Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 74

Kerna si Pentingna i Bas Ngalo-Ngalo Tamu ras Toto

Kerna si Pentingna i Bas Ngalo-Ngalo Tamu ras Toto

LUKAS 10:38–11:13

  • REH JESUS NDAHI MARTA RAS MARIA

  • PENTINGNA GELAH TERUS ERTOTO

Lawes Jesus ku Betani i deher teruh Deleng Saitun bagin timur, kira-kira telu kilometer arah Jerusalem. (Johanes 11:18) Masuk Jesus ku rumah Marta ras Maria. Kalak e ras turangna eme Lasarus, teman Jesus kap. Meriah ukur kalak e ngalo-ngalo Jesus.

Sada kehamaten kel reh Mesias ndahi kalak e! Emaka semangat kel Marta mereken si mehulina, isikapkenna erbage-bage pangan. Sanga sibuk Marta, seninana Maria kundul i deher nahe Jesus janahna megiken ia. Kenca piga-piga waktu, ngerana Marta man Jesus, “O Tuan, la nge iakapndu dalih adi ipediat seninaku aku sisada ndahiken kerina dahin e? Suruh min ia nampati aku.”​—Lukas 10:40.

La inasehati Jesus si Maria. Tapi, Marta si sibuksa ngurusi pangan dungna inasehati Jesus, nina, “Marta, Marta, mbuesa si iukurindu e. Padahal, sitik ngenca si iperluken, sada ngenca. Maria nggo milih bagin si mehulina, janah e la banci ibuat i bas ia nari.” (Lukas 10:​41, 42) Ikataken Jesus maka labo perlu ipekeri Marta mbue waktuna guna nikapken erbage-bage pangan. Bias me sada jenis pangan saja.

Memang mehuli ukur Marta. Sikap atena pengalo-ngalona selaku tuan rumah. Tapi perban sibuksa ngurusi pangan, lanai ia sempat langsung erlajar arah Anak Dibata! Ikataken Jesus maka Maria beluh erban keputusen, ipilihna si erguna seh ras lalap. Perlu kel siusih Maria.

Pernah ka iajarken Jesus kerna kai si penting. Nina sekalak muridna, “O Tuan, ajari dage kami cara ertoto, bagi Johanes pe nggo ngajari ajar-ajarna.” (Lukas 11:1) Kira-kira sada setengah tahun si lewat, nggo ikataken Jesus carana ertoto i bas Kotbahna i Deleng. (Matius 6:​9-​13) Tapi banci saja murid si nungkun ndai la lit paksa si e, emaka iulihi Jesus ka inti arah toto si iajarkenna. Ibere Jesus ka perumpaman si mbuktiken uga pentingna terus ertoto.

Kenca si e nina man kalak e, “Adi lit sekalak i bas kena lawes ndahi temanna bas tengah berngi janah ngataken, ‘O Teman, pinjam ge rotindu telu, sebap sekalak temanku si sangana i bas perdalanen nari singgah ku rumahku janah la lit si man berenken man bana.’ Tapi ngaloi ia arah bas nari, ‘Ula ganggundu aku. Pintu nggo ikunci, janah aku ras anak-anakku si kitik denga nggo medem. La banci aku medak, jadi la banci kubereken kai pe bandu.’ Kukataken man kena, aminna pe kena temanna, la ia nggit medak janah la iberekenna kai pe man kena, tapi erkiteken terus ipindo kena, dungna medak ia janah iberekenna kai si iperluken kena.”​—Lukas 11:​5-8.

Labo maksud Jesus maka Jahwe bagi teman si la nggit nampati. Maksud Jesus eme adi teman e saja si tangtangna la nggit nampati, dungna iberena pemindon temanna e perban erusaha kel ia, apai ka Bapakta i surga si perkeleng! Pastilah ijawap Jahwe pemindon umatNa si erkiniteken adi terus ipindona. Nina Jesus, “Kukataken man kena, teruslah pindo, maka pasti ibereken man kena; teruslah darami, maka pasti dat kena; teruslah tuktuk, maka pasti ibukaken man kena. Sebap ise pe si mindo pasti ngalo, ise pe si ndarami pasti idatna, janah ise pe si nuktuk pasti ibukaken.”​—Lukas 11:​9, 10.

Gelah reh jelasna, ibandingken Jesus me Jahwe ras sekalak perbapan, nina, “Ise i bas kena selaku bapak mereken nipe man anakna adi ikan nge si ipindona? Entah mere kacip gelang adi telor nge si ipindona? Adi kena saja si erdosa meteh carana mere si mehuli man anak-anak kena, terlebih ka Bapak si i surga pasti mereken kesah si badia man kalak si mindo baNa!” (Lukas 11:​11-​13) Enggo ijamin maka pastilah nggit Jahwe megiken pemindonta janah mereken kai si kita perluken!