesus janah iperdiatekenna rakyat biasa ras kalak si erdosa. Eme sebapna iceritaken Jesus perumpaman e guna mpersingeti kalak e. Tapi kita pe perlu erlajar arah perumpaman e. Ula sipandangi perkuah ate Dibata.

Idungi Jesus perumpamanna e alu kata-kata si ibelasken bapak e man anakna sintua, “O Nakku, kam lalap nge ras aku, janah kerina ertaku enda jangndu ka nge. Tapi enda arus sirayaken janah meriahlah ukurta, sebap agindu nggo mate tapi nggeluh mulihken; ia nggo bene janah dat mulihi.”​—Lukas 15:​31, 32.

La iceritaken Jesus kerna kai si dungna ilakoken anak sintua e. Tapi kenca Jesus mate ras ipekeke, “enterem imam-imam pe mulai ngaloken kiniteken e.” (Perbahanen Rasul-Rasul 6:7) Banci saja piga-piga i bas kalak e nari si megiken Jesus si nceritaken perumpaman kerna anak si bene e, dungna sadar, ertobat, janah mulihken ku Dibata.

Kerina pengikut Jesus arus ngukuri pelajaren si penting arah perumpaman e. Pertama, arus kita tetap radu ras umat Dibata gelah terus ilindungi Jahwe kita, eme Bapak si ngkelengi kita janah mereken keperlunta. Ula sempat kita tergoda guna ndarami kesenangen “ku negri si ndauh.”

Si peduaken, adi ndauh kita arah Dibata nari, arus kita meteruk ukur guna ngulih ku Bapakta, gelah banci kita rembak mulihi ras Ia.

Si peteluken, arus siusih bapak si perkuah ate ras si melias. Ula bagi anak sintua si la nggit ngalo-ngalo. Selaku umat Dibata, arus kita nggit ngampuni janah nggit ngalo-ngalo kalak si nggo ertobat ras mulihken ku Jahwe. Emaka, ermeriah ukurlah ras turang seninata si “nggo mate tapi nggeluh mulihken,” perban “ia nggo bene janah dat mulihi.”