Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 71

Isungkuni Kalak Parisi Mulihi Dilaki si Nggo Erpengidah

Isungkuni Kalak Parisi Mulihi Dilaki si Nggo Erpengidah

JOHANES 9:19-41

  • ISUNGKUNI KALAK PARISI DILAKI SI NGGO ERPENGIDAH

  • PEMINPIN-PEMINPIN AGAMA KAP SI “PENTANG”

La tek kalak Parisi maka nggo ipepalem Jesus dilaki si pentang lahirna nari e. Emaka ilebuh kalak e orang tuana. Iteh orang tua dilaki e maka banci saja kalak e “ipedarat arah ingan pulung kalak Jahudi nari.” (Johanes 9:​22) Adi terjadi si e, keluarga kalak e banci imusuhi rakyat janah jadi mesera geluhna.

Lit dua penungkunen kalak Parisi, “Tuhu kin enda anak kena si ikataken kena nggo pentang mulai lahirna nari? Uga maka gundari ia nggo erpengidah?” Ijawap orang tuana, “Payo ia anak kami, janah ia pentang lahirna nari. Tapi la teh kami uga maka gundari ia nggo erpengidah. Janah, la teh kami ise si erbanca ia erpengidah.” Bicara nggo iceritaken anakna pe, kalak e la nggit kena masalah. Emaka nina, “Sungkunilah ia. Nggom ia galang janah banci nge ijawapna.”​—Johanes 9:​19-​21.

Sekali nari idilo kalak Parisi dilaki si nggo erpengidah e, nina, “Muliakenlah Dibata. Katakenlah situhuna. Teh kami maka ia kalak perdosa nge.” Aminna pe ipebiar-biar kalak e dilaki e alu ngataken lit buktina maka Jesus erdosa, tapi nina dilaki e, “Kerna ia kalak perdosa ntah lang, e labo kuteh. Sada ngenca kuteh: Mbarenda aku pentang, gundari nggo erpengidah.”​—Johanes 9:​24, 25.

La puas kalak Parisi megi si e, emaka nungkun ka kalak e, “Kai si ilakokenna man bandu? Uga maka banci ibanna kam erpengidah?” Ijawap dilaki e alu pang, “Enggo kap kukataken man kena, tapi la ibegiken kena. Engkai maka kena merhat denga megikenca? Ntah, jadi murid-muridna kin ate kena?” Merawa janah ihina kalak Parisi e ia, nina, “Kamlah murid-muridna, tapi kami murid-murid Musa kap. Si teh kami, man Musa nge Dibata ngerana. Tapi kerna kalak si ikatakenndu e, la teh kami i ja nari ia.”​—Johanes 9:​26-​29.

Mamang kel ate pemindo-mindo e, nina, “Ngeri naring nge ah! La teh kena ja nari ia rehna, padahal nggo ibanna mataku erpengidah.” Ikataken dilaki e ka kerna kai si masuk akal, “Siteh maka labo ibegiken Dibata kalak perdosa. Tapi ibegikenNa kalak si mbiar man baNa janah ngelakoken peratenNa. Nai-nai nari, lenga pernah terbegi maka lit kalak si ngasup erban kalak si pentang lahirna nari jadi erpengidah.” Dungna nina dilaki e, “Adi la kin ia i bas Dibata nari, labo ia banci erban kai pe.”​—Johanes 9:​30-​33.

Lanai terjawapi kalak Parisi e, dungna ihina kalak e dilaki e, nina, “Mulai lahirndu nari pe, kam nggo dem alu dosa. Tapi gundari iajarindu ka kami?” Kenca bage, ipelawes kalak e dilaki e!​—Johanes 9:​34.

Sanga ibegi Jesus kerna si e, ijumpaina pemindo-mindo e janah isungkunna, “Erkiniteken nge kam man Anak manusia?” Ijawap dilaki e, “O Pa, ise kin ia? Katakenlah man bangku gelah erkiniteken aku man bana.” Nina Jesus, “Enggo kap idahndu ia. Situhuna, ia sangana ngerana ras kam.”​—Johanes 9:​35-​37.

Nina dilaki e, “O Tuan, erkiniteken aku.” Jenari, erjimpuh dilaki e man Jesus mbuktiken maka ia erkiniteken ras nghamati Jesus. Kenca si e, nina Jesus, “Aku reh ku doni enda guna nghakimi, gelah kalak pentang banci erpengidah, janah kalak si erpengidah jadi pentang.”​—Johanes 9:​38, 39.

Palak kel kalak Parisi si lit i je, nina, “Jadi menurutndu, kami pe pentang?” La akap kalak e pentang bana perban banci denga kalak e erpengidah. Ijawap Jesus, “Adi kena pentang, kena la erdosa. Tapi ning kena, ‘Kami erpengidah.’ Emaka tetap kena erdosa.” (Johanes 9:​40, 41) Kai ertina e? Bicara la kin lit guru i Israel, banci imaklumi adi itulak kalak e Jesus si jadi Mesias. Tapi kalak e guru kap si meteh Undang-Undang Musa, emaka alu nulak Jesus, ilakoken kalak e dosa si serius.