Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 80

Permakan si Mehuli ras Kandang Biri-Biri

Permakan si Mehuli ras Kandang Biri-Biri

JOHANES 10:1-21

  • ICAKAPKEN JESUS KERNA PERMAKAN SI MEHULI

Jesus ngajar i bas Judea denga. Gundari si icakapkenna eme kerna biri-biri ras kandang biri-biri. Ia ngerana alu perumpaman. Mungkin iinget kalak Jahudi kata-kata Daud, “Jahwe kap permakanku, e maka la kekurangen aku. I bas mbalmbal si meratah, ipesenang-senangNa aku.” (Masmur 23:​1, 2, NW) I bas masmur si deban, iundang Daud bangsa Israel, “Ota nembah mungkuk man baNa, erjimpuh i adep-adepen Jahwe, Si Nepa kita. Sebap Ia kap Dibatanta. . . . Kita desken rarasen biri-biri si ipermakaniNa.” (Masmur 95:​6, 7, NW) Mbarenda, i teruh Undang-Undang Musa, bangsa Israel bali bagi rarasen biri-biri.

Sanga i bas perjanjin Undang-Undang Musa, bangsa Israel eme “biri-biri” si lit i bas “kandang biri-biri.” Undang-Undang e bali bagi pagar si misahken kalak e arah perbahanen si la mehuli bas bangsa si deban nari. Piga-piga kalak Israel isiksana biri-biri Dibata. Nina Jesus, “Situhuna kukataken man bandu, ise pe si masuk ku bas kandang biri-biri tapi la arah pintu janah inangkihina dingding, pinangko janah perampok kap ia. Tapi ise si masuk arah pintu, ia me permakan biri-biri e.”​—Johanes 10:​1, 2.

Banci saja kalak e erpengakap maka pinangko ras perampok eme kalak si ngaku-ngaku jadi Mesias ntah pe Kristus. Jadi si man ikuten kalak e eme “permakan biri-biri e,” labo penipu-penipu e. Kerna permakan e, ikataken Jesus:

“Ibukaken penjaga pintun me pintu man bana, janah ibegi biri-biri e sora permakan. Ilebuhna biri-biri e sada per sada alu gelarna janah ipinpinna biri-biri e ku darat. Kenca ibabana kerina biri-biri e ku darat, erdalan permakan e arah lebe, janah iikutken biri-biri e ia sebap itandai biri-biri e sorana. Labo ikutken biri-biri e kalak si la itandaina, tapi kiam me biri-biri e perban la itandaina sorana.”​—Johanes 10:​3-5.

Mbarenda, Johanes Peridiken bali bagi si njaga pintun, ikatakenna maka kalak si bali ras biri-biri si lit i bas Undang-Undang Musa arus ngikutken Jesus. Piga-piga biri-biri i Galilea ras i Judea nandai sora Jesus. Ikataken Jesus maka ‘ipinpinna me kalak e ku darat,’ janah piga-piga si megi perumpaman e kemamangen, sebap “la iangkai kalak e kai maksudna.” (Johanes 10:6) Banci saja iukuri kalak e, ‘Ku ja? Kai gunana adi ngikutken Jesus?’

Nina Jesus, “Situhuna aku kap pintu guna biri-biri e. Kerina si reh si ngaku-ngaku maka ia permakan situhu-tuhu, pinangko ras perampok kap ia, janah la ibegiken biri-biri e ia. Aku kap pintu. Ise pe si masuk arah aku, iselamatken me. Ku bas ku darat me ia, idatna me gagaten.”​—Johanes 10:​7-9.

Kalak si megi e meteh maka Jesus labo “pintu” guna perjanjin Undang-Undang Musa, si nggo lit ratusen tahun. Jadi si imaksud Jesus kerna biri-biri si ‘ipinpinna ku darat’ eme ndarat guna masuk ku kandang si deban. Kai gunana man kalak e?

Ijelasken Jesus, “Aku reh gelah ialoken biri-biri kegeluhen janah kegeluhen e seh rasa lalap. Aku me permakan si mehuli. Permakan si mehuli, iberekenna kesahna guna biri-biri.” (Johanes 10:​10, 11) Pernah ipetetap Jesus ukur murid-muridna, nina, “Ula mbiar, o rarasen si kitik, sebap nggo meriah ukur Bapak kena mere Kerajan man kena.” (Lukas 12:32) Jadi, “rarasen si kitik” enda me si ipinpin Jesus pagi ku kandang si mbaru, gelah “ialoken biri-biri kegeluhen janah kegeluhen e seh rasa lalap.” Pasu-pasu si mbelin kel adi ikut bas rarasen e!

La e saja si icakapken Jesus, nina ka, “Lit denga biri-biriku si deban si la i bas kandang enda. Kalak e pe arus kubaba, janah ibegikenna me soraku. Kerina ia jadi sada rarasen janah sada permakanna.” (Johanes 10:16) ‘Biri-biri si deban’ e labo reh arah “kandang enda” nari, tapi arah kandang si deban. Kalak e la seri ras “rarasen si kitik” si ngaloken warisen Kerajan. Aminna pe la seri manpaat si ialoken dua kandang e ntah pe dua rarasen biri-biri e, tapi duana kalak e ngaloken manpaat arah kai si ilakoken Jesus. Nina, “Keleng ate Bapak aku perban kubereken kegeluhenku.”​—Johanes 10:17.

Ijawap jelma si nterem, nina, “Ia nggo irasuki malekat jahat janah nggo adon.” Tapi si debanna nggit megiken ia janah nggit ngikutken Permakan si Mehuli e, nina kalak e, “Kalak si irasuki malekat jahat labo bagi ia ngerana. Me labo mungkin iban malekat jahat kalak si pentang erpengidah mulihi?” (Johanes 10:​20, 21) Banci saja si icakapken kalak e mukjizat si ilakoken Jesus mbaru-mbaru e sanga ipepalemna dilaki si pentang mulai lahir nari.