Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 66

Ngerayaken Wari Raya Sapo-Sapo i Jerusalem

Ngerayaken Wari Raya Sapo-Sapo i Jerusalem

JOHANES 7:11-32

  • JESUS NGAJAR I BAS RUMAH PERTOTON

Kenca Jesus iperidiken piga-piga tahun si lewat, reh teremna kalak si nandai ia. Lit ribun kalak Jahudi si nggo ngidah mukjizat-mukjizatna janah iceritaken kalak e ku japa pe. Gundari, nterem kalak ndarami Jesus paksa Wari Raya Sapo-Sapo i Jerusalem.

La seri pendapat kalak kerna Jesus. Lit si ngataken, “Ia kalak bujur.” Lit ka si ngataken, “Lang, itipuna jelma si nterem.” (Johanes 7:​12) Piga-piga wari i bas tangtangna perayan e, icakapken kalak e kerna Jesus. Tapi la lit si terus terang mbela Jesus alu pang perban mbiar man peminpin-peminpin agama Jahudi.

Sanga pertengahen perayaan e, masuk Jesus ku rumah pertoton janah mulai ngajar. Luar biasa kel akap jelma si nterem ngidah cara Jesus ngajar. La pernah ia sekolah guru, emaka mamang ate kalak Jahudi janah nina, “I ja nari nge pemetehna kerna Kitap si Badia adi labo ia pernah sekolah?”​—Johanes 7:​15.

Ngaloi Jesus, “Kai si kuajarken labo ajarenku, tapi ajaren Ia si nuruh aku. Kalak si nggit ndalanken peraten Dibata pasti itehna si kuajarken e i bas Dibata nari nge ntah arah diriku sendiri.” (Johanes 7:​16, 17) Kerina si iajarken Jesus sue ras Undang-Undang Dibata. Jelas me, ersura-sura Jesus gelah ipuji kalak Dibata, labo dirina.

Kenca si e, nina Jesus, “La kin ibereken Musa Undang-Undang man kena? Tapi sada pe la ipatuhi kena. Engkai maka ibunuh kena ate kena aku?” Piga-piga kalak si lit i je, si banci rehna arah luar kota, la meteh kerna rencana jahat kalak e. Iakap kalak enda labo mungkin lit kalak si ersura-sura munuh guru si bagi Jesus hebatna. Jadi, lit akap kalak enda si la pas i bas Jesus. Ngaloi kalak si nterem e, “Irasuki malekat jahat kap kam e. Ise kin atena munuh kam?”​—Johanes 7:​19, 20.

La iteh kalak e maka sada setengah tahun si lewat, kenca ipepalem Jesus sekalak dilaki i bas wari Sabat, iusahaken peminpin-peminpin agama Jahudi munuh Jesus. Emaka, gundari ibereken Jesus contoh gelah sadar peminpin agama e maka kalak e la masuk akal. Ikataken Jesus maka menurut Undang-Undang Musa anak dilaki si kitik denga arus isunat paksa umurna waluh wari, aminna pe paksa si e wari Sabat. Isungkun Jesus, “Adi kalak isunat i bas wari Sabat gelah Undang-Undang Musa la ilanggar, ngkai maka merawa kel kena sanga kupepalem kalak i bas wari Sabat? Ula nai hakimi kena kalak arah kai si teridah saja. Hakimilah kalak alu adil.”​—Johanes 7:​23, 24.

Penduduk Jerusalem si meteh rencana peminpin-peminpin agama guna munuh Jesus, ngataken, “La kin enda nge dilaki si ibunuh penguasa-penguasa kalak Jahudi atena? Nenlah! Ngerana ia i lebe-lebe jelma si nterem, tapi la lit kai pe nina kalak e. Enggo kin iteh penguasa-penguasa e maka ia Kristus?” Adi bage, ngkai kalak e lalap la tek maka Jesus e Kristus? Nina kalak e, “Siteh kap ja nari asal dilaki enda. Tapi, adi Kristus reh, ise pe la meteh ja nari asalna.”​—Johanes 7:​25-​27.

Sanga i bas rumah pertoton denga, ijawap Jesus, “Itandai kena aku janah iteh kena ja nari asalku. Aku reh labo erkiteken sura-suraku. Ia si nuruh aku tuhu-tuhu lit, tapi la itandai kena. Tapi, kutandai Ia. Sebap aku reh jadi wakilNa, janah Ia si nuruh aku.” (Johanes 7:​28, 29) Erkiteken jawapen Jesus si terus terang e, lit si atena menjaraken Jesus, janah lit ka si atena munuh Jesus. Tapi la sahun perban paksa si e lenga waktuna Jesus mate.

Tapi nterem kalak erkiniteken man Jesus perban ilakokenna perbahanen si luar biasa. Pernah Jesus erdalan i datas lau, ipengadina angin si meter, alu mukjizat iberena ribun kalak man, ipepalemna kalak si sakit, si lumpuh, ibanna kalak pentang jadi erpengidah, janah ipekekena kalak si mate. Emaka, nina jelma si nterem e, “Adi reh kari Kristus, me melala kari ibanna mukjizat? La kin e si sangana ilakoken dilaki enda?”​—Johanes 7:​31.

Sanga ibegi kalak Parisi jelma si nterem ngataken si e, kalak Parisi bage pe imam-imam kepala nuruh petugas guna nangkap Jesus.