Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 88

Dilaki si Bayak Ras Lasarus

Dilaki si Bayak Ras Lasarus

LUKAS 16:14-31

  • PERUMPAMAN KERNA SEKALAK DILAKI SI BAYAK RAS LASARUS

Enggo inasehati Jesus murid-muridna kerna nggunaken kebayaken alu cara si cerdik. Tapi labo murid-murid ngenca si megiken e, kalak Parisi pe lit i je janah arusna itama kalak e pusuhna kerna nasehat Jesus e. Engkai? Perban kalak e “mata duiten.” Tapi, ‘itokohi kalak e ia.’​—Lukas 15:2; 16:​13, 14.

Amin pe bage, la mbiar Jesus, janah nina, “Kena me kalak si ngataken diri kena benar i lebe-lebe manusia, tapi iteh Dibata pusuh kena. Sebap kai si meherga iakap manusia, e ciga iakap Dibata.”​—Lukas 16:15.

Sedekah e, kalak Parisi nge “si meherga iakap manusia.” Tapi gundari nggo berubah. Ipeteruk me pagi ise pe si meherga, bagi kalak bayak, pejabat, ras peminpin agama. Tapi ipeganjang me pagi rakyat biasa si nggit iajari kerna Dibata. Icidahken Jesus maka perubahen e sangana terjadi, nina:

“Undang-Undang Musa ras Ajaren Nabi-Nabi iberitaken seh ku jaman Johanes. Mulai je nari, Kerajan Dibata iberitaken selaku berita si meriah, janah tiap kalak erusaha kel masuk ku bas. Situhuna, aminna pe langit ras doni masap, la mungkin sada hurup ntah bagin si kitikna pe i bas Undang-Undang Musa la terjadi.” (Lukas 3:​18; 16:​16, 17) Uga kata-kata Jesus e ncidahken maka sangana terjadi perubahen?

Peminpin-peminpin agama Jahudi erpengakap maka ipatuhi kalak e Undang-Undang Musa janah ipujiken kalak e bana. Contohna, sanga ipepalem Jesus mata sekalak dilaki i Jerusalem, tual kel kalak Parisi ngerana, nina, “Kami murid-murid Musa kap. Si teh kami, man Musa nge Dibata ngerana.” (Johanes 9:​13, 28, 29) Salah sada tujun Undang-Undang Musa eme gelah banci itandai kalak si meteruk rukur Mesias, eme Jesus. Ipeseri Johanes Peridiken me Jesus ras Anak Biri-Biri Dibata. (Johanes 1:​29-​34) Mulai awal pelayanen Johanes, “Kerajan Dibata” nggo iberitaken man kalak Jahudi si meteruk ukur, terutama man kalak si mesera. “Berita si meriah” nggo iberitaken man kerina jelma si nggit jadi rakyat Kerajan Dibata.

I bas paksa si e, Undang-Undang Musa sangana terjadi ntah pe seh ku tujunna, sebap Undang-Undang e nampati kalak nandai Mesias janah ngaloken penampatna. Adi nggo seh tujun Undang-Undang e, lanai perlu idalanken umat Dibata Undang-Undang e. Contohna, menurut Undang-Undang Musa, banci cerai erkiteken erbage-bage alasen, tapi gundari ikataken Jesus, “Ise pe si nceraiken ndeharana janah ngempoi diberu si deban, ia nggo erlua-lua. Ise pe si ngempoi diberu si iceraiken perbulangenna, ia pe nggo erlua-lua.” (Lukas 16:18) Kalak Parisi si rusur erban peraturen pe merawa kel megi ranan Jesus e.

Gundari iceritaken Jesus ka perumpaman si mpebetehken uga belinna perubahen si sangana terjadi paksa si e. I bas perumpaman e lit dua dilaki si rusurna kel iceritaken. Sanga ipelajarindu si e, ingetlah maka i tengah-tengah jelma si nterem si megiken Jesus pe lit i je kalak Parisi si mata duiten ras terpandang i tengah-tengah masyarakat.

Nina Jesus, “Lit me sekalak dilaki si bayak. Pakenna warna terong ras linen si meherga, janah tiap wari ia nggeluh ersenang-senang ras mewah. Tapi lit sekalak pemindo-mindo gelarna Lasarus si kerina dagingna ugahen. Ia rusur itamaken i gerbang dilaki si bayak e, janah iarapkenna rimah-rimah si ndabuh arah meja dilaki si bayak e guna ngisi beltekna. Biang pe rehen ndilati ugahna.”​—Lukas 16:​19-​21.

Si imaksud “dilaki si bayak” eme kalak Parisi si mata duiten. Bali bagi dilaki bayak e, meriah akap peminpin-peminpin agama Jahudi make baju si merga ras mewah. Kalak e bayak perban nterem kalak si nghamatisa. Payo, pakenna si warna terong ngertiken kedudukenna si istimewa, ras pakenna linen si meherga ngertiken maka kalak e akapna si benarna.​—Daniel 5:7.

