Minter ku Konten

Minter ku daftar isi

Saksi-Saksi Jahwe

Pilih bahasa Batak (Karo)

 PELAJAREN 76

Man Jesus ras Kalak Parisi

Man Jesus ras Kalak Parisi

LUKAS 11:37-54

  • ISUMPAHI JESUS KALAK PARISI SI MUNAPIK

Sanga i Judea, ialoken Jesus undangen guna man arah sekalak Parisi. Banci saja enda man ciger. (Lukas 11:​37, 38; bandingken Lukas 14:12.) Ope lenga man, biasana kalak Parisi icucina tanna seh ku siku-siku tanna, tapi si e la ilakoken Jesus. (Matius 15:​1, 2) Memang kebiasan e la ngelanggar Undang-Undang Dibata, tapi labo ka iarusken Dibata.

Mamang ate kalak Parisi e perban la ikutken Jesus kebiasan e. Iteh Jesus kerna si e, emaka nina, “O kalak Parisi, ibersihken kena cangkir ras piring kena si arah darat, tapi si arah bas dem kerangapen ras kejahaten. O kalak si la masuk akal! La kin Dibata si erbanca bagin si arah darat ras si arah bas?”​—Lukas 11:​39, 40.

Masalahna labo soal cuci tan ope lenga man, tapi kerna kalak Parisi si munapik. Ilakokenna kebiasan cuci tan ope lenga man, tapi pusuhna la ibersihkenna arah si jahat nari. Inasehati Jesus kalak e, “Berekenlah pemere man kalak si mesera i bas pusuh kena nari, alu bage kena tuhu-tuhu bersih i bas kerina.” (Lukas 11:41) Mejile kel nasehat e! Nggit kita mere perban keleng ateta, labo gelah ipuji kalak.

Nina Jesus, “Ibereken kena sepersepuluh i bas sinuan-sinuan mint nari, inggu, bage pe rempah-rempah si debanna, tapi la iperdiateken kena keadilen ras kekelengen man Dibata! Mere perpuluhen e wajip ilakoken kena, tapi si debanna pe arus iperdiateken kena.” (Lukas 11:42) Undang-Undang Dibata nuruh kalak Israel mereken sepersepuluh arah asil jumana, termasuk sinuan-sinuan mint ras inggu. (Ulangen 14:22) Ipatuhi kalak Parisi aturen e. Tapi, kerna peraturen si lebih penting, bagi perbahanen si adil ras sipat meteruk ukur, ipatuhi kalak enda kin?​—Miha 6:8.

Nina Jesus, “Cilaka kel kena, o kalak Parisi, sebap merhat kel kena kundul i bas ingan si arah lebe i ingan-ingan pulung kalak Jahudi janah merhat kel kena iperkuanken kalak alu mehamat i bas ingan si nterem jelma! Cilaka kel kena, sebap bali kena ras kuburen si la jelas teridah, erdalan kalak i je tapi la itehna maka e kuburen!” (Lukas 11:​43, 44) Banci saja alu la sengaja, erdalan kalak i datas kuburen si la jelas teridah janah jadi najis. Kalak Parisi bali bagi kuburen e, si najis aminna pe la idah kalak si deban.​—Matius 23:27.

Sekalak dilaki si ngangkai Undang-Undang Musa, la setuju janah nina, “O Guru, kata-katandu e nghina kami kap e.” Tapi, ahli-ahli Undang-Undang Musa bagi dilaki e, arus iban sadar maka kalak e erban kalak si deban jadi susah saja. Nina Jesus, “Cilaka ka me kena si ahli i bas Undang-Undang Musa, sebap iberati kena kalak alu baban si mberat, tapi kena sendiri la nggit ndadap baban e alu sada jari pe! Cilaka kel kena, sebap ibangun kena kuburen nabi-nabi, tapi nini bulang kena nge si munuh kalak e!”​—Lukas 11:​45-47.

Iban kalak Parisi kebiasanna ras pendapatna sendiri kerna Undang-Undang Musa, janah iaruskenna kalak ngikutken si e. Labo reh menahangna tapi reh susahna ibanna geluh kalak si deban. Mbarenda pe nini bulang kalak e munuh nabi-nabi Dibata, mulai kin Abil nari. Gundari iban kalak e kuburen man nabi-nabi e gelah iakap jelma si nterem kalak e nghamati nabi-nabi. Padahal situhuna kalak e bali bagi nini bulangna, iusahaken kalak e ka munuh Nabi Dibata si mbelinna. Emaka ikataken Jesus iukum Dibata pagi kalak e. Si e terjadi 38 tahun kenca si e, eme tahun 70 M.

Nina Jesus ka, “Cilaka kel kena si ahli i bas Undang-Undang Musa, perban ibuat kena kunci pemeteh. Kena sendiri la masuk ku bas, janah iambati kena kalak si atena masuk ku bas!” (Lukas 11:52) Ahli-ahli Undang-Undang Musa e labo nampati kalak ngangkai Kata Dibata, malahen iambatina.

Uga tanggapen kalak Parisi ras ahli-ahli Undang-Undang Musa? Sanga lawes ate Jesus arah rumah e, merawa kalak e janah terus isungkuni kalak e. Kalak e nungkun labo perban erlajar atena, tapi ijebak kalak e atena Jesus. Iarapken kalak e gelah ibelasken Jesus ranan si banci jadi alasen guna nangkap Jesus.