Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 99

Ipepalem Jesus Dilaki si Pentang janah Sakeus Isampati

Ipepalem Jesus Dilaki si Pentang janah Sakeus Isampati

MATIUS 20:29-34 MARKUS 10:46-52 LUKAS 18:35–19:10

  • IPEPALEM JESUS KALAK SI PENTANG I JERIHO

  • SAKEUS PENGALO CUKE ERTOBAT

Jesus ras rombongenna nggo seh i Jeriho, kira-kira sada wari dauhna erdalan arah Jerusalem. Kota Jeriho lit dua. Sada kota si nggo ndekah janah sada nari kota si ibangun sanga jaman Roma. Jarak duana kota e kira-kira 1,6 kilometer. Jesus ras kalak si nterem ndai sangana ngelewati kota e ku kota si debanna. Kerehen kalak e ieteh dua kalak pemindo-mindo si pentang. Sada kalak gelarna Bartimeus.

Sanga ibegi Bartimeus ras temanna Jesus sangana lewat, serko kalak e, “O Tuan, Anak Daud, mekuah min atendu kami!” (Matius 20:30) Piga-piga kalak arah si nterem e merawa janah isuruhna kalak e sinik, tapi reh gangna kalak e serko. Megi si e, ngadi me Jesus. Isuruhna gelah idilo kalak si serko e. Emaka idahi kalak e pemindo-mindo e janah ning kalak e man sekalak pemindo-mindo e, “Petetaplah ukurndu! Cinderken, idilona kam.” (Markus 10:49) Minter lompat kalak si pentang e, iambekkenna uisna si arah darat, jenari idahina Jesus.

Nungkun Jesus, “Kai kin ate kena si kulakoken man kena?” Ngaloi kalak e, “O Tuan, buka min mata kami.” (Matius 20:​32, 33) Perban mekuah ate Jesus, idadapna mata kalak e janah nina man sekalak arah kalak e, “Laweslah. Kinitekenndu nggo erban kam malem.” (Markus 10:52) Duana dilaki si pentang e jadi erpengidah, janah imuliaken kalak e Dibata dungna iikutken kalak e Jesus. Ngidah kai si terjadi, kalak si nterem pe muji Dibata.

Enterem kel jelma i sekeliling Jesus sanga ilewatina kota Jeriho. Kerina kalak merhat ngenen ise si mpepalem dilaki si pentang ndai. Perban teremna si ngkelilingi Jesus deba la banci idahna Jesus. Sekalak gelarna eme Sakeus. Ia kepala pengalo cuke i belang-belang kota Jeriho. Perban ia gendek, la banci idahna kai si terjadi. Emaka kiam Sakeus leben jenari inangkihina batang ara si nandangi ilewati Jesus. Arah datas batang ara e nari kerina banci idah Sakeus. Kenca nggo ndeher Jesus ku batang ara e, idahna Sakeus i datas, emaka nina Jesus, “O Sakeus, pedasken nusur, sebap arus aku tading i rumahndu gundari.” (Lukas 19:5) Minter nusur Sakeus janah meter ia ku rumahna guna ngalo-ngalo tamu si istimewa e.

La senang jelma si nterem ngidah kai si terjadi. La akap kalak e cocok masuk Jesus ku rumah kalak si perdosa. Sakeus jadi kalak bayak perban dahinna ngalo cuke alu cara si la jujur.

Sanga masuk Jesus ku rumah Sakeus, nina kalak si nterem e, “Tading atena i rumah kalak perdosa.” Tapi menurut Jesus, Sakeus mungkin banci ertobat. Janah eme si terjadi. Cinder me Sakeus janah nina, “O Tuan, setengah arah ertaku kubereken kari man kalak mesera janah kai pe si nggo kukompas i bas kalak nari kuulihken kari empat kali lipat.”​—Lukas 19:​7, 8.

Seh kel tutusna ate Sakeus ertobat! Arah catatenna banci itehna asa kai buena cuke si nggo ialokenna, janah ersumpah ia ngulihkenca empat kali lipat. E lebihen asangken si ituntut undang-undang Dibata. (Keluaren 22:1; Imamat 6:​2-5) Erjanji ka ia mereken setengah ertana man kalak mesera.

Meriah ukur Jesus ngidah Sakeus ertobat, nina Jesus man bana, “I bas wari enda reh me keselamaten ku rumah enda, perban ia pe kesusuren Abraham kap. Sebap Anak manusia reh guna ndarami ras nelamatken kalak si papak.”​—Lukas 19:​9, 10.

Mbaru denga icakapken Jesus perumpaman kerna keadan anak si bene. (Lukas 15:​11-​24) Gundari icidahken Jesus contoh si jelas kerna kalak si bene dungna idatken mulihi. Peminpin-peminpin agama bage pe pengikut kalak e la senang janah la setuju nandangi Jesus perban iperdiatekenna Sakeus. Tapi terus idarami Jesus anak-anak Abraham si bene ras si papak gelah mulihken.