 Uga perukuren peminpin-peminpin si bayak janah meganjang rukur e nandangi kalak si biasa? Ihina peminpin agama kalak e alu nggelarisa am haarets, ntah pe rakyat negri. Peminpin agama erpengakap maka labo iangkai kalak e Undang-Undang Musa, ras la pantas kalak e iajari kerna Undang-Undang Musa. (Johanes 7:​49) Kalak e bali bagi “pemindo-mindo gelarna Lasarus” si ngarapken “rimah-rimah si ndabuh arah meja dilaki si bayak e.” Bagi Lasarus si kerina dagingna barehen, rakyat biasa pe la merga iakap, tempa-tempa la senang Dibata nandangi kalak e.

Situasi e nggo nai nari terjadi, tapi iteh Jesus maka situasi e tuhu-tuhu nandangi berubah, bali bagi dilaki si bayak ras bagi Lasarus.

PERUBAHEN SITUASI

Iceritaken Jesus perubahen situasi e, nina, “La ndekah kenca si e, mate me pemindo-mindo e janah ibaba malekat-malekat ia ku deher Abraham. Dilaki si bayak e pe mate janah ikuburken. Sanga inanamina kiniseran i bas Kuburen, inenna ku datas, janah dauh-dauh nari idahna Abraham ras Lasarus i deherna.”​—Lukas 16:​22, 23.

Iteh kalak si megiken Jesus maka Abraham nggo ndekah mate bas Kuburen. Ijelasken Kitap si Badia maka kerina si lit i bas Kuburen la banci ngenen ntah pe la banci ngerana, termasuk Abraham. (Pengerana 9:​5, 10) Jadi, kai si iukuri peminpin agama? Kai kin maksud Jesus e?

Ikataken Jesus maka, ‘Undang-Undang Musa ras Ajaren Nabi-Nabi iberitaken seh ku jaman Johanes Peridiken. Mulai je nari, Kerajan Dibata iberitaken selaku berita si meriah.’ Emaka, kenca iberitaken Johanes ras Jesus Kristus berita si meriah, paksa si e keadan Lasarus ras dilaki si bayak pe berubah. Tempa-tempa kalak e mate.

Bali bagi Lasarus si kalak mesera ndai, rakyat biasa i bas jaman e pe tangtangna mesera i bas kiniteken. Mbarenda, kalak e nggeluh arah ‘sisa pangan si ndabuh arah meja’ peminpin-peminpin agama, eme pengajaren si seh kel sitikna si iajarken peminpin-peminpin agama e. Tapi kenca si e, ialoken kalak e berita si meriah si ipeseh Johanes Peridiken ras Jesus. Gundari idat kalak e melala pangan rohani eme kebenaren arah Jesus nari, bage pe arah Kitap si Badia. Emaka, ngena ate Dibata nandangi kalak e.

Tapi, itulak peminpin-peminpin agama berita Kerajan si ipeseh Johanes ras Jesus. (Matius 3:​1, 2; 4:​17) Malahen merawa kalak e perban isi berita e kerna api pengukumen arah Dibata. (Matius 3:​7-​12) Gelah tenang akap peminpin-peminpin agama si mata duiten e, ate kalak e gelah ula nai min iberitaken Jesus ras murid-muridna berita kerna kata Jahwe. Kalak e bali bagi dilaki bayak si ngataken, “O Bapak, Abraham, mekuah min atendu aku. Suruh min Lasarus ncelupken ujung jarina ku lau janah itaktakkenna ku dilahku, sebap mesui kel kuakap i bas api si gara enda.”​—Lukas 16:24.

Tapi si e labo terjadi. Engkai? Pertama, teremen peminpin agama e la nggit robah. “Tulisen Musa ras Ajaren Nabi-Nabi la ibegiken kalak e,” padahal e si erban kalak e nggit ngaloken Jesus selaku Mesias ras Raja si ipilih Dibata. (Lukas 16:​29, 31; Galati 3:​24) Sombong kel kalak e janah la ialokenna berita si ipeseh rakyat biasa si nggo jadi murid Jesus. Peduaken, la mungkin iubah murid-murid Jesus kebenaren gelah senang peminpin agama. Enda teridah arah ranan si ibelasken ‘Bapak Abraham’ man dilaki si bayak ndai:

“O anakku, ingetlah maka segedang geluhndu ialokenndu melala si mehuli, tapi Lasarus ngaloken kai si la mehuli. Gundari, ia sangana iapuli i jenda, tapi kam mesui kel atendu. Selain si e, antara kami ras kena lit iban embang si mbages, emaka la banci kalak nyebrang jenda nari ku jena, bage ka pe si jena nari ku jenda.”​—Lukas 16:​25, 26.

Tuhu-tuhu adil kel perubahen enda! Peminpin agama si sombong e ngenanami kiniseran. Tapi pengikut Jesus si meteruk ukur ipegegehi ras ibereken pemeteh kerna Dibata. (Matius 11:​28-​30) Piga-piga bulan kenca si e, ibereken Dibata kesah si badiaNa bas wari Pentakosta tahun 33 M, janah perjanjin Undang-Undang Musa iganti alu perjanjin si mbaru. (Jeremia 31:​31-​33; Kolose 2:​14; Heber 8:​7-​13) Emaka paksa si e, reh jelasna teridah perbedan antara murid-murid Jesus ras peminpin-peminpin agama. La lit si banci mpersokensa maka ngena ate Dibata nandangi murid-murid, labo man peminpin-peminpin agama.