Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 98

Mulihi Ka Isungkun Rasul-Rasul Ise si Mbelinna

Mulihi Ka Isungkun Rasul-Rasul Ise si Mbelinna

MATIUS 20:17-28 MARKUS 10:32-45 LUKAS 18:31-34

  • IKATAKEN JESUS KA KERNA KEMATENNA SI TERJADI PAGI

  • TANGGAPEN JESUS SANGA MURIDNA MERHAT JADI SI MBELINNA

Berkat me Jesus ras murid-muridna Perea nari ku Jerusalem. Jenari isebrangi kalak e Lau Jordan i deher Jeriho. Enterem ka kalak si deban lawes ras kalak e guna ngerayaken Paskah tahun 33 M.

Leben Jesus erdalan asangken murid-muridna, la atena terlambat guna ngerayaken Paskah e. Tapi mbiar murid-muridna. Perban sanga mate Lasarus, lawes ate Jesus arah Perea nari ku Judea, nce nina Tomas man murid-murid si deban, “Ota kita ku jah, gelah mate kita ras ia.” (Johanes 11:​16, 47-​53) Emaka bahaya akap kalak e adi lawes ku Jerusalem e janah banci siangkai ngkai maka mbiar murid-murid e.

Gelah rasul-rasul Jesus nggo ersikap ngadapi kai si nandangi terjadi, emaka nina man kalak e, “Kita i bas perdalanen ku Jerusalem, janah iserahken me Anak manusia man imam-imam kepala ras ahli Undang-Undang Musa guna iukum mate. Iserahken pagi ia man kalak i bas bangsa si deban nari guna ihina, iligasi, janah ibunuh i tiang. I bas wari si peteluken ipekeke me ia.”​—Matius 20:​18, 19.

Enda petelu kaliken ikataken Jesus man murid-muridna kerna kematen ras kekekenna. (Matius 16:21; 17:​22, 23) Tapi sekalenda si icakapken Jesus eme kerna kematenna i bas tiang. Aminna pe la iangkai kalak e kai maksud Jesus tapi ibegiken kalak e. Banci saja si iarapken kalak e eme kerajan Israel ipajekken mulihi i doni, janah kalak e imuliaken ras ihamati perban merentah radu ras Kristus.

I bas perdalanen e, ikut nande rasul Jakup ras Johanes eme Salome. Igelari Jesus duana rasul e “Anak-Anak Lenggur,” perban kalak e semangat kel. (Markus 3:​17; Lukas 9:​54) Piga-piga kali, merhat kel kalak enda duana ndatken keduduken si mbelinna bas Kerajan Kristus. Meteh si e, idahi nande kalak e me Jesus. Erjimpuh ia janah mindo man Jesus. Nina Jesus, “Kai atendu?” Ijawapna, “Ban min gelah dua anakku enda banci kundul i sampingndu i bas Kerajanndu, sada arah kananndu janah sada nari arah kirindu.”​—Matius 20:​20, 21.

Pemindon e rehna arah Jakup ras Johanes. Edenga ikataken Jesus maka ipemelaken me ia janah isiksa, emaka nina man kalak e, “La kap iangka kena kai si ipindo kena e. Ngasup kin kena minem tare calung si nandangi kuinem?” Ijawap kalak e, “Ngasup.” (Matius 20:22) Situhuna, labo jelas iangkai kalak e kai maksud kata-kata Jesus e.

Aminna pe bage, nina Jesus man kalak e, “Payo, minem nge kena pagi tare calungku. Tapi, kerna ise si kundul arah kanan ras kiriku, labo aku si nentukenca. Bapakku nggo nikapkenca man kalak si itentukenNa.”​—Matius 20:23.

Meteh pemindon Jakup ras Johanes, sepuluh rasul si deban jadi merawa. Perban paksa si e Jakup ras Johanes si merhatna jadi kalak si mbelinna. (Lukas 9:​46-​48) Kerina kalak e merhat denga jadi kalak si pentingna. Pemindon kalak e mbuktiken maka lenga ilakoken kalak e nasehat Jesus gelah jadi kalak si kitikna.

Idungi Jesus atena masalah e. Emaka idilona sepulu dua rasulna janah inasehatina kalak e alu manjar-anjar, nina, “Iteh kena maka kalak si ianggap selaku penguasa bangsa-bangsa ngkuasai rakyatna janah pejabat pe erkuasa nandangi kalak e. Tapi, kena la banci bage. Ise pe si atena jadi si mbelin i bas kena arus jadi pelayan kena, janah ise pe si atena jadi si perlebe i bas kena arus jadi budak man kerina.”​—Markus 10:​42-​44.

Ikataken Jesus maka arusna iusih kalak e ia. Nina Jesus, “Bali bagi Anak manusia reh labo guna ilayani, tapi guna ngelayani, janah mereken kegeluhenna selaku tebusen jadi penukar man nterem jelma.” (Matius 20:28) Kira-kira telu tahun, nggo ilakoken Jesus dahin guna kepentingen kalak si deban. Janah kentisik nari mate ka me ia guna kerina manusia! Murid-murid perlu ngusih Kristus eme merhat ngelayani labo gelah ilayani, gelah jadi kalak si kitikna labo gelah jadi kalak si mbelinna.